Baby Bag

„ბავშვთან ჩუმად არასდროს არ იყოთ! ბავშვი ლაპარაკში იზრდება,“- შალვა ამონაშვილის რჩევები მშობლებს

„ბავშვთან ჩუმად არასდროს არ იყოთ! ბავშვი ლაპარაკში იზრდება,“- შალვა ამონაშვილის რჩევები მშობლებს

აკადემიკოსმა შალვა ამონაშვილმა მშობლებს ბავშვთან ურთიერთობაში მეტი სიახლოვის დამყარება და შვილთან ხშირი საუბარი ურჩია:

„როდესაც ბავშვი სადმე მიგყავთ, ჩუმად არ ატაროთ ბავშვი ორი წლისა, ხუთი წლისა, შვიდი წლისა. მუჭებით არ ათრიოთ, აბა ჩქარა წამოდი, ჩქარა, ჩქარა. რაღაც ელაპარაკე. ბავშვი ლაპარაკში იზრდება. ლაპარაკში ხატები ჩნდება. ლაპარაკში წარმოდგენები აშენდება. ამის გარეშე აღზრდა არ მოხდება. გააგრძელე გუშინდელი ზღაპარი, უამბე შენს თავზე რაღაც. რაღაცაზე ილაპარაკეთ. ნუთუ დავმუნჯდით და სალაპარაკო არაფერი გვაქვს?! ბავშვთან ჩუმად არასდროს არ იყოთ!

ერთხელ პაატამ რაღაც აწყენინა დედას ცუდი სიტყვით. ჩემი მეუღლე მართლა ნაწყენი წავიდა, დაჯდა და ტიროდა. მე არ ჩავერიე ამ საქმეში. რომ ჩავრეულიყავი, ვეტყოდი: „როგორ არ გრცხვენია?! მიდი ახლა, ბოდიში მოუხადე!“ მოვახდევინებდი ბოდიშს, მაგრამ მე უკვე ვიცოდი, რომ აღზრდა არ შედგება ამით. როდესაც რამე ხდება ასეთი რთული, არ ეცადოთ, რომ ემოციის ფონზე იქვე გადაწყვიტოთ ამოცანა. გადადეთ ერთი კვირით, ათი დღით. მოიფიქრეთ, როგორ უნდა ამოხსნათ ეს ამოცანა. ბავშვის აღზრდა მრავალუცნობიანი ამოცანაა. ერთს კი ასწორებ, მაგრამ მეორე რომ ფუჭდება?! სულ ვფიქრობდი, რა ვქნა? რა ვქნა? აი, რა გავაკეთე. ერთ დღეს ვმუშაობდი, მოვიდა, მეხუთე კლასში იყო და რაღაცის გაკეთება უნდოდა. ვის უნდა ეს ყველაფერი-მეთქი? მასწავლებელს უნდაო. ვუთხარი, წამოდი, რაღაც მაქვს-მეთქი შენთან სალაპარაკო. რა გაქვს სათქმელიო? აქ არ შეიძლება თქმა, საიდუმლოა-მეთქი. გარეთ გავიპარეთ. ბაღისკენ ჩუმად წავედით. ხმას არ ვიღებდი. ეს ჩვენი წესი არ იყო. პაატა ჩაფიქრდა უკვე. დავსხედით ბაღში. მას ვუთხარი, ეს არის მამაკაცური საუბარი-მეთქი. რამდენი წლის ხარ-მეთქი? 12 წლისა გავხდიო. ეს მეფური ასაკია-მეთქი. რატომო? იმიტომ, რომ ერეკლე მეფე 12 წლისა აკურთხეს მეფედ, ჯარს გაუძღვა წინ-მეთქი. რაც უნდა გითხრა, ამას როგორც მეფე გამიგებ-მეთქი. რჩევა მინდა გკითხო-მეთქი. ერთ დროს გოგო შემიყვარდა ძალიან და ვუთხარი: ოღონდ ცოლად გამომყევი და შენს თავს არავის გავაბრაზებინებ-მეთქი არასდროს. დამთანხმდა და ცოლად გამომყვა-მეთქი. მე ეს პირობა მივეცი ჩემს საყვარელ ქალს, მაგრამ ამ ქალს უკვე აწყენინეს, ვინც აწყენინა ჩემი შვილია, რა ვქნა არ ვიცი და მირჩიე, რა გავაკეთო-მეთქი. დამსაჯეო, პაატამ მითხრა. მე ვუთხარი: დასჯა რომ მდომებოდა, დაგსჯიდი. აქამდე ერთი კაცი ვიყავი სახლში, არ დადგა დრო, რომ ორნი ვიყოთ-მეთქი? ეს იყო მამაკაცის საუბარი მამაკაცთან,“- აღნიშნა შალვა ამონაშვილმა.

​წყარო

შეიძლება დაინტერესდეთ

„კოვიდ-19-ით ინფიცირების ყოველი მესამე შემთხვევა ბავშვებზე მოდის,“ - პედიატრი თემურ მიქელაძე

„კოვიდ-19-ით ინფიცირების ყოველი მესამე შემთხვევა ბავშვებზე მოდის,“ - პედიატრი თემურ მიქელაძე

პედიატრმა თემურ მიქელაძემ ბავშვებში კოვიდ-19-ით ინფიცირების გაზრდილი შემთხვევების შესახებ ისაუბრა და აღნიშნა, რომ ბავშვებში ვირუსის გავრცელებამ მნიშვნელოვნად მოიმატა:

„იქიდან გამომდინარე, რომ არანაირ რეგულაციას ჩვენი მოსახლეობა არ იცავდა, შესაბამისად ტალღები გადაება. ერთადერთი, ​რასაც ვაკვირდები, არის ის, რომ ბავშვთა პოპულაციაში საკმაოდ მოიმატა გავრცელებამ. თუ თავიდან ბავშვებში გავრცელება 10%-მდე იყო, ახლა 30%-მდეა ასული. ინფიცირების ყოველი მესამე შემთხვევა ბავშვებზე მოდის.“

თემურ მიქელაძის თქმით, კორონავირუსი ბავშვების უმრავლესობას მარტივად გადააქვს:

„საბედნიეროდ ერთადერთი რაც შეგვიძლია ვთქვათ, ბავშვებში ნებისმიერი შტამის შემთხვევაში დაავადება მსუბუქად მიმდინარეობს. საქართველოში დაიწყო 12-დან 15 წლამდე ასაკის ბავშვთა ვაქცინაცია განსაკუთრებული რისკ-ჯგუფის პაციენტებისთვის. ​მე პირადად რამდენიმე ათეული ასეთი ბავშვი ავცერი. თუ სხვა შემთხვევაში კოვიდი მსუბუქად მიმდინარეობს, ამ კონკრეტულ ბავშვებთან, შესაძლოა, ის ფატალურად დასრულებულიყო. გუშინ ამერიკის შეერთებულ შტატებში დაიწყო 5-დან 12 წლამდე ბავშვების ვაქცინაცია.“

„ტესტირების რიგში დგას აურაცხელი რაოდენობის ადამიანი, მაშინ როდესაც ვაქცინაციის კაბინეტთან თითო-ოროლა ადამიანი თუ არის. მაღალგანვითარებად ქვეყნებში აბსოლუტურად პირიქით არის. ვაქცინაციის ცენტრებთან არის რიგები და ტესტირებაზე არავინ არ დგას. ჩვენთან გვაქვს სულ სხვა რეალობა. ჩვენი მოსახლეობა არანაირ რეგულაციას არ იცავს,“- აღნიშნულ საკითხებზე თემურ მიქელაძემ რადიო „იმედის“ ეთერში ისაუბრა.

წყარო:​ „რადიო იმედი“

წაიკითხეთ სრულად