Baby Bag

რჩევები დღესასწაულის შემდეგ ბავშვების ყოველდღიურობაში დასაბრუნებლად

რჩევები დღესასწაულის შემდეგ ბავშვების ყოველდღიურობაში დასაბრუნებლად

დღესასწაულის შემდგომ ბავშვების ჩვეულ რეჟიმში დაბრუნებაზე ​MomsEdu.ge-ს ფსიქოლოგი, ფსიქოთერაპევტი მზიკო დალაქიშვილი ესაუბრა.

- რა ასაკიდან ენიჭება ბავშვებისთვის მნიშვნელობა დღესასწაულების აღნიშვნას? 

- დღესასწაული გულისხმობს ემოციების გაცვლას, სიხარულის გამოხატვას, სიყვარულს ერთმანეთის მიმართ. ამ მდგომარეობას ასაკი არ აქვს, ბავშვი დაბადების დღიდან საჭიროებს ემოციების გაცვლას და დადებითი ენერგიის ემოციებად მიღებას, შესაბამისად, დღესასწაულში ბავშვის ჩართულობა ყველა ასაკში მისაღებია, მთავარია, ვიცოდეთ ბავშვის განვითარების თავისებურებები და ფიზიოლოგია, არ დავარღვიოთ ბავშვის რეჟიმი ისე, რომ მისი ნერვული სისტემა დაზიანდეს, მოხდეს ზედმეტი აგზნება, რაც გამოიწვევს გაღიზიანებას და ქცევის ცვლილებებს. ზედმეტი ხმაური, ხმამაღალი გარემო, ჭარბი გამღიზიანებელი ზოგადად არღვევს ორგანიზმის ჰომეოსტაზს და მშობლებს გვმართებს ყურადღება ეს გარემო გამღიზიანებლები ვაკონტროლოთ ბავშვის განვითარებისა და ფსიქო-ემოციური მდგომარეობის შესაბამისად. ზეიმი და დადებითი ემოციების მიღება კი ყველა ასაკს უხდება!

- რა პერიოდიდან არის ასე ვთქვათ, ღირებული, რომ ბავშვს დავურღვიოთ ცხოვრების რუტინა დღესასწაულების გამო?

- გააჩნია რას ვგულისხმობთ ცხოვრების რუტინის დარღვევაში... გვიან დაძინება, ზედმეტი ტკბილეული, დიდი დოზით ტელევიზორი, ხმაურიანი გარემო და ხალხმრავლობა - ეს ბავშვობის არცერთი ასაკისთვის არ არის რეკომენდებული. თუ უბრალოდ არდადეგები იგულისხმება, სადაც ბავშვები მშობლებთან და მეგობარ-ახლობლებთან ერთად მხიარულობენ და აქვთ იმის საშუალება, რომ თავისუფლად, სტრესის გარეშე გაატარონ დრო მხიარულებაში, ამაში პრობლემას ვერ ვხედავ. მსგავსი სიტუაციები აუცილებელიც კი არის განსატვირთად და გამოცდილების მისაღებად, ახლო ადამიანებთან დიდი დოზით დროის გატარება და მხიარულება მხოლოდ კარგის მომტანია განსაკუთრებით მაშინ, როდესაც მშობლებს არ გვაქვს საშუალება, წლის განმავლობაში დავუთმოთ დრო და ენერგია ჩვენს შვილებს და ვიყოთ მათი მხიარულების გამზიარებელნი.

- დღესასწაულების შემდეგ როგორ უნდა დავიწყოთ ბავშვის ემოციების და სადღესასწაულო განწყობის დარეგულირება?

- დღესასწაულის შემდეგ ყოველთვის არის რუტინულ ცხოვრებასთან დამაკავშირებელი გარდამავალი პერიოდი. სწორედ ეს გარდამავალი პერიოდია რაც ბავშვს უხეშად არ წყვეტს ერთ რეალობას და არ გადაჰყავს მეორეში. ახალი წლის პერიოდს თუ ავიღებთ, მაგალითად, ყველა მხიარულებას აქვს როგორც დასაწყისი, ისე დასასრული, ნაძვის ხეს ერთად ვრთავთ, შემდეგ ერთად ვშლით, ვინახავთ. მე პირადად, მთავარი მგონია ბავშვის ყველა პროცესში ჩართულობა (ასაკის ინტერესისა და განვითარების შესაბამისად) და ცხოვრების ციკლისა და რიტმის შეგრძნების ცნობიერება, რაც, ჩვენზე, მშობლებზეა დამოკიდებული - მათთან ერთად მოვემზადოთ დღესასწაულისთვის, ერთად ვიზეიმოთ და ერთად დავალაგოთ/ავალაგოთ საზეიმო გარემო, ასე ხელს შევუწყობთ პროცესის ჯანსაღად გავლას, გამოცდილების ინტეგრირებას, დროებით დამშვიდობებას დღესასწაულთან, მომზადებას ახალი, ხვალინდელი დღისთვის.

რჩევები ყოველდღიურობაში დასაბრუნებლად:

ჩართეთ ბავშვები სუფრის ალაგების პროცესში, ნაძვის ხეც ერთად დაშალეთ, გააზიარეთ ამ დღესასწაულის კარგი ემოციებისა და შთაბეჭდილებების შესახებ, მოყევით და ბავშვსაც მოუსმინეთ, რა იყო კარგი, ასევე თქვით და მოუსმინეთ, რა მოგენატრათ ყოფითი რუტინული ცხოვრებიდან, ბაღი, სკოლა, მეგობრები, მასწავლებლები, მეცადინეობა, სპორტზე სიარული.... თქვენც უდავოდ  გექნებათ თქვენი საყვარელი საქმე და სიტუაციები, რაც მოგენატრებოდათ, გააზიარეთ ეს. ერთად უთხარით მადლობა დღესასწაულს და დასვენების პერიოდს დაემშვიდობეთ, რომელიც აუცილებლად დაბრუნდება! წელიწადი ხომ რამდენჯერმე გვთავაზობს სხვადასხვა ჩვენთვის საყვარელ დღესასწაულს, ამის გაზიარებაც დაეხმარება ბავშვს, გაუშვას რაც იყო, დაუბრუნდეს აწმყოს და ჰქონდეს მოლოდინი მსგავსი სიტუაციის, დღესასწაულის მოსვლის! დაუბრუნდით იმ ყოველდიურობას, რომელიც შესაძლოა არც კი იცით, მაგრამ შესაძლოა, მოგენატრათ კიდეც. დიალოგში აზრები ლაგდება და ცნობიერდება ის, რაც არის ჩვენში, ამიტომ გირჩევთ დიალოგს ბავშვთან, ასაკისა და განვითარების შესაბამისად.

გავაცილოთ დღესასწაული, რომ მოგვენატროს და მისი მოსვლა ხელახლა იქცეს დღესასწაულად!

ესაუბრა ელენე ოვაშვილი

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუ​ფი“)

შეიძლება დაინტერესდეთ

„ერთბაშად ცივ წყალში რომ ვაბანაოთ ბავშვი, რომელიც სითბოშია გაზრდილი, ეს იმუნიტეტს არ გააკაჟებს,“ - ეკა უბერი

„ერთბაშად ცივ წყალში რომ ვაბანაოთ ბავშვი, რომელიც სითბოშია გაზრდილი, ეს იმუნიტეტს არ გააკაჟებს,“ - ეკა უბერი

პედიატრმა ეკა უბერმა ბავშვის ვირუსული ინფექციებით ავადობისა და იმუნიტეტის გაძლიერების მნიშვნელობაზე ისაუბრა. მან აღნიშნა, რომ ვირუსული ინფექციების სამკურნალოდ ანტიბიოტიკების გამოყენება არ არის საჭირო:

„ძალიან ხშირად მშობელი მეკითხება: „ოთხი დღეა ბავშვს მაღალი ტემპერატურა აქვს, მივცე ანტიბიოტიკი?“ ​ცხელება აბსოლუტურად არ არის ჩვენება ანტიბიოტიკის მიცემის. ვირუსული ინფექციები შესაძლებელია მიმდინარეობდეს მაღალი ტემპერატურით. ამ შემთხვევაში ექიმი წყვეტს, გარკვეული კვლევების შემდეგ მიეცეს თუ არა ანტიბიოტიკი ბავშვს. ძალიან ხშირად მე არ მჭირდება ხოლმე ანტიბიოტიკი, რადგან აღმოჩნდება, რომ ეს არის ვირუსული ინფექცია და მას თვითლიკვიდაცია, თვითგანკურნება ახასიათებს.“

ეკა უბერის თქმით, ცივი წყლით გაკაჟებას თავისი ტრადიცია სჭირდება და მისი ხელაღებით გამოყენება რეკომენდებული არ არის:

„რაც შეეხება ​ცივი წყლით გაკაჟებას, ჩრდილოეთის ქვეყნებში არის ასეთი ტენდენცია და მას თავისი ტრადიცია სჭირდება. ასე ერთბაშად გადავწყვიტოთ, რომ მოდი, ცივ წყალში ვაბანაოთ ბავშვი, რომელიც სითბოშია გაზრდილი, ოთახის ტემპერატურა მაღალია, სადაც სძინავს, თბილად ჩაცმას არის მიჩვეული და უცებ გადავწყვიტოთ, რომ მოდი, ცივ წყალში ვაბანაოთ, მოკლე მკლავიანი პერანგით ვატაროთ, როდესაც ტემპერატურა დაბალია, ეს, რა თქმა უნდა, იმუნიტეტს არ გააკაჟებს. ასე პირიქით, უფრო სავალალო შედეგებამდე მივალთ, პირველ რიგში, მივალთ ავადობამდე.“

„გადაციება არის ერთ-ერთი ფაქტორი, რის გამოც ადგილობრივი იმუნიტეტი ქვეითდება. შესაბამისად ჩვენი ლორწოვანი ადვილი მიმღებლობით ხასიათდება ვირუსების მიმართ და გაციების კლინიკური სიმპტომები ხელში გვაქვს. თუ ახალშობილობის პერიოდიდანვე არსებობს ტრადიცია, რომ შედარებით ​გრილ წყალში აბანაოთ ბავშვი, თავიდანვე შედარებით თხლად ჩააცვათ, ხშირად ანიავოთ ოთახი, ოთახის ტემპერატურა, სადაც ბავშვს სძინავს 20-30 გრადუსს არ აღემატებოდეს, ოთახი კარგად ტენიანდებოდეს, რა თქმა უნდა, ასეთ ღონისძიებებს იმუნიტეტის გაჯანსაღება მოაქვს,“ - აღნიშნულ საკითხებზე ეკა უბერმა რადიო ფორტუნას ეთერში ისაუბრა.

წყარო: ​რადიო ფორტუნა

წაიკითხეთ სრულად