Baby Bag

მეცნიერების მტკიცებით, ბუნებასთან ურთიერთობა ბავშვებს აბედნიერებს

მეცნიერების მტკიცებით, ბუნებასთან ურთიერთობა ბავშვებს აბედნიერებს

მშობლები ბავშვებთან ერთად ბუნებაში სეირნობისას შვილების გუნება-განწყობის გამოკეთებას მარტივად ამჩნევენ. სიარული ერთგვარი ვარჯიშია, რომელიც ადამიანს თავს ბედნიერად აგრძნობინებს. საყვარელ ადამიანებთან ერთად ყოფნა ნებისმიერი ბავშვისთვის უდიდესი სიხარულის მიმნიჭებელია, ხოლო ბუნებაში ყოფნა პატარების განწყობაზე ძალიან დადებითად აისახება. შაბათ-კვირას ოჯახური გასეირნების მოწყობა მშობლებსა და შვილებზე პოზიტიურად ზემოქმედებს. შესაძლოა, გარეთ ცუდი ამინდი იყოს, წვიმდეს, ბავშვებს კი სიარული ეზარებოდეთ, მაგრამ საბოლოო ჯამში, ყველაფერი ძალიან კარგად ჩაივლის. თავგადასავლები, ახალი აღმოჩენები, უნიკალური შეგრძნებები და ბუნების სილამაზით ტკბობა ნებისმიერ უსიამოვნებას მარტივად გადაფარავს.

მკვლევარები პატარების ბუნებასთან ურთიერთობებს რეგულარულად აკვირდებოდნენ, რის შედეგადაც დაადგინეს, რომ ბუნება ბავშვებს ნამდვილად აბედნიერებს. ადამიანები ბუნებასთან ურთიერთობისას მასთან ძლიერ ემოციურ კავშირს ამყარებენ, რაც მათ უდიდეს ბედნიერებას ანიჭებს. მექსიკის ერთ-ერთ სკოლაში 9-12 წლის ასაკის 300-მდე ბავშვმა მკვლევარების მიერ შედგენილი სპეციალური კითხვარი შეავსო. კითხვები მათ გუნება-განწყობას, ბუნებასთან ურთიერთობას და ხასიათის თავისებურებებს შეეხებოდა.

მეცნიერებმა დაადგინეს, რომ ბავშვები, რომლებიც ბუნებასთან ხშირად ურთიერთობდნენ, ველური ყვავილებისა და ცხოველების დანახვაზე ბედნიერდებოდნენ. მათ ფრინველების ხმის გაგონებაც საოცრად სიამოვნებდათ. პატარები, რომლებსაც ბუნებაში ყოფნა უყვართ, სხვა ადამიანებისადმი მეტ თანაგრძნობას და მათი დახმარების სურვილს რეგულარულად ავლენენ. ისინი სიფრთხილით მოიხმარენ წყალს და საყოფაცხოვრებო ნივთებს. ბუნებასთან ურთიერთობის მოყვარული ბავშვები გენდერულ, სოციალურ და რასობრივ თანასწორობასაც უჭერენ მხარს. მათ ბედნიერების სკალაზე უმაღლესი მაჩვენებლებიც უფიქსირდებათ. კვლევებით ასევე დადასტურდა, რომ ბუნების მოყვარული ბავშვები გლობალური ეკოლოგიური კრიზისის ფონზე გარემოს აქტიურ დამცველებად გვევლინებიან.

„ბავშვები მომავალი ლიდერები, საქმოსნები, მუშები და მასწავლებლები არიან. მათი განათლება, გარემოსადმი პატივისცემა და გარემოს მნიშვნელობის გაცნობიერება სამომავლოდ ბუნების გადარჩენას შეუწყობს ხელს,“ - ნათქვამია კვლევის ორგანიზატორთა ოფიციალურ განცხადებაში.

ამერიკის შეერთებულ შტატებში ე.წ. „ტყის საბავშვო ბაღები“ ფუნქციონირებს. მსგავსი ტიპის სკოლამდელი აღზრდის დაწესებულებებში ბავშვებს ბუნებაში ყოველდღიურად სეირნობას აჩვევენ, ასწავლიან ბაღის მოვლას და გარემოს პატივისცემას.

ბუნებასთან ურთიერთობა დადებითად არამხოლოდ ბავშვებზე, არამედ უფროსებზეც ზემოქმედებს. 2015 წელს ჩატარებულმა კვლევამ აჩვენა, რომ ადამიანები, რომლებიც ხშირად სეირნობენ, ნეგატიური აზრებისგან თავისუფლდებიან. შოტლანდიელი ექიმები მაღალი არტერიული წნევის, სტრესისა და დეპრესიისგან გასათავისუფლებლად ადამიანებს ბუნებაში ხშირად გასვლას ურჩევენ. ერთ-ერთმა უახლესმა კვლევამ აჩვენა, რომ ბუნების მოყვარული ბავშვები უკეთ იკვებებიან, ბევრს ვარჯიშობენ და კარგი ხასიათითაც გამოირჩევიან.

XIX საუკუნეში მოღვაწე ამერიკელი ფილოსოფოსი ჰენრი დევიდ თორო, რომელიც ტრანსცენდენტალისტი იყო, თვლიდა, რომ ბუნებას სპირიტუალური დანიშნულება აქვს. მისი ნაშრომი „უოლდენი ანუ ტყეში ცხოვრება“ ბუნებაზე ზრუნვის და მისკენ მიბრუნებისკენ მოწოდებაა. თორო თვლიდა, რომ ბუნებას ადამიანის სულის განკურნების უნარი აქვს. ადამიანის სული კი ბუნების დიადი სულის ნაწილად მიაჩნდა.

ამერიკელების ნაწილს დღემდე მტკიცედ სწამს, რომ ბუნებას უდიდესი ძალა აქვს. ისინი მისი სიღრმისეული მნიშვნელობის გაგებას და წვდომას აქტიურად ცდილობენ. თოროს მოძღვრების თაყვანისმცემლები თვლიან, რომ ადამიანური ყოფიერების ყველა ფუნდამენტურ კითხვაზე პასუხი სწორედ ბუნებაში უნდა ვეძებოთ.

მომზადებულია ​cnn.com-ის მიხედვით

თარგმნა ია ნაროუშვილმა

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)

შეიძლება დაინტერესდეთ

6 კულინარიული შეცდომა, რომელსაც ყველაზე გამოცდილი დიასახლისებიც უშვებენ

6 კულინარიული შეცდომა, რომელსაც ყველაზე გამოცდილი დიასახლისებიც უშვებენ

ცნობილმა პედიატრმა ევგენი კომაროვსკიმ 6 კულინარიული შეცდომა დაასახელა, რომელსაც ყველაზე გამოცდილი დიასახლისებიც კი უშვებენ.

  • პროდუქტების გასინჯვა

დიასახლისების დიდი ნაწილი პროდუქტებს სხვადასხვა მიზნით გემოს უსინჯავს. ძალიან დიდი შეცდომაა მოუმზადებელი ნახევარფაბრიკატი პროდუქტების გასინჯვა მასში მარილისა და სანელებლების შემცველობის დასადგენად. ამაზე უფრო საშიშია საკვების გასინჯვა იმ მიზნით, რომ გაიგონ, გაფუჭდა თუ არა ის. ბევრი ქალბატონი გემოს უსინჯავს ცომს, რომელიც უმ კვერცხს შეიცავს. ეს, შესაძლოა, სალმონელოზის წყაროდ იქცეს, რის გამოც, ამ მავნე ჩვევაზე უარი უნდა ვთქვათ.

  • ყველა პროდუქტის დასაჭრელად ერთი დაფის გამოყენება

უმი ხორცის დაფა სხვა პროდუქტებისთვის არ უნდა გამოიყენოთ. სამზარეულოში აუცილებლად უნდა იყოს ცალკე დაფა ხორცის, თევზის, ბოსტნეულისა და მზა პროდუქტებისთვის. უმი და მზა პროდუქტები ერთად არ უნდა დაიჭრას.

  • ფრინველის ხორცის გარეცხვა გამდინარე წყალში

ეს გავრცელებული ჩვევა ძალიან საზიანოა. კამპილობაქტერიოზის ბაქტერია თითქმის ყველა ფრინველის ნაწლავში გვხვდება. ის ადვილად კვდება მაღალი ტემპერატურის ქვეშ, როდესაც პროდუქტის სათანადო თერმული დამუშავება ხდება. ქათმის ხორცის წყლის ჭავლის ქვეშ გარეცხვის დროს, შხეფები სამზარეულოში სხვადასხვა ადგილზე ეცემა, ხვდება ხელებსა და ტანსაცმელზე, რაც ინფიცირების რისკებს ზრდის. ინფიცირების თავიდან აცილებისთვის საკმარისია ხორცის სრულფასოვანი თერმული დამუშავება.

  • კერძების გაგრილება

ჩვეულებრივ დიასახლისები ცხელ კერძებს მაცივარში არ ინახავენ, რათა მისი დაზიანება თავიდან აიცილონ. ისინი კერძს ოთახის ტემპერატურაზე 8-10 საათის განმავლობაში გასაციებლად ტოვებენ, რითაც მასში ბაქტერიების გამრავლების რისკებს ზრდიან. ამ ყოველივეს თავიდან ასარიდებლად კერძი სწრაფად უნდა გააციოთ, თუნდაც ცივ წყალში. ევგენი კომაროვსკის თქმით, 30 გრადუსამდე ტემპერატურაზე, კერძის გასაცილებლად დატოვება მაქსიმუმ 2 საათით შეიძლება, 30 გრადუსზე მაღალ ტემპერატურაზე კი მხოლოდ 1 საათით.

  • ეკონომია სარეცხ ღრუბლებსა და ტილოებზე

ევგენი კომაროვსკის თქმით, სამზარეულოს ტილოებზე მიკრობების კონცენტრაცია 100-ჯერ მაღალია ვიდრე საზოგადოებრივ ტუალეტებში. პედიატრმა ქალბატონებს ურჩია, რომ თუ ისინი ტილოებს ვერ ელევიან, ის თეფშზე დადონ და სულ ცოტა 1 წუთით მიკროტალღურ ღუმელში მოათავსონ. ამგვარად ისინი სტერილიზაციის პროცედურას ჩაატარებენ და ინფექციის პოტენციურ წყაროს გაანეიტრალებენ.

  • ხელების იშვიათად დაბანა საკვების მომზადების პროცესში

ევგენი კომაროვსკის თქმით, დიასახლისები ხშირად ვერ ხვდებიან, რამდენად მნიშვნელოვანია კერძის მომზადებისას ხელების ხშირი დაბანა. მისი თქმით, დიასახლისმა საკვების მომზადების ყველა ეტაპის დაწყებისა და დასრულების შემდეგ ხელი აუცილებლად უნდა დაიბანოს.

წყარო: ​komarovskiy.info 

წაიკითხეთ სრულად