Baby Bag

„ბევრი ამბობს: „ვისაც თამაში უნდა, მაინც ითამაშებს,“ ეს ასე ადვილი არ არის,“- ფსიქოლოგი მარინა კაჭარავა

„ბევრი ამბობს: „ვისაც თამაში უნდა, მაინც ითამაშებს,“ ეს ასე ადვილი არ არის,“- ფსიქოლოგი მარინა კაჭარავა

ფსიქოლოგმა მარინა კაჭარავამ საქართველოში ონლაინ კაზინოების აკრძალვის ინიციატივაზე ისაუბრა და აღნიშნა, რომ ეს პოზიტიური გადაწყვეტილებაა:

„ამ ასაკში თუ დავიცავთ ახალგაზრდებს თამაშისგან, ეს მნიშვნელოვანია. ბევრი ამბობს: „ვისაც თამაში უნდა, მაინც ითამაშებს.“ ასე ადვილი არ არის. ჩვენ წლების განმავლობაში ვესაუბრებოდით IT სპეციალისტებს. მოგვყავდა ჩვენც მაგალითები, როგორ ხერხდება, რომ ჩეხეთში ან სხვა ქვეყნებში ისინი ვერ თამაშობენ.“

მარინა კაჭარავას თქმით, ონლაინ კაზინოებს ძალიან აგრესიული მარკეტინგი აქვთ:

„მათ ასეთი აგრესიული მარკეტინგი აქვთ. პირდაპირ თანხას უსვამენ მოთამაშეებს. კრიტიკული პერიოდი არის 6-8 თვე, როდესაც ადამიანი მდგომარეობიდან გამოდის, ცდილობს, რომ ამოვიდეს აქედან. ზუსტად რვა თვეა გასული და მას ჰგონია, რომ გამოძვრა აქედან, ამ დროს მას ანგარიშზე უჯდება 50-დან 100 ლარამდე სათამაშო თანხა. ეს ისეთი ტრიგერია, რომ ძალიან ცოტა გაუძლებს ამას.“

„ბევრი ამბობს: „ზრდასრულია და ნუ ითამაშებს, ნუ შევა! მას თუ უნდა, ითამაშოს.“ ასეთი საუბარიც არის, რომ აქვს უფლება მოიკლას თავი. ეს საუბარი ისეთ აბსურდამდე მიდის... დიახ, არ აქვს უფლება, რომ თავი მოიკლას, ან სხვამ მოკლას. არც ღვთის წინაშე. ამ უფლებაზე როგორ შეიძლება იყოს ლაპარაკი საერთოდ? ეს არის უკიდურესი უბედურებაც და დანაშაულიც,“- აღნიშნულ საკითხზე მარინა კაჭარავამ საპატრიარქოს ტელევიზიის ეთერში ისაუბრა.

წყარო: ​„საპატრიარქოს ტელევიზია“

შეიძლება დაინტერესდეთ

„ახალგაზრდა ოჯახს სჭირდება თავისი ცალკე ბუდე, ეს არის აუცილებელი პირობა იმისთვის, რომ მათ ერთმანეთი დაინახონ,“ - ფსიქოლოგი ვერიკო გოჯიაშვილი

„ახალგაზრდა ოჯახს სჭირდება თავისი ცალკე ბუდე, ეს არის აუცილებელი პირობა იმისთვის, რომ მათ ერთმანეთი დაინახონ,“ - ფსიქოლოგი ვერიკო გოჯიაშვილი

ფსიქოლოგმა ვერიკო გოჯიაშვილმა ჯანსაღი ოჯახის ჩამოყალიბებისთვის აუცილებელი პირობები დაასახელა და წყვილებს ურჩია, რომ დამოუკიდებელი ოჯახი შექმნან:

„ახალგაზრდა ოჯახს სჭირდება თავისი ცალკე ბუდე. ეს არის აუცილებელი პირობა იმისთვის, რომ მათ ერთმანეთი დაინახონ. უკვე არსებულ ბუდეში ისინი ერთმანეთს ვერ ხედავენ. თვითგამოხატვა ძალიან ძნელია სხვა ადამიანების წინაშე, მით უმეტეს უფროსი თაობის წინაშე. იქ ძალიან ბევრი ვალდებულება გაქვს. საქართველოში ძალიან გავრცელებულია შვილების სასხვისო აღზრდა. სხვას რა უნდა? სხვა რას ფიქრობს? სხვა რას იტყვის? სხვისი აზრი არის დომინანტი. როდესაც ასეთი აღზრდა აქვს ადამიანს და ის შედის ოჯახში, იქ უკვე დომინირებს სხვისი აზრი. ეს არსად არ წავა, გროვდება და კრიტიკულ მომენტში აუცილებლად ამოხეთქავს. გაჩუმება, ანგარიშის გაწევა, სხვისი პრინციპებით ცხოვრება, აუცილებლად სადღაც ამოხეთქავს.

ვერიკო გოჯიაშვილის თქმით, ჯანსაღ ოჯახში აღზრდილი ადამიანები, თავადაც ჯანსაღ ოჯახებს ქმნიან:

„რაც უფრო ჯანსაღი ოჯახიდან, ჯანსაღი ურთიერთობებიდან გამოდის ადამიანი, მით უფრო ჯანსაღ ოჯახს ქმნის. მნიშვნელოვანია ასევე ავთენტურობა. მე დამოუკიდებელი პიროვნება ვარ და ვქმნი ოჯახს. მე ჩემი გემოვნებითა და შეხედულებებით ვქმნი ოჯახს. მთელს კავკასიაშია ეს, მაგრამ საქართველოშიც არის სამწუხაროდ, რომ პატარები ქმნიან ოჯახს. რაღაც ასაკამდე ოჯახის შექმნა ემყარება ფიზიკურ მიზიდულობას, ვნებას. ეს აუცილებელია, ფიზიკური მიზიდულობა, რასაც ჩვენ სიყვარულს ვეძახით, მაგრამ ძალიან მცირეა და ძალიან მალე შეიძლება ის გაილიოს. შემდეგ ასაკებში უკვე ვითარდება მეგობრობის ფენომენი, როდესაც ფიზიკურ მიზიდულობას ემატება წყვილის მეგობრობა. ესეც აუცილებელია, მაგრამ არც ეს არის საკმარისი. პირველივე კონფლიქტის შემდეგ ეს შეიძლება დაიმსხვრეს და აღარ ვიყოთ მეგობრები.“

„ჯანსაღი ოჯახის აუცილებელი პირობა არის პატივისცემა. წინა თაობებში იყო გარიგება, მაგრამ იყო მყარი ოჯახები. პატივისცემა არის ზედა ზღვარი, საიდანაც შეიძლება მეგობრობაც განვითარდეს და სიყვარულიც წარმოიშვას. მე არ ვემხრობი გარიგებას, არავინ იფიქროს ასე. ურთიერთპატივისცემას უჭირავს კონფლიქტების დროს ოჯახი. ეს პატივისცემაა, როდესაც მათ შეუძლიათ მოილაპარაკონ, ერთმანეთის აზრს პატივი სცენ. ეს აუცილებელი მომენტებია, რაც ოჯახს სჭირდება. შემდეგ მოდის ეკონომიკური მდგომარეობა, ერთმანეთისთვის ანგარიშის გაწევა,“- აღნიშნულ საკითხზე ვერიკო გოჯიაშვილმა რადიო „ფორტუნას“ ეთერში ისაუბრა.

წყარო: ​რადიო „ფორტუნა“

წაიკითხეთ სრულად