Baby Bag

„მინდა, ზუსტად ავხსნა, რა ხდება, რომ არასწორი ინფორმაცია არ ჰქონდეს ხალხს,“ - ალექსანდრე ზაზარაშვილი ამერიკულ კონკურსში გამარჯვების შესახებ

„მინდა, ზუსტად ავხსნა, რა ხდება, რომ არასწორი ინფორმაცია არ ჰქონდეს ხალხს,“ - ალექსანდრე ზაზარაშვილი ამერიკულ კონკურსში გამარჯვების შესახებ

მომღერალმა ალექსანდრე ზაზარაშვილმა საქართველოში გავრცელებული ინფორმაციის შესახებ ისაუბრა, რომლის თანახმადაც მან ამერიკის „ნიჭიერში“ გაიმარჯვა:

„იმდენი ვარიანტი გავრცელდა ამ პროექტის შესახებ, რომ მინდა, ზუსტად ავხსნა, რა ხდება, რომ არასწორი ინფორმაცია არ ჰქონდეს ხალხს. ერთი თვის წინ მივიღე ოქროს ღილაკი კონექტიკუტის შტატის „ნიჭიერში.“ გუშინ იყო ფინალი, სადაც მონაწილეობა მივიღე და გავიმარჯვე. კიდევ ასეთი ინფორმაცია გავრცელდა, რომ გამარჯვებული მიიღებდა მონაწილეობას ამერიკულ „ნიჭიერში,“ არც ეს არ არის ნამდვილი.“

ალექსანდრე ზაზარაშვილის თქმით, ის ამერიკის ერთ-ერთი ყველაზე ცნობილი პროექტიდან მიწვევის მოლოდინშია:

„ამერიკაში არის ასეთი პროექტი „American Idol,“ რომელიც ნიჭიერია, მაგრამ მხოლოდ მომღერლებისთვის არის გათვლილი. იქ დასაქმებული ერთ-ერთი ადამიანი შემეხმიანა, რომელიც ახლა აღარ მუშაობს ამ პროექტში, მაგრამ მისი მეგობრები არიან იქ. მან ვიდეო გადამიღო და გადაუგზავნა ჩემი ვიდეო კონკურსიდან თავის მეგობრებს. ისინი ძალიან დაინტერესდნენ. გამოართვეს ჩემი საკონტაქტო ინფორმაცია და წუთი წუთზე ველოდებით მიწვევას „American Idol“-ში.“

„ძალიან ბევრი ქართველი ემიგრანტი ჩამოვიდა დასასწრებად სხვადასხვა ქალაქიდან 3-4 საათის სავალ გზებზე. ჩემმა დამ ჩაიწერა ჩემი გამარჯვების დროს ოჯახის წევრების ემოციები. როდესაც ამ ყველაფერს ვუყურე, მე თვითონ მოვკვდი ტირილით. იმხელა ემოციები ჰქონდათ, რომ მეც ვერ გავუძელი ემოციებს,” - აღნიშნულ საკითხზე ალექსანდრე ზაზარაშვილმა ტელეკომპანია „იმედის“ გადაცემაში „იმედის დღე“ ისაუბრა.

წყარო:​ „იმედის დღე“

შეიძლება დაინტერესდეთ

„დაბომბვის ხმაზე ინსტინქტურად მოვკიდე ბავშვს ხელი, ჟილეტში გავახვიე, მივიხუტე და ასე გადმოვხტი სამშობიაროს ფანჯრიდან,“- ქართველი დედა 2008 წლის აგვისტოს მძიმე დღეებს იხსენებს

„დაბომბვის ხმაზე ინსტინქტურად მოვკიდე ბავშვს ხელი, ჟილეტში გავახვიე, მივიხუტე და ასე გადმოვხტი სამშობიაროს ფანჯრიდან,“- ქართველი დედა 2008 წლის აგვისტოს მძიმე დღეებს იხსენებს

2008 წლის აგვისტოს ომის დროს ქართველი დედები არაერთი მძიმე განსაცდელის წინაშე აღმოჩნდნენ. ერთ-ერთი დედა, რომელსაც ომის პერიოდში უდიდეს სირთულეებთან მოუხდა შეჯახება სოფელ ერგნეთში მცხოვრები მაგული ოქროპირიძეა. ის 14 წლის წინანდელ მძიმე ამბებს ტელეკომპანია „იმედის“ გადაცემაში „იმედის დღე“ იხსენებს და ყვება, როგორ გადახტა სამშობიაროს ფანჯრიდან ახალშობილთან ერთად, როდესაც საფრთხის მოახლოება იგრძნო:

„2008 წლის 7 აგვისტოს ღამე მეყოლა მეხუთე შვილი. ზუსტად როდესაც გავაჩინე ქეთი, ის პერიოდი იყო შორ მანძილზე რომ ისროდნენ. ისეთი ხმა ჰქონდა, მთელი სამშობიარო ზანზარებდა. სამხედრო ნაწილი და გორის სამშობიარო ძალიან ახლოს არის. ფანჯრები, მინები სულ ჩამომსხვრეული იყო საავადმყოფოში. ამ ხმაზე ინსტინქტურად მოვკიდე ამ ბავშვს ხელი, ჟილეტში გავახვიე, მივიხუტე და ასე გადმოვხტი ფანჯრიდან. რამოდენიმე წელი იმ საავადმყოფოს ეზოშიც კი ვერ შევდიოდი. ქეთო, როგორც ომი, ისეთი დაუმორჩილებელია. ვიტყოდი, რომ გმირია, იმიტომ, რომ პირველმა დაამარცხა სიკვდილი თავისი დაბადებით. მშობიარობის დროს „ვაიმე დედა“ არ მითქვამს. მარტო ვლოცულობდი: „ღმერთო, ჩემი შვილები კარგად იყვნენ, ღმერთო, გადაგვარჩინე.“

მაგული ოქროპირიძის თქმით, ომმა ბავშვებზე უმძიმესი გავლენა მოახდინა და პატარებს მდგომარეობიდან გამოსვლა დიდხანს უჭირდათ:

„ჩემი შვილი, მეორე გოგო დედაჩემის გვერდით იყო, როდესაც მე ბავშვით ხელში გადმოვხტი. მთელი ორი კვირა არ ლაპარაკობდა. ხალხს რომ დაინახავდა, გზაზე ვერ გადადიოდა. ომის შემდეგ პირველად რომ შემოვედი ერგნეთში და დავინახე პირველი სახლი დამწვარი, ერთი ამოსუნთქვით დამთავრდა ყველაფერი. ჩემში ყველა ემოცია გაიყინა. პიანინო მაქვს ჩემი ასაკის. ჩექმიანი ფეხით იყო ჩაქუჩები და სიმები ჩამტვრეული, ნაფეხური ეტყობოდა ძირს დაყრილ ხატებს.“

2008 წლის 7 აგვისტოს დაბადებული ქეთევან დოჯაშვილი რუსულ ბომბდამშენებს გადაურჩა და 14 წლის წინანდელი ომის შესახებ მხოლოდ დედის მონაყოლიდან იცის.

„დედა რომ ყვება ხოლმე, მეც თვალწინ მიდგას ყველაფერი, რაც ომის დროს ხდებოდა. დედა სულ ამბობს, რომ დაიბადე, გმირი ხარ და სიკვდილს პირველი უთხარი არაო,“ - ამბობს ქეთევან დოჯაშვილი.

წყარო: ​„იმედის დღე“

წაიკითხეთ სრულად