ჯანდაცვის მინისტრის მოადგილე თამარ გაბუნია სინოფარმით აცრილებსა და კოვიდგადატანილებისთვის მიღებულ ახალ გადაწყვეტილებაზე საუბრობს. მისი თქმით, ნებისმიერი ვაქცინით შეიძლება ბუსტერ დოზის გაკეთება, გარდა ასტრაზენეკას ვაქცინისა:
,,სინოფარმით აცრილებს შეუძლიათ მესამე დოზა იგივე ვაქცინა გაიკეთონ, თუმცა მათ ასევე აქვთ საშუალება გაიკეთონ ფაიზერის ვაქცინა. რაც შეეხება კოვიდგადატანილ ადამიანს, თუ ისედაც ვაქცინირებული იყო, მისი იმუნიტეტი მყარი უნდა იყოს და ისინი იმ პირველ ჯგუფში არ შედიან, რომლებსაც ბუსტერ დოზა სჭრიდებათ. თუმცა 6 თვის გასვლის შემდეგ, მიზანშეწონილი იქნება, რადგან ჯერჯერობით მყარი დასაბუთება, რომ ანტისხეულები დიდხანს ნარჩუნდება, არ გვაქვს, '' - აღნიშნა თამარ გაბუნიამ.
რაც შეეხება სინოვაკის და სინოფარმის ეფექტურობას, ჯანდაცვის მინისტრის მოადგილის თქმით, ორივე ვაქცინა ეფექტურია, თუმცა გარკვეული დროის შემდეგ, ანტისხეულების ტიტრი იკლებს, ეს დაახლოებით 6 თვეში ხდება.
„სავალდებულო ვაქცინაციის შესახებ გადაწყვეტილების მიღებას პოლიტიკური პროცესი აყოვნებს,“ - ბიძინა კულუმბეგოვი
ალერგოლოგ-იმუნოლოგმა ბიძინა კულუმბეგოვმა საქართველოში ვაქცინაციის დაბალ ტემპზე ისაუბრა და ის სეგმენტები დაასახელა, რომლებიც ყველაზე მეტად იკავებენ თავს ვაქცინის გაკეთებისგან:
„მინდა გითხრათ ევროკავშირის მაგალითი, სადაც გააანალიზდა, სად არის ვაქცინებისადმი ყოყმანი, რომელ სეგმენტებშია. ადამიანებს, რომლებსაც აქვთ დაბალი განათლების დონე, მათში ყველაზე მეტია ვაქცინებისადმი უნდობლობა. ვაქცინებისადმი უნდობლობა მაღალია ასევე დაუსაქმებელ, უმუშევარი ადამიანების სეგმენტში. ჩვენ ვიცით, რა გავლენების გამო ხდება ეს ძირითადად. არ უნდა გამოვრიცხოთ რელიგიური კომპონენტის ნაწილიც. ჩვენი მართლმადიდებლური ეკლესია ამბობს, რომ არ ვერევით ამ საკითხში, მიუხედავად ამისა, ბევრი ეკლესიის წარმომადგენელი ადამიანებს ეუბნება, რომ არ გაიკეთოთ ეს ვაქცინები.“
ბიძინა კულუმბეგოვის თქმით, მხოლოდ ჯანდაცვის სამინისტრო ვერ გააკეთებს ვაქცინაციის წარმატებულ კამპანიას:
„სახელმწიფოს დააკლდა ის, რომ არ იყო პროაქტიული მოქმედება. არ შეიძლება, რომ მხოლოდ ჯანდაცვის სამინისტრომ ან დაავადებათა კონტროლის ცენტრმა გააკეთოს წარმატებული კამპანია. აქ ყველა ისე უნდა იყოს ჩართული, როგორც დღეს არიან არჩევნების პროცესში ჩართულები. დემოკრატიის შუქურად წოდებული ქვეყნები გარკვეულ სეგმენტებში განიხილავენ სავალდებულო ვაქცინაციას. მე ვფიქრობ, რომ ეს საკითხები კარგად გააზრებულია.“
„ამერიკის შეერთებულმა შტატებმა გადაწყვიტა ფედერალურ სამსახურებში დასაქმებული 80 მილიონამდე ადამიანის სავალდებულო ვაქცინაცია, ჯარის ვაქცინაცია. ბევრმა ქვეყანამ სამედიცინო პერსონალში შემოიღო სავალდებულო ვაქცინაცია. ჩვენმა ქვეყანამაც უნდა მიიღოს გადაწყვეტილება ამ სეგმენტების სავალდებულო ვაქცინაციის. სავალდებულო ვაქცინაციის შესახებ გადაწყვეტილების მიღებას პოლიტიკური პროცესი აყოვნებს და ალბათ, არჩევნების შემდეგ ეს გადაწყვეტილებები უფრო თამამად იქნება მიღებული,“ - აღნიშნულ საკითხებზე ბიძინა კულუმბეგოვმა საქართველოს პირველი არხის გადაცემაში „დღის თემა“ ისაუბრა.
