Baby Bag

,,არასწორი იყო ზოგიერთის შეფასება, რომ კოვიდი მხოლოდ ხანდაზმულების დაავადებაა, ამის გამო ახალგაზრდები ზედმეტად გათამამდნენ და არ იცავდნენ რეგულაციებს''

,,არასწორი იყო ზოგიერთის შეფასება, რომ კოვიდი მხოლოდ ხანდაზმულების დაავადებაა, ამის გამო ახალგაზრდები ზედმეტად გათამამდნენ და არ იცავდნენ რეგულაციებს''

ზოგიერთის შეფასებით, ცუდი პოზიცია იყო, რომ კოვიდი მხოლოდ ხანდაზმულების დაავადებაა. სწორედ ამიტომ საზოგადოების ახალგაზრდა ნაწილი ზედმეტად გათამამდა და არ იცავდა რეგულაციებს, – ამის შესახებ ინფექციური პათოლოგიისა და შიდსის ცენტრის გენერალურმა დირექტორმა, თენგიზ ცერცვაძემ​ საქართველოს პირველ არხს განუცხადა.

მისივე თქმით, „კოვიდ-19“-ისგან გამოწვეული გართულებები საფრთხეს უქმნის როგორც ხანდაზმულებს, ასევე ახალგაზრდებს.

„კონკრეტულად 19 წლის გოგოს გარდაცვალების შემთხვევა ჯერ არ შეგვისწავლია იმიტომ, რომ ეს ჩვენთან არ მომხდარა. დღეს ვაპირებთ ამის გარჩევას. ჩვენ გვესმოდა 32, 34, 36, 15 წლის პაციენტების გარდაცვალების შემთხვევები, ახლა 19 წლის. ზოგადად, ასეთი ტენდენციაა მსოფლიოში, ეს ყოველთვის იყო. ზოგიერთი ამბობდა, ცუდი პოზიცია იყო, რომ კოვიდი მხოლოდ ხანდაზმულების დაავადებაა, ის საფრთხეს არ უქმნის ახალგაზრდებს. ამან ცუდი სამსახური გაუწია საზოგადოებას, რადგან სწორედ ამიტომ საზოგადოების ახალგაზრდა ნაწილი ზედმეტად გათამამდა და არ იცავდა რეგულაციებს და არ ფიქრობდა იმაზე, რომ თვითონ შეიძლება მსუბუქად გადაიტანოს, თუმცა ოჯახში ხანდაზმულ ადამიანებს უქმნის საფრთხეს.

ახლა მარტო ხანდაზმულ ადამიანებზეც არაა საქმე, თვითონ ახალგაზრდებს ექმნებათ საფრთხე. არის კოვიდის გართულებები, გულის უეცარი გაჩერება და სხვა გართულებები, რომელიც საფრთხეს უქმნის როგორც ახალგაზრდებს, ისე ასაკოვნებს. ეს ახალი არ არის, უბრალოდ რადგან ჩვენთან შემთხვევების რაოდენობა გაიზარდა, ასეთ შემთხვევებიც გამოჩნდა, თორემ ეს ყოველთვის იყო.

მაგალითად, ამერიკის ოფიციალური მონაცემებით, ამერიკაში გარდაცვლილთა 20 პროცენტი 60 წელზე ახალგაზრდაა. ჩვენთან ახალგაზრდა ასაკში გარდაცვალება მაინც იშვიათია, ვიდრე უცხოეთში“, – განაცხადა ცერცვაძემ.

მისივე თქმით, საქართველოში ჰოსპიტალის გარეთ კოვიდინფიცირებული მოქალაქეების გარდაცვალების შემთხვევები ცოტაა.

„ძნელად, თუმცა მაინც ვახერხებთ, რომ ავადმყოფი ექიმის გარეშე, ხოლო მძიმე ავადმყოფი ჰოსპიტალიზაციის გარეშე არ დარჩეს. საქართველოში ძალიან ცოტაა ჰოსპიტალის გარეთ გარდაცვალების შემთხვევები. ბინასა და სასტუმროში გარდაცვალების ერთეული შემთხვევებია, 15 შემთხვევაზე მეტი არ იქნება, მაშინ როდესაც უცხოეთში არის ასეული და ათასეული ასეთი შემთხვევა“, – განაცხადა თენგიზ ცერცვაძემ.

შეიძლება დაინტერესდეთ

კორონავირუსთან ბრძოლის ერთ-ერთი მთავარი გამოწვევა: როგორ ვთქვათ უარი ხელების სახესთან მიტანის მავნე ჩვევაზე?

კორონავირუსთან ბრძოლის ერთ-ერთი მთავარი გამოწვევა: როგორ ვთქვათ უარი ხელების სახესთან მიტანის მავნე ჩვევაზე?
კორონავირუსის მასობრივმა გავრცელებამ კიდევ ერთხელ შეგვახსენა, რომ ადამიანები სახეს ხელებით იმაზე ხშირად ვეხებით, ვიდრე საჭიროა. სამედიცინო სფეროს წარმომადგენლები გვარწმუნებენ, რომ აღნიშნულ ჩვევაზე უარის თქმა ვირუსის გავრცელების პრევენციაში ძალიან დაგვეხმარება.

2015 წელს სიდნეის უნივერსიტეტში სამედიცინო ფაკულტეტის სტუდენტებზე ჩატარებულმა კვლევამ აჩვენა, რომ მომავალი ექიმები ერთი საათის განმავლობაში სახეს ხელებით 23-ჯერ მაინც ეხებოდნენ. სტუდენტების უდიდესი ნაწილი რეგულარულად ეხებოდა ხელით თვალებს, ცხვირსა და პირს.

კორონავირუსმა მსოფლიოს მასტაბით უკვე 3500 ადამიანზე მეტი იმსხვერპლა. მედიკოსები გვაფრთხილებენ, რომ მიკრობით დაბინძურებული თითების ნესტოებთან, ტუჩებთან ან თვალებთან მიტანა ვირუსის გავრცელების რისკებს უკიდურესად ზრდის. რესპირატორული ვირუსები ორგანიზმში ლორწოვანი გარსის გავლით ხვდება, რის გამოც ცხვირი, თვალები და პირის ღრუ მიკრობებისგან მაქსიმალურად უნდა დავიცვათ. განსაკუთრებით მნიშვნელოვანია ხელების სისუფთავის შენარჩუნებაზე ზრუნვა. როგორც აღმოჩნდა, ადამიანები სახეს ხელით რეგულარულად ეხებიან. აღნიშნულ ჩვევასთან გამოთხოვება კი იმაზე რთულია, ვიდრე ეს ერთი შეხედვით ჩანს.

სოციალურ ქსელებში აქტიურად ვრცელდება ვიდეორგოლი, რომელშიც კალიფორნიის ჯანდაცვის სისტემის ერთ-ერთი წარმომადგენელი ოფიციალური გამოსვლის დროს სახეს რამდენჯერმე ეხება ხელით. აღნიშნულ გამოსვლაში კი ის საზოგადოებას მიმართავს და ურჩევს, რომ ვირუსის პრევენციის მიზნით მოქალაქეებმა ხელების სახესთან მიტანისგან თავი მაქსიმალურად უნდა შეიკავონ.

ამერიკის შეერთებული შტატების პრეზიდენტმა დონალდ ტრამპმა საჯაროდ განაცხადა, რომ მას მიკრობებისა და ბაქტერიების პანიკური შიში აქვს. „უკვე რამდენიმე კვირაა სახეს ხელებით არ შევხებივარ და ეს ძალიან მომენატრა.“- განაცხადა ტრამპმა. რამდენიმე დღის წინ ინტერნეტში გავრცელდა ფოტო, რომელზეც დონალდ ტრამპია გამოსახული. პრეზიდენტი სახეს ხელით ეხება, რასაც ის, სავარაუდოდ, გაუცნობიერებლად აკეთებს. აღსანიშნავია, რომ აღნიშნული ფოტო თეთრ სახლში კორონავირუსის წინააღმდეგ ბრძოლის საკითხთან დაკავშირებით გამართულ ოფიციალურ შეხვედრაზეა გადაღებული.

ხელებით სახესთან კონტაქტის მავნე ჩვევა, როგორც წესი, ადრეულ ასაკში ყალიბდება. ადამიანები სახეს სხვადასხვა მიზეზით ეხებიან. კვლევებით დგინდება, რომ ხელის სახესთან მიტანა სტრესისა და დისკომფორტის დაძლევაში გვეხმარება. ადამიანების უდიდესი ნაწილი დღის განმავლობაში რამდენჯერმე ეხება სახეს, რასაც გაუცნობიერებლად აკეთებს. სტრესულ სიტუაციებში ხელით სახესთან კონტაქტის რიცხვი მნიშვნელოვნად იზრდება. ინტერნეტში სპეციალური ვებ-გვერდის მოძიებაც შეგიძლიათ, რომელიც ვებ-კამერის გამოყენებით გატყობინებთ, თუ რამდენჯერ შეეხეთ სახეს ხელით.

ხელების სახესთან მიტანის მავნე ჩვევის დაძლევას თუ ვერ ახერხებთ, არ იფიქროთ, რომ გამოსავალი არ არსებობს და ინფექციისგან თავის დაცვას ვერ შეძლებთ. მთავარია, კარგად აცნობიერებდეთ, რომ თქვენ ხელებით სახეს ხშირად ეხებით. უმჯობესია, თუ ყოველთვის თან ატარებთ სპეციალურ ხელსახოცს, რათა ცხვირიდან ლორწოვანი გამონადენის ან დაცემენის შემთხვევაში სახეს შიშველი ხელით არ შეეხოთ.

აუცილებელია ხელების სისუფთავის შენარჩუნებაზეც ზრუნვა. დღეში რამდენჯერმე ხელი თბილი წყლით და საპნით უნდა დაიბანოთ. თუ ხელების დაბანას ვერ ახერხებთ, დეზინფექციისთვის ისეთი სველი ხელსახოცი გამოიყენეთ, რომელსაც 60%-ზე მაღალი ალკოჰოლის შემცველობა აქვს. დაცემინების, დახველების, ცხვირის მოწმენდის ან საჭირო ოთახით სარგებლობის შემდეგ აუცილებელია ხელების საპნითა და თბილი წყლით დაბანა.

ადამიანები ხელით ყოველდღიურად უამრავ მიკრობს ეხებიან. მობილური ტელეფონები, მანქანის გასაღები, კარის სახელური, ფული და სხვა ყოველდღიური ნივთები მიკრობების ყველაზე სახიფათო წყაროებს წარმოადგენს. ხელების სათანადოდ გასუფთავების გარეშე თითების სახესთან მიტანა ბაქტერიების და ვირუსების ორგანიზმში მოხვედრის რისკს მნიშვნელოვნად ზრდის, რის გამოც, თავდაცვის მიზნით სიფრთხილის გამოჩენა თითოეული ადამიანისთვის აუცილებელია. 

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)

მომზადებულია ​cnn.com-ის მიხედვით
თარგმნა ია ნაროუშვილმა
წაიკითხეთ სრულად