Baby Bag

დაწესებულ შეზღუდვებთან დაკავშირებული შესაძლო კითხვები

დაწესებულ შეზღუდვებთან დაკავშირებული შესაძლო კითხვები

დაწესებულ შეზღუდვებთან დაკავშირებული შესაძლო კითხვები

▶ გადაადგილება

🔴 1. იზღუდება თუ არა საქალაქთაშორისო მიმოსვლა?

დიახ, 28 ნოემბრიდან 24 დეკემბრამდე, ასევე 3 იანვრიდან 31 იანვრამდე, იზღუდება მგზავრთა რეგულარული გადაყვანა სამარშრუტო ტაქსებით, ავტობუსებით (M2 და M3 კატეგორიების ავტოსატრანსპორტო საშუალებებით), ასევე რკინიგზით.

საქალაქთაშორისო ტრანსპორტი იმუშავებს 24 დეკემბრიდან 2 იანვრის ჩათვლით.

🔴 2. შესაძლებელია თუ არა კერძო კომპანიამ თანამშრომელთა საქალაქთაშორისო ტრანსპორტირება პერიოდულად განახორციელოს?

დიახ, შესაძლებელია.

🔴 3. შესაძლებელია თუ არა მსუბუქი ავტომობილით გადაადგილება?

დიახ, მსუბუქი ავტომობილით, მათ შორის ტაქსებით გადაადგილება დაშვებულია 05:00 სთ-დან 21:00 სთ-მდე, სპეციალური ნებართვების გარეშე.

🔴 4. შესაძლებელია თუ არა მსუბუქი ავტომობილით საქალაქთაშორისო გადაადგილება?

დიახ, მსუბუქი ავტომობილით ან ტაქსით საქალაქთაშორისო გადაადგილება დასაშვებია სპეციალური ნებართვის გარეშე.

🔴 5. ჩერდება თუ არა მუნიციპალური ტრანსპორტი?

ქ. თბილისის, ქ. ქუთაისის, ქ. ბათუმის, ქ. რუსთავის, ქ. გორის, ქ. ზუგდიდის, ქ. ფოთის, ქ. თელავის მუნიციპალიტეტების ადმინისტრაციულ საზღვრებში საზოგადოებრივი ტრანსპორტის მუშაობა სრულად შეჩერებულია 28 ნოემბრიდან 24 დეკემბრამდე, ასევე 3 იანვრიდან 16 იანვრამდე.

🔴 6. იკრძალება თუ არა ტაქსით გადაადგილება დღის საათებში?

ტაქსით გადაადგილება 05:00 სთ-დან 21:00 სთ-მდე დაშვებულია.

🔴 7. ძალაშია თუ არა აკრძალვა ღამის საათებში გადაადგილების შესახებ?

დიახ, მთელი ქვეყნის მასშტაბით, 21:00 საათიდან 05:00 საათამდე იკრძალება გადაადგილება როგორც ქვეითად, ისე სატრანსპორტო საშუალებით, ასევე საჯარო სივრცეში ყოფნა.

გამონაკლისი იქნება ახალი წლის ღამე - 31 დეკემბრის 21:00-დან, 1 იანვრის 05:00 საათამდე და შობის ღამე - 6 იანვრის 21:00 საათიდან, 7 იანვრის 05:00 საათამდე, რა დროსაც გადაადგილება არ იქნება შეზღუდული.

🔴 8. იზღუდება თუ არა სათხილამურო კურორტებზე (ბაკურიანი, გუდაური, გოდერძი და მესტია) მუნიციპალური ტრანსპორტით გადაადგილება?

დიახ, იზღუდება.

🔴 9. დიდ ქალაქებში დაწესებული შეზღუდვები ვრცელდება თუ არა სოფლებზე და მომიჯნავე დაბა/დასახლებებზე?

მთელი ქვეყნის მასშტაბით მოქმედებს გადაადგილების შეზღუდვა 21:00 სთ-დან 05:00 სთ-მდე, ასევე, საქალაქთაშორისო ტრანსპორტის მოძრაობის შეზღუდვა, კვების ობიექტების, ფიტნესკლუბების და აუზების საქმიანობის შეზღუდვა. დიდ ქალაქებში დაწესებული სხვა შეზღუდვები მოქმედებს მხოლოდ აღნიშნული ქალაქების მუნიციპალიტეტების ადმინისტრაციულ საზღვრებში.

დიდ ქალაქებში დაწესებული სხვა შეზღუდვები მოქმედებს მხოლოდ აღნიშნული ქალაქების საზღვრებში.

🔴 10. შესაძლებელია თუ არა 28 ნოემბრამდე მიღებული საშვის საფუძველზე გადაადგილება?

დიახ, 9 ნოემბრიდან გაცემული ნებართვები კვლავ ძალაშია.

🔴 11. აკრძალულია თუ არა 70 წელს გადაცილებულ პირთა გადაადგილება?

აკრძალული არ არის. რეკომენდებულია 70 წელს გადაცილებულმა პირებმა თავი შეიკავონ გადაადგილებისგან.

▶ ეკონომიკური საქმიანობა

🔴12. რა რეგულაციებია რესტორნებსა და კვების ობიექტებთან დაკავშირებით?

რესტორნები და კვების ობიექტები ქვეყნის მასშტაბით მთლიანად გადადიან მიტანის/გატანის სერვისზე. დასაშვებია:

🔹 პროდუქტის გატანა - ე.წ. takeaway
🔹 მიტანის სერვისი - ე.წ. „დელივერი“
🔹 ავტომობილით გატანა - ე.წ. „დრაივი“

🔴13. რომელ სავაჭრო ობიექტებს ეხება შეზღუდვა?

ყველა სავაჭრო ობიექტი ფუნქციონირებს მხოლოდ დისტანციურად - ადგილზე მიტანის/ადგილიდან გატანის სერვისით, მომხმარებლის სარეალიზაციო სივრცეში დაშვების/წვდომის გარეშე.

ეს შეზღუდვა არ ეხება:

🔹 სურსათის/ცხოველის საკვების, ცხოველის, ცხოველური და მცენარეული პროდუქტების, საყოფაცხოვრებო ქიმიისა და ჰიგიენის, ვეტერინარული პრეპარატების, პესტიციდებისა და აგროქიმიკატების, სათესლე და სარგავი მასალების საცალო რეალიზაციას;
🔹 ელექტროკომუნიკაციის, ელექტროენერგიის, ბუნებრივი გაზის, წყლის, ბენზინის, დიზელის, თხევადი აირის მიწოდებას;
🔹 სამედიცინო დანიშნულების საქონლის, ფარმაცევტული პროდუქტის რეალიზაციას;
🔹 პრესის ჯიხურებს.

🔴 14. იზღუდება თუ არა სავაჭრო ობიექტების მუშაობა მთელი ქვეყნის მასშტაბით?

არა. იზღუდება მხოლოდ ქ. თბილისის, ქ. თელავის, ქ. ბათუმის, ქ. ქუთაისის, ქ. რუსთავის, ქ. გორის, ქ. ფოთის, ქ. ზუგდიდის და სათხილამურო კურორტების (ბაკურიანი, გუდაური, გოდერძი და მესტია) საზღვრებში.

🔴 15. იხურება თუ არა ბაზრები და ბაზრობები?

ქ. თბილისის, ქ. თელავის, ქ. ბათუმის, ქ. ქუთაისის, ქ. რუსთავის, ქ. გორის, ქ. ფოთის, ქ. ზუგდიდის და სათხილამურო კურორტების (ბაკურიანი, გუდაური, გოდერძი და მესტია) საზღვრებში ყველა ტიპის ღია და დახურული ბაზრები/ბაზრობები გადადიან დისტანციურ რეჟიმზე.

აგრარული ბაზრები/ბაზრობები აგრძელებენ ფუნქციონირებას ჯანდაცვის სამინისტროს რეგულაციების დაცვით.

🔴 16. ეხება თუ არა აკრძალვა ფიტნესდარბაზებსა და საცურაო აუზებს?

ფიტნესდარბაზებისა და საცურაო აუზების ფუნქციონირება ჩერდება მთელი ქვეყნის მასშტაბით.

🔴 17. აგრძელებენ თუ არა ფუნქციონირებას სილამაზის სალონები და ესთეტიკის ცენტრები?

სილამაზის სალონები და ესთეტიკის ცენტრები აგრძელებენ ფუნქციონირებას ჯანდაცვის სამინისტროს რეგულაციების დაცვით.

🔴 18. დასაშვებია თუ არა საკურიერო მომსახურება, ე.წ „დელივერი სერვისი“?

ე.წ. „დელივერი სერვისი“ დასაშვებია მთელი ქვეყნის მასშტაბით.

🔴 19. არის თუ არა შესაძლებელი საკურიერო მომსახურების განხორციელება 21:00 სთ-დან 05:00 სთ-მდე პერიოდში?

საკურიერო მომსახურების განსახორციელებლად გადაადგილება დასაშვებია მხოლოდ შესაბამისი ნებართვის არსებობის შემთხვევაში.

🔴 20. აგრძელებენ თუ არა მუშაობას ბანკები/სავალუტო ჯიხურები/მიკროსაფინანსო ორგანიზაციები?

ბანკების, მიკროსაფინანსო ორგანიზაციებისა და სავალუტო ჯიხურების ფუნქციონირება არ იზღუდება.

🔴 21. შესაძლებელია თუ არა კვების ობიექტებზე ადგილზე მისვლა და საკვების გატანა?

დაშვებულია კვების ობიექტებიდან პროდუქტის გატანა ე.წ. takeaway. კერძოდ, მომხმარებლის კვების ობიექტის შენობაში შესვლა და პროდუქტის გატანა.

▶ სასწავლო პროცესი

🔴 22. რა სახის რეგულაცია ვრცელდება სკოლებზე, უნივერსიტეტებსა და პროფესიულ სასწავლებლებზე?

ქ. თბილისის, ქ. თელავის, ქ. ბათუმის, ქ. ქუთაისის, ქ. რუსთავის, ქ. გორის, ქ. ფოთის, ქ. ზუგდიდის საზღვრებში სკოლები, პროფსასწავლებლები და უმაღლესი საგანმანათლებლო დაწესებულებები (სამედიცინო პროგრამების გარდა) სრულად გადადიან დისტანციურ რეჟიმზე.

🔴 23. შესაძლებელია თუ არა ტრენინგების, კონფერენციების, სემინარების ორგანიზება მონაწილეთა ფიზიკური დასწრებით?

მთელი ქვეყნის მასშტაბით, ყველა სახის კონფერენციის, ტრეინინგის ჩატარება დასაშვებია მხოლოდ ონლაინ ფორმატით.

🔴 24. დასაშვებია თუ არა კულტურულ/სპორტული ღონისძიებები?

კულტურული და სპორტული ღონისძიებების ჩატარება დასაშვებია მხოლოდ ონლაინ ფორმატით. გასართობი ღონისძიებების ჩატარება იზღუდება მთელი ქვეყნის მასშტაბით.

🔴 25. ვრცელდება თუ არა აკრძალვები სახელოვნებო და სპორტულ წრეებზე?

დიახ, სახელოვნებო, სპორტული წრეები და სტუდიები აჩერებენ მუშაობას ქვეყნის მასშტაბით.

🔴 26. აგრძელებენ თუ არა მუშაობას საბავშვო ბაღები?

კერძო და საჯარო საბავშვო ბაღები აჩერებენ მუშაობას მთელი ქვეყნის მასშტაბით.

▶ სამთო სათხილამურო კურორტები

🔴 27. იზღუდება თუ არა გადაადგილება სამთო კურორტებზე?

ბაკურიანში, გუდაურში, გოდერძისა და მესტიაში იკრძალება 21:00 სთ -დან 05:00 სთ-მდე პირთა გადაადგილება როგორც ქვეითად, ისე სატრანსპორტო საშუალებით, ასევე საჯარო სივრცეში ყოფნა.

🔴 28. დამატებით რა შეზღუდვები წესდება ბაკურიანში, გუდაურში, გოდერძისა და მესტიაში?

აღნიშნულ კურორტებზე სასტუმროები ფუნქციონირებენ მხოლოდ საკარანტინე სივრცეების მოწყობისთვის.
იზღუდება სათხილამურო ტრასების და საბაგიროების ფუნქციონირება. არ ფუნქციონირებენ კვების ობიექტები.

▶ სხვა კითხვები

🔴 29. რა სანქციაა გათვალისწინებული დაწესებული აკრძალვების დარღვევის შემთხვევაში?

დარღვევის შემთხვევაში ფიზიკური პირი/ინდ. მეწარმე დაჯარიმდება 2 000 ლარით, ხოლო იურიდიული პირი - 10 000 ლარით.

🔴 30. როდის შედის ძალაში დაწესებული შეზღუდვები?

შეზღუდვები ამოქმედდება 2020 წლის 28 ნოემბრიდან.

შეიძლება დაინტერესდეთ

კორონავირუსის გავრცელების გამო იაპონიის სკოლებში სწავლა აპრილამდე გადაიდო

კორონავირუსის გავრცელების გამო იაპონიის სკოლებში სწავლა აპრილამდე გადაიდო

იაპონიის პრემიერ-მინისტრ შინზო აბეს ბრძანებით, იაპონიის ყველა დაწყებით, არასრულ საშუალო და საშუალო სკოლაში სწავლის პროცესი აპრილის დასაწყისამდე გადაიდო. 

„გადაწყვეტილება ბავშვების ვირუსისგან დასაცავად მივიღეთ. ამ მხრივ მომდევნო ორი კვირა განსაკუთრებით სახიფათოა, რის გამოც სწავლის გადადება მოგვიხდა,“ - აღნიშნული განცხადება შინზო აბემ მინისტრთა კაბინეტის წევრებთან შეხვედრის დროს გააკეთა.

იაპონიის პრემიერის განცხადებით, მისთვის მთავარი პრიორიტეტი ბავშვების უსაფრთხოებისა და ჯანმრთელობის დაცვაა. ჯანდაცვის მინისტრის თქმით, აღნიშნული შეზღუდვები ბავშვთა დღის ცენტრებზე არ ვრცელდება. პრემიერ-მინისტრის მოულოდნელი განცხადების მიზეზი იაპონიაში კორონავირუსით დაინფიცირებულ ადამიანთა რიცხვის სწრაფი ზრდა გახდა. ქვეყნის ტერიტორიაზე ჯამში 200-მდე ვირუსის მატარებელი ადამიანია აღრიცხული, გარდა ამისა, იოკოჰამას პორტში საკრუიზო ხომალდზე დაინფიცირებული მგზავრების და ეკიპაჟის წევრების რიცხვი უკვე 700-ს უტოლდება.

ჰოკაიდოს 1600-მდე სკოლა ადგილობრივი ხელისუფლების გადაწყვეტილებით ვირუსის გავრცელების თავიდან აცილების მიზნით დროებით დაიხურა. ჰოკაიდოს საგანმანათლებლო კოლეგიამ ადგილობრივ თვითმმართველობას დახმარების თხოვნით მიმართა, რადგან აღნიშნულ რეგიონში ვირუსით დაინფიცირების 50-მდე შემთხვევა დაფიქსირდა. დაავადებულთა შორის სკოლის მოსწავლეებიც იყვნენ. ადგილობრივი ხელისუფლების წარმომადგენლების თქმით, ისინი ყველა ღონეს იხმარენ, რათა ვირუსის გავრცელებას ხელი შეუშალონ.

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)

ტოკიოში მდებარე ოჩანომიზუს უნივერსიტეტმა მისი სასკოლო ფილიალების დროებითი დახურვის შესახებ ოფიციალური განცხადება უკვე გამოაქვეყნა. აღსანიშნავია, რომ ოჩანომიზუს ერთ-ერთ სასკოლო ფილიალში იმპერატორ ნარუჰიტოს 13 წლის ძმისწული პრინცი ჰისაჰიტოც ირიცხება. სკოლის ოფიციალური წარმომადგენლების თქმით, სასწავლო პროცესის აღნიშნული ვადით შეწყვეტა იაპონიაში უპრეცედენტო შემთხვევაა.

სკოლების უდიდესი ნაწილი დასაქმებულ მშობლებს გარკვეულ ვადას აძლევს, რათა მათ სამსახურიდან გათავისუფლება დროულად შეძლონ. დასაქმებული მშობლების დიდი ნაწილი აცნობიერებს, რა სირთულეებთან იქნება დაკავშირებული სკოლებიდან დროებით გათავისუფლებული ბავშვების მოვლა. მიუხედავად ამისა, ისინი თვლიან, რომ სამსახურის საქმეების გადადება ამ შემთხვევაში აუცილებელია, რადგან ვირუსის შესახებ საფუძვლიანი ინფორმაცია ჯერჯერობით არავის აქვს.

თითოეულ მასწავლებელს, რომელსაც ვირუსით დასნებოვნების საფრთხე ემუქრება, შესაბამისი კვლევები ჩაუტარდება. სკოლებში დეზინფექციის პროცედურების დაწყებასთან დაკავშირებით მუნიციპალიტეტები გადაწყვეტილებებს თავად მიიღებენ. 5 მარტს ჰოკაიდოს თითოეულ სკოლაში ინფექციურ დაავადებებთან დაკავშირებით სპეციალური სემინარი ჩატარდება, რათა მუნიციპალური საგანმანათლებლო დაწესებულებები ვირუსულ ინფექციებთან ბრძოლისთვის მზად იყვნენ.

მუნიციპალიტეტები ცენტრალური ხელისუფლების მოთხოვნებს ითვალისწინებენ, რის გამოც სკოლებში სწავლა დროებით გადაიდება. მთავრობის ინიციატივით, ვირუსის გავრცელების არეალში ბავშვთა დღის ცენტრებიც დაიხურება.

ჰოკაიდოს ერთ-ერთ სკოლაში მასწავლებლის დაინფიცირების შემთხვევა დაფიქსირდა, რის გამოც აღნიშნულ სასწავლებელში სწავლა 6 მარტამდე შეაჩერეს. ჰოკაიდოს ტერიტორიაზე კორონავირუსის დიაგნოზი დაწყებითი სკოლის 2 მოსწავლეს და სკოლის ავტობუსის მძღოლსაც დაუსვეს. 

მომზადებულია www.ja​pantimes.co.jp-ის მიხედვით

თარგმნა ია ნაროუშვილმა

წაიკითხეთ სრულად