Baby Bag

„ამ ვადაზე ადრე ძალიან ნაკლებია იმის შანსი, რომ ვირუსი გამოვლინდეს“ - ინფექციონისტი მაია ბუწაშვილი საუბრობს, როდის უნდა ჩატარდეს კოვიდზე ტესტირება

„ამ ვადაზე ადრე ძალიან ნაკლებია იმის შანსი, რომ ვირუსი გამოვლინდეს“ - ინფექციონისტი მაია ბუწაშვილი საუბრობს, როდის უნდა ჩატარდეს კოვიდზე ტესტირება
როდის უნდა ჩატარდეს კოვიდზე ტესტირება? - აღნიშნულ თემაზე ინფექციონისტი მაია ბუწაშვილი სოციალურ ქსელში წერს. გთავაზობთ მის ნათქვამს სიტყვა-სიტყვით:
„თუ კოვიდზე ტესტირების მიზანია, დავადგინოთ, ხომ არ დავინფიცირდით კორონავირუსის მქონესთან კონტაქტით, ტესტირება სასურველია, ჩატარდეს ბოლო კონტაქტიდან არა უადრეს 5-7 დღისა. ამ ვადაზე ადრე ძალიან ნაკლებია იმის შანსი, რომ ვირუსი გამოვლინდეს. თუ პასუხი დადებითია, ეს, ცხადია, ადასტურებს კოვიდს, მაგრამ თუ პასუხი უარყოფითია, კიდევ რჩება რისკი, რომ ბოლო კონტაქტიდან 12 დღის ჩათვლით გამოვლინდეს ინფექცია. ტესტირება უნდა ჩატარდეს ცხვირ-ხახის ნაცხის გამოკვლევით PCR-ით ან ანტიგენით.

​ზოგჯერ ადამიანები ამ მიზნით ანტისხეულების ტესტს იტარებენ. საქმე ისაა, რომ ანტისხეულების ტესტის გაკეთებას ამჟამად მიმდინარე ინფექციის დასადგენად არა აქვს აზრი იშვიათი გამონაკლისების გარდა, როცა PCR ტესტი უარყოფითია და ეჭვი მაინც არსებობს, რომ კოვიდთან გვაქვს საქმე.

​რაც შეეხება ანტისხეულების ტესტის გაკეთების ვადებს - ხშირად ამ ტესტს ადამიანები ნაადრევად იკეთებენ და როდესაც პასუხი უარყოფითია, უკვირთ, რატომ არ აღმოაჩნდათ. ანტისხეულების ტესტის მთავარი ამოცანაა გამოავლინოს გადატანილი ინფექცია. IgM და IgG ანტისხეულები ჩნდება ინფექციის დაწყებიდან 1-3 კვირის განმავლობაში, ანუ შეიძლება პირველივე კვირას გაჩნდეს, მაგრამ ზოგჯერ მათ გამომუშავებას შესაძლოა, 3 კვირაც დაჭირდეს. ამიტომ ანტისხეულების ტესტის გაკეთება სჯობია არ ვიჩქაროთ და შესაძლო ინფიცირების პერიოდიდან 3 კვირა მაინც დავიცადოთ.

​თუმცა ადამიანთა საკმაოდ დიდ ნაწილს კოვიდის გადატანის მიუხედავად შეიძლება, ანტისხეულები საერთოდ არ გამოუმუშავდეს და იმუნური პასუხი სხვა მექანიზმით განუვითარდეს. ამიტომ ანტისხეულების არარსებობა ბოლომდე ვერ გამორიცხავს იმ ფაქტს, რომ ადამიანმა კორონავირუსი გადაიტანა.

​ასევე ხშირად გვეკითხებიან, სიმპტომების დაწყებიდან როდის სჯობია PCR ტესტის ჩატარება. სიმპტომების გამოვლენის პირველივე დღეს PCR ტესტი შეიძლება ცრუ უარყოფითი იყოს. ტესტით ვირუსის გამოვლენის შანსი მნიშვნელოვნად მატულობს სიმპტომების დაწყებიდან მესამე დღეს.

​არის შემთხვევები, როდესაც ადამიანი ისე გადაიტანს ვირუსს, რომ სიმპტომები საერთოდ არ აღენიშნება. ზოგჯერ ასეთ ადამიანებს შემთხვევით ტესტირების დროს უვლინდებათ PCR დადებითი. ხშირად ვირუსის კონცენტრაცია ასეთ დროს დაბალია და მაგალითად, მეორე ან მესამე დღეს გადამოწმების შემთხვევაში, ვირუსი აღარ ვლინდება ხოლმე. ასეთ დროს ადამიანები ედავებიან ლაბორატორიას, სადაც დადებითი შედეგი გასცეს. სინამდვილეში კი, შეიძლება ვირუსი უბრალოდ უკვე გაუქრათ და ლაბორატორია, სადაც დადებითი პასუხი გაიცა, სრულიად მართალია.

​მოკლედ, მაგალითად, C ჰეპატიტის PCR ტესტისგან განსხვავებით, რომელიც ძალიან სწორხაზოვანია და თუ ადამიანი ინფიცირებულია, ცალსახად იძლევა დადებით შედეგს, კოვიდის შემთხვევაში შეიძლება ძალიან დიდი მნიშვნელობა ჰქონდეს გამოკვლევის ვადებს და გამოკვლევის შედეგი მთლიანად დამოკიდებული იყოს ტესტირების დროის სწორ შერჩევაზე“, - წერს ინფექციონისტი მაია ბუწაშვილი.

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედე​ბის ჯგუფი“)

ყველამ უნდა მოიხადოს თუ არა კოვიდ-19? - აქტუალურ კითხვას ხათუნა ზახაშვილი პასუხობს
უნდა მოიხადოს თუ არა კოვიდ-19 ყველამ? - აქტუალურ კითხვას საქართველოს პირველი არხის გადაცემაში​ „პირადი ექიმი - მარი მალაზონია“ დაავადებათა კონტროლის ეროვნული ცენტრის გადამდებ დაავადებათა დეპ...
,,სისხლის გასათხელებლად ეს ნაზავი სახლში შეგიძლიათ მოამზადოთ'' - ნახეთ ოთარ ტატიშვილის რეც...
​თრომბოზი, კოვიდინფექციის გართულება - როგორ ავირიდოთ სისხლის შესქელება, რომელი პროდუქტები უნდა მივიღოთ პრევენციისთვის? ნახეთ ვიდეო, სადაც ექიმი ოთარ ტატიშვილი გასწავლით, თუ რა პროდუქტები უნდ...
,,წყლის ბუყბუყი'' - ფილტვების მარტივი სავარჯიშო
​რა უფრო სასარგებლოა: ბუშტის გაბერვა თუ წყლის ბუყბუყი? - აღნიშნულ თემაზე გადაცემაში ,,პირადი ექიმი'' პულმონოლოგი, პროფესორი თამაზ მაღლაკელიძე საუბრობს. ნახეთ ფილტვების მარტივი სავარჯიშო...

შეიძლება დაინტერესდეთ

კორონავირუსისგან თავის დასაცავად ხელის ყველა სადეზინფექციო საშუალება არ გამოგადგებათ - რომელი მათგანია ყველაზე ეფექტური?

კორონავირუსისგან თავის დასაცავად ხელის ყველა სადეზინფექციო საშუალება არ გამოგადგებათ - რომელი მათგანია ყველაზე ეფექტური?

კორონავირუსის გავრცელებასთან ერთად საზოგადოებაში ხელის სადეზინფექციო საშუალებებზე მოთხოვნა მნიშვნელოვნად გაიზარდა. ზოგიერთ ქვეყანაში აფთიაქებმა და სავაჭრო დაწესებულებებმა ლიმიტიც კი დააწესეს, რომელიც მყიდველს ერთჯერადად მხოლოდ გარკვეული რაოდენობით სადეზინფექციო საშუალების შეძენის ნებას აძლევს. მართალია, აღნიშნული საშუალებები ინფექციებისგან გვიცავს, მაგრამ კორონავირუსის წინააღმდეგ ყველა მათგანი ნამდვილად არ გამოგვადგება.


სხვა ვირუსული რესპირატორული ინფექციების მსგავსად, კორონავირუსიც ადამიანიდან ადამიანს ჰაერ-წვეთოვანი გზით გადაეცემა. კორონავირუსით დაინფიცირება მაშინაც არის შესაძლებელი, თუ ვირუსით დაბინძურებულ ზედაპირს ხელით შეეხებით, შემდეგ კი ხელს სახესთან მიიტანთ. ადამიანები ხელით პირს, ცხვირს ან თვალებს რეგულარულად ეხებიან. უახლესი კვლევებით დგინდება, რომ ადამიანს სახესთან ხელი ერთი საათის მანძილზე საშუალოდ 23-ჯერ მაინც მიაქვს.

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)

ხელის ჰიგიენის ოქროს სტანდარტად კვლავ ხელების საპნითა და თბილი წყლით დაბანა რჩება. ალკოჰოლის შემცველი ეფექტური ხელის სადეზინფექციო საშუალებები ალკოჰოლს განსხვავებული დოზებით შეიცავს (დაახლოებით, 60%-დან 95%-მდე). როგორც წესი, მსგავსი ტიპის სადეზინფექციო საშუალებებში იზოპროპილის სპირტს, ეთილის სპირტს ან პროპანოლს იყენებენ. ცნობილია, რომ ალკოჰოლი მიკრობებსა და ბაქტერიებს ანადგურებს.

უალკოჰოლო სადეზინფექციო საშუალებებში, როგორც წესი, მეოთხედური ამონიუმის ნაერთებს (უმეტესად ბენზალკონიუმის ქლორიდს) გამოიყენებენ. აღნიშნული ნაერთების დახმარებით მიკრობების რაოდენობის შემცირება შესაძლებელია, თუმცა ბენზალკონიუმის ქლორიდი ამ მხრივ ისეთი ეფექტური არ არის, როგორიც ალკოჰოლი.

ალკოჰოლის შემცველი ხელის სადეზინფექციო საშუალებები არამხოლოდ ბაქტერიებს ანადგურებს, მათი გამოყენება ძალიან ეფექტურია ვირუსების პრევენციის მიზნითაც. მსგავსი ტიპის სადეზინფექციო საშუალებების გამოყენება წარმატებით გიცავთ H1N1-ის, რინოვირუსის, A ჰეპატიტის, აივ ინფექციისა და კორონავირუსისგანაც.

ალკოჰოლი ვირუსის ცილოვან გარსს აზიანებს. აღნიშნული გარსი ვირუსის გამრავლებისა და გადარჩენისთვის უმნიშვნელოვანესია. სადეზინფექციო საშუალება ვირუსის მოკვლას მხოლოდ იმ შემთხვევაში შეძლებს, თუ მას 60%-ზე მაღალი ალკოჰოლის შემცველობა აქვს. ის სადეზინფექციო გელები, რომლებშიც ალკოჰოლის შემცველობა 60%-ზე დაბალია, ბაქტერიებსა და მიკრობებს ვერ კლავს, მაგრამ მათ გამრავლებას ხელს უშლის.

60%-ზე მაღალი ალკოჰოლის შემცველობის მქონე სადეზინფექციო საშუალებები ყველა ტიპის ვირუსს ვერ ანადგურებს. კვლევებით დასტურდება, რომ ვირუსების წინააღმდეგ ბრძოლის დროს ხელების საპნით დაბანა გაცილებით ეფექტურია, ვიდრე ხელის სადეზინფექციო საშუალებების გამოყენება.

კორონავირუსის გავრცელების პარალელურად წარმოქმნილი სადეზინფექციო საშუალებების დეფიციტის გამო, ადამიანებმა მსგავსი ხსნარების დამზადება ოჯახურ გარემოში დაიწყეს. გახსოვდეთ, რომ სახლში დამზადებული სადეზინფექციო საშუალება ვირუსის წინააღმდეგ ბრძოლაში ძალიან დაბალი ეფექტურობით ხასიათდება. თუ ხელი შესამჩნევად დაბინძურებულია, სადეზინფექციო საშუალების ნაცვლად წყალი და საპონი გამოიყენეთ. კვლევებით დასტურდება, რომ ხელების წყლით და საპნით დაბანა არამხოლოდ ბაქტერიებს კლავს, კანს ჭუჭყსაც ეფექტურად აცლის.

დაცემინებისას ან დახველებისას სახეზე ხელების აფარების შემთხვევაში ხელის სადეზინფექციო საშუალების გამოყენება ნაკლებად ეფექტურია. როდესაც ხელზე ლორწო ხვდება, ის მიკრობებს დაზიანებისგან იცავს, რის გამოც მხოლოდ სადეზინფექციო საშუალების გამოყენებით მათ განადგურებას ვერ შეძლებთ.

კორონავირუსის გავრცელების თავიდან ასაცილებლად ყველაზე ეფექტურ საშუალებად კვლავ ხელის საპნითა და ცხელი წყლით დაბანა რჩება. ვირუსისგან თავის დასაცავად ხელის სახესთან მიტანის მავნე ჩვევაზე უარის თქმაც საუკეთესო გადაწყვეტილებაა. როდესაც წყალსა და საპონზე ხელი არ მიგიწვდებათ, ალკოჰოლის 60%-იანი შემცველობის მქონე ხელის სადეზინფექციო საშუალებების გამოყენება ძალიან ეფექტური ალტერნატივაა. როდესაც ხელს სადეზინფექციო საშუალებით ისუფთავებთ, ის ხელის გულზე, ხელის უკანა მხარეს, ფრთჩხილებსა და თითებს შორის არსებულ სივრცეზე კარგად უნდა დაიტანოთ. სადეზინფექციო საშუალებით ხელი სულ ცოტა 20 წამის მანძილზე მაინც უნდა დაიმუშავოთ, რათა დარწმუნდეთ, რომ ჰიგიენის წესებს სათანადოდ იცავთ. 

მომზადებულია ​thejakartapost.com​-ის მიხედვით

თარგმნა ია ნაროუშვილმა 
წაიკითხეთ სრულად