Baby Bag

კორონავირუსისგან განკურნებულ ადამიანებს ფსიქიკური აშლილობის განვითარების მაღალი რისკი აქვთ - უახლესი კვლევები

კორონავირუსისგან განკურნებულ ადამიანებს ფსიქიკური აშლილობის განვითარების მაღალი რისკი აქვთ - უახლესი კვლევები

​მკვლევარები გვარწმუნებენ, რომ კოვიდ-19-ისგან გამოჯანმრთელებული ადამიანები ფსიქიკური ჯანმრთელობის პრობლემების წინაშე დგებიან. ამ კუთხით ისინი რისკ-ჯგუფს მიეკუთვნებიან. კვლევებმა აჩვენა, რომ კოვიდ-19-ის დიაგნოზის დასმიდან 90 დღის განმავლობაში ადამიანების 20 %-ს ფსიქიკური ჯანმრთელობის სერიოზული პრობლემები უვლინდება.

ოქსფორდის უნივერსიტეტის​ მკვლევარებმა აღმოაჩინეს, რომ კოვიდისგან გამოჯანმრთელებულ ადამიანებს უმეტესად შფოთვითი აშლილობა, დეპრესია და ინსომნია აწუხებთ. მკვლევარების მტკიცებით, კოვიდ-19 ზრდის დემენციის განვითარების რისკებს.

მეცნიერები სამედიცინო სფეროს წარმომადგენლებს პრობლემის სიღრმისეული შესწავლისკენ მოუწოდებენ და მედიკოსებს ურჩევენ სასწრაფოდ გამოძებნონ პრევენციის გზები და სამკურნალო საშუალებები განკურნებული პაციენტების დასახმარებლად.

ამერიკის შეერთებულ შტატებში 62 000 -ზე მეტ განკურნებულ პაციენტს ფსიქიკური პრობლემები აღმოაჩნდათ, რაც საკმაოდ მაღალი რიცხვია. კოვიდ-19-ის დიაგნოზის დასმიდან პირველი სამი თვის მანძილზე ყოველი 5 განკურნებული პაციენტიდან ერთს შფოთვა და დეპრესია აღენიშნება. აღნიშნული სამი თვის განმავლობაში სხვა ადამიანებთან შედარებით კოვიდ-19-ისგან განკურნებულებს ორჯერ უფრო ხშირად უსვამდნენ ფსიქიკური ჯანმრთელობის პრობლემის დიაგნოზს.

​კვლევებით ასევე დადგინდა, რომ ადამიანებს, რომლებსაც მენტალური ჯანმრთელობის პრობლემები აწუხებთ, კოვიდ-19-ით დაინფიცირების 65%-ით მეტი რისკი აქვთ. აღნიშნული კვლევის შედეგები ჟურნალ „ლანცეტში“ გამოქვეყნდა.

​მეცნიერები ამტკიცებენ, რომ კოვიდ-19 ნეგატიურ ზემოქმედებას ახდენს ადამიანის ტვინზე. ის ფსიქიკური აშლილობების განვითარების რისკსაც ზრდის.

ის, რომ მენტალური ჯანმრთელობის პრობლემის მქონე ადამიანებს კოვიდ-19-ით დაინფიცირების მეტი რისკი აქვთ, ლონდონის კინგსის კოლეჯში ჩატარებულმა კვლევებმაც დაადასტურა. კოვიდ-19 ცენტრალურ ნერვულ სისტემაზე ზემოქმედებს და ის ფსიქიკური აშლილობების განვითარების რისკს მნიშვნელოვნად ზრდის.

მომზადებულია​ voanews.com-ის მიხედვით

თარგმნა ია ნაროუშვილმა

არ დაგავიწყდეთ !!!

დაემატეთ ჯგუფში საბავშვო რეცეპტები

„3 წლამდე ასაკის ბავშვი 24 საათიანი ჰიპერთერმიის შემდეგ აუცილებლად აჩვენეთ ექიმს“
პედიატრი ინგა მამუჩიშვილი გრიპის ვირუსთან დაკავშირებით პოსტს სოციალურ ქსელში აქვეყნებს. გთავაზობთ მის ნათქვამს სიტყვა-სიტყვით:„გრიპის ვირუსი მკვეთრი აქტივაციის ფაზაში შედის და არამარტო გრიპის ვირ...

შეიძლება დაინტერესდეთ

9 ეფექტური შინაურული მეთოდი ჩვილებში ხველის სამკურნალოდ

9 ეფექტური შინაურული მეთოდი ჩვილებში ხველის სამკურნალოდ

ქრონიკული ხველა ჩვილისთვის დამქანცველია. გარდა ამისა, როდესაც ბავშვს რაღაც აწუხებს, მშობლები განსაკუთრებით ღელავენ და შიშობენ, რომ მის ჯანმრთელობას სერიოზული საფრთხე დაემუქრება. ხველა პატარებს ხშირად აწუხებთ, მაგრამ თუ ის ქრონიკულ სახეს იღებს, მკურნალობისთვის გარკვეულ ზომებს აუცილებლად უნდა მიმართოთ. მსგავს შემთხვევაში შეგიძლიათ, დახმარებისთვის პედიატრს მიაკითხოთ და მისი რეკომენდაციების მიხედვით იმოქმედოთ ან ხველისგან განკურნების შინაურული და უსაფრთხო მეთოდების გამოყენება სცადოთ.

ჩვილებთან სამკურნალო საშუალებების გამოყენებისას განსაკუთრებული სიფრთხილის გამოჩენა გმართებთ. აუცილებლად უნდა იცოდეთ, რომ საშუალება, რომელსაც ბავშვის განკურნებისთვის იყენებთ, მისთვის აბსოლუტურად უსაფრთხოა. ჩვენს სტატიაში იმ შინაურულ მეთოდებს გაგაცნობთ, რომელთა დახმარებით ბავშვს ხველებას წარმატებით შეუჩერებთ და რაც მთავარია, ამას ყოველგვარი გვერდითი ეფექტების გამოვლენის გარეშე შეძლებთ.

9 საუკეთესო შინაურული მეთოდი ჩვილებში ხველის სამკურნალოდ

• დედის რძე

ხშირი ხველა ყელს ძალიან აღიზიანებს. მსგავსი გაღიზიანების თავიდან ასაცილებლად ჩვილის ორგანიზმმა ჰიდრატაციის მაღალი ხარისხის შენარჩუნება უნდა შეძლოს. 6 თვემდე ასაკის ბავშვის გაღიზიანებულ ყელს შეგიძლიათ დედის რძით უმკურნალოთ. დღის განმავლობაში პატარა მაქსიმალურად ხშირად უნდა გამოკვებოთ, რათა მისმა ორგანიზმმა სითხის საჭირო მარაგი შეივსოს. დედის რძე ბავშვისთვის სრულიად უსაფრთხოა. ძუძუთი კვება პატარას განწყობას გამოუკეთებს, ხოლო რძე გაღიზიანებულ ყელს დააცხრობს, რაც ხველით გამოწვეულ დისკომფორტს მნიშვნელოვნად შეამცირებს. დედის რძე სპეციალურ ანტისხეულებს შეიცავს, რომლებიც ვირუსებსა და ბაქტერიებს წარმატებით ებრძვიან. რძეს ჩვილის რესპირატორული დაავადებებისგან დაცვის უნიკალური უნარი აქვს. როდესაც პატარას ხველა აწუხებს, მისი განკურნებისთვის თქვენი პირველი არჩევანი ყოველთვის დედის რძე უნდა იყოს.

• მცირე რაოდენობით წყალი

ბავშვს, რომელიც 6 თვეზე მეტი ასაკისაა, დღის განმავლობაში რამდენჯერმე მიეცით მცირე რაოდენობით სასმელი წყალი. მისი დახამრებით ყელი დაგროვილი ლორწოსგან მარტივად გათავისუფლდება და ტენიანობასაც შეინარჩუნებს. თუ შეამჩნევთ, რომ ბავშვი ხშირად ახველებს, პატარას საკვებ კოვზზე მცირე რაოდენობით წყალი დაასხით და ბავშვს დაალევინეთ.

• თბილი სითხეები

6 თვეზე მეტი ასაკის ბავშვს შეგიძლიათ ხშირად მისცეთ თბილი ბოსტნეულისა და ხორცის ბულიონი, სახლში მომზადებული წვნიანი ან პიურე. არასდროს მიაწოდოთ პატარას ცხელი სითხე. უპირატესობა ნელ-თბილ ან ოთახის ტემპერატურის მქონე საკვებსა და სასმელს მიანიჭეთ. თბილი სითხეები ჩვილს გაღიზიანებულ ყელს დაუმშვიდებს და ხველებასაც მნიშვნელოვნად შეუმცირებს.

• თბილი საკვები

ბავშვი, რომელიც სოლიდურ კვებაზე გყავთ, თბილი და მსუბუქი ტექსტურის მქონე საკვებით ხშირად გაანებივრეთ. კარტოფილის ან ბარდის პიურე, მოხარშული ქათმისა და სტაფილოს კერძი ამ შემთხვევაში საუკეთესო არჩევანია. თბილი საკვები, რომელსაც მსუბუქი ტექსტურა აქვს ყელს სწრაფად დაამშვიდებს, რაც ბავშვს გახშირებული ხველისგან თავის დაღწევაში დაეხმარება. 

• თაფლი (მხოლოდ ერთ წელს გადაცილებული ასაკის ბავშვისთვის)

ერთ წელს გადაცილებული ასაკის ბავშვს ხველის შემოტევის შემთხვევაში შეგიძლიათ 2-5 მილილიტრი თაფლი მისცეთ. თაფლი ლორწოს რაოდენობას ამცირებს და ხველასაც აცხრობს. ამერიკის პედიატრთა აკადემიის ცნობით თაფლს ხველის ინტენსივობის შემცირება ხველების საწინააღმდეგო სიროფებზე უკეთ შეუძლია. გახსოვდეთ, რომ 1 წლამდე ასაკის ბავშვებისთვის თაფლი უსაფრთხო პროდუქტი არ არის. კლოსტრიდიუმ ბოტულინუმის ანაერობული ბაქტერიის სპორები, რომლებიც თაფლშიც გვხვდება, ჩვილის ორგანიზმში მოხვედრისას შინაგანი ინფექციის განვითარებას იწვევს. ჩვილს ბოტულიზმის განვითარების მაღალი რისკი აქვს, რის გამოც დაუშვებელია, რომ 12 თვემდე ასაკის ბავშვს თაფლი მისცეთ. ერთ წელს გადაცილებული ბავშვის ორგანიზმს აღნიშნული ბაქტერია ვეღარ ერევა, რის გამოც 12 თვეზე მეტი ასაკის ბავშვისთვის ხველის სამკურნალოდ თაფლის მიცება სავსებით დასაშვებია.

• ჰაერის დამატენიანებელი

დატენიანებული ჰაერით სუნთქვა ძალიან სასიამოვნოა, გარდა ამისა, ის გაღიზიანებული ყელის დამშვიდებას და ხველის შემცირებასაც უწყობს ხელს. ნუ შეიძენთ ისეთ დამატენიანებელს, რომელიც ოთახს ადუღებული წყლის ორთქლით ატენიანებს, რათა ჩვილის უცაბედი დამწვრობა თავიდან აიცილოთ. უპირატესობა ტრადიციულ დამატენიანებელს მიანიჭეთ, რომელიც ცივი ტენიანობის პრინციპით მუშაობს.
• ადგილობრივი მოხმარების ხველის ჩამხშობი საშუალებები

ბავშვებში ხველის დასამარცხებლად შეგიძლიათ ადგილობრივი მოხმარების ხველის ჩამხშობი საშუალებები გამოიყენოთ. ისეთი მალამოები, რომლებიც ქაფურს, მენთოლსა და ევკალიპტის ზეთს შეიცავენ ხველის შესამცირებლად აქტიურად გამოიყენება. ბავშვს კისრის გარშემო ნაზად და მსუბუქად შეუზილეთ სპეციალური მალამო კანში. 3 თვემდე ასაკის პატარებში მსგავსი მალამოების გამოყენება ექიმის ნებართვის გარეშე დაუშვებელია. მალამო მხოლოდ გარეგანი მოხმარებისთვის გამოდგება.
• ბავშვის სხეულის ტემპერატურაზე ზრუნვა

ცივი კლიმატი ხველებას ამწვავებს. თუ ოთახში სიცივეა, ბავშვს თბილად ჩააცვით. ბავშვს ყელი აუცილებლად თბილად უნდა ჰქონდეს. თუ პატარას სიცივისგან სათანადოდ დაიცავთ, ხველას მნიშვნელოვნად შეამცირებთ.

• ჰიგიენის წესების დაცვა

მტვერი, ცხოველის ბეწვი ან სუნამოს მკვეთრი არომატი ხველას აძლიერებს. ბავშვს ცხოველებთან ახლოს ნუ მიუშვებთ. არ გამოიყენოთ მკვეთრი არომატის მქონე აეროზოლი. თავი შეიკავეთ დეზოდორანტების გამოყენებისგან, რათა ბავშვის მდგომარეობა არ დაამძიმოთ.

მედიკამენტები, თუნდაც მცენარეული სახის, ბავშვს მხოლოდ ექიმის ნებართვით უნდა მისცეთ. მართალია, ხველა პატარას ასუსტებს და ღლის, მაგრამ სათანადო ზრუნვისა და მოვლის შემთხვევაში, თქვენი შვილი ძალებს მალევე აღიდგენს.

გაფრთხილება: სტატიაში მოცემული ინფორმაცია პროფესიონალი მედიკოსის რჩევას ვერ ჩაანაცვლებს. ჩვილის სამკურნალოდ შინაურული მეთოდების და საშუალებების გამოყენებამდე, აუცილებლად შეამოწმეთ ბავშვის ჯანმრთელობის მდგომარეობა პედიატრთან. ექიმის რეკომენდაციების და რჩევების მიღების შემდეგ ჩვენ მიერ შემოთავაზებული საშუალებების გამოყენება თამამად შეგიძლიათ. 

მომზადებულია ​momjunction.com-ის მიხედვით
თარგმნა ია ნაროუშვილმა 
წაიკითხეთ სრულად