ყოფილი მეუღლის მიმართ ფიზიკურ ძალადობაში ბრალდებული ჩოგბურთელი ნიკოლოზ ბასილაშვილი საზოგადოებისადმი მიმართვას ავრცელებს. როგორც განცხადებაში სპორტსმენი აღნიშნავს, არ აპირებს ყოფილ მეუღლესთან საჯარო დისკუსიაში შესვლას და იმის მტკიცებას, რაც ნამდვილად არ ყოფილა.
„ვწუხვარ და ბოდიშს ვუხდი საზოგადოებას, ჩემი ოჯახის ირგვლივ განვითარებული მოვლენების გამო. ვგრძნობ თქვენს ყოველწამიერ მხარდაჭერას და სიყვარულს, რისთვისაც უსაზღვროდ მადლიერი ვარ. რაც შეეხება, 22 მაისს განვითარებულ მოვლენებს, ვიმედოვნებ, ყველა დეტალი გაირკვევა, ახლა უკვე სასამართლოში და დადგება სამართლიანი განაჩენი, მანამდე კი, არ მსურს ვისაუბრო ჩემს პირად სივრცეზე. არ ვაპირებ საჯარო დისკუსიაში შევიდე ჩემს ყოფილ მეუღლესთან და ვამტკიცო ის, რაც ნამდვილად არ ყოფილა. ის ჩემი ერთადერთი ვაჟიშვილის, ლუკასის, დედაა და ასე დარჩება ცხოვრების ბოლომდე, ჩემი მიზანია ცხოვრების ამ რთულ ეტაპზე დავიცვა ჩემი სიმართლე ისე, რომ არ დაზიანდეს ლუკასის ინტერესები. სწორედ ჩემს შვილთან განსაკუთრებული დამოკიდებულება ვალდებულს მხდის, არ ვუპასუხო უსაფუძვლო ბრალდებებს, თუმცა მჯერა, რომ სიმართლეს სასამართლოში, ჩემი იურისტების დახმარებით აუცილებლად დავამტკიცებ“, - აღნიშნულია მიმართვაში.
შეგახსნებთ, რომ ჩოგბურთელ ნიკოლოზ ბასილაშვილს ბრალი ედება არასრულწლოვანი შვილის თანდასწრებით ყოფილ მეუღლეზე ძალადობაში. მას თბილისის საქალაქო სასამართლომ 100 ათასი ლარის ოდენობის გირაო შეუფარდა. ნიკოლოზ ბასილაშვილის ადვოკატის, ირმა ჭკადუა განცხადებით, ჩოგბურთელი დანაშაულს არ აღიარებს.
საქართველოში ელექტროენერგიის საფასურის გადახდის სისტემა იცვლება
საქართველოში ელექტროენერგიის საფასურის გადახდის სისტემა იცვლება. ელექტროენერგიის გადასახადის გადახდის თარიღები პენსიისა და სოციალური დახმარების მიღების გრაფიკის მიხედვით განისაზღვრება. 2022 წლის პირველი ინავრიდან პენსიის მიმღებები გადასახადს თვის16 რიცხვამდე, ხოლო სოციალური დახმარების მიმღები პირები 22 რიცხვამდე გადაიხდიან. ელექტროენერგიის საფასურის გადახდის სისტემაში შეტანილ ცვლილებებზე სემეკის თავმჯდომარემ დავით ნარმანიამ ტელეკომპანია „იმედის“ გადაცემაში „იმედის დილა“ ისაუბრა.
„დეკემბერ-იანვარი გარდამავალი ეტაპია. ადრე თბილისში თვის სხვადასხვა რიცხვში მიდიოდნენ სხვადასხვა აბონენტთან. ეს ყველაფერი სწორდება. მრიცხველებს წაიკითხავენ მხოლოდ თვის ბოლო 29, 30, 31 რიცხვებში. პირველი იანვრიდან თვიდან თვემდე დაჯდება დარიცხვა. ის, რაც ძველი პერიოდის მოხმარება იყო, ერთი ნახევარი მიუვათ ერთი ქვითრით, მეორე ნახევარი - მეორე ქვითრით. ნუ დარჩებათ შთაბეჭდილება, რომ ორმაგი დარიცხვა მიუვათ. ეს იქნება ჯამში ერთი თვის განმავლობაში გადასახდელი თანხა, რომ გასწორდეს თანხები. პირველი იანვრიდან მომხმარებლები თვეში მხოლოდ ერთ ქვითარს მიიღებენ,“ - აღნიშნა დავით ნარმანიამ.
„გადაწყვეტილება, რომელიც ბოლო პერიოდში მივიღეთ ეხებათ პენსიონერებსა და სოციალურად დაუცველებს. მათ არანაირი ინფორმაციის წარდგენა არ სჭირდებათ. ავტომატურად ჩაერთვებიან სისტემაში. პენსიონერები ყოველთვის უჩიოდნენ იმას, რომ სანამ ისინი პენსიას აიღებდნენ, მანამდე მისდიოდათ გადასახადი. მათთვის და სოციალურად დაუცველებისთვის გადასახადის გადახდის ვადა იქნა გადაწეული,“ - დასძინა დავით ნარმანიამ.
