Baby Bag

საქართველოს სახალხო დამცველი მცირეწლოვანი ბავშვის დაჭრის ფაქტს ეხმიანება

საქართველოს სახალხო დამცველი მცირეწლოვანი ბავშვის დაჭრის ფაქტს ეხმიანება

საქართველოს სახალხო დამცველი მცირეწლოვანი ბავშვის დაჭრის ფაქტს ეხმიანება. გთავაზობთ მის განცხადებას:

„2019 წლის 27 აგვისტოს მედიასაშუალებებში გავრცელებული ინფორმაციით, ცნობილი გახდა პეკინის გამზირზე მცირეწლოვანი ბავშვის დაჭრის შესახებ, რომელსაც გამვლელმა დანის გამოყენებით ჭრილობა მიაყენა და მიიმალა. მოგვიანებით, აღნიშნული პირი პოლიციამ დააკავა.

მომხდარის შეფასებისას, სოციალურ ქსელში არაერთი მოწოდება გავრცელდა ფსიქიკური ჯანმრთელობის პრობლემის მქონე პირთა საზოგადოებიდან გარიყვის და მათი იზოლაციის შესახებ. სახალხო დამცველი ხაზგასმით აღნიშნავს, რომ პირის ფსიქიკური ჯანმრთელობის მდგომარეობა გამოძიების ფარგლებში უნდა დადგინდეს და შესაბამისი ინფორმაციის არ ქონის პირობებში, აღნიშნულზე ხაზგასმა აძლიერებს ფსიქიკური ჯანმრთელობის პრობლემის მქონე პირთა მიმართ სტიგმას. 

აღსანიშნავია, რომ ფსიქიკური ჯანმრთელობის დაცვის სფეროში განხორციელებული ცვლილებების მიუხედავად, კვლავ არაერთი სისტემური პრობლემა რჩება, რაც აბრკოლებს არსებული რეგულაციების და სერვისების ეფექტურ განხორციელებას. საზოგადოებაში დამკვიდრებულ სტერეოტიპულ განწყობებთან ერთად, სახელმწიფოს მხრიდან გატარებული ღონისძიებების სიმცირე ამ სფეროში ადამიანური რესურსის, ეფექტური სერვისების, რეაბილიტაციისა და სოციალური ინტეგრაციის პრობლემებს იწვევს.

საზოგადოებაში ფსიქიკური ჯანმრთელობის შესახებ ინფორმაციის ნაკლებობა პრობლემის დროული გამოვლენის სირთულესთან ერთად, საკითხზე არასწორი მსჯელობის შესაძლებლობებს აჩენს და ხელს უწყობს არსებული ტაბუს გაძლიერებას. ამასთან, კვლავ პრობლემად რჩება ოჯახების მხრიდან უგულებელყოფა და თანამდგომთა ქსელის არარსებობა.

სოციალური სერვისების სიმცირე ართულებს ფსიქიკური ჯანმრთელობის საჭიროების დროულ იდენტიფიცირებას და მხარდამჭერი სერვისების შეთავაზებას; ხელს უშლის ფსიქიკურ ჯანმრთელობასთან დაკავშირებული რისკის შემცველი ქცევის გამოვლენას და აღნიშნულ პირთა შესაბამის სერვისებში ჩართვას.

სოციალურ ინტეგრაციასა და რეაბილიტაციაზე დაფუძნებული სერვისების განვითარების მიმართულებით, გამოწვევად რჩება თემზე დაფუძნებული და ამბულატორიული სერვისების ნაკლებობა, თავის მხრივ განაპირობებს მათზე მისაწვდომობის ნაკლებობას და შემთხვევათა გამწვავებას.

პრობლემურია ფსიქიკური ჯანმრთელობის სერვისის უწყვეტობის საკითხიც. მაგალითისთვის, 2018 წელს ჰოსპიტალიზაციის შემდგომ პაციენტთა მხოლოდ 37% ჩაერთო ამბულატორიულ/სათემო სერვისებში, რაც ასევე მიუთითებს ჰოსპიტალს გარეშე სერვისების გაძლიერების საჭიროებაზე.

ზემოაღნიშნულიდან გამომდინარე, სახალხო დამცველი კიდევ ერთხელ მოუწოდებს შესაბამის უწყებებს გაძლიერდეს ღონისძიებები ფსიქიკური ჯანმრთელობის მიმართულებით, მათ შორის დეინსტიტუციონალიზაციის პროცესის ხელშეწყობის, თემზე დაფუძნებული მომსახურებების განვითარებისთვის ეფექტური ნაბიჯების გადადგმის კუთხით. მნიშვნელოვანია მეტი ყურადღება დაეთმოს საზოგადოების ცნობიერების ამაღლებას და სახელმწიფომ ხელი შეუწყოს პრევენციული ღონისძიებების გატარებას. მათ შორის, ზოგადსაგანმანათლებლო დაწესებულებების ბაზაზე. ამასთან, მოუწოდებს ყველას საკითხის განხილვისას გამოიჩინონ სიფრთხილე და არ მოხდეს ფსიქიკური ჯანმრთელობის პრობლემის მქონე ადამიანთა მიმართ ტაბუს და სტიგმის გაძლიერება.

სახალხო დამცველი თავისი მანდატის ფარგლებში შეისწავლის მცირეწლოვანი ბავშვის დაჭრის შემთხვევას,“ - ნათქვამია განცხადებაში. 

შეიძლება დაინტერესდეთ

,,ნუთუ მართლა გგონიათ, ყველაზე განვითარებული ქვეყნების სამედიცინო პერსონალის აბსოლიტური უმრავლესობა სრული იდიოტია და აიცრა ვაქცინებით რომელიც კოვიდზე საშიშია, გენეტიკას შეუცვლის, სიკვდილის მაღალ რისკს შეიცავს და ა.შ.?''

,,ნუთუ მართლა გგონიათ, ყველაზე განვითარებული ქვეყნების სამედიცინო პერსონალის აბსოლიტური უმრავლესობა სრული იდიოტია და აიცრა ვაქცინებით რომელიც კოვიდზე საშიშია, გენეტიკას შეუცვლის, სიკვდილის მაღალ რისკს შეიცავს და ა.შ.?''
ამერიკაში მომუშავე ექიმი ნანა გეგეჭკორი სოციალურ ქსელში ვაქცინის შესახებ წერს, რომელსაც ​MomsEdu.ge უცვლელად გთავაზობთ:

,,მარტივი კითხვა: ნუთუ მართლა გგონიათ, ყველაზე განვითარებული ქვეყნების სამედიცინო პერსონალის აბსოლიტური უმრავლესობა სრული იდიოტია და აიცრა ვაქცინებით რომელიც კოვიდზე საშიშია, გენეტიკას შეუცვლის, სიკვდილის მაღალ რისკს შეიცავს და ა.შ.?

ჰოსპიტალში, სადაც მე ვმუშაობ 4 700 თანამშრომელზე მეტია სრულად აცრილი. ამერიკა, ისრაელი, ბრიტანეთი, გერმანია, ავსტრია, გრძელი სიაა... ამ ქვეყნებში პირველები ექიმები და ექთნები აიცრნენ.

ნუთუ ამაზე დიდი არგუმენტია საჭირო რომ გავითავისოთ, პანდემიის დასრულების ერთადერთი რეალური გზა სწრაფი ვაქცინაციაა.

P.S. ძალიან რთულად გადავიტანე ვაქცინის პირველი დოზა. განმივითარდა ლამის ყველა შესაძლო გვერდითი ეფექტი და 4 დღე სრულად მომწყვიტა ცხოვრების ჩვეულ რიტმს. და მაინც... სამწუხაროდ არ არსებობს სხვა ალტერნატივა ნორმალური ცხოვრების რიტმის დასაბრუნებლად. როგორი წარმატებულებიც არ უნდა ვიყოთ კოვიდის მკურნალობაში, ვირუსული დაავადების პრევენციას იდეალური მკურნალობაც კი ვერ ჩაანაცვლებს,'' - აღნიშნა ნანა გეგეჭკორმა.


წაიკითხეთ სრულად