Baby Bag

ჩვილებში სიცოცხლისთვის საშიში ბაქტერიული ინფექციების გამოწვევის გამო 3 ტიპის საბავშვო ფორმულა მწარმოებელმა გაყიდვებიდან გაიწვია

ჩვილებში სიცოცხლისთვის საშიში ბაქტერიული ინფექციების გამოწვევის გამო 3 ტიპის საბავშვო ფორმულა მწარმოებელმა გაყიდვებიდან გაიწვია

კომპანია Abbott Nutrition-მა გაყიდვებზე გატანილი პოპულარული საკვები ფორმულები Similac, Alimentum და EleCare უკან გაიწვია, რადგან პროდუქტის მიღების შემდეგ ოთხი ჩვილი ბაქტერიული ინფექციის განვითარების გამო საავადმყოფოში მოხვდა. Abbott Nutrition ბავშვთა კვების ცნობილი კომპანიაა, რომლის საკვებ პროდუქტებს ჩვილების კვებაში მშობლები აქტიურად იყენებენ.

აშშ-ის საკვებისა და მედიკამენტების ადმინისტრაციამ ოთხი მომხმარებლის საჩივარი განიხილა. სამი საჩივარი ჩვილებში კრონობაქტერ საკაზაკის შემთხვევების გამოვლენას შეეხებოდა. აღნიშნული ბაქტერია ტვინისა და ხერხემლის დამცველ მემბრანებში მძიმე და სიცოცხლისთვის საშიშ ანთებით პროცესებსა და ინფექციებს იწვევს. კრონობაქტერმა, შესაძლოა, ნაწლავებიც დააზიანოს და სისხლის მეშვეობით ორგანიზმის სხვა ნაწილებშიც გავრცელდეს.

აშშ-ის საკვებისა და მედიკამენტების ადმინისტრაციამ ხუთშაბათს მშობლების ინფორმირებისთვის სპეციალური მიმართვა გაავრცელა, რომელშიც ტეხასის, ოჰაიოსა და მინესოტას შტატებში ოთხი ჩვილის ბაქტერიული ინფექციით დაავადების შესახებ იყო საუბარი. სააგენტოს ინფორმაციით, შესაძლოა, რომ ბაქტერიული ინფექცია ერთ-ერთი ჩვილის გარდაცვალების მიზეზიც გახდა.

კომპანია Abbott Nutrition-მა მომხდარის გამო უკან გაიწვია Similac-ის, Alimentum-ისადა EleCare-ის პროდუქციის საკმაოდ დიდი ნაწილი, რომელსაც ვადა 2022 წლის პირველ აპრილს ან უფრო გვიან ეწურება. გაწვეულ პროდუქტებს შორის არის ისეთი ფორმულები, რომლებსაც კონტეინერის ბოლოში აქვს მრავალი რიცხვის შემცველი წარწერა. ბაზრიდან ამოღებული ფორმულების წარწერები 22-დან 37-ის ჩათვლით რიცხვებით იწყება და შეიცავს K8-ს, SH-ს ან Z2 წარწერებს.

სიმილაკის საბავშვო ფორმულები ამერიკაში და მის საზღვრებს გარეთ უდიდესი პოპულარობით სარგებლობს. მწარმოებელი კომპანია საბავშვო ფორმულებში კრონობაქტერისა და სხვა პათოგენების შემცველობას იკვლევს.

აშშ-ის საკვებისა და მედიკამენტების ადმინისტრაცია დაავადების კონტროლისა და პრევენციის ცენტრთან ერთად გამოძიების პროცესში აქტიურად არის ჩართული.

აშშ-ის საკვებისა და მედიკამენტების ადმინისტრაცია მშობლებს ურჩევს, რომ აღნიშნული საბავშვო ფორმულის გამოყენების შემხვევაში, ბავშვის ჯანმრთელობის მდგომარეობას ყურადღებით დააკვირდნენ და ნებისმიერი საეჭვო სიმპტომის გამოვლენისას ექიმს მიმართონ.

წყარო: ​Nytimes.com


შეიძლება დაინტერესდეთ

„მე ვარ საქართველოში პირველი და მსოფლიოში მეშვიდე ვოლფრამის სინდრომიანი დედა,“ – 30 წლის სოფიკო ფარეხელაშვილი

გადაცემაში „პირადი ექიმი“ 30 წლის სოფიკო ფარეხელაშვილი ვოლფრამის სინდრომისა და დედობის გამოცდილების შესახებ საუბრობს:

“ძალიან რთულია უსინათლოდ ცხოვრება. დამოუკიდებლად გადაადგილება ძალიან მიჭირს, დავდივარ ხელჯოხით, მყავს ძმა, რომელიც ზუსტად ჩემნაირად არის. დედა გვეხმარება როგორც გადაადგილებაში, ასევე დილაობით ანალიზებს გვიკეთებს, როცა დაგვჭირდება, გვიმზადებს საუზმეს, სადილს, ვახშამს, სადილს, გვივლის. მე ვარ სოფიკო ფარეხელაშვილი, 30 წლის, მაქვს ვოლფრამის სინდრომი. ვცხოვრობ გორის რაიონის სოფელ სათემოში. მე ვარ საქართველოში პირველი და მსოფლიოში მეშვიდე ვოლფრამის სინდრომიანი დედა. დაოჯახების შემდეგ მინდოდა მყოლოდა შვილი, მიუხედავად იმისა, რომ ვიცოდი, ჩემი ჯანმრთელობის მდგომარეობიდან გამომდინარე ეს არ შეიძლებოდა, მწამდა და მჯეროდა იმის, რომ შევძლებდი გავმხდარიყავი დედა. ჩემმა შვილმა დადებითად შეცვალა ჩემი ცხოვრება. რაც უნდა გაბრაზებული ვიყო, რასაც უნდა ვაკეთებდე, მოვა, მომეხმარება და ყველაფერი მავიწყდება."

სოფიკოს თქმით, მან ვოლფრამის სინდრომის მქონე ძმისგან ძალიან ბევრი რამ ისწავლა:

„ნიკოლოზისგან ძალიან ბევრი რამ შევისწავლე. ვისწავლე ცხოვრება, რომ ფრთხილად უნდა ვყოფილიყავი, ჩემი ჯანმრთელობისთვის მიმეხედა. მე ვიცი, რომ საქართველოში ვართ ოცი ვოლფრამის სინდრომიანი ადამიანი. მინდა მოვუწოდო ამ ადამიანებს, რომ რაც შეიძლება მეტად გაუფრთხილდნენ საკუთარ თავს, გაუფრთხილდნენ საკუთარ ნერვებს. უნდა გწამდეთ, რომ მოვა დრო, როდესაც უკეთესად ვიქნებით, როგორც ჯანმრთელობით, ასევე ცხოვრებაში ყველანაირად.“

წაიკითხეთ სრულად