Baby Bag

როგორ შევღებოთ სააღდგომო კვერცხი იდეალურად განსხვავებული წესით? - ნუცა სურგულაძის რეცეპტი

როგორ შევღებოთ სააღდგომო კვერცხი იდეალურად განსხვავებული წესით? - ნუცა სურგულაძის რეცეპტი

მასტერშეფის გამარჯვებულმა ნუცა სურგულაძემ სააღდგომო კვერცხის იდეალურად შეღებვისთვის საჭირო წესები გაგვაცნო:

„სააღდგომო წითელი კვერცხებისთვის დაგვჭირდება ცოტა განსხვავებული ინგრედიენტი. ეს არის ენდროს ფხვნილი. ამას ვიყენებ ენდროს მაგივრად, რადგან უფრო მარტივად და სწრაფად მზადდება. მას 100 %-იანი შედეგი აქვს. ენდროს ფხვნილის შეძენა შეგიძლიათ ნებისმიერ სუპერმარკეტში. ასევე ვიყენებ ნაჭუჭისგან და გარსისგან გათავისუფლებულ ენდროს, ძმარს და სოფლის კვერცხს. შეგვიძლია გამოვიყენოთ ჩვეულებრივი კვერცხიც. დაგვჭირდება ზეთი და ბამბა, რომ გაპრიალდეს ჩვენი კვერცხი. გამოვიყენოთ ხელთათმანები, რომ წითელი ხელები არ გვქონდეს.

გავრეცხოთ კარგად ოთახის ტემპერატურაზე გაჩერებული კვერცხი. აუცილებელია კვერცხი გავაჩეროთ ოთახის ტემპერატურაზე, რომ არ გაგვისკდეს. კვერცხის გარეცხვა აუცილებელია, რომ არ იყოს უსწორმასწოროდ შეღებილი. წყალი უნდა გავათბოთ, არ უნდა იყოს ადუღებამდე მისული. ცოტა ბუშტუკები რომ წამოვა, შეგვიძლია ჩავამატოთ ძმარი. ჩავაწყოთ კვერცხი ფაქიზად. მე გირჩევთ, რომ კვერცხი გააჩეროთ 9-10 წუთის განმავლობაში ადუღებულ წყალში, რომ არ იყოს გადახარშული. დავაცადოთ კვერცხს მოხარშვა. ამასობაში კი მოვამზადოთ განსხვავებული საღებავი.

გავათბოთ წყალი. ჯამში გადავიტანოთ ერთი ჩაის კოვზი ენდროს ფხვნილი. ფხვნილი გავხსნათ 50 მილილიტრ ძმარში. ძმრის და ენდროს ფხვნილის ნაზავში ჩავამატოთ ნელ-თბილი წყალი. დაახლოებით 2 ლიტრა წყალი გვჭირდება იმისთვის, რომ კვერცხი იდეალურად დაიფაროს. ეს ნაზავი 50 კვერცხსაც კი ჰყოფნის. საღებავი უნდა გამოვიდეს მუქი ფერის. მთავარია, რომ იყოს თბილი. მოხარშული კვერცხი ქვაბიდან გადავიტანოთ ენდროიან წყალში. კვერცხი ბოლომდე უნდა დაიფაროს. კვერცხი საღებავში გავაჩეროთ 5-10 წუთის განმავლობაში. როგორც კი მიიღებს კარგ პიგმენტს, ამოვიღოთ, გადავუსვათ ზეთი ბამბით, შევამშრალოთ და მზად არის,“- სააღდგომო კვერცხის შეღებვის წესებზე ნუცა სურგულაძემ საქართველოს პირველი არხის გადაცემაში „ახალი დღე“ ისაუბრა.

წყარო:​ „ახალი დღე“

შეიძლება დაინტერესდეთ

„ეს არ არის ტრადიცია, რომელიც უნდა გავაგრძელოთ, ძალიან ხშირად ეს ყველაფერი იწვევს ინვალიდიზაციას,“ - გუგა ქაშიბაძე

„ეს არ არის ტრადიცია, რომელიც უნდა გავაგრძელოთ, ძალიან ხშირად ეს ყველაფერი იწვევს ინვალიდიზაციას,“ - გუგა ქაშიბაძე

დამწვრობის ცენტრის ხელმძღვანელი გუგა ქაშიბაძე გადაცემაში „პოსტ ალიონი“ პიროტექნიკის არასწორი გამოყენების საფრთხეებზე საუბრობს და მშობლებს სიფრთხილისკენ მოუწოდებს:

„ძალიან ბევრი ქირურგიული განყოფილება, თვალის კლინიკები და ტრავმატოლოგები განსაკუთრებულ რეჟიმში მუშაობენ. ​სამწუხაროდ ეს მარტო დამწვრობას არ ეხება, ძალიან ხშირად ამპუტირებული თითებით მთავრდება და არის შემთხვევები, როდესაც ბავშვს მთლიანი მტევანიც კი დაუკარგავს. არ არის აუცილებელი, რომ საშიშად გამოიყურებოდეს პიროტექნიკა. შეიძლება ყველაზე იაფმა და ერთი შეხედვით უსაფრთხო პიროტექნიკამ არასწორი გამოყენების შემთხვევაში ძალიან სერიოზული დაზიანება მიაყენოს ბავშვს.“

გუგა ქაშიბაძის თქმით, პიროტექნიკის გამოყენებაზე უარის თქმა საუკეთესო გადაწყვეტილება იქნება:

„მესმის, რომ ქართველებისთვის ხმაური და სროლა არის დღესასწაულებთან ასოცირებული.​ ეს არ არის ტრადიცია, რომელიც უნდა გავაგრძელოთ. ქართველებს შეგვიძლია რაღაც ტრადიციები საერთოდ დავივიწყოთ. მაგ. ჭიაკოკონობა საერთოდ აღარ არის. როგორც კი კანონი შემოვიდა, რომ კოცონის ანთება ქუჩაში არ შეიძლება, ეს შეწყდა. ჭიაკოკონობაზე დაახლოებით 60-70 ბავშვს ვღებულობდით ხოლმე, კატასტროფა ხდებოდა. 2018 წელს საქართველოს პარლამენტმა მიიღო კანონი, რომ პიროტექნიკის არასრულწლოვანზე გაყიდვა ისჯება, მაგრამ მაინც ხელმისაწვდომია ბავშვებისთვის.“

გუგა ქაშიბაძე აღნიშნავს, რომ ბევრ ქვეყანაში პიროტექნიკის გამოყენება კანონით არის აკრძალული:

„ძალიან ​ბევრ ქვეყანაში პიროტექნიკა საერთოდ აკრძალულია. არის ასაკობრივი შეზღუდვა. ასაფეთქებელს, რომელსაც აწერია, რომ სპეციალური სამაგრი სჭირდება, 30 მეტრის რადიუსით ცოცხალი არსება არ უნდა იყოს, ასეთ ასაფეთქებელს შუა ოთახში რომ ააფეთქებ, უსაფრთხოების წესებს ელემენტარულად არ იცავ. პიროტექნიკა სათამაშო არ არის, გასართობი არაა. ეს არის ყველაზე დიდი პრობლემა. ჩვენ გვგონია, რომ ეს ნაძვის ხის სათამაშოს მსგავსია.“

„მაშხალა, რომელიც 100 მეტრის სიმაღლეზე ავა, გინდა ის არასწორად გამოგიყენებია და გინდა იარაღი გისვრია. ზოგჯერ პიროტექნიკას აწერია, რომ ათ წამში უნდა აფეთქდეს, ეს პირობითია, შეიძლება ეს 20 ან 5 წამიც იყოს. მაშხალას აწერია, რომ ათი მაშხალა უნდა გავარდეს და მეშვიდე არ გავარდა, ბევრი შიგნით იხედება, მერე არის თვალის დაზიანებები. დამწვრობასთან ერთად ძალიან ხშირია ნაკვეთი ჭრილობები, მოტეხილობები, ღრმა და არასასიამოვნო დაზიანებები. ​ძალიან ხშირად ეს ყველაფერი იწვევს ინვალიდიზაციას,“ - აცხადებს გუგა ქაშიბაძე.

წყარო: ​„პოსტ ალიონი“

წაიკითხეთ სრულად