Baby Bag

რა იწვევს სისხლიან გამონადენს ორსულობის პირველ ტრიმესტრში?

რა იწვევს სისხლიან გამონადენს ორსულობის პირველ ტრიმესტრში?
ორსულობა
დღეს ხუთშაბათია და მედიაპორტალი MomsEdu.ge ტრადიციულ რუბრიკას - მეან-გინეკოლოგის რეკომენდაციებს წარმოგიდგენთ. რა იწვევს სისხლიან გამონადენს ორსულობის პირველ ტრიმესტრში? - დღეს მეან-გინეკოლოგი და ქირურგი ეკა ბუკია ამ თემაზე მოგაწვდით კომპეტენტურ ინფორმაციას. 
​

ორსულობის პირველ ტრიმესტრში სისხლიანი გამონადენის რამდენიმე მიზეზი არსებობს:
​

  • იმპლანტაციური სისხლდენა - ჩასახვიდან 6-12 დღეში ხდება განაყოფიერებული კვერცხუჯრედის ჩანერგვა ენდომეტრიუმში, რაც ზოგიერთ ქალში იწვევს სისხლიან გამონადენს. გამონადენის სახე შეიძლება იყოს რამდენიმე წვეთი ან სისხლიანი გამონადენი. სისხლიანი გამონადენი იწყება უშუალოდ მოსალოდნელი მენსტრუალური ციკლის დღეებში. ჩვეულებრივ იმპლანტაციური სისხლოვანი გამონადენი უფრო ღია ფერისაა, ვიდრე მენსტრუალური სისხლი, გრძელდება რამდენიმე საათი ან 1-2 დღე.
    ​
  • საშვილოსნოს ყელის პოლიპი - ძირითადად პოლიპი არის კეთილთვისებიანი წარმონაქმნი. ზოგჯერ პოლიპს ახასიათებს გარე გაღიზიანების გამო სისხლდენისკენ ტენდენცია. საშილოსნოს ყელის პოლიპის დიაგნოსტირება ხდება გინეკოლოგიური გასინჯვის დროს, ვიზუალური შეფასებისას.
    ​
  • სქესობრივი აქტი - ორსულობის დროს არის ჰორმონული ცვლილებები, ამიტომ საშვილოსნოს ყელი მეტად მგრძნობიარეა, შესაძლოა, სქესობრივი ცხოვრების შემდეგ იყოს სისხლიანი გამონადენი, რომელიც იქნება ერთჯერადი ხასიათის და მალევე გაჩერდება.
    ​
  • ორსულობის შეწყვეტა - თვითნებითი აბორტი - ზოგჯერ იწყება მცირე რაოდენობის სისხლიანი გამონადენით და გადადის სისხლდენაში. სისხლდენას თან ემატება ტკივილი მუცლის ქვედა არეში, წელის ტკივილი, კოლტების არსებობა გამონადენში. ასეთ შემთხვევაში დაუყოვნებლივ უნდა მიმართოთ ექიმს.
    ​
  • საშვილოსნოს გარე ორსულობა - გარე ორსულობის უმეტესობა ხდება კვერცხსავალ მილში. გარე ორსულობა შედარებით ნაკლებად გვხვდება, ვიდრე თვითნებითი აბორტი. საშვილოსნოს გარე ორსულობა წარმოადგენს სასწრაფო ოპერაციული ჩარევის ჩვენებას. დამახასიათებელია შემდეგი სიმპტომები: მცირე ყავისფერი გამონადენი ან ძლიერი სისხლიანი გამონადენი საშოდან. შეტევითი ხასიათის ტკივილი მუცლის ქვედა არეში, ჩაჭერის და ზეწოლის შეგრძნება სწორ ნაწლავზე.
    ​
  • სუბქორიონალური ჰემატომა - ამ მოვლენის დროს ხდება პლაცენტის მცირე ნაწილის აცლა ენდომეტრიუმის ქსოვილისგან. მათ შორის არსებულ სივრცეში ვითარდება სისხლჩაქცევა - ჰემატომა. ზომის მიხედვით სისხლდენის ინტენსივობაც სხვადასხვაა. უფრო ხშირად გვხვდება მცირე ზომის ჰემატომები, შესაბამისად, სისხლიანი რაოდენობაც მცირეა. დიდი ზომის ჰემატომისთვის დამახასიათებელია სისხლდენა.
    ​
  • ინფექციური დაავადებები - პირველ ტრიმეტრში სისხლიანი გამონადენი არ არის კავშირში ორსულობასთან. იმ შემთხვევაში თუ არის მცირე მენჯის ღრუს, შარდის ბუშტის და საშარდე გზების ინფექცია, შესაძლოა, გქონდეთ სისხლიანი გამონადენი.

​როგორ უნდა მოვიქცეთ სისხლიანი გამონადენის დაწყების დროს?

​პირველ რიგში, უნდა მიმართოთ გინეკოლოგს. ჩაგიტარდებათ ექოსკოპიური კვლევა, რომ მოხდეს კვერცხუჯრედის ლოკალიზაციის განსაზღვრა, ასევე ჰემატომის არსებობის დიაგნოსტირება, შედარებით დიდ ვადაზე ჩანასახის გულისცემის შეფასება. საჭირო იქნება დამატებით ქორიონული გონადოტროპინის განსაზღვრა.

​მკურნალობის ტაქტიკა დამოკიდებულია ორსულობის მდგომარეობაზე.


​გისურვებთ ჯანმრთელობას!​

#ორსულობა #გინეკოლოგი #ეკაბუკია

შეიძლება დაინტერესდეთ

ორსულობა

რამდენად მართებულია მოსაზრება, რომ განაყოფიერება არ ხდება მშობიარობის შემდგომ, სანამ ციკლი აღდგება? - ამ და სხვა საკითხებზე ამ თემაზე ​MomsEdu.ge-ს ესაუბრა მეან-გინეკოლოგი დიანა ჭანუყვაძე

რამდენად მართებულია მოსაზრება, რომ განაყოფიერება არ ხდება მშობიარობის შემდგომ, სანამ ციკლი აღდგება? - ამ და სხვა საკითხებზე ამ თემაზე ​MomsEdu.ge-ს ესაუბრა მეან-გინეკოლოგი დიანა ჭანუყვაძე

​არსებობს მოსაზრება, რომ განაყოფიერება არ ხდება მშობიარობის შემდგომ, სანამ ციკლი აღდგება. რამდენად მართებულია და რამდენი უნდა იყოს ორსულობებს შორის შუალედი? - ამ და სხვა საკითხებზე ამ თემაზე ​MomsEdu.ge-ს ესაუბრა მეან-გინეკოლოგი, რეპროდუქტოლოგი დიანა ჭანუყვაძე.

- არსებობს მოსაზრება, რომ განაყოფიერება არ ხდება მშობიარობის შემდგომ, სანამ მენსტრუაციული ციკლი აღდგება, ლაქტაციის პერიოდში. რამდენად მართებულია?

- დიახ, არსებობს ასეთი მითი, რომ სანამ ჩვილს ძუძუთი კვებავთ, ორსულობა არ დადგება, თუმცა სიმართლე ის არის, რომ თქვენ შეგიძლიათ დაორსულდეთ ბავშვის დაბადებიდან 3 კვირის შემდეგ, მაშინაც კი, თუ ძუძუთი კვებავთ და მენსტრუაცია არ დაგწყებიათ. თუ არ გსურთ მშობიარობის შემდეგ მალევე დაორსულება, მნიშვნელოვანია გამოიყენოთ რაიმე სახის კონტრაცეფცია, ყოველი სქესობრივი კავშირის დროს, მათ შორის, პირველის ჩათვლით.

ძუძუთი კვება ხშირად თრგუნავს ოვულაციას, მაგრამ ეს ყოველთვის ასე არ არის. ქალებს, რომლებიც ექსკლუზიურად ძუძუთი კვებავენ ჩვილს, 6 თვის განმავლობაში, ნაკლებად აქვთ ოვულაცია ამ პერიოდში, ვიდრე ქალებს, რომლებიც ძუძუთი არ კვებავენ თავიანთ ჩვილს - კონტრაცეფციის ამ მეთოდს უწოდებენ ლაქტაციურ ამენორეას. ამ მეთოდის ერთ-ერთი მთავარი გამოწვევაა მისი სწორად გამოყენება, ჩვილის კვება 3-4 საათში ერთხელ. თუ კვებათა შორის შუალედს არ დაიცავთ, მეთოდი ნაკლებად ეფექტური იქნება.

Planned Parenthood-ის მიხედვით, ლაქტაციური ამენორეა დაახლოებით 98%-ით ეფექტურია, როდესაც ამ მეთოდს ბავშვის დაბადებიდან პირველი 6 თვის განმავლობაში სწორად იყენებთ. მშობიარობიდან 6 თვის შემდეგ ის ნაკლებად ეფექტური ხდება.

- თავდაცვის საშუალებებზე რომ ვისაუბროთ...

- აღსანიშნია, რომ 100%-ით არცერთი კონტრაცეფციული საშუალება არ იცავს ორსულობისგან, მნიშვნელოვანია თითოეული მეთოდის სწორად შერჩევა და გამოყენება, რომ მისი კონტრაცეფციული მოქმედება მაქსიმალურად იყოს გამოყენებული. მშობიარობის შემდეგ ნებისმიერ დროს, შეგიძლიათ გამოიყენოთ შემდეგი კონტრაცეფციული საშუალებები:

• მამაკაცის პრეზერვატივი;
• ქალის პრეზერვატივი;
• იმპლანტი;
• მხოლოდ პროგესტოგენის შემცველი აბები - მინი პილი;
• შეგიძლიათ აირჩიოთ IUD (საშვილოსნოს შიდა საშუალება), ბავშვის დაბადებიდან 48 საათის განმავლობაში. თუ IUD არ ჩაიდგმევა 48 საათის განმავლობაში, რეკომენდებულია დაელოდოთ მშობიარობიდან დაახლოებით 4 კვირის გასვლას.

თუ ბავშვს არ კვებავთ ძუძუთი და თქვენმა გინეკოლოგმა ჩაგიტარათ კონსულტაცია, რის საფუძველზეც გაიგეთ, რომ არ გაქვთ უკუჩვენება კომბინირებულ ჰორმონალურ პრეპარატებზე, შეგიძლიათ დაიწყოთ:

• კომბინირებული აბები;
• ვაგინალური რგოლი;
• კონტრაცეპტული პლასტირი.
​
ხოლო თუ ძუძუთი კვებავთ, ჯანმრთელობის გარკვეული დარღვევები გაქვთ ან სისხლის შედედების მომატებული რისკი, ჩვეულებრივ გირჩევთ გადადოთ კომბინირებული აბების, რგოლის ან პლასტირის გამოყენება.

- ახდენს თუ არა ზეგავლენას ორგანიზმზე მშობიარობიდან მოკლე პერიოდში ხელახალი ორსულობა და რა მხრივ?

- მშობიარობის შემდგომ ხელახალი დაორსულება, რა თქმა უნდა, შესაძლებელია, თუმცა ასოცირდება გაზრდილ რისკებთან, როგორებიც არის:

• ნაადრევი მშობიარობა;
• თანდაყოლილი პათოლოგიები;
• ნაყოფის ზრდაში ჩამორჩენა და მასის დეფიციტი;
• დედის ანემია;
• მშობიარობის წინ პლაცენტის ნაწილობრივი ან სრული აცლა.

გარდა ამისა, CDC-ის ბოლო დროინდელი მონაცემებით, მშობიარობიდან 18 თვეზე ადრე და 60 თვეზე მეტი ინტერვალის შემთხვევაში დაორსულება შეიძლება ასოცირებული იყოს აუტიზმის განვითარების გაზრდილ რისკთან. კავშირი უფრო გამოკვეთილია აუტიზმის მძიმე ფორმების დროს (​https://www.cdc.gov/ncbddd/autism/features/time-between-births.html).

მშობიარობის შემდგომ მალევე ორსულობამ შესაძლოა ქალს არ მისცეს საკმარისი დრო, რომ მოხდეს ორგანიზმის აღდგენა, როგორც ფიზიკურად, ასევე ფსიქოლოგიურად. მაგალითად, ორსულობამ და ძუძუთი კვებამ შეიძლება გამოიწვიოს ქალის ორგანიზმში სხვადასხვა ვიტამინების და მიკროელემენტების დეფიციტი (რკინა, ფოლიუმის მჟავა, კალციუმი და ა.შ), მშობიარობის შემდგომი დეპრესია და ა.შ.

- რამდენი უნდა იყოს ორსულობებს შორის შუალედი?

- ორსულობის და ჯანმრთელობის რისკის გართულებების შესამცირებლად, კვლევების მიხედვით გვირჩევენ, რომ ორსულობებს შორის შუალედი იყოს 18-დან 24 თვემდე, მაგრამ 5 წელზე ნაკლები. დედის ასაკი 35 წლის ზევით ასოცირდება გაზრდილ რეპროდუქციულ რისკებთან, მათ შორის, უნაყოფობასთან, ქრომოსომულ ანომალიებთან და მშობიარობის არასასურველ შედეგებთან. საჭიროა რისკის და სარგებლის დაბალანსება 35 წელზე მეტი ქალების ორსულობის გადადებასა და ორსულობათა შორის შემცირებულ შუალედებს შორის.

რისკები და რეკომენდაციები არ ვრცელდება წყვილებზე, რომლებსაც ჰქონდათ სპონტანური აბორტი. თუ ჯანმრთელი ხართ და მზად ხართ, არ არის საჭირო ხანგრძლივი შუალედი ორსულობებს შორის.

ბავშვის გაჩენის დროის არჩევა წყვილის პირადი გადაწყვეტილებაა. შემდეგი ორსულობის დაგეგმვისას თქვენ და თქვენმა პარტნიორმა შეიძლება გაითვალისწინოთ სხვადასხვა ფაქტორი, ჯანმრთელობის რისკებისა და სარგებელის. სანამ არ მიიღებთ გადაწყვეტილებას, როდის გააჩინოთ შემდეგი შვილი, ექიმის რეკომენდაციით გამოიყენეთ თქვენთვის მისაღები ჩასახვის საწინააღმდეგო საშუალებები.

ესაუბრა მარიამ ჩოქური
წაიკითხეთ სრულად
გასათიშად დააჭირეთ ESC.