Baby Bag

„იყავით მშვიდები და ბედნიერ ბავშვობაში აცხოვრეთ თქვენი შვილები,“ - ბაკურ კოტეტიშვილის რჩევები მშობლებს

„იყავით მშვიდები და ბედნიერ ბავშვობაში აცხოვრეთ თქვენი შვილები,“ - ბაკურ კოტეტიშვილის რჩევები მშობლებს

ნევროლოგმა ბაკურ კოტეტიშვილმა მშობლებს ურჩია შვილების ბავშვობა უზრუნველყონ და მაქსიმალურად გააუხანგრძლივონ შვილებს ბავშვობის ეტაპი:

„მშობლებმა უნდა უზრუნველყონ ბავშვების ბავშვობა. თუ ბავშვები ბავშვებად დარჩებიან რაც შეიძლება დიდი ხნის განმავლობაში, ეს ძალიან კარგია. მშობლებს გვაწყობს, რომ მალე გაიზრდონ ბავშვები, ზრუნვა რომ ნაკლები გვქონდეს. პრობლემები ყოველთვის იარსებებს, თუნდაც 20 წლის იყოს ბავშვი, ან 2 წლის.“

ბაკურ კოტეტიშვილმა იმ პრობლემებზე ისაუბრა, რომელიც მშობლებსა და შვილებს პანდემიის გამო დაწესებულმა აკრძალვებმა შეუქმნა:

„ეს აკრძალვები და ჩაკეტვები ვის უხარია, ხომ?! ​მშობლებმა უნდა უზრუნველყონ, რომ ბავშვებმა ეს ეტაპი მაქსიმალურად მსუბუქად გადაიტანონ. ბავშვებთან ურთიერთობა არის ძალიან მნიშვნელოვანი. ძალიან ბევრმა მშობელმა მითხრა: „როდის გაიხსნება სკოლები? აღარ შემიძლია ამათანი ატანა!“ ვითომ გაგვეცინება, მაგრამ რომ დავუფიქრდეთ, მას უჭირს შვილებთან ურთიერთობა, ვერ მოუფიქრებია, რა გააკეთოს. ამ დროს უმარტივესია, რა უნდა ბავშვთან ურთიერთობას?!“

ბაკურ კოტეტიშვილის თქმით, მშობლებს არ მოსწონთ, როდესაც თავადაც ბავშვურად უხდებათ მოქცევა და შვილებთან ერთად ენერგიის დახარჯვა:

„ჩვენ ბავშვის ჭკუაზე უნდა ვიყოთ და ეს არ გვაწყობს. მშობელმა უნდა იკოტრიალოს ბავშვთან ერთად, უნდა შეძვრეს საწოლის ქვეშ. ამ დროს რაღაც ჩამოვარდება, რაღაც გატყდება. ეს უკვე აღარ გვაწყობს. ყველა ჩვენგანს უტყდება ჭიქა, თეფში. აბა ბავშვმა გატეხოს, მაშინვე ვიწყებთ ზეწოლას მასზე. ამ დროს ჩვენც გვიტყდება ყველას რაღაც. არ გიტყდებათ ოჯახში თეფში? ​ბავშვი რომ გაიყვანოთ ეზოში, ეთამაშოთ, ირბინოთ მასთან ერთად, არცერთი არ მოგთხოვთ არც კომპიუტერს, არც ტელევიზორს და არც ტელეფონს.“

„პირველ რიგში, უნდა ვუზრუნველყოთ ბავშვის დაცულობა. ​ბავშვის დაცვა არ არის ჩაცმა, ჭამა, დაცვა არის გარემოს სიმშვიდე. ნებისმიერი ოთახი შემოფარგლული სივრცეა, ეს არ არის ლაღი სისტემა. ბავშვს აინტერესებს, რა ხდება კედლის იქით. ეს აღმომჩენობა ბავშვის ტვინის განვითარებაა, რომელსაც ის მთელი ცხოვრება იყენებს. მაღალი ან დაბალი თვითშეფასება ბავშვებში მშობლებთან ურთიერთობის ფენომენით არის განპირობებული. ჩვენ არ გვახსოვს თუნდაც ერთი კვირის წინ ნათქვამი სიტყვები, ბავშვი ამას ყველაფერს იმახსოვრებს. იყავით მშვიდები და ბედნიერ ბავშვობაში აცხოვრეთ თქვენი შვილები,“ - აღნიშნულ საკითხებზე ბაკურ კოტეტიშვილმა რადიო ფორტუნას ეთერში ისაუბრა.

წყარო: ​რადიო ფორტუნა

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)

„ყველას გთხოვთ, რომ ბავშვთან ურთიერთობაში პირველი, რასაც დაანახვებთ ბავშვს, იყოს ღიმილი,“...
​​ნევროლოგმა ბაკურ კოტეტიშვილმა ბავშვის ცხოვრებაში ღიმილის მნიშვნელობის შესახებ ისაუბრა და აღნიშნა, რომ ბავშვის ღიმილი თავისუფალი, გულწრფელი და გადამდებია:„ბავშვის ღიმილი, განსაკუთრებით პირველი 3...

შეიძლება დაინტერესდეთ

„მთავარია, რომ გონივრულობის ფარგლებში მოხდეს შვილიშვილის გათამამება,“- ფსიქოთერაპევტი ნინო ახალაია

„მთავარია, რომ გონივრულობის ფარგლებში მოხდეს შვილიშვილის გათამამება,“- ფსიქოთერაპევტი ნინო ახალაია

ფსიქოთერაპევტი ნინო ახალაია ტელეკომპანია იმედის გადაცემაში „იმედის დღე“ ბებიებისა და ბაბუების შვილიშვილებისადმი დამოკიდებულების თავისებურებებს განიხილავს. მისი თქმით, ბებიებმა და ბაბუებმა მშობლებს ბორკილები არ უნდა დაადონ, რათა ბავშვის თვალში მათი ავტორიტეტი არ შელახონ:

​ბებიას და ბაბუას მთავარი ფუნქციაა, რომ საკუთარი შვილი მისი შვილისთვის არ გახადოს ბორკილდადებული მშობელი. მშობლებს უნდა მიეცეთ მშობლობის საშუალება. რადგან მე შენზე ადრე დავიბადე, ბევრი რამ მინახავს და შენზე მეტი გამოცდილება მაქვს, არ ნიშნავს იმას, რომ მე შენს ნაცვლად ვიცი ყველაფერი. ეს არ ნიშნავს იმას, რომ მშობელს საკუთარ შვილთან მიმართებაში ცდისა და შეცდომის გამოცდილება ავუკრძალოთ. ერთადერთხელ არის ადამიანი მშობელი საკუთარი შვილისთვის. ამიტომ არის მნიშვნელოვანი, რომ ზღვარი იყოს დაცული. ბებია და ბაბუა საკუთარი შვილის მშობლობას უნდა გაუფრთხილდნენ.“

ნინო ახალაია აღნიშნავს, რომ მშობელს ბავშვთან ურთიერთობისთვის სივრცე აუცილებლად უნდა ჰქონდეს:

„მშობელს უნდა მიეცეს სივრცე ბავშვთან ურთიერთობაში.​ ის, რომ ბებიას ან ბაბუას სხვა პრინციპები აქვს, არ ნიშნავს იმას, რომ ის უპირობოდ მართალია. თუ შენ მეკითხები აზრს, მე რჩევას გაძლევ, იმიტომ, რომ შენს ადგილას მე ასე მოვიქცეოდი. რჩევას მაშინ აქვს აზრი, როდესაც გთხოვენ ამ რჩევას. ბებიები და ბაბუები თანმიმდევრულობაში ხელისშემშლელები გამოდიან შვილიშვილისადმი ჰიპერმზრუნველობის გამო. როდესაც ოჯახში რამდენიმე თაობა ერთად ცხოვრობს ზღვარი ძნელი დასაცავია. ყველაზე დიდი შეცდომა ამ დროს არის ის, რომ მშობლის ავტორიტეტს ლახავენ ბავშვის თვალში. მშობელი, შესაძლოა, მართალი არ იყოს, მაგრამ ისეთი ტიპის გამოქომაგება, რომელიც მის ავტორიტეტს შელახავს, მომავალში დამაზიანებელი იქნება თავად ბავშვისთვის. ბავშვმა იცის, რომ თუ რაიმე წესს დაარღვევს, მას თავშესაფარი აქვს ბებიასთან და ბაბუასთან. ამ თავშესაფარში მარტო ბავშვის ნუგეშისცემა კი არ ხდება, არამედ ხდება ბავშვში მშობლის მიმართ დაგროვილი აგრესიის წაქეზებაც.“

„ძალიან კარგია, როდესაც მშობელს არ სჭირდება ძიძა და ბებია-ბაბუას შეუძლია ეს ფუნქცია შეითავსოს, შვილიშვილის ბავშვობა გახადოს უფრო მდიდარი. ​როდესაც მშობლები ბებია-ბაბუასთან ტოვებენ ბავშვს, ნერვიულობენ, რომ ჯანსაღი კვების, ძილის, გაჯეტებთან გატარებული დროის ბალანსი დაერღვეს ბავშვს. ყველაზე მთავარია, რომ გონივრულობის ფარგლებში მოხდეს შვილიშვილის გათამამება. ეს ხომ მოგონებაა ბავშვისთვის. ხისტი წესების დაცვის შემდეგ მას კვირის ბოლოს ბებია-ბაბუასთან განებივრების შესაძლებლობა აქვს. ყველა სახლს თავისი წესი აქვს. ის მურაბა, ის ტკბილეული, გვიან დაძინება, ბევრად სასარგებლოა ბავშვის ფსიქიკისთვის, ვიდრე სახლში ნაჭამი ყოველდღიური ჯანსაღი საკვები,“ - აცხადებს ნინო ახალაია.

წყარო: ​იმედის დღე

წაიკითხეთ სრულად