Baby Bag

10 საფრთხის შემცველი ნივთი ბავშვის საძინებელში

10 საფრთხის შემცველი ნივთი ბავშვის საძინებელში

საყოფაცხოვრებო ნივთებში არსებული საფრთხეების ამოცნობა საკმაოდ რთულია. ზოგიერთი ნივთი, რომელიც ზრდასრული ადამიანისთვის სრულიად უსაფრთხოა, პატარებისთვის სახიფათოც შეიძლება აღმოჩნდეს. ჩვენს სტატიაში იმ 10 ნივთს გაგაცნობთ, ​რომლებიც ბავშვისთვის გარკვეულ რისკებს შეიცავს.

1. ბალიში

ზრდასრულებს კისრის არეში უსიამოვნო შეგრძნება უჩნდებათ, თუ ღამით თავი ბალიშზე არ უდევთ. ამის გამო ისინი საკუთარ გამოცდილებას ეყრდნობიან და ჩვილებისთვის ბალიშს დიდი მონდომებით ყიდულობენ. ბავშვის ჯანსაღი და უსაფრთხო ძილისთვის მას წლამდე ასაკში ბალიში საერთოდ არ ესაჭიროება. ჩვილმა, შესაძლოა, ძილის დროს მოულოდნელად სახე დაადოს ბალიშს, თუ ფეხზე დადგომა და სიარული იცის, ის ბალიშს საწოლიდან გადმოსაძრომად და საყრდენად გამოიყენებს. ბალიში, შესაძლოა, პატარასთვის ალერგენიც იყოს.

2. ჰაერის დამატენიანებელი

ჰაერის დამატენიანებელი ბავშვის ჯანმრთელობისთვის სასარგებლოა. კარგად დატენიანებული ჰაერი ბავშვს ჯანსაღად სუნთქვაში ეხმარება. თუ ჰაერის დამატენიანებელს არასწორად გამოვიყენებთ, შესაძლოა, მან სოკოვანი დაავადებების ჩამოყალიბებას შეუწყოს ხელი და ოთახში მეტისმეტად ნესტიანი გარემო შექმნას. მსგავსი შეცდომა რომ არ მოგვივიდეს, პედიატრები გვირჩევენ ჰაერის ტენიანობის შესამოწმებელი ხელსაწყო შევიძინოთ. ოპტიმალური მაჩვენებელი ჰაერის 50 % -იანი ტენიანობაა.

3. მაგნიტი

მაგნიტური სათამაშოები, ციფრები და ფიგურები ბავშვის ყურადღებას მარტივად იქცევს, თუმცა ისინი სერიოზულ საფრთხეს უქმნიან ბავშვის ჯანმრთელობას, განსაკუთრებით მაშინ, თუ მაგნიტი სათამაშოზე კარგად არ არის მიმაგრებული. შესაძლოა, ბავშვს მაგნიტი გადაეყლაპოს და მის სიცოცხლეს საფრთხე დაემუქროს. მსგავს სათამაშოებთან ბავშვი მარტო არასდროს დატოვოთ.

4. საწოლის გამოსაკრავები

მშობლებს ძალიან მოსწონთ საწოლის გამოსაკრავების შეძენა. მათი მეშვეობით ისინი ​ჩვილის ტრავმებისგან დაცვას ცდილობენ. როგორც აღმოჩნდა, მსგავსი გამოსაკრავები ბავშვისთვის უსაფრთხო არ არის. ბავშვი, შესაძლოა, სახით მიეჯახოს გამოსაკრავ ბალიშს, თუ გამოსაკრავი კარგად არ არის საწოლზე მიმაგრებული, შესაძლებელია, რომ ის ბავშვს სახეზე დაეცეს. გარდა ამისა, გამოსაკრავების გამოყენებამ, შესაძლოა, ბავშვის გადახურება გამოიწვიოს. ამერიკის პედიატრთა აკადემია საწოლის გამოსაკრავების გამოყენების რეკომენდაციას არ გასცემს.

5. რადიოძიძა

ელექტროგაყვანილობების გამოყენება ბავშვის ოთახში ძალიან სახიფათოა. ბავშვის საწოლთან ახლოს რადოძიძის დამონტაჟებას არ გირჩევთ. შესაძლოა, ბავშვმა გაყვანილობას შემთხვევით ხელი მოჰკიდოს ან მისი დაღეჭვა სცადოს. უმჯობესია, თუ უკაბელო მოწყობილობებს შეიძენთ, ან მას ბავშვისგან მოშორებით დაამაგრებთ.

6. პლედი

პლედის პატარებთან გამოყენება იმავე მიზეზით არ შეიძლება, რა მიზეზითაც საწოლის გამოსაკრავებს არ ვუწევთ რეკომენდაციას. შესაძლოა, ბავშვმა სახეზე აიფაროს პლედი, რაც ჰაერის უკმარისობის საფრთხეს ქმნის. პლედი ბავშვს გადახურების რისკსაც უქმნის. ​18 თვემდე ბავშვის საწოლში ზედმეტი ნივთები არ უნდა გქონდეთ. თუ გეშინიათ, რომ ბავშვს შესცივდება, სპეციალური საძილე კომბინიზონები გამოიყენეთ.

7. სათამაშოები ელემენტებით

ელემენტები ბავშვისთვის ძალიან სახიფათოა. იმ შემთხვევაში, თუ ის ელემენტს გადაყლაპავს, შესაძლოა, საყლაპავის სერიოზული დამწვრობა განუვითარდეს. ელემენტების მოხვედრა სახიფათოა ცხვირსა და ყურებშიც. არასდროს დატოვოთ ბავშვი ელემენტებთან ახლოს. კარგად დააკვირდით სათამაშოებს, თუ რამდენად უსაფრთხოდ არის მათში ელემენტები მოთავსებული.

8. არამყარი ავეჯი

ავეჯი ბავშვის ოთახში აუცილებლად მყარი უნდა იყოს. საქმე არ ეხება მხოლოდ კარადებსა და სხვა დიდი ზომის ავეჯს. ნებისმიერი სარკე, ტექნიკა ან სხვა სახის ავეჯი მყარი უნდა იყოს, რათა ბავშვს მოულოდნელად არ დაეცეს. ეცადეთ ავეჯი მყარად მიამაგროთ კედლებს. არასდროს დადოთ ბავშვისთვის მიმზიდველი ნივთი მისთვის მიუწვდომელ სიმაღლეზე, რათა​ ის გადმოვარდნის საფრთხისგან დაიცვათ.

9. არომატული სანთლები

არომატული სანთლები ქიმიურ ნივთიერებებს შეიცავს. თუ ოთახში ჰაერი კარგად არ ცირკულირებს, შესაძლოა, მძაფრმა არომატებმა ბავშვებში ალერგიული რეაქციები გამოიწვიოს, განსაკუთრებით, თუ მათ ასთმა აქვთ. ბავშვის ფილტვები განვითარების პროცესშია, რის გამოც მასზე მსგავსი მავნე ნაერთებით ზემოქმედება არ შეიძლება. თუ ოთახში უსიამოვნო სუნია, ბავშვი ოთახიდან გაიყვანეთ და ფანჯარა გამოაღეთ, რათა ჰაერი გასუფთავდეს.

10. რბილი სათამაშოები გრძელი ბეწვით

რბილი სათამაშო ბავშვის საწოლში არ დატოვოთ, როდესაც ის იძინებს, ​რათა ის მოგუდვის საფრთხისგან დაიცვათ. ყურადღება მიაქციეთ, რამდენად კარგად არის შეკერილი სათამაშო. ნუ იყიდით ისეთ სათამაშოს, რომელსაც გრძელი ბეწვი აქვს. ადრე თუ გვიან ბეწვი ცვენას დაიწყებს და ის ბავშვის პირის ღრუშიც შეიძლება აღმოჩნდეს.

მომზადებულია​ adme.ru - ს მიხედვით


არ დაგავიწყდეთ !!!

დაემატეთ ჯგუფში საბავშვო რეცეპტები

უსაფრთხოების 10 წესი, რომელიც ბავშვს აუცილებლად უნდა ასწავლოთ - ევგენი კომაროვსკი
​​ცნობილმა პედიატრმა ევგენი კომაროვსკიმ სოციალურ ქსელში პოსტი გამოაქვეყნა, რომელშიც მშობლებს უსაფრთხოების ის წესები გააცნო, რომელთა შესახებ ბავშვმა აუცილებლად უნდა იცოდეს. მართალია, მშობლებს სურთ, რომ...

შეიძლება დაინტერესდეთ

რაზე მიუთითებს ბავშვის განავალში სისხლის არსებობა და როგორ მივიტანოთ ეჭვი დაავადებაზე?

რაზე მიუთითებს ბავშვის განავალში სისხლის არსებობა და როგორ მივიტანოთ ეჭვი დაავადებაზე?

რაზე მიუთითებს ბავშვის განავალში სისხლის არსებობა და როგორ მივიტანოთ ეჭვი დაავადებაზე, - აღნიშნულ თემაზე პედიატრი თამარ ობგაიძე ​საუბრობს. გთავაზობთ მის ნათქვამს სიტყვა-სიტყვით?

„პირველ რიგში, ნორმაზე ვილაპარაკოთ. თქვენ შეიძლება, განავალში სისხლი უბრალოდ მოგეჩვენოთ. იმიტომ, რომ განავალი ფერს იცვლის და ჰგავს სისხლიანს, როცა ბავშვი იღებს ზოგიერთ საკვებს, მაგალითად, ჟოლოს, ჭარხალს, პომიდორს. ამ დროს განავალი მოწითალო ფერისაა. როგორც კი ამ საკვებს რაციონიდან ამოიღებთ, მას ჩვეულებრივი ფერი დაბრუნდება.


განავალი შეიძლება შავი ფერის იყოს, როცა ბავშვს რკინის პრეპარატს ან ნახშირს აძლევთ და ეს საშიში სულაც არ არის.

​თუ თქვენ კვებავთ ჩვილს ძუძუთი, რომლის თავზე ნახეთქები გაქვთ, მის კუჭში რძესთან ერთად მოხვდება თქვენი სისხლიც, რამაც შეიძლება გამოიწვიოს სისხლიანი პირღებინებაც და შავის ფერის განავალიც.

ახლა პათოლოგიაზე ვისაუბროთ - განავალში სისხლზე ეჭვი უნდა მიიტანოთ მაშინ, როცა განავალი წითელია ფერისაა, მასში ხედავთ სისხლის აშკარა მინარევს ან განავალი შავი ფერისაა. სწორედ შავი და არა მუქი ყავისფერი ან მუქი მწვანე.

პრობლემის განსაზღვრა სისხლის ფერის მიხედვით

როცა განავალში ალისფერ სისხლს ხედავთ, ნიშნავს, რომ სისხლი საჭმლის მომნელებელი სისტემის ქვედა ნაწილებიდან მოდის, მაგალითად, სწორი, მსხვილი ნაწლავიდან, ანალური ხვრელიდან.

​როცა განავალი შავია, ნიშნავს იმას, რომ პრობლემა საყლაპავში, კუჭში ან თორმეტგოჯა ნაწლავშია. მარილმჟავას ზემოქმედებით სისხლი ფერს იცვლის და განავალი შავდება.

​თუ სისხლი განავლის ბოლო ულუფაშია, მოსხმული აქვს განავალს ან ანუსის გაწმენდის შემდეგ ხელსახოცზე ხედავთ ალისფერ სისხლს, ის ყველაზე ხშირად ანუსიდან მოდის და სავარაუდოდ, ბუასილის ან ანუსის ნახეთქის გამოა.

სისხლიანი განავლის მთავარი მიზეზები:

ალისფერი სისხლი -
თუ პატარას დიარეა აქვს და განავალში სისხლია, გამოსარიცხია ზოგიერთი ინფექციური ნაწლავური დაავადება, მაგალითად, დიზენტერია, ამებიაზი. სისხლიანი დიარეის დროს ექიმთან დაუყოვნებელი ვიზიტია საჭირო.
ბუასილი
ანუსის ნახეთქი
ამ ორი პრობლემის გამომწვევი მთავარი მიზეზი, როგორც წესი, ყაბზობაა.
ნაწლავის პოლიპები
ნაწლავის ზოგიერთი ანატომიური დეფექტი
ნაწლავის პარაზიტული დაავადებები
წყლულოვანი კოლიტი
ლაქტოზის აუტანლობა
კვებითი ალერგია - თუ თქვენ ფიქრობთ, რომ ალერგია მხოლოდ კანზე შეიძლება გამოვლინდეს, ცდებით. ძროხის რძის ცილის აუტანლობა ზოგჯერ მუცლის ტკივილით, დიარეით და სისხლიანი განავლითაც ვლინდება.
შავის ფერის განავალი ანუ მელენა - საყლაპავის, კუჭის-თორმეტგოჯა ნაწლავის წყლულოვანი დაავადებები, სიმსივნეები.

როგორ უნდა მოვიქცეთ?

თვითგამოკვლევა და თვითმკურნალობა დაივიწყეთ. არც გუგლის საძიებო სისტემა გამოგადგებათ პრობლემაში გასარკვევად. ექიმს უნდა მიმართოთ და მის მიერ დაგეგმილი კვლევები ჩაატაროთ. ეს შეიძლება იყოს სისხლის საერთო ანალიზი, განავლის ტესტები, ანუსის და კუჭ-ნაწლავის ორგანოების დათვალიერება, მათ შორის რენტგენოლოგიური ან ენდოსკოპური მეთოდით,“ - წერს პედიატრი თამარ ობგაიძე.

წაიკითხეთ სრულად