Baby Bag

მასწავლებლის 5 განსაკუთრებული უნარი, რომელიც კარგ მშობელს აუცილებლად უნდა ჰქონდეს

მასწავლებლის 5 განსაკუთრებული უნარი, რომელიც კარგ მშობელს აუცილებლად უნდა ჰქონდეს

მასწავლებლებს ბავშვებთან ურთიერთობისთვის გარკვეული უნარები აუცილებლად სჭირდებათ. როგორც აღმოჩნდა, აღნიშნული უნარები მშობლებისთვისაც მნიშვნელოვანია. ჩვენს სტატიაში მასწავლებლების იმ ხუთ უნარს გაგაცნობთ, რომელთა შეძენა მშობლებს შვილებთან ურთიერთობის გაუმჯობესებაში მნიშვნელოვნად დაეხმარება.

1. მოთმინება

მასწავლებლისთვის მოთმინების უნარი ძალიან მნიშვნელოვანია. მან უნდა იცოდეს, რომ ​ბავშვები ერთმანეთისგან განსხვავდებიან და მათთან განსხვავებული მიდგომაა საჭირო. მასწავლებელმა უნდა გააცნობიეროს, რომ ყველა ბავშვი სასწავლო მასალას ერთნაირი წარმატებით ვერ ითვისებს. მშობელიც მოთმინებით უნდა აკვირდებოდეს შვილის სწავლის პროცესს და მის შესაძლებლობებს ითვალისწინებდეს. მასწავლებელს აქვს უნარი ბავშვს ცოდნა თანდათანობით გადასცეს. ის ჯერ უხსნის ბავშვს, როგორ ისწავლოს. შემდეგ მასთან ერთად აკეთებს დავალებას, რის შემდეგაც ბავშვი დამოუკიდებელ მუშაობაზე გადადის. მშობელმა შვილთან ურთიერთობაში სწორედ ასეთი მოთმინება უნდა გამოიჩინოს.

2. ორგანიზებულობა

ორგანიზებულობის უნარი ბუნებრივად თუ გერგოთ, ძალიან იღბლიანი ხართ. ​თუ ეს უნარი არ გაქვთ, უმჯობესია მის ჩამოყალიბებაზე იზრუნოთ. სკოლებში ყველაზე ორგანიზებული მასწავლებლები სიმარტივისადმი სიყვარულით გამოირჩევიან. სახლში მარტივი ცხრილი შეადგინეთ, რომელშიც თქვენი მთავარი ინტერესები და პრიორიტეტები იქნება ჩამოწერილი. თუ თქვენთვის მთავარი ბავშვის მეცადინეობაა, პირველ რანგის საქმედ სწორედ შვილის სწავლაში დახმარება უნდა განსაზღვროთ. შეადგინეთ ცხრილი, სადაც მთელი კვირის საქმეებს პრიორიტეტების მიხედვით გაწერთ. ეს ძალიან დაგეხმარებათ.

3. ქცევის მართვა

თუ მასწავლებელს მოსწავლის ქცევის მართვის უნარი არ აქვს, მას სწავლება გაუჭირდება. კარგი მასწავლებელი ბავშვს არ უყვირის და არ არცხვენს, თუმცა მის კლასში დისციპლინა არ ირღვევა. კარგი დედა კარგი მასწავლებლის მსგავსად ცდილობს, რომ ​ბავშვებს თავდაჯერება აუმაღლოს. როდესაც ბავშვები გრძნობენ, რომ მშობელს მათი სჯერა, ისინი კარგი ქცევისკენ მეტ მიდრეკილებას ავლენენ. ბავშვი ხშირად შეაქეთ, თუნდაც მცირედი მიღწევებისთვის. თუ თქვენი შვილი დას ან ძმას კეთილად ექცევა, აუხსენით, რომ ეს მოსაწონი საქციელია, რის გამოც ის გარკვეულ ჯილდოს მიიღებს. ბავშვს უფლება მიეცით ველოსიპედით გაისეირნოს, რათა მისი დადებითი ქმედება წაახალისოთ.

4. კრეატიულობა

დედებს კრეატიულობა ძალიან სჭირდებათ, რათა ბავშვებთან ურთიერთობა გაიუმჯობესონ. თუ გსურთ, რომ ბავშვებმა ტანსაცმელი დაალაგონ, ტანსაცმლის კეცვაში შეჯიბრი მოაწყვეთ. თქვენს შვილებს ეს ძალიან მოეწონებათ. თუ გსურთ, რომ ბავშვი კომპიუტერის ეკრანს მოშორდეს, უთხარით, რომ თუ ის კომპიუტერს სწრაფად გამორთავს და 30 წამში ჩაგეხუტებათ, შაბათ-კვირას კომპიუტერთან დამატებით 10 წუთს გაატარებს.

5. ბავშვზე ორიენტირება

მასწავლებელი კლასში იმისთვის შედის, რომ ბავშვს ასწავლოს და მოსწავლეებზე იყოს ორიენტირებული. ​ბავშვზე ორიენტირება დედისთვის კიდევ უფრო მნიშვნელოვანია. როდესაც შვილებთან ვართ, მთლიანად მათზე უნდა გადავიტანოთ ყურადღება. მასწავლებელი, რომელიც კლასშია და გამუდმებით ტელეფონში იყურება, კარგი პედაგოგი არ არის. დედაც შვილთან ყოფნისას ყოველთვის უნდა ცდილობდეს, რომ ბავშვი მისი ყურადღების ცენტრში იყოს.

მომზადებულია ​imom.com-ის მიხედვით

შეიძინე საბავშვო პროდუქტების ნაკრები ექსკლუზიურ ფასად ბმულზე 👉 https://www.facebook.com/babybag.momsedu.ge

თარგმნა ია ნაროუშვილმა 


ბავშვთან სწორად მოქცევის გასაღები, როდესაც ბავშვი არ გვისმენს - ფსიქოლოგი მზიკო დალაქიშვილ...
​ფსიქოლოგმა მზიკო დალაქიშვილმა მშობლებსა და შვილებს შორის კომუნიკაციის პრობლემის შესახებ ისაუბრა. მისი თქმით, თანამედროვე მშობლების უმთავრესი პრობლემა ის არის, რომ ბავშვები მათ არ უსმენენ:„ძალიან ხშირ...

შეიძლება დაინტერესდეთ

„შენიშვნებს მაძლევენ: „ის რატომ აცვია ბავშვს, ეს რატომ აცვია,“ ამ ყველაფერს გავდივარ პედიატრთან,“- მარიტა მელიქიშვილი

„შენიშვნებს მაძლევენ: „ის რატომ აცვია ბავშვს, ეს რატომ აცვია,“ ამ ყველაფერს გავდივარ პედიატრთან,“- მარიტა მელიქიშვილი

გიორგი გასვიანის მეუღლემ მარიტა მელიქიშვილმა პატარა გალაკტიონის დაბადების შემდეგ მის ცხოვრებაში მომხდარი ცვლილებების შესახებ ისაუბრა:

„ჩემს ცხოვრებაში აბსოლუტურად ყველაფერი შეიცვალა. დილა თუ იწყებოდა სარკეში ჩახედვით, გაპრანჭვით, ახლა იწყება გალაკტიონის ჭამით, მოფერებით, მასზე ზრუნვით და მთელი დღე ასე გრძელდება. ჩვენს ცხოვრებაში მესამე, ყველაზე წმინდა არსება გახდება მთავარი გმირი. სახელს განსაკუთრებულად ვმალავდით. ზოგს არც მოეწონა, რომ გალაკტიონი დავარქვით. ვფიქრობ, რომ ეს ჩვენი გადასაწყვეტი იყო. ვერ ვხსნი, რატომ დავარქვით გალაკტიონი. ჩვენი სიყვარულის დიდი მონაკვეთი გალაკტიონის ლექსებმა შეამკო. ჩვენი სიყვარულის ნაყოფს გვინდოდა გალაკტიონი რქმეოდა. გალაკტიონს რამდენჯერაც უსმენს, თითი აქვს აწეული და ისე უსმენს. იმდენად ჭკვიანი თვალები აქვს, რომ ვფიქრობ, ძალიან დიდი ამბებით გაიზრდება.“

„თავიდან, რა თქმა უნდა, იყო ძალიან რთული, თუნდაც ლაქტაციის პროცესი. აქედანვე მივმართავ ყველა დედას, რომ ისინი არიან გმირები. ვფიქრობ, რომ 19 წლის ასაკთან შედარებით კარგი დედა ვარ. ყველა მეხმარება, ინფორმირებაც მაქვს. ჩვენზე ძალიან ზრუნავენ. სოციალურ ქსელში რასაც დავდებ, ყველაფერს აკვირდებიან. მაძლევენ შენიშვნებს: „ის რატომ აცვია, ეს რატომ აცვია.“ მინდა, მადლობა გადავუხადო ყველას. ასეთი აქტივობა ჩემთვის მნიშვნელოვანია, უბრალოდ მე რუსიკოც მეხმარება, მშობლებიც მეხმარებიან, პედიატრთან მაქვს ყოველდღიური შეხება. არის ახალი გაიდლაინები, რომ ბავშვს არ უნდა ეკეთოს ხელთათმანი, არ უნდა ეცვას წინდა, არ ეხუროს ქუდი, უნდა დავაძინოთ ისე, რომ არ იყოს ჩათბილული. ამ ყველაფერს გავდივარ პედიატრთან. მოკლედ, გარშემო ძალიან ბევრი მრჩეველი მყავს,“- აღნიშნულ საკითხზე მარიტა მელიქიშვილმა ტელეკომპანია POSTV-ის გადაცემაში „სიკეთე მარტივია“ ისაუბრა.

წყარო: ​„სიკეთე მარტივია“

წაიკითხეთ სრულად