Baby Bag

რატომ არის აბაზანის სათამაშო იხვი სახიფათო ბავშვის ჯანმრთელობისთვის?

რატომ არის აბაზანის სათამაშო იხვი სახიფათო ბავშვის ჯანმრთელობისთვის?

აბაზანის სათამაშოებს შორის პატარა ყვითელი იხვები ყველაზე დიდი პოპულარობით სარგებლობს. გარედან აღნიშნული სათამაშო აბსოლუტურად უსაფრთხოდ გამოიყურება, თუმცა მისი უხილავი მხარე არც ისე უწყინარია, როგორც ეს ხშირად გვგონია.

აბაზანის სათამაშო იხვს, რომელსაც ბავშვი აქტიურად იყენებს, შუაზე თუ გაჭრით, ნანახი უსიამოვნოდ გაგაკვირვებთ. ბავშვებს ძალიან სიამოვნებთ აბაზანაში იხვებით თამაში. რა ხდება, როდესაც სათამაშოში წყალი აღწევს? თბილ და ტენიან აბაზანაში იდეალური პირობებია ბაქტერიებისა და სოკოების გასამრავლებლად. ​დროთა განმავლობაში აბაზანის იხვი ბინძურდება, ბაქტერიები კი გარეთ მარტივად აღწევენ, როდესაც ბავშვი თამაშს იწყებს.

ილინოისის უნივერსიტეტის მკვლევარები აღნიშნულ საკითხს აქტიურად იკვლევდნენ. ისინი ახალ და გამოყენებულ აბაზანის სათამაშოებს ერთმანეთს ადარებდნენ. თერთმეტი კვირის განმავლობაში მეცნიერები საყოფაცხოვრებო პირობებში აქტიურად იყენებდნენ აბაზანის სათამაშოებს. შემდეგ ისინი აღნიშნულ სათამაშოებს შუაზე ჭრიდნენ, რათა მათი შიდა მხარე ყურადღებით დაეთვალიერებინათ.

გამოყენებული სათამაშოების შიდა ზედაპირის 1 კვადრატულ სანტიმეტრზე 5-დან 75 მილიონამდე სოკოსა და სხვასხვა ბაქტერიის უჯრედი აღმოაჩინეს. სათამაშოს შიდა ზედაპირზე პათოგენური ბაქტერია ლეგიონელაც აღმოჩნდა. მკვლევარებმა დაასკვნეს, რომ ​ბაქტერიების მსგავსი მომრავლება სათამაშოების დაბალი ხარისხის მასალით დამზადებასთან არის კავშირში. აღნიშნული სათამაშოები მოხმარებისას გარემოში დიდი რაოდენობით ნახშირბადოვან ნაერთებს გამოყოფს.

სააბაზანოში თამაშისას დაბალი ხარისხის სათამაშოების მავნე ეფექტებს სხვა ნეგატიური ფაქტორებიც ემატება. წყალი ჭუჭყიანდება, როდესაც ბავშვი ბანაობს. მასში რჩება ჰიგიენური მოვლის საშუალებების ნარჩენებიც. პატარები აბაზანის სათამაშოებით თამაშისას ხშირად ყლაპავენ წყალს, რადგან სათამაშოს ხელით მოჭერისას წყლის ჭავლი სახეზე ეშხეფებათ.

ფოტოზე თქვენ ხედავთ აბაზანის სათამაშო იხვს, რომელიც ​ხანგრძლივი გამოყენების შემდეგ ნამდვილად არასახარბიელოდ გამოიყურება.

მეცნიერების დასკვნით, აბაზანის სათამაშოებით თამაშმა, შესაძლოა, ბავშვის იმუნური სისტემა გააძლიეროს. მიუხედავად ამისა, ის შეიძლება თვალის, ყურის ან კუჭ-ნაწლავის ინფექციათა გამომწვევ მიზეზადაც იქცეს.

მკვლევარები მიიჩნევენ, რომ აღნიშნული ტიპის ​სათამაშოების დაბალი ხარისხი კიდევ ერთი სერიოზული პრობლემაა, რაც მეტ ზედამხედველობას და რეგულაციების გამკაცრებას საჭიროებს.

მომზადებულია ​brightside.me - ს მიხედვით

არ დაგავიწყდეთ !!!

დაემატეთ ჯგუფში საბავშვო რეცეპტები

რატომ არის ბუშტი ბავშვისთვის ყველაზე სახიფათო სათამაშო?
​რთული წარმოსადგენია, მაგრამ ბუშტებით თამაში ბავშვის სიცოცხლისთვის სერიოზულ საფრთხეს წარმოადგენს. ბუშტი სათამაშოებს შორის ყველაზე ხშირად ხდება ბავშვთა სიკვდილიანობისა და უეცარი გარდაცვალების მიზეზი. მ...

შეიძლება დაინტერესდეთ

„თუ ექიმმა დაგინიშნათ ანტიბიოტიკი, ჰკითხეთ მას: „რატომ მინიშნავ ანტიბიოტიკს?“ უნდა იცოდეთ, არის თუ არა ეს ანტიბიოტიკი მნიშვნელოვანი,“ - პაატა იმნაძე

„თუ ექიმმა დაგინიშნათ ანტიბიოტიკი, ჰკითხეთ მას: „რატომ მინიშნავ ანტიბიოტიკს?“  უნდა იცოდეთ, არის თუ არა ეს ანტიბიოტიკი მნიშვნელოვანი,“ - პაატა იმნაძე

​დაავადებათა კონტროლის ცენტრის დირექტორის მოადგილე პაატა იმნაძე საზოგადოებას წინდახედულობისკენ მოუწოდებს და ადამიანებს ურჩევს, ანტიბიოტიკები სიფრთხილით გამოიყენონ:

„XXI საუკუნეში კაცობრიობას ემუქრებოდა ორი ძირითადი საფრთხე: ეს იყო ახალი რესპირატორული ვირუსით გამოწვეული პანდემია და მეორე, უფრო საშიში, ანტიბიოტიკებისადმი გამძლე ბაქტერიების პოპულაციის გამრავლება ანტიბიოტიკების არასწორი მოხმარების გამო. ჩვენ ვართ იმ ეტაპზე, როდესაც ერთი პანდემია დაგვატყდა თავს, ეს მეორე პანდემია შეიძლება კიდევ უფრო უარესი იყოს თავისი შედეგებით კაცობრიობისთვის. ის გამოგვაცლის იმ იარაღს, რომელიც მეოცე საუკუნეში შექმნა ადამიანმა, ეს არის ანტიბიოტიკები, რომლებიც ბაქტერიულ ინფექციებთან საბრძოლველად გამოიყენება.“

პაატა იმნაძის თქმით, ანტიბიოტიკების გამოყენება​ კოვიდ ინფიცირებულების მხოლოდ 8 პროცენტს ესაჭიროება:

„თუ არის ბაქტერიული გართულება, გამოიყენება ანტიბიოტიკები, მაგრამ ეს სჭირდება კოვიდ ავადმყოფების მხოლოდ 8 პროცენტს, იგულისხმება მძიმე ავადმყოფები, რომლებიც ჰოსპიტალიზირებულები არიან. მათ თანდართული ბაქტერიული ინფექციების გამო შეიძლება დასჭირდეთ ანტიბიოტიკების გამოყენება. დღევანდელი სტატისტიკით 70 %-ზე მეტი პაციენტი მოიხმარს ანტიბიოტიკებს. ეს არის კატასტროფული მონაცემები. როდესაც ანტიბიოტიკები აღარ იქნება გამოსადეგი, რადგან ბაქტერიები გამოიმუშავენ მდგრადობას მათ მიმართ, ეს დრო მოახლოვდება, რადგან ანტიბიოტიკების პანდემიის დროს დანიშნულების გარეშე ვიყენებთ.“

​პაატა იმნაძე აცხადებს, რომ ანტიბიოტიკების გამოყენება ექიმის დანიშნულების უნდა მოხდეს და ის კონკრეტული ბაქტერიის გასანეიტრალებლად უნდა გამოიყენებოდეს:

„ანტიბიოტიკს აქვს თავისი მკაცრი ჩვენება, როდის უნდა გამოიყენო. უნდა იყოს ბაქტერიული ინფექცია, რომლის დროსაც ექიმმა უნდა გადაწყვიტოს ანტიბიოტიკის გამოყენება.​ სხვა ყველა შემთხვევაში შეიძლება პირდაპირ ითქვას, რომ უარყოფითის გარდა არაფერ კარგს არ აკეთებს ანტიბიოტიკი. მისი დანიშნულება არის, რომ მოკლას ბაქტერია, რომელმაც გამოიწვია ინფექცია. თუ ბაქტერია არ არის, ანტიბიოტიკი ყველაფერზე უარყოფითად ზემოქმედებს. თუ არის ბაქტერიული ინფექცია და არა ვირუსული, მაშინ მას აქვს გამოყენების ჩვენება.“

„მინდა მოვუწოდო ჩემს კოლეგებს, რომლებიც მართავენ კოვიდ პაციენტებს ბინის პირობებში, არავითარ შემთხვევაში არ გამოიყენონ ანტიბიოტიკები. ასევე მინდა მოვუწოდო მოსახლეობას, თუ ექიმმა დაგინიშნათ ანტიბიოტიკი, ჰკითხეთ მას: „რატომ მინიშნავ ანტიბიოტიკს?“ უნდა იცოდეთ, არის თუ არა ეს ანტიბიოტიკი მნიშვნელოვანი, რომ პაციენტი ებრძოლოს კოვიდ ინფექციას,“ - აღნიშნავს პაატა იმნაძე.

წყარო:​ პულსი TV

წაიკითხეთ სრულად