Baby Bag

„ბავშვმა ადრეული ასაკიდანვე უნდა ისწავლოს თვითდამშვიდება და თვითჩაძინება,“ - ბავშვთა ნევროლოგი ნანა ტატიშვილი

„ბავშვმა ადრეული ასაკიდანვე უნდა ისწავლოს თვითდამშვიდება და თვითჩაძინება,“ - ბავშვთა ნევროლოგი ნანა ტატიშვილი

ბავშვთა ნევროლოგმა ნანა ტატიშვილმა ბავშვებში ძილის დარღვევის განვითარების მიზეზებზე ისაუბრა და აღნიშნული პრობლემის გენეტიკურ ხასიათს გაუსვა ხაზი:

„ძილის დარღვევის დროს ძალიან ხშირია ოჯახური წინასწარგანწყობა, განსაკუთრებით ადრეულ ჩვილობაში. ძალიან ხშირად, როდესაც მშობელს მოჰყავს ჯანმრთელი ბავშვი, ყოველგვარი გართულების გარეშე და ჩივის, რომ ​ბავშვს არ სძინავს, წუხს, აღმოჩნდება, რომ დედა ან მამა ასეთივე პრობლემით იყო ადრეულ ჩვილობაში. თვითონ, რა თქმა უნდა, ამის შესახებ არ იციან, მაგრამ თუ ბებია ახლავს, ის ამბობს: „სულ ვამბობდი, რომ შენი შვილი გადაგიხდის სამაგიეროს, მე რომ მაწვალე ადრეულ ბავშვობაში.“

ნანა ტატიშვილის თქმით, ძილის დარღვევების მთავარი გამომწვევი გარემოა და არა - გენეტიკა:

„გენეტიკაზე დიდი მნიშვნელობა აქვს გარემოს, წესების დაცვას. თუ ბავშვის ძილი დამოკიდებულია ჩვენს დროზე, როდესაც ჩვენ მოვიცლით, სტუმრებს გავუშვებთ, საქმეებს მოვრჩებით და ბავშვს მერე დავაძინებთ, ეს არის ხან ადრე, ხან უფრო გვიან, ასეთ ბავშვებს დარღვეული აქვთ ძილი. ჩემთან მოსულან მშობლები, რომლებსაც გამოცდილი აქვთ ძალიან მძიმე და სერიოზული წამლები, რომელთაც არავითარი ზეგავლენა ბავშვის ძილზე არ მოუხდენია. გაცილებით ძნელია მშობელი დავარწმუნოთ, რომ ​ძილის რუტინის მოწესრიგება არის ერთადერთი საშუალება ბავშვის ძილის მოწესრიგებისთვის. რეჟიმის დაცვის გარეშე არ არსებობს მედიკამენტი, არ არსებობს საშუალება, რომელიც ძილს გამოასწორებს.“

ნანა ტატიშვილმა მშობლებს მოუწოდა არ ინერვიულონ, თუ ბავშვი ძილში ხშირად წამოიყვირებს და დღისით დაძინებაზე უარს იტყვის:

„ძილში ბავშვის წამოყვირება არ არის საშიში. ერთი წლიდან სკოლამდელ ასაკამდე, ან უფრო გვიანაც, არის ღამის შიშები და კოშმარები. ეს არის ძილის მომწიფების სტადია, არის ასაკობრივი დარღვევა, რომელიც თავისით მოწესრიგდება. ჩვენ უნდა ვიყოთ მშვიდად, უნდა შევუწყოთ ხელი ბავშვის დღის რეჟიმს. მშობლები ჩივიან ხოლმე, რომ ბავშვმა გაიღვიძა ერთხელ, ორჯერ. წლამდე 4-6 გამოღვიძება ღამის განმავლობაში არის ნორმა. მშობლისთვის ეს ძალიან ძნელია, რადგან ის დაღლილია. ერთი წლის მერე ბევრი ბავშვი იღვიძებს ღამის პირველ საათზე, დილის ოთხამდე თამაშობენ. ესეც ძნელი მოსათმენია, მაგრამ ნორმაა. დღის ძილს რაც შეეხება, ბევრი ბავშვი ორი წლის შემდეგ ანებებს დღის ძილს თავს. თუ მათი ძილის ხანგრძლივობა, რომელიც 11-12 საათი უნდა იყოს, სრულდება ღამის ძილით, მაშინ შესაძლებელია, რომ ჩვენ არ ვინერვიულოთ. სამი წლიდან უმეტესი ბავშვი ანებებს დღისით დაძინებას თავს. როგორც წესი ეს ძილის დარღვევა ​ბავშვების ნერვულ სისტემას არ აფუჭებს, როგორც მშობლებს ჰგონიათ ხოლმე. ის არც რაიმე რთულ პრობლემებს არ იწვევს.“

„ბავშვმა ადრეული ასაკიდანვე უნდა ისწავლოს თვითჩაძინება და თვითდამშვიდება. როდესაც მშობელი ამოიყვანს ბავშვს საწოლიდან, ანჯღრევს, ეს არ აძლევს მას თვითდამშვიდების საშუალებას. ჩვენ უნდა ვეცადოთ, რომ თუ ბავშვი იღვიძებს, ამოვიყვანოთ, მოვეფეროთ, მივიკრათ გულზე, ვაგრძნობინოთ, რომ მასთან ვართ, შემდეგ ისევ ჩავაწვინოთ საწოლში და ​არ შევიმჩნიოთ მისი ჭირვეულობა. დავაცადოთ ბავშვს, რომ თვითონ დამშვიდდეს და დაიძინოს. თუ ბავშვობის ასაკში არ ჩამოუყალიბდა ბავშვს ნორმალური ძილის რეჟიმი, შემდეგ მთელი ცხოვრება ეს იქნება პრობლემა. მას მოუწევს უამრავი მედიკამენტის მიღება. ხშირად ვითარდება ძილის კიდევ უფრო რთული პრობლემები და სერიოზული პრობლემების წინაშე დგება ადამიანი,“ - აღნიშნულ საკითხებზე ნანა ტატიშვილმა საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.

​წყარო

არ დაგავიწყდეთ !!!

დაემატეთ ჯგუფში საბავშვო რეცეპტები

„ზოგჯერ მშობლები ბავშვებს ჩაძინების მიზნით ლოგინში ურთავენ ტელეფონს - ეს მცდარი შეხედულება...
რა საფრთხის წინაშე აყენებს ეკრანდამოკიდებულება ბავშვს და როგორ უნდა მოიქცეს მშობელი, რომ თავიდან აირიდოს მისგან გამოწვეული დაავადებები - აღნიშნულ თემებზე ​Momsedu.ge-ს ექიმი-პედიატრი, რადიოლ...

შეიძლება დაინტერესდეთ

შეიძლება თუ არა ორსულისთვის ვარჯიში, სპორტი და რამდენად უსაფრთხოა?

შეიძლება თუ არა ორსულისთვის ვარჯიში, სპორტი და რამდენად უსაფრთხოა?

დღეს ხუთშაბათია და მედიაპორტალი MomsEdu.ge ტრადიციულ რუბრიკას - მეან-გინეკოლოგის რეკომენდაციებს წარმოგიდგენთ. ამჯერად მეან-გინეკოლოგი და ქირურგი ეკა ბუკია მოგაწვდით კომპეტენტურ ინფორმაციას, შეიძლება თუ არა ვარჯიში ორსულობის პერიოდში და რამდენად უსაფრთხოა?

მიუხედავად იმისა, რომ ორსულად ხართ და თქვენი ორგანიზმი მეტი დატვირთვით მუშაობს, შესაძლოა, ვარჯიში და დამატებით ფიზიკური დატვირთვა რთულად გეჩვენებოდეთ, მაგრამ ვარჯიში დადებით გავლენას ახდენს როგორც თქვენზე, ასევე ნაყოფზე. ეს არამხოლოდ უსაფრთხო, არამედ სასარგებლოცაა!

როგორ უნდა შეარჩიოს ორსულმა, რა სახის ვარჯიში დაიწყოს?

ორსულობა ზეგავლენას ახდენს სახსრების სტაბილურობაზე, კოორდინაციასა და წონასწორობაზე. ფიზიკური დატვირტვა კი იწვევს გულისცემის რითმის ცვლილებას, ამიტომ ორსულისთვის ფიზიკური ვარჯიშის ესა თუ ის ფორმა, ინდივიდუალურად უნდა იქნას შერჩეული.

ვარჯიშმა არ უნდა გამოიწვიოს ტკივილი, შარდის შეუკავებლობა. ვარჯიში დასაშვებია იმ შემთხვევაში, თუ ორსული არის ჯანმრთელი და ორსულობა მიმდინარეობს გართულებების გარეშე!

ვარჯიშის დაწყებამდე გაიარეთ კონსულტაცია თქვენს გინეკოლოგთან, განიხილეთ რისკ-ფაქტორები.

რამდენი ხანია დასაშვები ვარჯიში?

ორსულობის ადრეულ ვადაზე ივარჯიშეთ დღეში მინიმუმ 30 წუთი, 5 დღე კვირაში, ჯამში კვირაში გამოგივათ 150 წუთი ვარჯიში. ვარჯიშის დროს აუცილებლად თან იქონიეთ წყალი. თავი აარიდეთ ისეთ ვარჯიშს, რომელიც გამოიწვევს ორგანიზმის გადახურებას. არ იწვეთ ზურგზე დიდი ხნის განმავლობაში, განსაკუთრებით, მეორე და მესამე ტრიმესტრში.

რა სახის ვარჯიშებს ენიჭება უპირატესობა?

ორსულებისთვის ვარჯიშის საუკეთესო ფორმებად ითვლება:

  • ჩქარი ნაბიჯით სიარული
  • მსუბუქი სირბილი (ე.წ. ძუნძული)
  • ცურვა
  • აერობიკა
  • აკვა აერობიკა
  • პრენატალური იოგა
  • პილატესი
  • ველოტრენაჟორი

რა უპირატესობები აქვს ვარჯიშს?

რეგულარულ ვარჯიშს სამივე ტრიმესტრში შეუძლია:

  • არტერიული წნევის დაბლა დაწევა
  • შაქრის დონის შემცირება სისხლში
  • ქოლესტერინის რაოდენობის შემცირება
  • ეხმარება ორგანიზმს სხეულის მასის და ცხიმოვანი უჯრედების გადანაწილების კონტროლში
  • ცხოვრების ხარისხის გაუმჯობესება
  • წელის ტკივილის შემცირება
  • ეხმარება ორგანიზმს შფოთვისა და დეპრესიის დაძლევაში
  • აუმჯობესებს მშობიარობის შემდგომ აღდგენით პერიოდს
  • გიმაღლებთ მოტივაციას მშობიარობის შემდგომი ფიტნესისთვის


​რა სახის ფიზიკური აქტივობა იკრძალება ორსულობის დროს?

ორსულობისას აკრძალულია შემდეგი სახის ფიზიკური აქტივობა/სპორტი, როგორებიცაა:

  • კრივი
  • ფეხბურთი
  • კალათბურთი
  • თხილამურები
  • ციგურაობა
  • დაივინგი
  • ჯირითი
  • მთამსვლელობა


​რა მდგომარეობის დროს არ არის მიზანშეწონილი ვარჯიში ორსულობისას?

როგორც წესი, მსუბუქი სახის ვარჯიში არ არის ორგანიზმისთვის საზიანო, მაგრამ არსებობს შემთხვევები, როდესაც გულისცემის გახშირება და მსუბუქი სახის ფიზიკური დატვირთვა იწვევს მთელ რიგ პრობლეებს.

დაუყოვნებლივ უნდა შეწყვითოთ ვარჯიში, თუ გრძნობთ:

  • საერთო სისუსტეს
  • თავბრუსხვევას
  • ტკივილს გულის არეში
  • ვარჯიშის დაწყებისთანავე ქოშინს
  • თავის ტკივილს
  • ფეხების შესიებას ან ტკივილს
  • დაგეწყოთ სისხლიანი გამონადენი საშოდან


​გარდა ამისა, ვარჯიში არ არის მიზანშეწონილი იმ პაციენტებისთვის, ვისაც აქვს:

  • პლაცენტის წინმდებარეობა
  • ორსულობის 26 კვ. შემდეგ მძიმე ფორმის ანემია
  • ცერვკალური უკმარისობა
  • პრეეკლამფსია
  • ორსულობა ტყუპი ნაყოფით


​გისურვებთ ჯანმრთელობას!


წაიკითხეთ სრულად