Baby Bag

„ბავშვმა ადრეული ასაკიდანვე უნდა ისწავლოს თვითდამშვიდება და თვითჩაძინება,“ - ბავშვთა ნევროლოგი ნანა ტატიშვილი

„ბავშვმა ადრეული ასაკიდანვე უნდა ისწავლოს თვითდამშვიდება და თვითჩაძინება,“ - ბავშვთა ნევროლოგი ნანა ტატიშვილი

ბავშვთა ნევროლოგმა ნანა ტატიშვილმა ბავშვებში ძილის დარღვევის განვითარების მიზეზებზე ისაუბრა და აღნიშნული პრობლემის გენეტიკურ ხასიათს გაუსვა ხაზი:

„ძილის დარღვევის დროს ძალიან ხშირია ოჯახური წინასწარგანწყობა, განსაკუთრებით ადრეულ ჩვილობაში. ძალიან ხშირად, როდესაც მშობელს მოჰყავს ჯანმრთელი ბავშვი, ყოველგვარი გართულების გარეშე და ჩივის, რომ ​ბავშვს არ სძინავს, წუხს, აღმოჩნდება, რომ დედა ან მამა ასეთივე პრობლემით იყო ადრეულ ჩვილობაში. თვითონ, რა თქმა უნდა, ამის შესახებ არ იციან, მაგრამ თუ ბებია ახლავს, ის ამბობს: „სულ ვამბობდი, რომ შენი შვილი გადაგიხდის სამაგიეროს, მე რომ მაწვალე ადრეულ ბავშვობაში.“

ნანა ტატიშვილის თქმით, ძილის დარღვევების მთავარი გამომწვევი გარემოა და არა - გენეტიკა:

„გენეტიკაზე დიდი მნიშვნელობა აქვს გარემოს, წესების დაცვას. თუ ბავშვის ძილი დამოკიდებულია ჩვენს დროზე, როდესაც ჩვენ მოვიცლით, სტუმრებს გავუშვებთ, საქმეებს მოვრჩებით და ბავშვს მერე დავაძინებთ, ეს არის ხან ადრე, ხან უფრო გვიან, ასეთ ბავშვებს დარღვეული აქვთ ძილი. ჩემთან მოსულან მშობლები, რომლებსაც გამოცდილი აქვთ ძალიან მძიმე და სერიოზული წამლები, რომელთაც არავითარი ზეგავლენა ბავშვის ძილზე არ მოუხდენია. გაცილებით ძნელია მშობელი დავარწმუნოთ, რომ ​ძილის რუტინის მოწესრიგება არის ერთადერთი საშუალება ბავშვის ძილის მოწესრიგებისთვის. რეჟიმის დაცვის გარეშე არ არსებობს მედიკამენტი, არ არსებობს საშუალება, რომელიც ძილს გამოასწორებს.“

ნანა ტატიშვილმა მშობლებს მოუწოდა არ ინერვიულონ, თუ ბავშვი ძილში ხშირად წამოიყვირებს და დღისით დაძინებაზე უარს იტყვის:

„ძილში ბავშვის წამოყვირება არ არის საშიში. ერთი წლიდან სკოლამდელ ასაკამდე, ან უფრო გვიანაც, არის ღამის შიშები და კოშმარები. ეს არის ძილის მომწიფების სტადია, არის ასაკობრივი დარღვევა, რომელიც თავისით მოწესრიგდება. ჩვენ უნდა ვიყოთ მშვიდად, უნდა შევუწყოთ ხელი ბავშვის დღის რეჟიმს. მშობლები ჩივიან ხოლმე, რომ ბავშვმა გაიღვიძა ერთხელ, ორჯერ. წლამდე 4-6 გამოღვიძება ღამის განმავლობაში არის ნორმა. მშობლისთვის ეს ძალიან ძნელია, რადგან ის დაღლილია. ერთი წლის მერე ბევრი ბავშვი იღვიძებს ღამის პირველ საათზე, დილის ოთხამდე თამაშობენ. ესეც ძნელი მოსათმენია, მაგრამ ნორმაა. დღის ძილს რაც შეეხება, ბევრი ბავშვი ორი წლის შემდეგ ანებებს დღის ძილს თავს. თუ მათი ძილის ხანგრძლივობა, რომელიც 11-12 საათი უნდა იყოს, სრულდება ღამის ძილით, მაშინ შესაძლებელია, რომ ჩვენ არ ვინერვიულოთ. სამი წლიდან უმეტესი ბავშვი ანებებს დღისით დაძინებას თავს. როგორც წესი ეს ძილის დარღვევა ​ბავშვების ნერვულ სისტემას არ აფუჭებს, როგორც მშობლებს ჰგონიათ ხოლმე. ის არც რაიმე რთულ პრობლემებს არ იწვევს.“

„ბავშვმა ადრეული ასაკიდანვე უნდა ისწავლოს თვითჩაძინება და თვითდამშვიდება. როდესაც მშობელი ამოიყვანს ბავშვს საწოლიდან, ანჯღრევს, ეს არ აძლევს მას თვითდამშვიდების საშუალებას. ჩვენ უნდა ვეცადოთ, რომ თუ ბავშვი იღვიძებს, ამოვიყვანოთ, მოვეფეროთ, მივიკრათ გულზე, ვაგრძნობინოთ, რომ მასთან ვართ, შემდეგ ისევ ჩავაწვინოთ საწოლში და ​არ შევიმჩნიოთ მისი ჭირვეულობა. დავაცადოთ ბავშვს, რომ თვითონ დამშვიდდეს და დაიძინოს. თუ ბავშვობის ასაკში არ ჩამოუყალიბდა ბავშვს ნორმალური ძილის რეჟიმი, შემდეგ მთელი ცხოვრება ეს იქნება პრობლემა. მას მოუწევს უამრავი მედიკამენტის მიღება. ხშირად ვითარდება ძილის კიდევ უფრო რთული პრობლემები და სერიოზული პრობლემების წინაშე დგება ადამიანი,“ - აღნიშნულ საკითხებზე ნანა ტატიშვილმა საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.

​წყარო

არ დაგავიწყდეთ !!!

დაემატეთ ჯგუფში საბავშვო რეცეპტები

„ზოგჯერ მშობლები ბავშვებს ჩაძინების მიზნით ლოგინში ურთავენ ტელეფონს - ეს მცდარი შეხედულება...
რა საფრთხის წინაშე აყენებს ეკრანდამოკიდებულება ბავშვს და როგორ უნდა მოიქცეს მშობელი, რომ თავიდან აირიდოს მისგან გამოწვეული დაავადებები - აღნიშნულ თემებზე ​Momsedu.ge-ს ექიმი-პედიატრი, რადიოლ...

შეიძლება დაინტერესდეთ

„სარქველი სარქველში“ - საქართველოში ურთულესი კარდიოქირურგიული პროცედურა ჩატარდა

„სარქველი სარქველში“ - საქართველოში ურთულესი კარდიოქირურგიული პროცედურა ჩატარდა

65 წელს გადაცილებულმა პაციენტმა ჩვეული ფიზიკური აქტივობის შეზღუდვით ექიმს მიმართა. 10 წლის წინ ქირურგიული წესით ჰქონდა აორტის სარქველი გამოცვლილი, ბიოლოგიური სარქველი ეყენა, რომელმაც ეფექტურობა დაკარგა. კვლევები კრიტიკულ ციფრებსა და მაღალ რისკებს აჩვენებდა... შედგა კონსილიუმი და ყველა დეტალის, რაც მთავარია პაციენტის სურვილის გათვალისწინებით, ტრანსკათერეტული აორტის სარქვლის შეცვლის პროცედურა (TAVI) ჩატარდა. „სარქველი სარქველში“ მეთოდი სირთულითა და კომპლექსურობით პირველი იყო, რაც საქართველოში, კერძოდ „ნიუ ჰოსპიტალსში“ წარმატებით წარიმართა, კარდიოლოგ ლაშა მოსიაშვილის ხელმძღვანელობით.

​MOMSEDU.GE გთავაზობთ ინტერვიუს „ნიუ ჰოსპიტალსის“ ინტერვენციული კარდიოლოგიის სამსახურის ხელმძღვანელთან:

- რას გულისხმობს ტრანსკათერეტული აორტის სარქვლის შეცვლის პროცედურა (TAVI)?

ლაშა მოსიაშვილი: „პროცედურა წარმოადგენს აორტის სარქვლის შეცვლის არაქირურგიულ მეთოდს. ძირითადად ნაჩვენებია პაციენტებისთვის, რომელთაც აქვთ მაღალი კარდიოქირურგიული რისკი.

მეთოდი ტექნოლოგიისა და ინტერვენციული კარდიოლოგიის განვითარებამ წარმოშვა. ჩვენ შეგვიძლია ერთი ჩხვლეტით შევცვალოთ სარქველი, რომელიც ვეღარ ასრულებს თავის ფუნქციას და ახალი სარქველი ჩავაყენოთ. ბარძაყის არტერიიდან ან ნებისმიერი პერიფერიული არტერიიდან, საიდანაც შეიძლება აორტაში მოხვდე, სპეციალური კათეტერის მეშვეობით ხდება დაზიანებული სარქვლის გამოცვლა, რომელიც თავისი არსით ბიოლოგიური სარქველია. მას შემდეგ რაც მიდის აორტამდე, სპეციალური მარკერით სწორდება, დგება და იწყებს ფუნქციონირებას.

ცნობისთვის, აორტა გულიდან გამომავალი ყველაზე დიდი არტერიაა, მისი საშუალებით ორგანიზმს ჟანგბადით გაჯერებული სისხლი მიეწოდება, მარცხენა პარკუჭსა და აორტას შორის არის სარქველი. აორტის სარქვლის დაზიანება, გულის სარქვლოვანი აპარატის დაზიანების ყველაზე გავრცელებული ფორმაა - მსოფლიოში 65 წელს გადაცილებული ადამიანების 3%-7% მოიცავს.

- რა იწვევს აორტის სარქვლის დაზიანებას?

ლაშა მოსიაშვილი: „ჩვენ დღეს აორტის სტენოზს, ანუ შევიწროებას განვიხილავთ. ის ასაკობრივი ცვლილებაა, რომელიც სხვადასხვა დეგენერაციული ცვლილებებიდან და კალციფიცირებიდანაა გამოწვეული. რაც უფრო ასაკში შედის ადამიანი, სარქვლის მოძრავი ფურცლები კარგავენ ელასტიურობას, რაც სარქვლის რგოლის დაპატარავებასა და აორტის ხვრელის შევიწროებას იწვევს. თუ აორტის რგოლი არის 1 კვ.სმ-ზე ნაკლები, ითვლება რომ ამ სარქველს დახმარება სჭირდება.

პაციენტს აღენიშნება ადვილად დაღლა, ქოშინი, გულის აჩქარება, ტაქიკარდია, ტკივილი. ექოკარდიოსკოპია დაავადების დადგენის ოქროს სტანდარტია.

- ერთგვარი ანალიზი რომ გავაკეთოთ მკითხველთათვის, აორტის სარქვლის შეცვლის სხვადასხვა მეთოდის დადებითი და უარყოფითი მხარეებისა:

ლაშა მოსიაშვილი: „მოგეხსენებათ, მედიკამენტურ მკურნალობასთან ერთად აორტის სარქვლის შეცვლის ქირურგიული მეთოდი არსებობს - მექანიკური და ბიოლოგიური სარქვლის ჩაყენება. მექანიკური სარქველი მუდმივია, თუმცა ჩვენს პოპულაციაში რთული სამართავია, რადგან მუდმივად საჭიროებს სისხლის გამათხელებლების დოზებს, რათა თავიდან ავიცილოთ თრომბოზი. ბიოლოგიური სარქველი უფრო მარტივი მოსავლელია, თუმცა 10-15 წლამდე აქვს ეფექტური მოქმედება და რეოპერაცია სჭირდება, კარდიოქირურგიული ჩარევით მას 2-3 ჯერ მეტი გართულება ახლავს თან, ვიდრე პირველ შემთხვევაში.

მსგავსი გადაწყვეტილების წინაშე ვიდექით ზემოთქმულ პაციენტთან „სარქველი სარქველში“ მეთოდის ჩატარებისას, მას არ უნდოდა, რომ გულ-მკერდი მეორედ გაგვეხერხა. არა მხოლოდ კარდიოქირურგიის, არამედ TAVI-სთვისაც მაღალი რისკი იყო. ანატომიური თავისებურებების გამო შესაძლოა, გულის მკვებავი მთავარი არტერია დაკეტილიყო და იძულებულნი გავმხდარიყავით, ძველი სარქველი სპეციალური ბალონების საშუალებით გაგვეხლიჩა, რათა ახალი კარგად ჩამდგარიყო. მთავარი რისკი იყო ყელის დახურვა, სტენტირებითვისაც წინასწარ ვიყავით მზად. გავამართლეთ პაციენტის ნდობა, 3 დღეში სრულფასოვნად დაუბრუნდა ცხოვრების რიტმს.“

TAVI-ს კვლევებმა ძალიან კარგი შედეგები გვაჩვენა, რამაც საშუალება მოგვცა, არა მხოლოდ კარდიოქირურგიის რისკის მწონე პაციენტებს ჩავუტაროთ პროცედურა, არამედ პაციენტებს, რომლებიც პირველად არიან აორტის სარქველზე ჩასარევნი. მიზეზი ისაა, რომ განსხვავებით კარდიოქირურგიისგან, TAVI-ს არ სჭირდება დიდი ნარკოზი, არც გულის გაჩერება, არც ჭრილობა. მხოლოდ ერთი ჩხვლეტითა და 90-120 წუთამდე პროცედურით, 3 დღეში პაციენტი სახლში ეწერება და სრულფასოვან ცხოვრებას უბრუნდება.“

5 წელია, რაც საქართველოში TAVI-ს პროცედურა ტარდება, ლაშა მოსიაშვილი კი მეთოდის მართვაში პირველივე დღიდან წარმატებითაა ჩართული. საამაყოა, რომ მაღალკვალიფიციური კარდიოლოგებით დაკომპლექტებულ და ტექნოლოგიურად უმაღლეს დონეზე აღჭურვილ „ნიუ ჰოსპიტალსში“ მსოფლიო მედიცინის თანამედროვე სტანდარტებს ვუწყობთ ფეხს.

R.


წაიკითხეთ სრულად