Baby Bag

„ბავშვი სიტყვებზე მეტად სხეულის ენას ენდობა, მან იცის, რომ სიტყვებით ადამიანები ტყუიან,“ - ტრენერი ია ბერსენაძე

ტრენერი ია ბერსენაძე გადაცემაში „იმედის დღე“ ბავშვებთან კომუნიკაციისას სხეულის ენის მნიშვნელობის შესახებ საუბრობს და აღნიშნავს, რომ ბავშვები სიტყვებს ნაკლებად ენდობიან:

„ბავშვმა იცის, რომ სიტყვებით ადამიანები ტყუიან. ის ამას შესწრებია. შეუძლებელია, რომ მას ეს არ გამოეცადა. ჩვენ ვეუბნებით ბავშვებს: „ეს არ უთხრა მეზობელს,“ ან „ლია დეიდა რომ მოვა, ამას ნუ ეტყვი.“ შეიძლება ჩვენ ამას ძალიან კეთილი მიზნებით ვეუბნებით ბავშვს, მაგრამ ეს მისთვის ინფორმაციაა. მან უკვე იცის, რომ სიტყვები ტყუიან, ამიტომ ის სხეულის ენას უყურებს, როგორც ძალიან გულწრფელ არხს. ითქმის, რომ სხეულის ენა არასდროს ტყუის, ის ძალიან გულწრფელია. გაგიკვირდებათ, მაგრამ ყველაზე გულწრფელია ფეხები. პოკერის მოთამაშემ ძალიან კარგად იცის, როგორ მართოს სახე და თვალი, მაგრამ თუ მაგიდის ქვეშ მის ფეხებს დავინახავთ, მაშინვე მივხვდებით, ტყუის თუ არა.“

ია ბერსენაძის თქმით, სხეულის ენა მეტყველებამდე არსებობდა, რის გამოც მისი ძალა საკმაოდ დიდია:

„ბავშვი სიტყვებზე მეტად სხეულის ენას ენდობა. თუ სხეულის ენა და სიტყვები ერთმანეთს არ ემთხვევა, მას გაორება აქვს. ის ინფორმაციას ფილტრის ქვეშ ატარებს. მეტყველებამდე არსებობდა სხეულის ენა. თუ თქვენ მე გაბრაზებული სახით მიყურებთ, მაშინაც კი, როდესაც მეუბნებით, რომ კმაყოფილი ხართ ჩემი ქცევით, ჩემთვის თქვენი შეჭმუხნული სახე უფრო მეტს მეტყველებს, ვიდრე სიტყვები. ამიტომ თქვენს სიტყვებს ეჭვქვეშ ვაყენებ.“

ია ბერსენაძის მტკიცებით, ბავშვების ნდობის მოსაპოვებლად აუცილებელია, რომ მშობელი გულწრფელი იყოს:

„გამოსავალი ყოველთვის არის გულწრფელობა. ჩვენი სხეულის ენა და სიტყვები ერთსა და იმავე ემოციაზე უნდა მიუთითებდეს. ამას ბავშვი აუცილებლად იგრძნობს. ყველაზე პატარა ბავშვსაც მისთვის გასაგებ ენაზე შეიძლება ძალიან რთული რამ აუხსნათ. მან შეიძლება კოგნიტურად ეს ვერ გაიგოს, მაგრამ ემოციურად თუ სწორ გზავნილს გადასცემთ, ის ამას სწორად მიიღებს, გენდობათ და დაიწყებს რეფლექსიას. ბავშვის მიმღებლობა უფრო მაღალი იქნება და მას წინააღმდეგობა არ ექნება."

„როდესაც რთულ თემებზეა ოჯახში საუბარი, მშობლები ხშირად ამბობენ: „ჯერ პატარაა, ვერ გაიგებს, გაიზრდება და მერე ვეტყვი.“ ეს არავითარ შემთხვევაში არ უნდა გაკეთდეს. ბავშვს ნებისმიერ ასაკში უნდა აუხსნათ, თუ რა ხდება,“- აღნიშნავს ია ბერსენაძე.

წყარო: ​იმედის დღე

არ დაგავიწყდეთ !!!

დაემატეთ ჯგუფში საბავშვო რეცეპტები

„აღზარდეთ საკუთარი თავი, ვიდრე შვილების აღზრდას დაიწყებთ,“ - ცნობილი ინდოელი გურუს რჩევები...
​„ბავშვი სიცოცხლესთან ბევრად ახლოსაა, ვიდრე თქვენ. როდესაც ის ქვეყანას ევლინება, ცხოვრება თავიდან უნდა გაიცნოთ. ბავშვს მეგობარი სჭირდება და არა უფროსი. შვილს ჩვენს იდეებს თუ მოვახვევთ თავს, ის თავისუფ...

შეიძლება დაინტერესდეთ

„დედამ მითხრა: როდესაც ბავშვებთან არ არის დედა, მათ ღმერთი უფრო იფარავთო… საოცარი სიმშვიდე ჩადგა ჩემს გულში,“- ნათია ფანჯიკიძე

„დედამ  მითხრა: როდესაც ბავშვებთან არ არის დედა, მათ ღმერთი უფრო იფარავთო… საოცარი სიმშვიდე ჩადგა ჩემს გულში,“- ნათია ფანჯიკიძე

ფსიქოლოგმა ნათია ფანჯიკიძემ შვილების გამო დედების გადაჭარბებული შფოთვის პრობლემას გამოეხმაურა. მისი თქმით, ჭარბ შფოთვას არანაირი სარგებელი არ მოაქვს:

„ძალიან იშვიათად ვტოვებდი შვილებს სადმე. თუ დედასთან დავტოვებდი ცოტა ხნით, დ​იდი ფორიაქით ვუწერდი რვეულში: ამდენი უნდა ჭამონ, ამდენს ხანს იყვნენ ჰაერზე... ეტყობა, დედაჩემი ამაზე ძალიან წუხდა. ერთ დღესაც, რომ შეამჩნია დედამ, რომ ვტოვებ ბავშვებს, მაგრამ ვერ ვტოვებ, მაქვს ზედმეტი შფოთვა, მითხრა სიტყვები, რომელიც რჩევაც არ იყო. ეს იყო შთაგონება, რომელიც მე მთელი ცხოვრება დამამახსოვრდა. როგორც მაშინ დავმშვიდდი, იმის მერე რომ გადავკოტრიალდი, მძინავს, როდესაც შვილები სახლში არ არიან. დედამ მითხრა: როდესაც ბავშვებთან არ არის დედა, მათ ღმერთი უფრო იფარავთო. საოცარი სიმშვიდე ჩადგა ჩემს გულში.“

ნათია ფანჯიკიძის თქმით, დედებმა მეტი ნდობა უნდა გამოიჩინონ კეთილი ანგელოზების მიმართ:

„დავიწყე ფიქრი, მე რომ ვინმემ ვიღაც ჩამაბაროს და არ მენდოს, ყოველ წუთას შემამოწმოს, ხომ მეწყინება? თქვენი კეთილი ანგელოზები ძალიან გაბრაზდებიან, თუ არ ენდობით. რაც უფრო მშვიდი და აუმღვრეველია ჩვენი მცირე გრავიტაციის ველი, მით უფრო კარგად მიდის ჩვენი ცხოვრება.“

„ჩემს შვილებს თუკი თავი გაუტეხავთ, ხელი გადაუჭრიათ, ყველაფერი ჩემს თვალწინ. უკან მივდევდი და მაშინ გაანგრია ჩემმა შვილმა შუშა. ვერასდროს ვერ ვიცავთ ადამიანს, როდესაც მას ხიფათი უნდა გადაეყაროს.​ როდესაც დედა ბევრს შფოთავს, ამ შფოთვას ღვრის შვილში. შვილი ფაქტობრივად განწირული ხდება მარცხისთვის,“ - აღნიშნა ნათია ფანჯიკიძემ.

წყარო: ​Civic Initiative

წაიკითხეთ სრულად