Baby Bag

„ბავშვი სიტყვებზე მეტად სხეულის ენას ენდობა, მან იცის, რომ სიტყვებით ადამიანები ტყუიან,“ - ტრენერი ია ბერსენაძე

ტრენერი ია ბერსენაძე გადაცემაში „იმედის დღე“ ბავშვებთან კომუნიკაციისას სხეულის ენის მნიშვნელობის შესახებ საუბრობს და აღნიშნავს, რომ ბავშვები სიტყვებს ნაკლებად ენდობიან:

„ბავშვმა იცის, რომ სიტყვებით ადამიანები ტყუიან. ის ამას შესწრებია. შეუძლებელია, რომ მას ეს არ გამოეცადა. ჩვენ ვეუბნებით ბავშვებს: „ეს არ უთხრა მეზობელს,“ ან „ლია დეიდა რომ მოვა, ამას ნუ ეტყვი.“ შეიძლება ჩვენ ამას ძალიან კეთილი მიზნებით ვეუბნებით ბავშვს, მაგრამ ეს მისთვის ინფორმაციაა. მან უკვე იცის, რომ სიტყვები ტყუიან, ამიტომ ის სხეულის ენას უყურებს, როგორც ძალიან გულწრფელ არხს. ითქმის, რომ სხეულის ენა არასდროს ტყუის, ის ძალიან გულწრფელია. გაგიკვირდებათ, მაგრამ ყველაზე გულწრფელია ფეხები. პოკერის მოთამაშემ ძალიან კარგად იცის, როგორ მართოს სახე და თვალი, მაგრამ თუ მაგიდის ქვეშ მის ფეხებს დავინახავთ, მაშინვე მივხვდებით, ტყუის თუ არა.“

ია ბერსენაძის თქმით, სხეულის ენა მეტყველებამდე არსებობდა, რის გამოც მისი ძალა საკმაოდ დიდია:

„ბავშვი სიტყვებზე მეტად სხეულის ენას ენდობა. თუ სხეულის ენა და სიტყვები ერთმანეთს არ ემთხვევა, მას გაორება აქვს. ის ინფორმაციას ფილტრის ქვეშ ატარებს. მეტყველებამდე არსებობდა სხეულის ენა. თუ თქვენ მე გაბრაზებული სახით მიყურებთ, მაშინაც კი, როდესაც მეუბნებით, რომ კმაყოფილი ხართ ჩემი ქცევით, ჩემთვის თქვენი შეჭმუხნული სახე უფრო მეტს მეტყველებს, ვიდრე სიტყვები. ამიტომ თქვენს სიტყვებს ეჭვქვეშ ვაყენებ.“

ია ბერსენაძის მტკიცებით, ბავშვების ნდობის მოსაპოვებლად აუცილებელია, რომ მშობელი გულწრფელი იყოს:

„გამოსავალი ყოველთვის არის გულწრფელობა. ჩვენი სხეულის ენა და სიტყვები ერთსა და იმავე ემოციაზე უნდა მიუთითებდეს. ამას ბავშვი აუცილებლად იგრძნობს. ყველაზე პატარა ბავშვსაც მისთვის გასაგებ ენაზე შეიძლება ძალიან რთული რამ აუხსნათ. მან შეიძლება კოგნიტურად ეს ვერ გაიგოს, მაგრამ ემოციურად თუ სწორ გზავნილს გადასცემთ, ის ამას სწორად მიიღებს, გენდობათ და დაიწყებს რეფლექსიას. ბავშვის მიმღებლობა უფრო მაღალი იქნება და მას წინააღმდეგობა არ ექნება."

„როდესაც რთულ თემებზეა ოჯახში საუბარი, მშობლები ხშირად ამბობენ: „ჯერ პატარაა, ვერ გაიგებს, გაიზრდება და მერე ვეტყვი.“ ეს არავითარ შემთხვევაში არ უნდა გაკეთდეს. ბავშვს ნებისმიერ ასაკში უნდა აუხსნათ, თუ რა ხდება,“- აღნიშნავს ია ბერსენაძე.

წყარო: ​იმედის დღე

არ დაგავიწყდეთ !!!

დაემატეთ ჯგუფში საბავშვო რეცეპტები

„აღზარდეთ საკუთარი თავი, ვიდრე შვილების აღზრდას დაიწყებთ,“ - ცნობილი ინდოელი გურუს რჩევები...
​„ბავშვი სიცოცხლესთან ბევრად ახლოსაა, ვიდრე თქვენ. როდესაც ის ქვეყანას ევლინება, ცხოვრება თავიდან უნდა გაიცნოთ. ბავშვს მეგობარი სჭირდება და არა უფროსი. შვილს ჩვენს იდეებს თუ მოვახვევთ თავს, ის თავისუფ...

შეიძლება დაინტერესდეთ

ეს ვარჯიშები ყველა დედამ ჩვილს აუცილებლად უნდა ჩაუტაროს - ფიზიკური თერაპევტის მაია ხვიჩიას რჩევები მშობლებს

ეს ვარჯიშები ყველა დედამ ჩვილს აუცილებლად უნდა ჩაუტაროს - ფიზიკური თერაპევტის მაია ხვიჩიას რჩევები მშობლებს

ფიზიკურმა თერაპევტმა მაია ხვიჩიამ მშობლებს ბავშვისთვის სასარგებლო საინტერესო ვარჯიშები გააცნო, რომლის შესრულება სახლის პირობებშიც მარტივად არის შესაძლებელი:

„ჩვენ ვიცით, რომ ჩვილებს ხშირად აწუხებთ მუცლის შებერილობა და ეს ვარჯიში ამ შემთხვევაში ძალიან დაგვეხმარება. ტერფების დამუშავება შეგვიძლია ნაზი ხელსმით გავაკეთოთ. აუცილებლად ვეფერებით ჩვენს შვილს. ერთი, რაც არ შეიძლება, შიდა ზედაპირებზე არ ვეხებით. მხოლოდ გარედან ვაკეთებთ მასაჟს. ყველა მშობელი ამბობს, რომ მასაჟის მერე გადასარევად სძინავს ბავშვს.“

მაია ხვიჩიას თქმით, მასაჟი კანის სიმშრალის წინააღმდეგ ძალიან ეფექტიანი საშუალებაა:

„ახლა ძალიან ხშირია კანის სიმშრალე ბავშვებში და ათას დამატენიანებელ საშუალებას ვხმარობთ, მასაჟი საოცრად კარგად მოქმედებს, იმიტომ, რომ ცხიმქვეშა ქსოვილზე ვმოქმედებთ და ეს იწვევს კანის დატენიანებას.“

„მშობლებს შეუძლიათ ბურთის შეძენა. ბავშვებს ძალიან მოსწონთ ბურთზე ვარჯიში. ბაყაყის პოზაში ვაჯენთ ბავშვს ბურთზე. ვაკეთებთ ცურვის იმიტაციას. სამი თვიდან უკვე შეგიძლიათ ბავშვი ბურთზე ავარჯიშოთ,“- აღნიშნულ საკითხზე მაია ხვიჩიამ ტელეკომპანია „რუსთავი 2“-ის გადაცემაში „დილა მშვიდობისა საქართველო“ ისაუბრა.

წყარო: ​„დილა მშვიდობისა საქართველო“

წაიკითხეთ სრულად