Baby Bag

როგორ ვუპასუხოთ ბავშვს რთულ კითხვებზე?

როგორ ვუპასუხოთ ბავშვს რთულ კითხვებზე?

ბავშვები კითხვების დასმის დროს ფილტრს არ იყენებენ. ზოგჯერ ისინი ძალიან რთულ შეკითხვას გისვამენ, რომელზე პასუხის გაცემა გიჭირთ. მნიშვნელოვანია, რომ მშობელი ბავშვთან საუბრისთვის ყოველთვის მზად იყოს. უნდა შეეგუოთ, რომ თქვენი შვილი მცირეწლოვან ასაკში ბევრ რთულ და უხერხულ კითხვას დაგისვამთ. როდესაც მშობელი ცდილობს, რომ თავი აარიდოს ბავშვის რთულ კითხვაზე პასუხის გაცემას, ის შვილისგან კიდევ უფრო მეტ კითხვას იღებს. მშობლები ძალიან ღელავენ, როდესაც ბავშვი მოულოდნელად სვამს უხერხულ ან ორაზროვან შეკითხვას, რომელზე პასუხის გაცემა მათთვის წარმოუდგენლად რთულია.

ბავშვები ხშირად სვამენ შემდეგი სახის კითხვებს: გარდაცვლილი ადამიანები სამოთხეში ხვდებიან? რატომ არის ცა ლურჯი ფერის? რატომ არ შეუძლიათ გოგონებს მაისურების გარეშე სეირნობა, ბიჭებს კი აქვთ ამის შესაძლებლობა? რატომ არის მარიხუანა ცუდი? რა გემო აქვს ღვინოს? რას ნიშნავს სექსი? როგორ ჩნდებიან ბავშვები? როდესაც ბავშვი რთულ კითხვას დაგისვამთ, ნუ შეშინდებით. აჯობებს, თუ შვილის კითხვებს მომზადებული დახვდებით. ჩვენს სტატიაში რამდენიმე რეკომენდაციას შემოგთავაზებთ, რომელთა დახმარებით შვილის რთულ კითხვებზე პასუხის გაცემა არ გაგიჭირდებათ.

  • ბავშვს არ გაუბრაზდეთ

ხალხთან ერთად ბავშვი უხერხულ კითხვას თუ სვამს, ნუ გაბრაზდებით. თავი ხელში აიყვანეთ და პასუხის გასაცემად მოემზადეთ. შეგიძლიათ, გულის სიღრმეში ჩუმად იყვიროთ ან იტიროთ, მაგრამ ბავშვს მშვიდად ესაუბრეთ, რათა მან თქვენ მიმართ გულღია დამოკიდებულება არ დაკარგოს. ბავშვს თუ უყვირებთ ან გაკიცხავთ უხერხული კითხვის დასმის გამო, მას თქვენთან გულახდილი საუბრის ყოველთვის შეეშინდება. ისე მოიქეცით, რომ თქვენი შვილი თქვენთან საუბარს საინტერესოდ აღიქვამდეს და გენდობოდეთ.

  • ბავშვს ნუ მოატყუებთ

ყველაზე ცუდი რამ, რაც შეიძლება თქვენს შვილს გაუკეთოთ, მისთვის ტყუილის თქმაა. მშობლები ძალიან განიცდიან, როდესაც შვილები ატყუებენ, შესაბამისად, ისინიც უნდა გაუფრთხილდნენ პატარების გრძნობებს. თუ ბავშვს მოატყუებთ, მას თქვენს მიმართ უნდობლობა გაუჩნდება. პატივი ეცით თქვენს შვილებს და მათთან ყოველთვის მართალი იყავით. ამგვარად ისინი სიმართლის დაფასებას ისწავლიან. თუ ბავშვი თოვლის ბაბუის შესახებ გეკითხებათ, უმჯობესია, თუ მასთან გულახდილი იქნებით. ბავშვს აუხსენით, რომ თოვლის ბაბუას საახალწლო განწყობა და საჩუქრები მოაქვს, რომ ის გამოგონილი პერსონაჟია, რომელიც ადამიანებს აბედნიერებს.

  • კითხვაზე პასუხი თუ არ გაქვთ, გარკვეული დრო ფიქრს დაუთმეთ

ბავშვი მეტისმეტად რთულ კითხვას თუ სვამს, ღრმად ჩაისუნთქეთ და უთხარით, რომ ეს შესანიშნავი კითხვაა. შემდეგ წამოდექით და ოთახიდან გადით, ამასთან ბავშვი გააფრთხილეთ, რომ მალე დაბრუნდებით. შეგიძლიათ, ბავშვს გულახდილად უთხრათ, რომ ამ კითხვაზე პასუხი არ გაქვთ. თქვენმა შვილმა უნდა იცოდეს, რომ ჩვეულებრივი ადამიანი ხართ, რომელმაც ბევრი რამ არ იცის. ბავშვს უთხარით, რომ კითხვაზე დაფიქრდებით და პასუხს გასცემთ. მომავალში თქვენი დანაპირები აუცილებლად შეასრულეთ. არასდროს სცადოთ, რომ ბავშვისთვის პასუხის გაცემას თავი აარიდოთ.

  • კითხვები მეტისმეტად სერიოზულად არ აღიქვათ

ბავშვი მეტისმეტად უცნაურ კითხვებს თუ სვამს, არ ჩათვალოთ, რომ მას ყველაფერი რიგზე არ აქვს. ეს სავსებით ბუნებრივი მოვლენაა. ბავშვები ძალიან ცნობისმოყვარეები არიან. ისინი ცდილობენ, რომ სამყარო შეიმეცნონ. ბავშვის მიერ დასმული კითხვების სირთულე არ უნდა გაშინებდეთ.

  • ბავშვის მიერ დასმული კითხვები შემეცნებისთვის გამოიყენეთ

ბავშვები ხშირად დაგაფიქრებენ ისეთ საკითხებზე, რომელზე პასუხის მოძიება არ შეგიძლიათ. ისინი შთაგაგონებენ და მნიშვნელოვანი პასუხების ძიებისკენ მოგიწოდებენ. ბავშვის კითხვები შემეცნებისთვის გამოიყენეთ. ეცადეთ, ყოველთვის მზად იყოთ შვილთან სერიოზულ თემებზე საუბრისთვის და მისთვის მნიშვნელოვანი რჩევების მისაცემად.

მომზადებულია ​homeschoolgiveaways.com - ის მიხედვით

თარგმნა ია ნაროუშვილმა

არ დაგავიწყდეთ !!!

დაემატეთ ჯგუფში საბავშვო რეცეპტები

თუ ბავშვს „არას“ უფრო ხშირად ეტყვით, ვიდრე „კის,“ მას მადლიერების გრძნობას განუვითარებთ
​თანამედროვე მშობლებისთვის ერთ-ერთ მთავარ პრობლემას ბავშვების გამუდმებული უკმაყოფილება წარმოადგენს. რაც უნდა გააკეთონ უფროსებმა მათთვის, ისინი ბედნიერები მაინც არ არიან. მშობლები გარკვეულ სტრატეგიებს...

შეიძლება დაინტერესდეთ

„მაცივრის პროდუქტები ამ სამი კატეგორიის ხალხში რიგი დაავადებების განვითარების მიზეზი შეიძლება გახდეს,“- გიორგი ღოღობერიძის რჩევები

„მაცივრის პროდუქტები ამ სამი კატეგორიის ხალხში რიგი დაავადებების განვითარების მიზეზი შეიძლება გახდეს,“- გიორგი ღოღობერიძის რჩევები

ექიმმა გიორგი ღოღობერიძემ მაცივარში შენახული პროდუქტებისგან მომდინარე საფრთხის შესახებ ისაუბრა და ორსულებს, სუსტი იმუნური სისტემის მქონე ადამიანებსა და 65 წელს გადაცილებულ ადამიანებს საინტერესო რჩევები მისცა:

„ეს თემა საინტერესოა ორსულებისთვის, 65 წელზე მეტი ადამიანებისა და იმუნური სისტემის დაქვეითების პრობლემის მქონე ადამიანებისთვის. ეს თემა აქტუალურია იმიტომ, რომ მაცივარში ბევრ რამეს ვინახავთ. მაცივრის პროდუქტები ამ სამი კატეგორიის ხალხში რიგი დაავადებების განვითარების მიზეზი შეიძლება გახდეს. დაავადება, რომელსაც დღეს გავარჩევთ, იქნება ლისტერიოზი. ამ თემის შესახებ აუცილებლად უნდა იცოდე. ლისტერიოზი არის დაავადება, რომლის წარმოშობა ბაქტერიულია. რა უნდა ვიცოდეთ ამ ბაქტერიაზე? ეს ბაქტერია გვხვდება მაცივარში. მაცივარში ის აზიანებს პროდუქტებს, ხორცს, რძეს. თუ ორსული, 65 წელს გადაცილებული ადამიანი ან იმუნოდეფიციტის მქონე ადამიანი დალევს ამ არაპასტერიზებულ რძეს, ან მიირთმევს ამ დელიკატურ ხორცს, შეიძლება მას განუვითარდეს ლისტერიოზი. მსუბუქ შემთხვევებში ადამიანს ექნება ცხელება, კუნთების ტკივილი, ფაღარათი და ალაგდება თავისით.“

„მძიმე შემთხვევებში ლისტერიოზს შეიძლება ჰქონდეს სხვა გართულებები. შეიძლება იყოს სეფსისი, თავის ტვინის ანთება, ენცეფალიტი, მენინგიტი, ან ორივე ერთდროულად, აბსცესი. ფეხმძიმეები, რომლებიც დალევენ ამ არაპასტერიზებულ რძეს ან მიირთმევენ ხორცს, ექნებათ გრიპის მსგავსი სიმპტომები. ის იფიქრებს, რომ კოვიდი აქვს და შეიძლება არ მიაქციოს ყურადღება. ამ შემთხვევაში ლისტერია ვრცელდება საშვილოსნოს გავლით და შესაძლოა, მიაღწიოს ნაყოფს. ლისტერიოზი ფეხმძიმეებში იწვევს მკვდრადშობადობას, აბორტს. შეიძლება ნაყოფში გამოიწვიოს თავის ტვინის ანთება, აბსცესი, სეფსისი. როცა საქმე ეხება ფეხმძიმეებს, ასაკოვან ადამიანებს და სუსტი იმუნური სისტემის მქონე ადამიანებს, მათთვის კატეგორიულად არ შეიძლება არაპასტერიზებული რძის და ხორცის პროდუქტების მირთმევა, რომელიც ინახება მაცივარში. თუ მაინც გვინდა, რომ მაცივარში შენახული რძე დავლიოთ, ეს რძე უნდა გაცხელდეს 63 გრადუსამდე 30 წუთის განმავლობაში, ან 72 გრადუსამდე 15 წუთის განმავლობაში. ეს არის ძალიან საკვანძო საკითხი. ხშირია ზამთრის პერიოდში აბორტები არაპასტერიზებული რძის და ხორცის პროდუქტების მიღების გამო,“- აღნიშნა გიორგი ღოღობერიძემ.

წყარო: ​Usmle მოსამზადებელი ცენტრი

წაიკითხეთ სრულად