Baby Bag

როგორ ვუპასუხოთ ბავშვს რთულ კითხვებზე?

როგორ ვუპასუხოთ ბავშვს რთულ კითხვებზე?

ბავშვები კითხვების დასმის დროს ფილტრს არ იყენებენ. ზოგჯერ ისინი ძალიან რთულ შეკითხვას გისვამენ, რომელზე პასუხის გაცემა გიჭირთ. მნიშვნელოვანია, რომ მშობელი ბავშვთან საუბრისთვის ყოველთვის მზად იყოს. უნდა შეეგუოთ, რომ თქვენი შვილი მცირეწლოვან ასაკში ბევრ რთულ და უხერხულ კითხვას დაგისვამთ. როდესაც მშობელი ცდილობს, რომ თავი აარიდოს ბავშვის რთულ კითხვაზე პასუხის გაცემას, ის შვილისგან კიდევ უფრო მეტ კითხვას იღებს. მშობლები ძალიან ღელავენ, როდესაც ბავშვი მოულოდნელად სვამს უხერხულ ან ორაზროვან შეკითხვას, რომელზე პასუხის გაცემა მათთვის წარმოუდგენლად რთულია.

ბავშვები ხშირად სვამენ შემდეგი სახის კითხვებს: გარდაცვლილი ადამიანები სამოთხეში ხვდებიან? რატომ არის ცა ლურჯი ფერის? რატომ არ შეუძლიათ გოგონებს მაისურების გარეშე სეირნობა, ბიჭებს კი აქვთ ამის შესაძლებლობა? რატომ არის მარიხუანა ცუდი? რა გემო აქვს ღვინოს? რას ნიშნავს სექსი? როგორ ჩნდებიან ბავშვები? როდესაც ბავშვი რთულ კითხვას დაგისვამთ, ნუ შეშინდებით. აჯობებს, თუ შვილის კითხვებს მომზადებული დახვდებით. ჩვენს სტატიაში რამდენიმე რეკომენდაციას შემოგთავაზებთ, რომელთა დახმარებით შვილის რთულ კითხვებზე პასუხის გაცემა არ გაგიჭირდებათ.

  • ბავშვს არ გაუბრაზდეთ

ხალხთან ერთად ბავშვი უხერხულ კითხვას თუ სვამს, ნუ გაბრაზდებით. თავი ხელში აიყვანეთ და პასუხის გასაცემად მოემზადეთ. შეგიძლიათ, გულის სიღრმეში ჩუმად იყვიროთ ან იტიროთ, მაგრამ ბავშვს მშვიდად ესაუბრეთ, რათა მან თქვენ მიმართ გულღია დამოკიდებულება არ დაკარგოს. ბავშვს თუ უყვირებთ ან გაკიცხავთ უხერხული კითხვის დასმის გამო, მას თქვენთან გულახდილი საუბრის ყოველთვის შეეშინდება. ისე მოიქეცით, რომ თქვენი შვილი თქვენთან საუბარს საინტერესოდ აღიქვამდეს და გენდობოდეთ.

  • ბავშვს ნუ მოატყუებთ

ყველაზე ცუდი რამ, რაც შეიძლება თქვენს შვილს გაუკეთოთ, მისთვის ტყუილის თქმაა. მშობლები ძალიან განიცდიან, როდესაც შვილები ატყუებენ, შესაბამისად, ისინიც უნდა გაუფრთხილდნენ პატარების გრძნობებს. თუ ბავშვს მოატყუებთ, მას თქვენს მიმართ უნდობლობა გაუჩნდება. პატივი ეცით თქვენს შვილებს და მათთან ყოველთვის მართალი იყავით. ამგვარად ისინი სიმართლის დაფასებას ისწავლიან. თუ ბავშვი თოვლის ბაბუის შესახებ გეკითხებათ, უმჯობესია, თუ მასთან გულახდილი იქნებით. ბავშვს აუხსენით, რომ თოვლის ბაბუას საახალწლო განწყობა და საჩუქრები მოაქვს, რომ ის გამოგონილი პერსონაჟია, რომელიც ადამიანებს აბედნიერებს.

  • კითხვაზე პასუხი თუ არ გაქვთ, გარკვეული დრო ფიქრს დაუთმეთ

ბავშვი მეტისმეტად რთულ კითხვას თუ სვამს, ღრმად ჩაისუნთქეთ და უთხარით, რომ ეს შესანიშნავი კითხვაა. შემდეგ წამოდექით და ოთახიდან გადით, ამასთან ბავშვი გააფრთხილეთ, რომ მალე დაბრუნდებით. შეგიძლიათ, ბავშვს გულახდილად უთხრათ, რომ ამ კითხვაზე პასუხი არ გაქვთ. თქვენმა შვილმა უნდა იცოდეს, რომ ჩვეულებრივი ადამიანი ხართ, რომელმაც ბევრი რამ არ იცის. ბავშვს უთხარით, რომ კითხვაზე დაფიქრდებით და პასუხს გასცემთ. მომავალში თქვენი დანაპირები აუცილებლად შეასრულეთ. არასდროს სცადოთ, რომ ბავშვისთვის პასუხის გაცემას თავი აარიდოთ.

  • კითხვები მეტისმეტად სერიოზულად არ აღიქვათ

ბავშვი მეტისმეტად უცნაურ კითხვებს თუ სვამს, არ ჩათვალოთ, რომ მას ყველაფერი რიგზე არ აქვს. ეს სავსებით ბუნებრივი მოვლენაა. ბავშვები ძალიან ცნობისმოყვარეები არიან. ისინი ცდილობენ, რომ სამყარო შეიმეცნონ. ბავშვის მიერ დასმული კითხვების სირთულე არ უნდა გაშინებდეთ.

  • ბავშვის მიერ დასმული კითხვები შემეცნებისთვის გამოიყენეთ

ბავშვები ხშირად დაგაფიქრებენ ისეთ საკითხებზე, რომელზე პასუხის მოძიება არ შეგიძლიათ. ისინი შთაგაგონებენ და მნიშვნელოვანი პასუხების ძიებისკენ მოგიწოდებენ. ბავშვის კითხვები შემეცნებისთვის გამოიყენეთ. ეცადეთ, ყოველთვის მზად იყოთ შვილთან სერიოზულ თემებზე საუბრისთვის და მისთვის მნიშვნელოვანი რჩევების მისაცემად.

მომზადებულია ​homeschoolgiveaways.com - ის მიხედვით

თარგმნა ია ნაროუშვილმა

არ დაგავიწყდეთ !!!

დაემატეთ ჯგუფში საბავშვო რეცეპტები

თუ ბავშვს „არას“ უფრო ხშირად ეტყვით, ვიდრე „კის,“ მას მადლიერების გრძნობას განუვითარებთ
​თანამედროვე მშობლებისთვის ერთ-ერთ მთავარ პრობლემას ბავშვების გამუდმებული უკმაყოფილება წარმოადგენს. რაც უნდა გააკეთონ უფროსებმა მათთვის, ისინი ბედნიერები მაინც არ არიან. მშობლები გარკვეულ სტრატეგიებს...

შეიძლება დაინტერესდეთ

ახალი ჭკვიანი საფენი მშობლებს გამოცვლის საჭიროების შესახებ გამაფრთხილებელ შეტყობინებას გაუგზავნის

ახალი ჭკვიანი საფენი მშობლებს გამოცვლის საჭიროების შესახებ გამაფრთხილებელ შეტყობინებას გაუგზავნის
საფენები არამხოლოდ ჩვილ ბავშვებს, არამედ საწოლს მიჯაჭვულ ან მძიმე დაავადებების მქონე ზრდასრულ ადამიანებსაც ყოველდღიურად ესაჭიროებათ. ძიძებს, მშობლებსა და მძიმე დაავადებების მქონე პაციენტების მომვლელებს ახალი ჭკვიანი საფენი შრომას მნიშვნელოვნად შეუმსუბუქებს. მისი დახმარებით ბავშვებისა და პაციენტების მომვლელები საფენის გამოცვლის აუცილებლობის შესახებ შეტყობინებას დროულად მიიღებენ.

ბაზარზე ჭკვიანი საფენები მალე გამოჩნდება. როგორც ცნობილია, გამოცვლის საჭიროების შემთხვევაში მომვლელები მობილურზე სპეციალურ შეტყობინებას მიიღებენ. მასაჩუსეტსის ტექნოლოგიის ინსტიტუტის მკვლევარებმა ახალი ტიპის საფენი გამოიგონეს, რომელსაც ტენიანობის სპეციალური სენსორი აქვს მიმაგრებული. აღნიშნული სენსორის დახმარებით საფენის ტენიანობის მაჩვენებლის დადგენა მარტივდება. საჭიროების შემთხვევაში სენსორი ახლომდებარე მიმღებს სპეციალურ სიგნალს უგზავნის, რომელიც მშობლებს და მომვლელებს საფენის გამოცვლის აუცილებლობაზე მიანიშნებს.
მკვლევარებმა საფენებში საკმაოდ დაბალფასიანი სენსორი გამოიყენეს, რათა მათი შეძენა მოსახლეობის უდიდესი ნაწილისთვის შესაძლებელი იყოს. როდესაც საფენი სველდება, ის ფართოვდება და სიგნალის გამტარუნარიანობა მატულობს, რის გამოც სენსორი ახლომდებარე მიმღებს მარტივად უკავშირდება. ეს ყოველივე სპეციალური ელემენტების გამოყენების გარეშე ხდება.
მკვლევარების ინფორმაციით, სენსორის წარმოება და დამონტაჟება მხოლოდ 2 ცენტი ჯდება, რის გამოც ახალი ჭკვიანი საფენი საკმაოდ ხელმისაწვდომ ფასში გაიყიდება. აღსანიშნავია ისიც, რომ ჭკვიანი საფენები არამხოლოდ ოჯახებისთვის არის განკუთვნილი, არამედ მათ საავაადმყოფოებშიც გამოიყენებენ, სადაც მომვლელებს რამდენიმე პაციენტის ერთდროულად მოვლა უხდებათ.
ჭკვიანი საფენები ბაზარზე სიახლეს ნამდვილად არ წარმოადგენს. მშობლებს და პაციენტების მომვლელებს მსგავსი ტიპის საფენების შეძენა აქამდეც შეეძლოთ, თუმცა ბაზარზე დღემდე არსებული ჭკვიანი საფენები ძალიან ძვირადღირებულია და მათ შესაძენად საკმარისი თანხა ყველა ოჯახს არ აქვს. გარდა ამისა, ბაზარზე არსებულ ჭკვიან საფენებს სპეციალური ბლუთუზ სენსორი აქვს დამაგრებული, რომელიც რეგულარულ წმენდას და ყოველდღიურ კვების წყაროს საჭიროებს. ახალი ჭკვიანი საფენები კი ძალიან მარტივად მოსახმარი, დაბალფასიანი და პრაქტიკულია. 
მომზადებულია teche​xplorist.com-ის მიხედვით

​თარგმნა ია ნაროუშვილმა
წაიკითხეთ სრულად