Baby Bag

„ბავშვებს ნუ ანახებთ თქვენს გადარევას, არ არის ეს ბავშვისთვის კარგი. ნუ ასმენინებთ მათ აგრესიულ ტექსტებს,“ - თამარ გაგოშიძე

ნეიროფსიქოლოგი თამარ გაგოშიძე გადაცემაში „სხვა შუადღე“ ონლაინ სწავლებასთან დაკავშირებული პრობლემების შესახებ საუბრობს და მშობლებს საინტერესო რჩევებს აძლევს:

„ყველა გაღიზიანებულები ვართ. ზაფხული ისეთი იყო, დაგვავიწყდა ეს წყეული კორონა. ბუნებრივია, რომ ყველგან მატებაა. მსოფლიოში ყველგან ასეა, ველოდებოდი, რომ ასე იქნებოდა. ეს არის მოცემულობა. ახლა გინდა ინერვიულე და გინდა, ნუ ინერვიულებ. გინდა იჩხუბე, იყვირე, რაც გინდა ქენი, მაგრამ მოცემულობას ჩვენ ვერ შევცვლით. მე მესმის მშობლებისაც. წარმოიდგინეთ მშობლები, რომლებიც მუშაობენ, განსაკუთრებით პირველ კლასელების მშობლები. შევდივარ მათ მდგომარეობაში. ბავშვები, რომლებიც ელოდებოდნენ სკოლაში წასვლას, ეს ხომ ცხოვრებაში განსაკუთრებული მოვლენაა. უცებ ასეთი საშინელი იმედგაცრუება და ფრუსტრაცია მოვიდა. როდესაც ჩვენ ვართ გაღიზიანებულები, ბავშვებს ხომ კიდევ უფრო ვსტრესავთ. როდესაც მშობელი არის ასეთი გაღიზიანებული, ბავშვს ესმის მისი ტექსტები, რა დამოკიდებულება უნდა ჩამოუყალიბდეს მას სკოლის მიმართ?“

თამარ გაგოშიძის თქმით, ონლაინ სწავლებს უამრავი ემოციური პრობლემა ახლავს თან:

„რა შეიძლება, რომ გავაკეთოთ? მშობლების პოზიციიდან ვამბობ. მე არ ვარ მომხრე ონლაინ სწავლების, მე თვითონ ამის მსხვერპლი ვარ, როგორც უმაღლესი სასწავლებლის მასწავლებელი. ჩემზე კარგად არავინ იცის, რა დამღლელი და გამომფიტავია მასწავლებლისთვის ეს. მასწავლებლები ვცდილობთ ეკრანი დავიჭიროთ, მივიპყროთ ყველა სტუდენტის ყურადღება. ვიღაცებს ფანჯრები დახურული აქვთ, ეს კიდევ უფრო მაგიჟებს, შავ კედელს ელაპარაკები. ძალიან სერიოზული ემოციური პრობლემები ახლავს ამას თან, დაძაბულობა, ენერგიის დახარჯვა. პირველ კლასელისთვის ონლაინ სივრცეში ყველა სახე უნდა ჩანდეს. მას გვერდით აუცილებლად უნდა ჰყავდეს მშობელი. ყველა მშობელი მუშაობს, მე არ ვიცი, როგორ მოახერხებენ ისინი ამ ყველაფერს.“

თამარ გაგოშიძე აღნიშნავს, რომ დაწყებით კლასებში ბავშვებისთვის არავერბალური კომუნიკაცია აუცილებელია:

„პირველ კლასელებისა და დაწყებითი კლასის მოსწავლეებისთვის არავერბალური კომუნიკაცია არის წამყვანი. მათთვის ეს ყველაფერი დიდი დანაკლისია. ამ ასაკის ბავშვებისთვის შინაარსი და ცოდნა მოჰყვება რეალურ ურთიერთობებს, კომუნიკაციას მასწავლებელსა და მოსწავლეებს შორის. ექვსი წლის ბავშვს სჭირდება ფიზიკური კონტაქტი. მან დედა, ახლობელი უნდა ჩაანაცვლოს მასწავლებლით. მასწავლებელმა მისი ნდობა უნდა მოიპოვოს. ეს ხდება ფიზიკურად, სამწუხაროდ, ეს არ ხდება ვირტუალურად.“

„ახლა რეალობა ვირტუალურია, ამიტომ ჩემი რჩევაა, ბავშვებს ნუ ანახებთ თქვენს გადარევას. არ არის ეს ბავშვისთვის კარგი. ნუ ასმენინებთ ბავშვებს აგრესიულ ტექსტებს. რაც შეეხება მასწავლებლებს, მათ კლასში ცოტა ბავშვი უნდა ჰყავდეთ, რომ ყველას სახე იყოს დანახვადი, ყველას ვიდეო უნდა იყოს ჩართული. მასწავლებელს უნდა ჰქონდეს ბავშვებთან არაფორმალური კონტაქტი ონლაინ გაკვეთილის დროს,“ - აცხადებს თამარ გაგოშიძე.

არ დაგავიწყდეთ !!!

დაემატეთ ჯგუფში საბავშვო რეცეპტები

,,ვერც მასწავლებელი, ვერც მშობელი, ვერც ახალგაზრდები ვერ აფიქსირებენ, რომ ისინი ამცირებენ,...
ბავშვის ქცევა სოციუმში - აღიშნულ თემაზე ნეიროფსიქოლოგი თამარ გაგოშიძე საუბრობს. მისი თქმით, ვერც მასწავლებელი, ვერც მშობელი, ვერც ახალგაზრდები ვერ აფიქსირებენ, რომ ისინი ამცირებენ, შეურაცხყო...

შეიძლება დაინტერესდეთ

„ვიცი, რომ ბევრი მშობელი ელოდება ამ შესაძლებლობას. გადაწყვეტილება, რა თქმა უნდა, იქნება დადებითი,“ - ოთარ ჩოკოშვილი ბავშვებში ვაქცინაციის დაწყებაზე

„ვიცი, რომ ბევრი მშობელი ელოდება ამ შესაძლებლობას. გადაწყვეტილება, რა თქმა უნდა, იქნება დადებითი,“ - ოთარ ჩოკოშვილი ბავშვებში ვაქცინაციის დაწყებაზე

ექიმმა-ეპიდემიოლოგმა ოთარ ჩოკოშვილმა საქართველოში 12 წელს ზემოთ ასაკობრივ ჯგუფებში ვაქცინაციის დაწყების თემაზე ისაუბრა. მან აღნიშნა, რომ ქვეყანა ჯერჯერობით ვერ მიდის იმ სამიზნე მოცვისკენ, რომელიც თავდაპირველად იქნა განსაზღვრული:

„ამჟამად ვაქცინაციის ტემპი ნამდვილად არ არის დამაკმაყოფილებელი. იმ სამიზნე მოცვისკენ, რისკენაც მიდიოდა ქვეყანა, რომ 60 %-მდე მინიმუმ მოცული ყოფილიყო, ისეთი ტემპით ვეღარ მივდივართ. ტემპი ძალიან შემცირდა. მართალია, თბილისში აცრების რაოდენობა ყველაზე მეტია, რეგიონებში მნიშვნელოვანი პრობლემები იყო. ბოლო პერიოდში შედარებით გაუმჯობესება შეიმჩნევა, განსაკუთრებით კი იმ მხრივ, რომ ​გააქტიურდა გარკვეული პროგრამები. სერიოზული მხარდაჭერა აქვთ სოფლის ექიმებს, არის ბინაზე გასვლის საშუალებები, ტრანსპორტში აცრა. ამ მიმართულებით მიდის სამუშაოები.“

ოთარ ჩოკოშვილმა იმედი გამოთქვა, რომ რეგიონებში ვაქცინაციის ტემპი გაუმჯობესდება:

„იმედი გვაქვს, რომ მალე იქნება გაუმჯობესება ამ მხრივ რეგიონებში. ერთ-ერთი კარგი რაც არის ვაქცინაციის ზოგად მოცვაში, რომ 60 წელს ზემოთ ასაკის ადამიანების 65 %-მდე მოცულია. ​დანარჩენი მოსახლეობა ჯერ კიდევ ვაქცინაციის მოლოდინშია. ასაკოვან მოსახლეობაში ეს პროცენტიც არ არის საკმარისად დამაკმაყოფილებელი.“

​უახლოეს პერიოდში იგეგმება 12 წლის ზემოთ ბავშვების ვაქცინაციაზე გადაწყვეტილების მიღება. გადაწყვეტილება, რა თქმა უნდა, იქნება დადებითი. რა თქმა უნდა, აქ არ იქნება საუბარი, რომ ვაქცინაცია იყოს სავალდებულო. დღემდე არცერთ ჯგუფში არ არის სავალდებულო ვაქცინაცია. ვაქცინაცია რეკომენდებული ნამდვილად იქნება და იქნება ხელმისაწვდომიც. ბევრ ქვეყანაში უკვე დაწყებულია ვაქცინაციის პროცესი ამ ასაკობრივ ჯგუფებში. მე ვიცი, რომ ბევრი მშობელი ელოდება ამ შესაძლებლობას,“ -აღნიშნულ საკითხზე ოთარ ჩოკოშვილმა Euronews Georgia-ს ეთერში ისაუბრა.

წყარო: ​Euronews Georgia 

წაიკითხეთ სრულად