Baby Bag

როგორ ვასწავლოთ ბავშვს მოთმინება?

როგორ ვასწავლოთ ბავშვს მოთმინება?

მოთმინება ერთ-ერთი ყველაზე მნიშვნელოვანი უნარია, რომლის შეძენა ბავშვისთვის ადრეული ასაკიდანვე საჭიროა. მისი დახმარებით ადამიანები არამხოლოდ კარიერულ წინსვლას, არამედ ჯანმრთელობის შენარჩუნებას და ჯანსაღი ურთიერთობების ჩამოყალიბებასაც ახერხებენ. მართალია, ბავშვისთვის მოთმინების უნარის გამომუშავება საკმაოდ რთული საქმეა, თუმცა არსებობს გარკვეული სტრატეგიები, რომელთა დახმარებით მიზნის მიღწევას აუცილებლად შეძლებთ.

  • პოზიტიური გამოცდილების დახმარებით ბავშვი მოთმინებას სწავლობს

ბავშვებს გამოუცდელობის გამო უჭირთ იმის გააზრება, თუ რა სარგებლობა მოაქვს მათთვის მოთმინების უნარის განვითარებას. ისინი კარგად ვერ აცნობიერებენ დროის მნიშვნელობას და ვერ ხვდებიან, რას ნიშნავს, როდესაც გარკვეული მსხვერპლის ფასად ჯილდოს იღებ. როდესაც ბავშვს დაპირდებით, რომ მას ტკბილეულს უყიდით, ან მგზავრობისას ეტყვით, რომ მალე პარკს მიუახლოვდებით, ბავშვი ძალიან ბევრჯერ გკითხავთ, მალე უყიდით თუ არა ტკბილეულს, ან მალე მიხვალთ თუ არა პარკთან. მის კითხვებს ყოველთვის თბილად და მოთმინებით უპასუხეთ, თუნდაც მან ერთი და იგივე კითხვა ოცჯერ დაგისვათ. როდესაც ბავშვი კითხვას განმეორებით გისვამთ, ის ამით ეგოიზმს არ ავლენს, არამედ ცნობისმოყვარეობას გამოხატავს. მას უბრალოდ არ ესმის დროის მნიშვნელობა და ვერ ხვდება, რამდენი დრო დარჩა თქვენ მიერ მიცემული პირობის შესრულებამდე. თუ ბავშვს უხეშად უპასუხებთ ან ფიზიკურად დასჯით იმის გამო, რომ მან ბევრი კითხვა დაგისვათ, ის ჩათვლის, რომ ლოდინი ნეგატიური გამოცდილებაა. თუ მას თბილად უპასუხებთ, ბავშვი გადაწყვეტს, რომ ლოდინი ცუდი სულაც არ არის.

  • ბავშვმა დროის მსვლელობა უნდა იგრძნოს

თანამედროვე ბავშვები დროის უდიდეს ნაწილს ეკრანთან ატარებენ. ისინი თამაშობენ ან ფილმებს უყურებენ, რის გამოს დროის მსვლელობას საერთოდ ვერ გრძნობენ. ბავშვს ისეთი გასართობი გამოუძებნეთ, რომელიც მას რეალურ დროსთან კავშირს არ გააწყვეტინებს. ბავშვმა სიამოვნებაც უნდა მიიღოს და დროის მსვლელობაც უნდა იგრძნოს, რათა მოთმინების სწავლა შეძლოს.

  • ბავშვისთვის მიცემული დაპირებები ყოველთვის უნდა შეასრულოთ

მშობლები ბავშვებს დაპირებებს აძლევენ და იმედოვნებენ, რომ ბავშვი მიცემულ პირობას დაივიწყებს. პატარები კი ყველაფერს იმახსოვრებენ. ისინი ელოდებიან, როდის შეასრულებს მშობელი დაპირებას, რის გამოც ფიქრობენ, რომ დრო ძალიან ნელა გადის. მათ ლოდინის პროცესი არ სიამოვნებთ და ნეგატიურ გამოცდილებას იღებენ. ბავშვი, რომელიც ელოდა, რომ დედა ათ წუთში ტკბილეულს უყიდიდა, თვეობით ელის პირობის შესრულებას, რის გამოც ის თვლის, რომ ლოდინი ძალიან ხანგრძლივი და მოსაწყენი პროცესია. როდესაც ბავშვს პირობას აძლევთ, რომ რამეს გაუკეთებთ, დანაპირები უნდა შეასრულოთ.

  • ბავშვი ინფორმირებული უნდა იყოს

ბავშვი თუ გეკითხებათ, რამდენ ხანში მიხვალთ გასართობ ცენტრში, მას ინფორმირებული პასუხი უნდა გასცეთ. თქვენს შვილს არ უთხრათ, რომ მალე მიხვალთ. პასუხი უფრო ზუსტი და ბავშვისთვის გასაგები უნდა იყოს. თქვენს შვილს აუხსენით, რომ გასართობ ცენტრამდე მისვლას იმდენი დრო სჭირდება, რამდენიც მისი საყვარელი მულტფილმის ყურებას. ბავშვი ასე უკეთ გაიგებს, რამდენ ხანში მივა დანიშნულების ადგილამდე და ზედმეტი კითხვებითაც არ შეგაწუხებთ.

  • ბავშვის დასამშვიდებლად წამზომისა და ვიზუალური რეპრეზენტაციის გამოყენება შეგიძლიათ

შორ გზაზე თუ მიდიხართ და ბავშვის კითხვებზე ყოველწამიერად პასუხის გაცემას ვერ ახერხებთ, შეგიძლიათ წამზომი გამოიყენოთ. ბავშვს აუხსენით, რომ წამზომის დახმარებით ის თავად გაიგებს, როდის მივა დანიშნულების ადგილამდე. უმჯობესია, თუ მანქანაში რუკაც გექნებათ, რომლის დახმარებითაც თქვენს შვილს ვიზუალურად აჩვენებთ, რა გზა გაქვთ გასავლელი და რა დრო დაგჭირდებათ მანძილის დასაფარად.

მომზადებულია​ kidsvillage.com - ის მიხედვით

თარგმნა ია ნაროუშვილმა

არ დაგავიწყდეთ !!!

დაემატეთ ჯგუფში საბავშვო რეცეპტები

შეიძლება დაინტერესდეთ

მშვილდოსანი სტატისტიკის მიხედვით საუკეთესო დედამთილია... მას კარგად შეუძლია რძალთან მეგობრობა - ასტროლოგი სოფია ბზეკალავა ზოდიაქოს ნიშნის მიხედვით დედამთილებს ახასიათებს

მშვილდოსანი სტატისტიკის მიხედვით საუკეთესო დედამთილია... მას კარგად შეუძლია რძალთან მეგობრობა - ასტროლოგი სოფია ბზეკალავა ზოდიაქოს ნიშნის მიხედვით დედამთილებს ახასიათებს

ასტროლოგი სოფია ბზეკალავა ზოდიაქოს ნიშნის მიხედვით დედამთილებისთვის დამახასიათებელ ძირითად თავისებურებებსა და თვისებებზე საუბრობს:

ვერძი

ვერძი ზოდიაქოს ნიშნის ქვეშ დაბადებული დედამთილი საკმაოდ რთული ხასიათისაა, რადგან ეს ზოდიაქოს ნიშანი საკმაოდ მკაცრია. ასეთ ადამიანთან ერთ ჭერქვეშ ცხოვრება რთულია. კარგია, თუ მასთან იმეგობრებთ, რადგან წინააღმდეგ შემთხვევაში კონფლიქტი გარდაუვალია. მის შენიშვნას ყოველთვის იუმორით ან სიმშვიდით უნდა უპასუხოთ. მას კონკურენტები არ უყვარს, ამიტომ არ გაუწიოთ კონკურენცია სამზარეულოში ან საყვარელი ადამიანის სიყვარულში.

კურო

თუ მისი ძალიან ახლობელი არ ხართ, პირველ ეტაპზე, შესაძლოა, იყოს ძალიან სიტყვაძუნწი. კუროს ნიშნით დაბადებული ქალები ენაწყლიანები არ არიან. ეს არის ადამიანი, რომელიც იდეალურად უძღვება ოჯახს, არის არაჩვეულებრივი კულინარი, უვლის სახლს. შესაძლებელია, უყვარდეს მცენარეები, ჰქონდეს ბაღი. ერთადერთი რაც თქვენ მოგეთხოვებათ, არის ის, რომ არ შეიტანოთ მის ოჯახში ქაოსი. დედამთილ კუროს არ მოეწონება რძალი, რომელიც არის ძალიან მფლანგველი და ფულთან მიმართებაში უყაირათო. მას არ უყვარს უთავბოლოდ მლანგველი ადამიანები.

ტყუპები

ერთადერთი რაც ამ ნიშნის დედამთილის რძალს მოეთხოვება, საუბრის მიმართ დიდი სიყვარულია. შესაძლებელია, ტყუპმა დედამთილმა შენიშვნა ძალიან პირდაპირ და უტაქტოდ მოგცეთ, თუმცა უნდა იცოდეთ, რომ მას ცუდი განზრახვა არ ამოძრავებს.

კირჩხიბი

კირჩხიბი საკმაოდ რთული დედამთილია. ის შვილებს აღმერთებს. თუ თქვენ არ ზრუნავთ თქვენს მეორე ნახევარზე, შესაძლებელია, ეს გაბრაზების საბაბი გახდეს.

ლომი

ლომი არის კარიერით დაკავებული, აქვს რაღაც საკუთარი საქმე. ხშირ შემთხვევაში ის იქნება ავტორიტეტული ფიგურა. თუ მას არ აქვს საკუთარი პროფესია, ნათესავებში მაინც იქნება აუცილებლად ავტორიტეტი და ჭკუის საკითხავი ადამიანი. სხვების დასანახად ის თქვენთან ყოველთვის კარგ ურთიერთობას შეინარჩუნებს. თუ თქვენ მას შესაბამისი პატივისცემით არ მოეპყრობით, შესაძლებელია თქვენს შორის ბზარი გაჩნდეს. ერთ მარტივ ეშმაკობას გასწავლით, თუ თქვენი დედამთილი არის ლომის ზოდიაქოს ნიშნით დაბადებული, ხშირად შეაქეთ.

ქალწული

ქალწულ დედამთილს ძლიერი სითბოს გამოხატვა არ შეუძლია, ამიტომ, შესაძლოა, თქვენს მეორე ნახევარს ბავშვობაში სითბო აკლდა. ეს ყველაფერი თქვენ უნდა აანაზღაუროთ. ქალწული პერფექციონისტია. თუ ქაოსური ადამიანი ხართ, ეს თქვენს შორის კონფლიქტის საბაბი გახდება.

სასწორი

სასწორი ესთეტიკისადმი სიყვარულით გამოირჩევა. ის საკმაოდ ამბიციურია და შეუძლია დიპლომატიით მთელი ოჯახის მართვა. ის თქვენთან კონფლიქტში ღიად არასდროს შემოვა, თუმცა კარგად შეუძლია ცივი ომის წარმოება.

მორიელი

მორიელი დედამთილი თავისი ბუნების გამომჟღავნებას არ ერიდება. ის არის ძალიან რთული. მასთან ურთიერთობაში დაგჭირდებათ აუცილებლად მიდგომა. ეს არის ადამიანი, რომელიც კარგსაც ძალიან კარგად ხედავს და ცუდსაც ძალიან კარგად ხედავს. მას აქვს საოცრად კარგი ინტუიცია, ვერ მოატყუებთ. ჩემი მთავარი რჩევა იქნება, დაიცვათ მასთან გარკვეული დისტანცია. არც ძალიან ახლოს მოუშვათ და არც თქვენ ეცადოთ მის პირად სივრცეში ზედმეტად შეღწევას.

მშვილდოსანი

მშვილდოსანი სტატისტიკის მიხედვით საუკეთესო დედამთილია. მას კარგად შეუძლია თქვენთან მეგობრობა. რძლის მიმართ საკმაოდ კეთილგანწყობილია.

თხის რქა

თხის რქის ნიშანს ტრადიციები უყვარს. თუ ტრადიციებს ვერ ეგუებით, შესაძლოა, კონფლიქტი გქონდეთ მასთან. აუცილებელია, რომ გარკვეულ ავტორიტეტს წარმოადგენდეთ, თუნდაც თქვენს პროფესიაში.

მერწყული

მერწყული მეგობრული დედამთილია. ის არის ძალიან ჰუმანური და თავისუფლების მოყვარული. ის არასდროს ჩაერევა თქვენს ცხოვრებაში. მას მტკიცედ სჯერა, რომ ყველა ადამიანს აქვს უფლება მოიქცეს ისე, როგორც თავად თვლის საჭიროდ. მერწყულის ნიშნის ქვეშ დაბადებულ დედამთილთან შეგიძლიათ თამამად იაროთ პირსინგით, ტატუირებით. ის ამ ყველაფერს ძალიან გაგებით შეხვდება.

თევზები

თევზ დედამთილს ბევრ რამეზე შეუძლია თვალი დახუჭოს. ის ემოციური ადამიანია და მისი იმიჯის მიუხედავად, შესაძლებელია, უეცრად მრისხანებაც გამოავლინოს.

წყარო: ​Music Box

წაიკითხეთ სრულად