Baby Bag

უნდა იყოს თუ არა მშობელი მკაცრი შვილთან ურთიერთობისას?

უნდა იყოს თუ არა მშობელი მკაცრი შვილთან ურთიერთობისას?

მშობლების ნაწილი თვლის, რომ ბავშვის სწორად აღსაზრდელად სიმკაცრის გამოჩენა აუცილებელია. ისინი ფიქრობენ, რომ თუ შვილებთან კომპრომისზე ნაკლებად წავლენ, მათ უკეთეს ადამიანებად ჩამოყალიბებაში დაეხმარებიან. მშობლების ნაწილმა არ იცის, რომ სიმკაცრეს ძალიან ბევრი უარყოფითი შედეგი მოაქვს. ბავშვები მეტისმეტად მკაცრ მშობლებს მეგობრებად არ განიხილავენ, რაც მათ შორის ურთიერთობას აფუჭებს. შვილები მშობლებთან გულახდილები აღარ არიან, ოჯახური კავშირი კი მტკიცე აღარ არის.

რამდენად სწორად იქცევიან მშობლები, რომლებიც შვილებთან ურთიერთობისას სიმკაცრეს ავლენენ? პირველ რიგში, მშობელმა უნდა იცოდეს, თუ რა ზიანს აყენებს მის შვილს მკაცრი დამოკიდებულებით. სიმკაცრე მშობელსა და შვილს შორის უნდობლობას იწვევს. ბავშვი არ ენდობა მშობელს, რომელიც მისდამი სიმკაცრეს იჩენს. ყოველთვის, როდესაც თქვენს შვილს პრობლემები ექნება, ის ეცდება, რომ მათ დამოუკიდებლად გაუმკლავდეს. ის იფიქრებს, რომ სიმართლის თქმის შემთხვევაში, მას მშობლები დასჯიან. მკაცრი მშობლები შვილებს აშინებენ. ეს ყველაზე ცუდი რამ არის, რაც ბავშვს შეიძლება დაემართოს.

მკაცრი მშობლები ბავშვის თვითშეფასებაზეც ნეგატიურად ზემოქმედებენ. ისინი მეტისმეტად კრიტიკულები არიან შვილებისადმი, რადგან თვლიან, რომ შვილმა მათი მოლოდინი ყოველთვის უნდა გაამართლოს. თუ ასე არ ხდება, მშობლები მას სჯიან. მკაცრი მშობლები შვილს ძალიან ზღუდავენ, რაც ბავშვს სულს უხუთავს. ის ყველაფრის ფასად ცდილობს თავისუფლება მოიპოვოს. არაერთი კვლევით დასტურდება, რომ თინეიჯერების ამბოხის უმთავრეს მიზეზს მშობლების მხრიდან გამოჩენილი სიმკაცრე წარმოადგენს. მოზარდებს სურთ, რომ საკუთარი აზრი და იდეები ჰქონდეთ, რის შესაძლებლობას მათ მშობლები ნაკლებად აძლევენ, რაც ბავშვების გაბრაზებას და ბუნტს იწვევს.

მკაცრი მშობლები შვილების ფსიქიკაზე გარკვეულ ნეგატიურ ზეგავლენას ახდენენ, თუმცა მათი სიმკაცრე ბავშვებისთვის დადებითი შედეგების მომტანიც არის. მკაცრი მშობლების შვილები დისციპლინას მიჩვეულები არიან. მათ სკოლაში კარგი შედეგები აქვთ. მკაცრი მშობლების შვილებს სოციუმში ინტერგაცია არ უჭირთ. ზრდილობიანი და მოწესრიგებული ადამიანები ყველას უყვარს. მკაცრი მშობლები სწორედ ასეთ შვილებს ზრდიან, რის გამოც, ისინი ყველას სიყვარულს და მოწონებას მარტივად იმსახურებენ.

შვილის მიმართ გამოჩენილ სიმკაცრეს თავისი დადებითი და უარყოფითი მხარეები აქვს. ბავშვთან უფრო დისტანცირებული, ცივი ურთიერთობის წყალობით მშობელი მას წესრიგს და დისციპლინას აჩვევს, თუმცა რამდენად მართებულია მსხვერპლის გაღება მსგავსი შედეგის მიღების მიზნით? საქმე იმაშია, რომ მშობელი ვალდებული არ არის არჩევანი გააკეთოს. აუცილებელი არაა, რომ თქვენ ბავშვთან ყოველთვის მკაცრი ან ყოველთვის ლოიალური იყოთ. ოქროს შუალედის გამონახვა საუკეთესო არჩევანია.

მშობელმა თითოეულ საკითხზე განსხვავებული მიდგომა უნდა გამოამჟღავნოს. ძალიან რთულია, რომ ის შვილის მასწავლებელიც იყოს და მეგობარიც, თუმცა ეს სავსებით მიღწევადი მიზანია. საუკეთესო შემთხვევაში, მშობელმა საკუთარი მკაცრი ქცევის მიზეზები ბავშვს დეტალურად უნდა განუმარტოს, რათა მისი ნდობა არ დაკარგოს. მეგობრული და მენტორული მიდგომების გაერთიანება წარმატებული და დისციპლინირებული ბავშვის აღზრდაში ძალიან დაგეხმარებათ.

მომზადებულია ​paikesekilluperekeskus.ee - ს მიხედვით

თარგმნა ია ნაროუშვილმა 

არ დაგავიწყდეთ !!!

Momsedu.ge-მ თქვენთვის, დედებისთვის შექმნა ახალი სივრცე. მოიწონეთ გვერდი მცოდნე დედები

შეიძლება დაინტერესდეთ

ქალს მაღალი მამაკაცის გვერდით ყოფნა დაცულობის შეგრძნებას უჩენს და თავს უფრო ფემინურად აგრძნობინებს

ქალს მაღალი მამაკაცის გვერდით ყოფნა დაცულობის შეგრძნებას უჩენს და თავს უფრო ფემინურად აგრძნობინებს
2016 წელს ჩატარებული სამეცნიერო ​კვლევის შედეგებმა აჩვენა, რომ დაბალი ქალები მაღალ მამაკაცებთან თანაცხოვრებისას ძალიან ბედნიერები არიან. რაც უფრო დიდია სხვაობა ცოლ-ქმრის სიმაღლეებს შორის, მით მეტია წყვილის ბედნიერების ხარისხიც. კვლევაში მონაწილეობას დაოჯახებული ქალბატონები იღებდნენ და მეუღლეებთან თანაცხოვრებას დადებითად ან უარყოფითად აფასებდნენ. აღსანიშნავია ისიც, რომ ცოლ-ქმრის სიმაღლეებს შორის დიდი სხვაობა წყვილის ბედნიერების ხარისხზე დადებით ზეგავლენას ერთად ცხოვრების პირველი 18 წლის მანძილზე ახდენდა. ქალბატონები, რომლებსაც ცოლ-ქმრული თანაცხოვრების უფრო დიდი გამოცდილება ჰქონდათ, თავს ბედნიერად ნაკლებად მაღალ ან დაბალ მეუღლეებთან ურთიერთობისასაც გრძნობდნენ.

ქალბატონები, როგორც წესი, თავიანთ მეუღლეებთან შედარებით დაბლები არიან, რადგან გენეტიკურად მამაკაცი უფრო მაღალი აღნაგობისაა. მდედრობითი და მამრობითი სქესის წარმომადგენლები რომანტიკულ პარტნიორებს სხვადასხვა კრიტერიუმის მიხედვით არჩევენ, რადგან ორივე მათგანს განსხვავებული მოლოდინები და ინტერესები აქვს.

ჩრდილოეთ ტეხასის უნივერსიტეტის მიერ ჩატარებულმა კიდევ ერთმა კვლევამ აჩვენა, რომ პარტნიორის სიმაღლეს ქალისთვის ძალიან დიდი მნიშვნელობა აქვს. ქალს მაღალი მამაკაცის გვერდით ყოფნა დაცულობის შეგრძნებას უჩენს და თავს უფრო ფემინურად აგრძნობინებს. კვლევაში მონაწილე ქალების უმეტესობა ერთხმად აღნიშნავდა, რომ მათ მაღალ მამაკაცებთან ურთიერთობა ძალიან სიამოვნებდათ, რადგან მათ გვერდით თავს უსაფრთხოდ გრძნობდნენ.

დაბალი ქალბატონები, რომლებსაც მაღალი მეუღლეები ჰყავთ და ცოლ-ქმრული ურთიერთობით ძალიან კმაყოფილები არიან, გარკვეული გარეგანი თუ შინაგანი ფაქტორების ფარულ ზეგავლენას განიცდიან. მიზიდულობა მისტიკური მოვლენაა, რომელსაც ადამიანის თვალისთვის შეუმჩნეველი ბიოლოგიური პროცესების ერთიანობა ქმნის.

კვლევებით დასტურდება, რომ მაღალი მამაკაცები მდედრობითი სქესის წარმომადგენლების მიერ პოზიტიურად აღიქმებიან. ქალბატონების წარმოდგენებში მაღალი მამაკაცი ინტელექტუალურად განვითარებული ადამიანის შთაბეჭდილებას ტოვებს, რომელსაც ფულის გამომუშავების განსაკუთრებული უნარი აქვს. შესაძლოა, ამის მოსმენა ძალიან არ გვსიამოვნებს, მაგრამ ადამიანებს სხვების გარეგნული ნიშნით შეფასება არცთუ იშვიათად გვჩვევია, რის გამოც ამა თუ იმ პიროვნების ხასიათის თავისებურებებთან დაკავშირებით ნაადრევი დასკვნების გამოტანა გვახასიათებს. მდედრობით და მამრობით სქესს შორის ურთიერთობაში ინსტინქტური რეაქციები და ბიოლოგიური ფაქტორი ძალიან დიდ როლს ასრულებს.

თუ თქვენთან შედარებით ბევრად მაღალ მამაკაცს ხვდებით და მასთან ოჯახის შექმნას გეგმავთ, გილოცავთ! მომდევნო 18 წელი უსაზღვროდ ბედნიერი იქნებით.
წაიკითხეთ სრულად