Baby Bag

ჯანმრთელი და წარმატებული შვილების აღსაზრდელად საუკეთესო სტრატეგია მშობლების ბედნიერებაა

ჯანმრთელი და წარმატებული შვილების აღსაზრდელად საუკეთესო სტრატეგია მშობლების ბედნიერებაა

მშობლები გამუდმებით შვილების ბედნიერებასა და კეთილდღეობაზე ზრუნავენ. ბავშვების წარმატებისა და ჯანმრთელობისთვის ისინი არნახულ სტრესს უძლებენ. სამწუხაროდ, მშობლების სტრესი შვილებისთვის სარგებლის მომტანი ნამდვილად არ არის. გარდა ამისა, ის უფროსების ფიზიკურ და მენტალურ ჯანმრთელობასაც უდიდეს საფრთხეს უქმნის.

ჯანმრთელი და წარმატებული შვილების აღსაზრდელად საუკეთესო სტრატეგია მშობლების ბედნიერებაა. განტვირთვა და საკუთარ თავზე ფიქრი უფროსებს ბავშვებზე ზრუნვაში ძალიან ეხმარება. მშობლები შვილებისთვის იდეალურ როლურ მოდელად უნდა იქცნენ, რომლებიც სამსახურსა და განტვირთვას ერთმანეთს მარტივად უთავსებენ, ამასთან ბედნიერებიც არიან. უახლესი საერთაშორისო კვლევებით დგინდება, რომ ოჯახური ატმოსფერო, სადაც ბავშვი იზრდება, მის ჯანმრთელობაზე უდიდეს ზეგავლენას ახდენს. პატარებს არასახარბიელო ჯანმრთელობა აქვთ, როდესაც:

  • მშობლები ერთმანეთთან გამუდმებით ჩხუბობენ.
  • მშობლები პრობლემების ერთობლივად მოგვარებას არ ცდილობენ.
  • ბავშვებს მშობლების სითბო აკლიათ.
  • მშობლები შვილებს ზედმეტად აკონტროლებენ და მათ არარეალური მიზნების მიღწევას ავალდებულებენ.
  • მშობლებს მოთმინების უნარი არ აქვთ და ემოციური სტაბილურობა აკლიათ.


​ბავშვი მშობლების მეთვალყურეობის ქვეშ იზრდება. ის მათ გარემოცვაში თავს უსაფრთხოდ და დაცულად გრძნობს. ბავშვის ნერვული და ფსიქოლოგიური სისტემის ჯანსაღად ფუნქციონირება იმაზეა დამოკიდებული, რამდენად პირნათლად ასრულებენ მშობლები დაკისრებულ მოვალეობას. ბავშვი, რომელსაც მზრუნველი და თბილი მშობლები ზრდიან, სოციალიზაციის პროცესში ემოციურ ტრავმებს ნაკლებად მიიღებს. თუ ბავშვი ისეთ ოჯახში იზრდება, სადაც მას ადამიანებთან ურთიერთობის შესახებ არაფერს ასწავლიან და ტოლერანტობის შესახებ არაფერი იცის, ის სოციალიზაციის პროცესში ძალიან ბევრ ტრავმას მიიღებს.

მშობლები, განსაკუთრებით დედები, წარმატებული და ჯანმრთელი შვილების აღზრდას მაშინ ახერხებენ, როდესაც საკუთარი როლი აბედნიერებთ. გარდა ამისა, ძალიან დიდ როლს ასრულებს სოციალური მხარდაჭერაც. აუცილებელი არ არის, რომ ადამიანი მსგავს მხარდაჭერას მხოლოდ მეუღლისგან იღებდეს, ამას მეგობრები, კოლეგები, მეზობლები და ახლობლებიც არაჩვეულებრივად ახერხებენ.

მშობლების მხარდაჭერა ბავშვებსაც შეუძლიათ. როდესაც დედას ან მამას დახმარება სჭირდება, შვილი კი ყურადღებას იჩენს, ეს მშობლების განწყობას მნიშვნელოვნად ამაღლებს, რაც საბოლოოდ ბავშვზე ძალიან დადებითად აისახება. მშობლის მხრიდან გამუდმებული თავგანწირვა, სამსახურისა და თავისუფალი დროის დისბალანსი, ემოციური გადაწვა ოჯახში არაჯანსაღ ატმოსფეროს ქმნის, რაც ბავშვზე ნეგატიურად ზემოქმედებს. ჯანმრთელი და წარმატებული ბავშვის აღზრდა თუ გსურთ, მნიშვნელოვანია, რომ შემდეგ საკითხებზე გაამახვილოთ ყურადღება:

  • ბავშვის განვითარების შესახებ ინფორმაცია მოიძიეთ

მშობელი, რომელიც საკუთარ როლში გათვითცნობიერებულია, ნებისმიერ რთულ ვითარებას და კრიზისს მომზადებული ხვდება. თუ ბავშვის განვითარების თავისებურებების შესახებ ინფორმაციის მოპოვებას შეძლებთ, 2 წლის ბავშვის უძილობა და 12 წლის ბავშვის სახლში ტატუთი გამოცხადება საკუთარ თავზე კონტროლს აღარ დაგაკარგინებთ.

  • მიიღეთ რჩევები სხვა მშობლებისგან

ნათესავებს, მეგობრებს, ინტერნეტ ფორუმზე დარეგისტრირებულ მშობლებს ან სრულიად უცხო ადამიანებს, რომლებსაც ბავშვების სათამაშო მოედანზე ხვდებით, თქვენი პრობლემები გაუზიარეთ, მიიღეთ მათგან რჩევები, რომლებიც, შესაძლოა, ძალიან გამოგადგეთ.

  • გახსოვდეთ, რატომ გახდით მშობელი

მშობლობა ადამიანის გაცნობიერებული არჩევანია. როდესაც კარგად გესმით, თუ რატომ გადაწყვიტეთ, შვილი გყოლოდათ, სტრესთან გამკლავება აღარ გიჭირთ.

  • სამსახური და თავისუფალი დრო დააბალანსეთ

არ არსებობს იდეალური ბალანსი, რომლის დაცვაც ყველა მშობელს მოეთხოვება. ბავშვის ასაკის მატებასთან ერთად, თქვენი თავისუფალი დროის ხანგრძლივობაც შეიცვლება. აუცილებლად იზრუნეთ საკუთარ თავზე. თქვენი დრო ისე გადაანაწილეთ, რომ სამსახურში წასვლამდე ყავის დალევა შეძლოთ, დღის განმავლობაში ვარჯიშისთვისაც გამონახოთ დრო და მაქსიმალურად განიტვირთოთ. ვალდებული არ ხართ, რომ მთელი თქვენი დრო სამსახურსა და ბავშვებს მოახმაროთ.

მშობლებმა ნებისმიერი სტრატეგია უნდა გამოიყენონ, რათა ოჯახში ბედნიერი ატმოსფერო შექმნან. ამ გზით ისინი საკუთარი შვილების ჯანმრთელობასა და კეთილდღეობას შეუწყობენ ხელს.

მოზმადებულია​ psychologytoday.com- ის მიხედვით

თარგმნა ია ნაროუშვილმა

არ დაგავიწყდეთ !!!

Momsedu.ge-მ თქვენთვის, დედებისთვის შექმნა ახალი სივრცე. მოიწონეთ გვერდი მცოდნე დედები

შეიძლება დაინტერესდეთ

„თერმომეტრი დამალონ, ნერვები დაიმშვიდონ და დაწყნარდნენ. ეს ფორიაქი და ნერვიულობაც თავისებურად მოქმედებს,“ - ინფექციონისტი მარინა ჯანგავაძე

„თერმომეტრი დამალონ, ნერვები დაიმშვიდონ და დაწყნარდნენ. ეს ფორიაქი და ნერვიულობაც თავისებურად მოქმედებს,“ - ინფექციონისტი მარინა ჯანგავაძე

ინფექციონისტი მარინა ჯანგავაძე ტელეკომპანია „რუსთავი 2“ - ის გადაცემაში „დილა უქმეებზე“ ​კოვიდ-19 ის მიმდინარეობის თავისებურებებისა და პოტკოვიდური სინდრომის შესახებ საუბრობს. მისი თქმით, ყველაფერი კოვიდი არ უნდა გვეგონოს, რადგან სხვა რესპირატორული ინფექციებიც არსებობს, რომლებსაც კორონავირუსის მსგავსი სიმპტომატიკა აქვს:

„ზოგჯერ სწრაფი ტესტი აჩვენებს უარყოფითს, მაგრამ ყველაფერს კორონავირუსს ნუ დავაბრალებთ. თუ ადამიანს აინტერესებს ჰქონდა თუ არა კოვიდი, გარკვეული დროის მერე, სამი კვირის შემდეგ, გაიკეთოს ტესტი იმუნოგლობულინებზე. თუ გადატანილი აქვს, ეს ანტისხეულები აღმოჩნდება სისხლში. უამრავი რესპირატორული ინფექცია არსებობს. ნიღბებმა კი დაიცვეს ადამიანები. არ არის ბევრი შემთხვევა სხვა რესპირატორული ინფექციების. ძალიან ბევრს აქვს კითხვა, რომ უარყოფითი პასუხი ჰქონდა ტესტზე, მაგრამ ​კლინიკა ჰქონდა 37.1-37.2 ტემპერატურა. სხვა დროსაც ხომ დაგვიკარგავს სუნი და გემო, როდესაც რესპირატორული ინფექცია ყოფილა. რადგან პანდემიის პირობებში ვიმყოფებით, ყველაფერი კოვიდი ნუ გვგონია.“

მარინა ჯანგავაძის თქმით, თუ პოსტკოვიდურ ეტაპზე პაციენტს კვლევებით ყველაფერი რიგზე აქვს, გახანგრძლივებული ტემპერატურა მის ჯანმრთელობას საფრთხეს არ უქმნის:

„ყველგან წერია, რომ კოვიდის გადატანის შემდეგ​ საკმაოდ დიდხანს შეიძლება გაგრძელდეს ტემპერატურა. ყველაზე ხანმოკლე პოსტკოვიდური პერიოდი შეიძლება იყოს ოთხი კვირა და ყველაზე ხანგრძლივი - ექვსი თვე. არასწორი იმუნური პასუხი და კიდევ ბევრი რამ არის ამის მიზეზი. თუ რენდგენოლოგიურად, სისხლის საერთო ანალიზით, ლაბორატორიული კვლევებით ყველაფერი ნორმაშია, თერმომეტრი დამალონ, ნერვები დაიმშვიდონ და დაწყნარდნენ. ეს ფორიაქი და ნერვიულობაც თავისებურად მოქმედებს.“

„თერმორეგულაციის ცენტრსაც დამახსოვრებული აქვს კოვიდი, პერიოდულად შეიძლება ტემპერატურამ აიწიოს. დამალონ თერმომეტრი. არ არის საჭირო ყოველ წუთში ტემპერატურის გაზომვა. ნერვიულობის ფონზეც შესაძლებელია ეს ყველაფერი განვითარდეს. ​თუ მწყობრში გაქვთ ყველაფერი, დამშვიდდით და დაწყნარდით. ძალიან ბევრია შემთხვევები, როდესაც ტემპერატურა იმატებს ნერვიულობის ფონზე. არ უნდა ნერვიულობა. თუ ყველაფერი წესრიგშია, მორჩა,“ - აღნიშნავს მარინა ჯანგავაძე.

წყარო: ​„დილა უქმეებზე“

წაიკითხეთ სრულად