Baby Bag

8 იაფი და სახალისო იდეა ბავშვის პირველი დაბადების დღის წვეულებისთვის

8 იაფი და სახალისო იდეა ბავშვის პირველი დაბადების დღის წვეულებისთვის

ბავშვის პირველი დაბადების დღე ნებისმიერი მშობლისთვის უმნიშვნელოვანესი დღეა, თუმცა ეს სულაც არ ნიშნავს იმას, რომ წვეულების გამართვას მთელი თქვენი დანაზოგი და ოჯახის ბიუჯეტი უნდა ​ემსხვერპლოს. პატარას გაბედნიერება და მისთვის დაუვიწყარი წვეულების გამართვა საკმაოდ ხელსაყრელ ფასშიც შეგიძლიათ, მთავარია ორიგინალური და საინტერესო იდეები არ შემოგაკლდეთ. ჩვენს სტატიაში რვა იაფ და სახალისო იდეას შემოგთავაზებთ, რომლებიც ბავშვისთვის დაუვიწყარი დღესასწაულის ჩუქებაში დაგეხმარებათ.


შექმენით სახალისო ფოტოკოლაჟი

ბავშვის გასახალისებლად ყველა იმ ფოტოს მოუყარეთ ერთად თავი, რომლებიც მისი ცხოვრების პირველი წლის მნიშვნელოვან მოვლენებს ასახავს, როგორიცაა პირველი კბილის ამოსვლა, პირველი ნაბიჯები, პირველი გაცინება და ა.შ. აღნიშნული ფოტოკოლაჟი არამხოლოდ წვეულების დეკორაციად გამოგადგებათ, ის ბავშვისთვის სანუკვარ და საყვარელ საჩუქრად იქცევა, რომელსაც მთელი ცხოვრების მანძილზე შეინახავს.

დეკორაციისთვის ჟატის ქაღალდი გამოიყენეთ

წვეულების გემოვნებიანად გაფორმება თუ გსურთ, მაგრამ დეკორაცია ძალიან ძვირი გიჯდებათ, შეგიძლიათ, დეკორისთვის ჟატის ქაღალდი გამოიყენოთ. ჟატის ქაღალდისგან უამრავი რამის დამზადებას შეძლებთ. ფერად-ფერადი ქაღალდებით დამზადებული ყვავილები, ბურთები და სხვა საბავშვო დეკორაციული ნივთები სტუმრად მოსულ პატარებს და მშობლებს ნამდვილად აღაფრთოვანებთ.

საბავშვო მენიუ თავად შეადგინეთ

ბავშვის პირველი დაბადების დღის წვეულებაზე საპატიო სტუმრის რანგში რამდენიმე მცირეწლოვანი აუცილებლად გეყოლებათ. მათ საპატივცემულოდ საბავშვო ტკბილეული და ნუგბარი მაგიდასთან მცირე ზომის ლამაზ ჭურჭელში ჩაწყობილი მიიტანეთ. საბავშვო მენიუ თქვენგან დიდი ფინანსური რესურსის მობილიზებას ნამდვილად არ მოითხოვს, პატარებს კი თქვენ მიერ გამოჩენილი ყურადღება ძალიან გააბედნიერებთ.

საბავშვო ტკბილეული დეკორაციის ნაწილად აქციეთ

ლამაზად გაფორმებულ დონატებზე მშვენიერი დეკორაცია, ალბათ, იშვიათად თუ გინახავთ სადმე. საბავშვო ტკბილეულის დეკორაციის ნაწილად ქცევა წვეულების გალამაზებაში ძალიან დაგეხმარებათ. რძით სავსე ბოთლებს თავზე ლამაზად მორთული დონატები დააფარეთ, ბოთლებში ფერადი საწრუპი ჩხირები ჩააწყვეთ და მშვენიერი დეკორაციაც მზად გაქვთ.

მუყაოს ყუთების გამოყენებით პატარა მონსტრები გამოჭერით

წვეულების თემად შეგიძლიათ „მონსტრები“ შეარჩიოთ. მონსტრების დასამზადებლად მუყაოს ყუთები გამოიყენეთ. პატარებს თქვენი იდეა აუცილებლად მოეწონებათ. მონსტრების გამოჩენა წვეულებას მნიშვნელოვნად გაახალისებს. ეს ყველაფერი კი ძალიან იაფი დაგიჯდებათ.

მოაწყვეთ რძისა და ნამცხვრების წვეულება

არ აქვს მნიშვნელობა ერთი წლის ბავშვის წვეულებას აწყობთ, თუ 100 წლის მოხუცის, ნამცხვრებს გვერდს მაინც ვერ აუვლით. პატარები რძისა და ნამცხვრების უგემრიელესი კომბინაციით გაახარეთ. წვეულების ტკბილეულით გახალისებისთვის ბანკის გაძარცვა ნამდვილად არ დაგჭირდებათ.

ბავშვის საკვები სკამ-მაგიდა პრინცის/პრინცესას ტახტად აქციეთ

ბავშვის საკვები სკამ-მაგიდა ლამაზად მორთეთ და ამაღლებულ ადგილას დადგით. თუ გოგოს წვეულებაა, თქვენს პატარას თავი ნამდვილ პრინცესად უნდა აგრძნობინოთ. ბიჭმა კი თავი ყოვლისშემძლე პრინცად უნდა წარმოიდგინოს.

პატარები ფერადი ბურთებით გაართეთ

ბურთის თამაში არამხოლოდ მცირეწლოვან ბავშვებს, თინეიჯერებსა და ზრდასრულ ადამიანებსაც ძალიან უყვართ. თქვენს წვეულებაზე ფერადი ბურთები აუცილებლად უნდა გქონდეთ. თუ სახლში საბავშვო აუზი გაქვთ, ის ფერადი ბურთებით გაავსეთ. ბავშვები თქვენი სახალისო იდეით ნამდვილად აღფრთოვანდებიან. ისინი რამდენიმე დაუვიწყარ საათს მხიარულებაში გაატარებენ, მათი ფერადი ბურთებით გართობა კი ძვირი ნამდვილად არ დაგიჯდებათ.

მომზადებულია parents.com-ის მიხედვით
თარგმნა ია ნაროუშვილმა 

შეიძლება დაინტერესდეთ

რატომ არის ეზოს თამაშები აუცილებელი ბავშვის განვითარებისთვის? - ფსიქოლოგ ანა თუნიაშვილის რეკომენდაციები

რატომ არის ეზოს თამაშები აუცილებელი ბავშვის განვითარებისთვის? - ფსიქოლოგ ანა თუნიაშვილის რეკომენდაციები

ფსიქოლოგმა ანა თუნიაშვილმა ბავშვის განვითარებისთვის ეზოს თამაშების უდიდეს მნიშვნელობაზე ისაუბრა:

​ბავშვებს მეტად მოსწონთ ფიზიკური აქტივობები, სადაც თვითონ უფრო აქტიურები არიან, ვიდრე კომპიუტერთან ან პლანშეტთან ჯდომა, როდესაც ბავშვი პასიურია, მხოლოდ თითებს ამოძრავებს. თამაშის დროს მშობლის ჩართულობა მნიშვნელოვანია. ბავშვს და მშობელს შორის ამ დროს ხდება ემოციური კავშირების გამყარება. მშობლებს შეუძლიათ ბავშვებს ასწავლონ ახალი უნარები, თუ როგორ დაამყარონ ურთიერთობა სხვა ბავშვებთან. მშობლებს შეუძლიათ მოდელის მიცემით განავითარონ ბავშვის მეტყველება, ასწავლონ კონფლიქტების მოგვარება, თანამშრომლობა.“

ანა თუნიაშვილის თქმით, ეზოს თამაშებით ბავშვი დამოუკიდებლობას სწავლობს:

„ასევე მნიშვნელოვანია, რომ ​ბავშვებს ჰქონდეთ დრო ითამაშონ დამოუკიდებლად, მარტო. ეზოს თამაშები სწორედ ამიტომ არის მნიშვნელოვანი, რომ იქ დამოუკიდებლობას სწავლობენ ბავშვები. შეიძლება ავძვრე სადღაც და ჩემზეა დამოკიდებულები, ჩამოვალ თუ არა. ბავშვი თვითონ იღებს გადაწყვეტილებას და ეს არის ის მნიშვნელოვანი უნარი, რაც სჭირდება შემდეგ რეალურ ცხოვრებაში.“

„სასურველია, რომ პრობლემა თვითონ ბავშვებმა გადაჭრან, მონახონ გზები, როგორ წავიდნენ კომპრომისზე, ისწავლონ საგნების გაზიარება. თუ მშობელი ამჩნევს, რომ ვითარება კრიტიკულია, სასურველია, რომ ჩაერიოს ბავშვების კონფლიქტში. მ​შობელი უნდა ჩაერიოს მსუბუქად და გადაწყვეტილებები ბავშვებმა მიიღონ. სასურველია ბავშვებს წარვუდგინოთ ახალი თამაშები. თუ არ მოსწონს მას რეზინობანა და კლასობანა, ბუნებრივია, რომ არც ითამაშებს. ბავშვს უნდა ჰქონდეს უამრავი თავისუფალი დრო თამაშისთვის. ადრეულ ასაკში ბაღშიც და სკოლაშიც აქტივობები უნდა მიმდინარეობდეს თამაშის მეშვეობით,“ - აღნიშნულ საკითხზე ანა თუნიაშვილმა ტელეკომპანია „იმედის“ გადაცემაში „იმედის დღე“ ისაუბრა.

წყარო:​ „იმედის დღე“

წაიკითხეთ სრულად