Baby Bag

მშობელს თავისი შეცდომის აღიარება უნდა შეეძლოს

მშობელს თავისი შეცდომის აღიარება უნდა შეეძლოს
ჩვილი ბავშვები არასდროს ცრუობენ, თუმცა საუბრის დაწყებასთან ერთად ბავშვი ტყუილის თქმასაც ​სწავლობს. პატარები სიცრუის თქმის გამო ყოველთვის არ უნდა გააკრიტიკოთ, რადგან განვითარების საწყის ეტაპზე ტყუილის თქმა ბავშვის კოგნიტური უნარების დახვეწაზე მიგვანიშნებს. მშობლების მხრიდან აქტიური ჩარევა და ბავშვის სწორად აღზრდა მას ცუდისა და კარგის გარჩევას ასწავლის. თუ გსურთ ბავშვი გულახდილი იყოს და ტყუილის თქმას გადაეჩვიოს, დაეხმარეთ მას სწორად ჩასწვდეს სიცრუისა და სიმართლის არსს, იცოდეს თითოეული მათგანის დადებითი და უარყოფითი მხარეები.

ბავშვის სწორად აღზრდა მარტივი არ არის. თქვენი შვილი რომ გულახდილობას მიაჩვიოთ, შესაძლოა, ამისთვის წლები დაგჭირდეთ. ვაღიაროთ, რომ სიმართლის თქმა მარტივი არასდროსაა. სრულფასოვანი გულწრფელობა სოციალურად მიუღებელიც კია და ასეთად ყოფნა არც თქვენს შვილს არგებს რამეს. კომპლექსური სწავლებითა და მოთმინებით ბავშვს აუცილებლად ასწავლით, თუ როდის არის აუცილებელი სიმართლის თქმა და როდის არ უნდა ისაუბროს ხმამაღლა თავის განცდებსა და ფიქრებზე.

კარგისა და ცუდის გარჩევას ბავშვი 5-6 წლის ასაკში სწავლობს. როდესაც სკოლაში მიდის, მან სიმართლისა და სიცრუის შესახებ ბევრი რამ უნდა იცოდეს. შედარებით პატარა ასაკში ბავშვებმა იციან, რომ არსებობს ცუდი და კარგი ქცევები. ისინი თავიანთ მშობლებს აკვირდებიან და დასკვნები მათი ქცევებიდან გამომდინარე გამოაქვთ.

მშობელი თავად უნდა იყოს გულწრფელი

სიცრუისა და სიმართლის გარჩევა ბავშვებს ადრეული ასაკიდანვე უნდა ასწავლოთ, თუმცა ეცადეთ ამ დროს მათ თავად არ უთხრათ ბევრი სიცრუე. თუ მამა სახლშია, დედას კი ბავშვები სასეირნოდ ჰყავს წაყვანილი, სადაც ბავშვებთან ერთად მაღაზიების თვალიერებით ერთობა, შინ მისულმა თავის მეუღლეს არ უნდა უთხრას, რომ მას და ბავშვებს საცობების გამო შინ მოსვლა დააგვიანდათ. პატარები ყველაფერს ამჩნევენ და იმახსოვრებენ. თქვენი ქცევა მათთვის ყოველთვის სამაგალითოა.

მშობელს თავისი შეცდომის აღიარება უნდა შეეძლოს

მშობელმა თავისი შეცდომა ყოველთვის უნდა აღიაროს. თუ ბავშვებთან ერთად პიკნიკზე მიდიხართ და მათი საყვარელი ტკბილეული სახლში დაგრჩებათ, გულახდილად უთხარით, რომ შეცდომა დაუშვით და მოუბოდიშეთ კიდეც. ამაში ცუდი არაფერია. ბავშვი თქვენს ქმედებებს აუცილებლად გაიმეორებს.

მშობელი ბავშვისთვის ავტორიტეტი უნდა იყოს და არა ავტორიტარი

გულახდილი ბავშვის აღზრდას დიდი მოთმინება სჭირდება. ბავშვი ზრდასთან ერთად მშობლების წინაშე გულწრფელობას კარგავს, რადგან ხშირ შემთხვევაში სასჯელი აშინებს. არ აქვს მნიშვნელობა რა პრინციპებით ზრდით ბავშვს, თუ ის თქვენს მითითებას გადაუხვევს, მიეცით საშუალება თავისი ქცევის მიზეზებზე გულახდილად დაგელაპარაკოთ. თუ მას ამის უფლებას არ მისცემთ, მომავალში ყველაფერს დაგიმალავთ. მოუსმინეთ თქვენს შვილს. ესაუბრეთ იმ უმთავრეს პრინციპებზე, რომლის მიხედვითაც მას ზრდით. აუცილებლად შეაქეთ გულახდილობის გამო.

ასწავლეთ ბავშვს წიგნებისა და ფილმების დახმარებით

ბავშვებთან ერთად ხშირად იკითხეთ, ფილმებს უყურეთ და შემდეგ ნანახსა და წაკითხულზე გულახდილად ისაუბრეთ. აუხსენით თქვენს შვილს, რატომ მოგწონთ ან არ მოგწონთ ესა თუ ის პერსონაჟი. მატყუარა პერსონაჟების ქცევები გააანალიზეთ, ასწავლეთ თქვენს შვილს, თუ რატომ იქცევა ესა თუ ის გმირი არასწორად.

მშობელმა უნდა იცოდეს, რომ გულწრფელობას ბავშვი ერთ დღეში ვერ ისწავლის

მცირეწლოვან ბავშვებს მარტივი სიმბოლოებით და ფრაზებით უნდა ასწავლოთ, მაგრამ თინეიჯერები კომპლექსური ქცევებისა და აბსტრაქტული კონცეფციების ანალიზს ეჩვევიან. თინეიჯერებს ბევრად რთული ცხოვრება აქვთ, ვიდრე მცირეწლოვან პატარებს. ისინი სკოლაში ძალიან ბევრ დაბრკოლებას ხვდებიან, იცნობენ ახალ ადამიანებს, წვეულებებზე დადიან. მშობელმა თავის შვილს უნდა ასწავლოს, თუ რატომ არის გულწრფელობა ძლიერი სოციალური იარაღი და რატომ არ უნდა ცრუობდეს ადამიანი, რომელსაც სოციუმში ნორმალურად ცხოვრება სურს. არსებობენ ბავშვები, რომლებიც კონფრონტაციას ყოველთვის გაურბიან. დარწმუნდით, რომ თქვენი შვილიც დაპირისპირების ან უთანხმოების შიშით ტყუილში ცხოვრებას არ ეჩვევა. ბავშვს აუცილებლად უნდა ესაუბროთ. მისთვის სწორი რჩევებისა და რეკომენდაციების მიცემა რომ შეძლოთ, მის ცხოვრებას კარგად უნდა იცნობდეთ.

ავტორი: ია ნაროუშვილი

შეიძლება დაინტერესდეთ

არ უყიდოთ ბავშვს „Cry Babies” თოჯინები, რომელიც პატარების ფრუსტრაციასა და დაბნეულობას იწვევს

არ უყიდოთ ბავშვს „Cry Babies” თოჯინები, რომელიც პატარების ფრუსტრაციასა და დაბნეულობას იწვევს

თუ თქვენ სკოლამდელი ან ორ წლამდე ასაკის ბავშვის მშობელი ხართ და „Cry babies” თოჯინების ან Youtube სერიების შესახებ ჯერ არაფერი გსმენიათ, ეს გაფრთხილება მაინც უნდა გაითვალისწინოთ: არასდროს უყიდოთ ბავშვს „Cry babies” თოჯინები. „Cry babies: Magic Tears“ ანიმაციის სამყარო თქვენს ბავშვს მონსტრად აქცევს და მას ნამდვილი (არა ჯადოსნური) ცრემლებით შეამკობს.ეს თოჯინები ბავშვებში ფრუსტრაციისა და დაბნეულობის გამოსაწვევად არის შექმნილი.

თოჯინებით თამაში ბავშვს დამოუკიდებლობას აჩვევს და ძალიან სასარგებლოა. ხმაურიანი და მტირალა თოჯინებიც მისაღებია, თუმცა თოჯინების ეს სპეციფიკური ბრენდი და მისი Youtube სერიები მსოფლიოს მასშტაბით უამრავ ოჯახს აწამებს.

Cry babies არის როგორც სათამაშოები, ასევე ანიმაცია. თოჯინებს IMCToys-ის ბრენდი აწარმოებს. თითქმის არ არსებობს ობიექტური ინფორმაცია იმ ადამიანების შესახებ, რომლებიც თოჯინებს ან ანიმაციას ქმნიან. თოჯინების ნაწილი წყლის ცრემლებით ტირის, ნაწილი კი ტოქსიკური სითხის შხეფებით, რომელსაც „ჯადოსნური ცრემლები“ ეწოდება. მან შეიძლება ალერგიული რეაქცია გამოიწვიოს. შემადგენლობაში ვკითხულობთ, რომ შეიცავს ალერგენებს: ლიმონენესა და ლინალულს. თოჯინები შემაშფოთებლად ხმაურიანია და შემაწუხებელ ხმებს გამოსცემს.

„Cry babies“ Youtube შოუ 40-წუთიანი ან ორსაათიანი სეგმენტების სახით არსებობს. აღნიშნულ ანიმაციაში არ არის გაკვეთილები ბავშვებისთვის. ისეთი შეგრძნება გრჩებათ, რომ სიუჟეტები სადისტური ალგორითმით არის შექმნილი. რაც შეეხება თოჯინებს, მათი ყუთიდან ამოღებისთანავე მიხვდებით, რომ ის თქვენი შვილის ფრუსტრაციას გამოიწვევს.

მტირალა თოჯინის ქონა ბავშვისთვის დამაზიანებელი არ არის, რადგან ეს მას ზრუნვას აჩვევს. ის სწავლობს, რომ ბავშვს უნდა მოეფეროს, აჭამოს, გამოუცვალოს, როდესაც ის ტირის, თუმცა Cry babies თოჯინები მიზეზ-შედეგობრივი კომფორტული ციკლის საფუძველზე არ არის შექმნილი. დამაბნეველი პარამეტრების გამო თოჯინა ხშირად აკეთებს იმას, რასაც ბავშვი მისგან არ ელოდება, რის გამოც ბავშვი თოჯინასთან ერთად ტირილს იწყებს. ნაცვლად იმისა, რომ ბავშვს თოჯინა მობეზრდეს, ის დაჟინებით ცდილობს, რომ მას ის გააკეთებინოს, რაც ჩაიფიქრა.

Cry babies თოჯინები საბოლოოდ მშობლის თავის ტკივილისა და ბავშვის უსასრულო გაურკვევლობის მიზეზი ხდება. მშობლები ცდილობენ ახალი მოდელების შეძენას და იმედი აქვთ, რომ მას უკეთესი ფუნქციები ექნება, ამგვარად მოჯადოებული წრე იკვრება. ამ წრისგან თავის დასაღწევად, გირჩევთ, არ უყიდოთ ბავშვს Cry babies ტოქსიკური თოჯინები.

წყარო: ​fatherly.com 

წაიკითხეთ სრულად