Baby Bag

,,ყველაზე ხშირად ეს დაავადება ბავშვთა ასაკში ვლინდება, თუმცა, შესაძლებელია ცხოვრების მეორე დეკადაშიც შეგვხვდეს''

,,ყველაზე ხშირად ეს დაავადება ბავშვთა ასაკში ვლინდება, თუმცა, შესაძლებელია ცხოვრების მეორე დეკადაშიც შეგვხვდეს''

ატოპიური დერმატიტის თემაზე MomsEdu.ge-ს დერმატო-ვენეროლოგი ზაზა თელია ესაუბრა. 

რა არის ატოპიური დერმატიტი და როგორ ვლინდება ბავშვებში?

- ატოპიური დერმატიტი ერთ-ერთი ყველაზე ხშირი დაავადებაა დერმატოლოგიაში. ითვლება, რომ ატოპიური დერმატიტი არის კანის ბარიერული დეფექტი, კანქვეშა ქსოვილები კარგავენ სითხეს, შრებიან და ამის შედეგად ხდება კანის დაზიანება, მიმდინარეობს ანთებითი პროცესი. ამას ემატება კანის ჰიპერმგრძნობელობა გარე გამღიზიანებელ ფაქტორებზე ბარიერული დეფექტის გამო, შესაბამისად, ატოპიური დერმატიტის დროს ნებისმიერი ფაქტორი, როგორიცაა, ტემპერატურის ცვალებადობა, სხვადასხვა საშუალებასთან კონტაქტი ამწვავებს დაავადებას. ზოგადი მონახაზი რომ გავაკეთოთ, ატოპიური დერმატიტი დაკავშირებულია კანის სიმშრალესთან და მის ბარიერულ დეფექტთან.

ყველაზე ხშირად ეს დაავადება ბავშვთა ასაკში ვლინდება, თუმცა, შესაძლებელია ცხოვრების მეორე დეკადაშიც შეგვხვდეს.

- რა ასაკიდან შეიძლება გამოვლინდეს?

- ატოპიურ დერმატიტს არ აქვს ასაკობრივი ზღვარი. შეიძლება გამოვლინდეს 0 წლიდან, შეიძლება გაგრძელდეს გარდატეხის ასაკამდე. თუ სტატისტიკურად გვაინტერესებს, ბავშვთა ასაკში დაწყებული ატოპიური დერმატიტი, დაახლოებით, პაციენტების 60-70 %-ის შემთხვევაში რემისიაში გადადის. პაციენტთა 80%-ში კი პუბერტულ ასაკამდე მიმდინარეობს. მხოლოდ 20 % -შია იმის შანსი, რომ გარდატეხის ასაკის შემდეგაც გაგრძელდება.

- რა ფაქტორებმა შეიძლება შეუწყოს ხელი ატოპიური დერმატიტის გამწვავებას?

  • გარე ფაქტორები (ტემპერატურის ცვლილება და სხვა);
  • გარკვეული სახის მედიკამენტი (ანტიბიოტიკები);
  • სხვადასხვა ტიპის კოსმეტიკური საშუალება (პარფიუმის შემცველი).

- რა კრემები უნდა გამოვიყენოთ ბავშვებისთვის და როგორი შემადგენლობა უნდა ჰქონდეს?

მნიშვნელოვანია დამატენიანებელი კრემების და დასაბანი საშუალებების სწორი გამოყენება. პროდუქტები არ უნდა შეიცავდეს პარფიუმს, მჟავებს, ვინაიდან ეს ყველაფერი აპროვოცირებს დერმატიტს. მინერალური ზეთები, ვაზელინი, გლიცერინი, ცერამიდების შემცველი მოვლის საშუალებები - ეს არის ის ყველაფერი, რაც ატოპიური დერმატიტის მკურნალობის პროცესში უნდა გამოვიყენოთ.

დიდი ყურადღება უნდა მივაქციოთ შემადგენლობას და არა ფასს, რადგან ბიუჯეტური პროდუქტიც შესაძლებელია ძალიან ეფექტური იყოს.

- შესაძლებელია თუ არა ბავშვის კრემი მოზრდილმაც გამოიყენოს?

- რა თქმა უნდა. ასეთი ტიპის პროდუქტებს ასაკობრივი შეზღუდვა არ აქვს. თუ მოზრდილ ადამიანს აწუხებს ატოპიური დერმატიტი, სრულიად დასაშვებია, რომ ბავშვისთვის განკუთვნილი მსუყე დამატენიანებელი გამოიყენოს.

ესაუბრა მარიამ ჩოქური

„საუკეთესო დამატენიანებელი და ასევე ყველაზე იაფი საშუალება არის თეთრი ვაზელინი“ - როგორ მო...
როგორ მოვუაროთ ზამთარში ბავშვის კანს? - აღნიშულ თემაზე ​MomsEdu.ge დერმატო-ვენეროლოგ ზაზა თელიას ესაუბრა. - ზამთარში, სიცივისგან ბავშვებს ხშირად უწითლდებათ და უუხეშდებათ...

შეიძლება დაინტერესდეთ

„ჩვილები დაიღუპნენ ასეთი გელის ძალიან ინტენსიური მოხმარების შემდეგ, ამიტომ FDA არ უწევს რეკომენდაციას კბილების ამოჭრისას მსგავსი გელების გამოყენებას,“- ბავშვთა სტომატოლოგი სოფო სამხარაძე

ბავშვთა სტომატოლოგმა სოფო სამხარაძემ კბილების ამოჭრისას ღრძილების დამამშვიდებელი, ტკივილგამაყუჩებლების შემცველი გელების გამოყენების მიზანშეუწონლობასა და გვერდით ეფექტებზე ისაუბრა:

„არ არსებობს მტკიცებულება, რომ რომელიმე კვებასთან დაკავშირებით უფრო მარტივად ხდება კბილების ამოჭრა. აქვე დავამატებ, ამ პროცესთან დაკავშირებით ძალიან ბევრი გელი არსებობდა და იყიდებოდა. უმეტესობა ეს გელები შეიცავს ტკივილგამაყუჩებელს. ინსტრუქციაში მითითებულია, რომ გამოყენება შეიძლებოდა 2-ჯერ, მაქსიმუმ 3-ჯერ. ამას მშობლები დიდად არ აქცევდნენ ყურადღებას. თითოეულ წამოტირებაზე ხდებოდა აპლიკაცია. ჩვენ ვიცით, რომ პირის ღრუს ლორწოვანი გარსიდან ძალიან აქტიურად იწოვება ნებისმიერი მედიკამენტი. იყო შემთხვევები, როდესაც მაქსიმალურ ტოქსიურ დოზას მიაღწიეს და რიგ შემთხვევებში ძალიან სამწუხარო, სავალალო შედეგებით დასრულდა ასეთი გელების გამოყენება.

ჩვილები დაიღუპნენ ასეთი გელის ძალიან ინტენსიური მოხმარების შემდეგ, ამიტომ საერთაშორისო ორგანიზაციები, მათ შოირს FDA არ უწევს რეკომენდაციას მსგავსი ტკივილგამაყუჩებლების შემცველი გელების გამოყენებას, რომელიც ეხმარება პატარას კბილების ამოჭრის შემთხვევაში. სჯობს გამოვიყენოთ მოსაქავებელი საშუალებები, რომლის დაჭერასაც თვითონ შეძლებს და გაიადვილებს ამ პროცესს,“- მოცემულ საკითხზე სოფო სამხარაძემ საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.

წყარო:​ „პირადი ექიმი - მარი მალაზონია“


წაიკითხეთ სრულად