Baby Bag

რა გავლენა აქვს ძუძუთი კვებას დედის მენტალურ ჯანმრთელობაზე?

რა გავლენა აქვს ძუძუთი კვებას დედის მენტალურ ჯანმრთელობაზე?

თანამედროვე სამედიცინო ლიტერატურის კვლევის შედეგებით დგინდება, რომ ძუძუთი კვება დედის მენტალურ ჯანმრთელობაზე მნიშვნელოვან გავლენას ახდენს. უახლესი კვლევის შედეგები ჟურნალში Women's Health გამოქვეყნდა. მასაჩუსეტსის უნივერსიტეტის სამედიცინო სკოლაში ჩატარებული კვლევით დადგინდა, რომ ძუძუთი კვება დედის მენტალურ ჯანმრთელობაზე დადებითად ზემოქმედებს. თუმცა, თუ დედას ძუძუთი კვების პროცესი უჭირს და სირთულეებს აწყდება, თუ მისი მოლოდინები და რეალობა რადიკალურად განსხვავებულია, შესაძლოა, ძუძუთი კვებამ მის მენტალურ ჯანმრთელობაზე ნეგატიურად იმოქმედოს.

ძუძუთი კვებასა და დედის მენტალურ ჯანმრთელობას შორის მნიშვნელოვანი კავშირების არსებობა 36 კვლევის შედეგებით დადასტურდა. 29 კვლევამ დაასკვნა, რომ დედებს, რომლების ჩვილებს ძუძუთი კვებავენ, მენტალური ჯანმრთელობის პრობლემები ნაკლებად ექმნებათ. 28 კვლევის შედეგებით დადგინდა, რომ ძუძუთი კვება მშობიარობის შემდგომი დეპრესიის განვითარების რისკებს ამცირებს.

საყოველთაოდ ცნობილია, რომ ძუძუთი კვებას ბავშვისა და დედის ფიზიკური ჯანმრთელობისთვის უამრავი სარგებლის მოტანა შეუძლია, თუმცა დედის მენტალურ ჯანმრთელობაზე მისი დადებითი გავლენის შესახებ ნაკლებად არის ცნობილი. უახლესი კვლევები სწორედ ამ მნიშვნელოვანი კავშირების შესწავლას მიეძღვნა.

დედასა და ახალშობილს შორის ძლიერი კავშირის ჩამოყალიბების გარდა, ძუძუთი კვება დედას წონის დაკლებაში ეხმარება, იცავს მას გულ-სისხლძარღვთა დაავადებებისგან, დიაბეტისა და ჰიპერტენზიისგან, გარდა ამისა ამცირებს საკვერცხის და სარძევე ჯირკვლის სიმსივნის განვითარების რისკებს. მიუხედავად იმისა, რომ ძუძუთი კვების სარგებელს ბევრი დედა აცნობიერებს, მათ ნაწილს რძის ნაკლებობის, მკერდის მტკივნეულობის ან სამსახურეობრივი მდგომარეობიდან გამომდინარე არ შეუძლია ბავშვის ძუძუთი გამოკვება, რამაც, შესაძლოა, მათ მენტალურ ჯანმრთელობაზე ნეგატიური ზეგავლენა მოახდინოს.

კვლევით დადგინდა, რომ ექსკლუზიური ძუძუთი კვება ამცირებს დედებში პოსტტრავმული სტრესული აშლილობის განვითარების რისკს.

კვლევებში ხაზგასმულია, რომ ძუძუთი კვება აუმჯობესებს დედების ფსიქიკურ მდგომარეობას, ხოლო დედებს, რომლებსაც აქვთ ძუძუთი კვების სირთულეები, ფსიქიკური ჯანმრთელობის პრობლემების განვითარების უფრო მაღალი რისკი აქვთ.

წყარო: ​news-medical.net 

შეიძლება დაინტერესდეთ

„თუ ბავშვს ეტყვი: „შენ ეს უნდა გააკეთო,“ ის არასდროს არ გაგიკეთებს ამას, უნდა დაეკითხო ჯერ ბავშვს,“ - მზიკო დალაქიშვილი

„თუ ბავშვს ეტყვი: „შენ ეს უნდა გააკეთო,“ ის არასდროს არ გაგიკეთებს ამას, უნდა დაეკითხო ჯერ ბავშვს,“ - მზიკო დალაქიშვილი

ფსიქოთერაპევტმა მზიკო დალაქიშვილმა მშობლებს უფროსსა და უმცროს შვილებს შორის ყურადღების გადანაწილების საუკეთესო მეთოდები გააცნო. მისი თქმით, ყველაზე კარგი გამოსავალია, როდესაც მშობელი უფროსს უმცროსზე ზრუნვაში თავს თანამონაწილედ აღაქმევინებს:

„ყველაზე კარგი გამოსავალია, როდესაც მშობელი თანამონაწილედ აღაქმევინებს ბავშვს თავს. ბავშვი არის მოსავლელი, გასაზრდელია, საჭმელი უნდა ვაჭამოთ, უნდა გამოვუცვალოთ, გავასეირნოთ. ყველაფერი უნდა მოხდეს ისე, რომ ერთად ვაკეთებთ ამას. იზოლირებულები კი არ ვართ, შენ ჩემთან ერთად ხარ და ჩვენ ამას ერთად გავაკეთებთ. რას განიცდის ყველაზე ძალიან ადამიანი? მნიშვნელოვნების დაკარგვას. ბავშვი ფიქრობს, რომ ის ისეთი მნიშვნელოვანი აღარ არის მშობლებისთვის. ჩვენ ვეუბნებით: „როგორ არა, შენ ახლა უფრო მეტად მნიშვნელოვანი ხარ. შენ უნდა მომეხმარო.“

მზიკო დალაქიშვილის თქმით, ყველა ბავშვი ბედნიერდება, როდესაც ისინი დიდების შესაფერის საქმეს აკეთებენ:

„ყველა ბავშვს მოსწონს, როდესაც დიდურ საქმეს აკეთებს. მეც ძალიან პატარა ვიყავი, როდესაც მინდოდა უთო გამომეყენებინა, სათამაშო უთო არა, დიდის უთო. როდესაც ბავშვი გვეხმარება, ​ამ ყველაფერს აქვს თამაშის სახე. შენ ხომ მართლა დაუთოვებას არ მოსთხოვ პატარა ბავშვს.ამიტომ ვამბობ, რომ მიწოდების ფორმას აქვს ძალიან დიდი მნიშვნელობა.“

„თუ ბავშვს ეტყვი: „შენ ეს უნდა გააკეთო,“ ის არასდროს არ გაგიკეთებს ამას. უნდა უთხრა: „დე, შენ შეგიძლია, რომ ჩემთან ერთად იყო ახლა?“ ​უნდა დაეკითხო ჯერ ბავშვს. რაღაცას რომ დაავალებ, ვუთხრათ: „შენ რა კარგად გამიკეთე ეს.“ ამის შემდეგ ბავშვი კიდევ უფრო საჭიროდ თვლის საკუთარ თავს. ფიქრობს: ერთხელ თუ გამოვადექი მშობლებს, როგორი გამოსადეგი ადამიანი ვარ ზოგადად. მარტო დედას კი არა, მერე მოუნდება, რომ ბებოსაც დაეხმაროს,“ - აღნიშნულ საკითხებზე მზიკო დალაქიშვილმა ტელეკომპანია GDS-ის გადაცემაში შუადღე GDS-ზე ისაუბრა.

წყარო: ​შუადღე GDS-ზე

წაიკითხეთ სრულად