Baby Bag

კვლევა: მკაცრი დედები წარმატებულ გოგონებს ზრდიან

კვლევა: მკაცრი დედები წარმატებულ გოგონებს ზრდიან

მკაცრი დედები წარმატებულ გოგონებს ზრდიან. დისციპლინას მშობლები იმისთვის იყენებენ, რომ შვილებმა მიზნების მიღწევა და ოცნებების ასრულება უკეთ შეძლონ. ის ადამიანები, რომლებიც სირთულეებს უმკლავდებიან და საკუთარი უნარების გასაუმჯობესებლად ბევრს მუშაობენ, წარმატებას უფრო ადვილად აღწევენ.

დედებს სურთ, რომ მათი ქალიშვილები წარმატებულ ადამიანებად ჩამოყალიბდნენ. წარმატება მწვერვალების დაპყრობას გულისხმობს, როდესაც ადამიანი საკუთარ საქმიანობაში საუკეთესო შედეგებს აღწევს, გარდა ამისა მას პატივს სცემენ მისი ღირებულებებისა და თვისებების გამო. წარმატება კავშირშია მატერიალურ შესაძლებლობებთანაც. ქალები, რომლებსაც საკუთარი შემოსავალი აქვთ და ფინანსების განკარგვა ეხერხებათ, წარმატებულებად აღიქმებიან.

მნიშვნელოვანია წარმატების ემოციური ასპექტებიც. ადამიანი წარმატებულია, როდესაც ბედნიერია იმით, თუ ვინ არის, რას აკეთებს, რას ფლობს და როგორ ცხოვრობს. წარმატებულია ქალი, რომელიც ემოციურ კმაყოფილებას განიცდის, რომელიც უყვართ და თავადაც შეყვარებულია, რომელსაც თამამად შეუძლია იმის თქმა, რომ წარმატებას მიაღწია.

ინგლისში 15 500 გოგონაზე ჩატარებულმა კვლევამ აჩვენა, რომ მკაცრი დედები წარმატებულ გოგონებს ზრდიან. 13-14 წლის ასაკის გოგონებზე დაწყებული დაკვირვება 6 წლის მანძილზე გრძელდებოდა. გოგონები, რომლებსაც მკაცრი და მომთხოვნი დედები ჰყავდათ, რომლებიც დისციპლინის წესების მკაცრი დაცვით იზრდებოდნენ, უნივერსიტეტებში ჩაირიცხნენ და მათ საკუთარ პროფესიაში წარმატებულ მომავალს უწინასწარმეტყველებდნენ.

მკაცრი დედების ქალიშვილებს თინეიჯერობის ასაკში ნაადრევი ორსულობის ნაკლები რისკი ჰქონდათ, ვიდრე ნაკლებად მომთხოვნი დედების გოგონებს.

მნიშვნელოვანია გავარჩიოთ მკაცრი დედა მოძალადე დედისგან. მოძალადე დედას შვილზე არანაირი დადებითი გავლენის მოხდენა არ შეუძლია. ბოროტება და ძალადობა თქვენს ქალიშვილს მომავალში სწორ გზაზე ნამდვილად არ დააყენებს. ცხოვრებისთვის ვერ მოამზადებთ შვილს, რომელსაც მუდმივად სჯით და მის მიმართ სიყვარულს არ ამჟღავნებთ.

მკაცრი დედა, რომელიც საზღვრებს იცავს და მოძალადე არ არის, ყოველთვის ითვალისწინებს იმ ასპექტებს, რომელიც მას შვილთან ურთიერთობაში ეხმარება. მკაცრი დედა არასდროს უყენებს შვილს იმაზე მეტ მოთხოვნებს, ვიდრე მას შეუძლია, რომ შეასრულოს, თუმცა ის არასდროს ელის შვილისგან იმაზე ნაკლებს, ვიდრე მას შეუძლია. მკაცრი დედა შვილს მხოლოდ საჭიროების შემთხვევაში სჯის, ამასთან დასჯას არ აქვს ძალადობრივი ხასიათი! მკაცრი დედა მომთხოვნია, მაგრამ არ არის ცივი და შვილის მოფერება კარგად ეხერხება. მას არ აქვს გამუდმებით სერიოზული გამომეტყველება და აფასებს შვილის მონდომებას, მაშინაც კი, როდესაც მას დასახული მიზნის მიღწევა არ გამოსდის.

წყარო:​ youaremom.com 

შეიძლება დაინტერესდეთ

დიდი ბრიტანეთის სკოლებში მოსწავლეებს ჰიგიენურ საშუალებებს უფასოდ დაურიგებენ

დიდი ბრიტანეთის სკოლებში მოსწავლეებს ჰიგიენურ საშუალებებს უფასოდ დაურიგებენ
შოტლანდიის, უელსისა და ინგლისის ტერიტორიებზე მდებარე სკოლებში სიღარიბის წინააღმდეგ ბრძოლის კამპანიის ფარგლებში მოსწავლეებს ჰიგიენურ საშუალებებს უფასოდ დაურიგებენ. სახელმწიფო დაფინანსებით მოსარგებლე დაწყებით და საშუალო სკოლებს, ასევე კოლეჯებს, განათლების სამინისტროსა და ერთ-ერთი ბრიტანული სამედიცინო გაერთიანების ერთობლივი ძალისხმევით ჰიგიენური საშუალებების უსასყიდლოდ მიღების შესაძლებლობა ეძლევათ. აღნიშნული კამპანიის უმთავრეს მიზანს მოსწავლეების მატერიალური მხარდაჭერა წარმოადგენს. კამპანიის ორგანიზატორების თქმით, სიღარიბემ ბავშვებს განათლების მიღებაში ხელი არ უნდა შეუშალოს.

„მოსწავლე გოგონების დიდ ნაწილს მენსტრუალური ციკლის გამო სკოლის გაცდენა ხშირად უხდება, რადგან მათ ჰიგიენური საშუალებების შესაძენად თანხები არ ჰყოფნით. სიდუხჭირე მოსწავლეებისთვის შემაფერხებელ ფაქტორად არ უნდა იქცეს. უსახსრობის გამო ბავშვები სკოლაში სიარულზე უარს არ უნდა ამბობდნენ. ჩვენ დარწმუნებულები უნდა ვიყოთ, რომ მოსწავლეები ჰიგიენური საშუალებების დეფიციტის გამო საგაკვეთილო პროცესს არ ჩამოშორდებიან.“ - განაცხადა ახალი კამპანიის ინიციატორმა ამიკა ჯორჯმა.

არ დაგავიწყდეთ !!!

Moms.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)


ამიკა ჯორჯი სკოლებს უფასო ჰიგიენური საშუალებებით 2017 წლიდან ამარაგებს. ახალი კამპანიის ორგანიზატორები მოსწავლეებს გულახდილობისკენ მოუწოდებენ. მათ უმთავრეს მიზანს ბავშვების მოთხოვნილებების დაკმაყოფილება წარმოადგენს. მოსწავლეებმა საკუთარი საჭიროებების შესახებ ღიად და დაუფარავად უნდა ისაუბრონ. კამპანიის ორგანიზატორები პირობას დებენ, რომ მოსწავლეებს ყველა იმ პროდუქტს უფასოდ მიაწვდიან, რომელსაც ისინი მოითხოვენ.

„ჩვენ მიერ შემოთავაზებული პროდუქტები ყველა მოსწავლისთვის არის განკუთვნილი. არ აქვს მნიშვნელობა, რა მიზეზით არ აქვს ამა თუ იმ მოსწავლეს წვდომა ჰიგიენურ პროდუქტებზე. ჩვენი მიზანია, რომ მათ დავეხმაროთ.“ - განაცხადა კამპანიის თანადამფუძნებელმა ქლეგ ბამბერმა.

კამპანიის ორგანიზატორების წამოწყებას ლტოლვილთა მატერიალური ხელშეწყობის პროგრამების წარმომადგენლებიც უერთდებიან და თვლიან, რომ აღნიშნული წამოწყება მისასალმებელია. ახალი ინიციატივა ლტოლვილთა და თავშესაფრის მაძიებელთა დახმარებასაც ისახავს მიზნად. კამპანიის ორგანიზატორთა განცხადებით, ჰიგიენური საშუალებები სიღარიბეში მცხოვრები ნებისმიერი ადამიანისთვის ხელმისაწვდომი უნდა იყოს.

მომზადებულია ​positive.news-ის მიხედვით 
თარგმნა ია ნაროუშვილმა 
წაიკითხეთ სრულად