Baby Bag

ნუ ეტყვით ბავშვს: „ფრთხილად იყავი!“ - როგორ დავიცვათ შვილების უსაფრთხოება მათი დაშინების გარეშე?

ნუ ეტყვით ბავშვს: „ფრთხილად იყავი!“  - როგორ დავიცვათ შვილების უსაფრთხოება მათი დაშინების გარეშე?

მშობლები ხშირად იყენებენ ფრაზას: „ფრთხილად იყავი!“ ამგვარად ისინი ბავშვების საფრთხისგან დაცვას ცდილობენ, თუმცა უფროსები ვერ აცნობიერებენ, რომ მსგავსი ფრაზები ბავშვს რისკისგან არ აზღვევს. „ფრთხილად იყავი“ ბავშვს გარემოში დაფარულ საფრთხეებზე მიანიშნებს და მასში ხშირად გადაჭარბებულ შიშსაც ბადებს.

ნაცვლად იმისა, რომ ბავშვი მსგავსი შეძახილებით დააშინოთ, მისი უსაფრთხოების უზრუნველსაყოფად შემდეგი 5 მეთოდი გამოიყენეთ:

1. ბავშვს აგრძნობინეთ, რომ მის დასახმარებლად ყოველთვის მზად ხართ

ზოგჯერ ბავშვები თამაშისას კომფორტის ზონიდან გადიან და ახალ გამოწვევებს ეჯახებიან. ნაცვლად იმისა, რომ ამ დროს ბავშვს უთხრათ: „ფრთხილად იყავი!“ შეახსენეთ მას, რომ მის გვერდით ხართ და საჭიროების შემთხვევაში დაეხმარებით. შეგიძლიათ ბავშვთან ერთად მოიფიქროთ სიტყვა, რომლითაც ბავშვი დახმარების საჭიროებაზე მიგანიშნებთ. თამაშის დაწყებამდე შვილს უთხარით: „თუ გაგიჭირდება, დამიძახე და მაშინვე მოვალ!“ მშობლის თანადგომა ბავშვს ახალ გამოწვევებთან გამკლავებისთვის მეტ მოტივაციას შესძენს.

2. გაამხნევეთ ისინი, რათა მიზნების მისაღწევად დრო და ძალისხმევა არ დაიშურონ

ბავშვები ხშირად ბაძავენ მათზე უფროს ბავშვებს. თუ თქვენი შვილი პარკში სიმაღლეზე მცოცავ ბავშვებს ხედავს, მიუხედავად მცირე ასაკისა, მან, შესაძლოა, იმავეს გამეორება სცადოს. ეცადეთ ბავშვს საკუთარი შესაძლებლობების ფარგლებში მოქმედების უფლება მისცეთ. ვიდრე ის სიმაღლეზე ძრომას მთელი სისწრაფით დაიწყებს, უთხარით, რომ ჯერ ნელა იმოძრაოს, ხოლო თუ დასახულ მიზანს მიაღწევს, ტემპს მხოლოდ ამის შემდეგ მოუმატოს.

3. ბავშვთან ერთად აწარმოეთ დაკვირვება თამაშის პროცესზე

ბავშვის თამაშზე დაკვირვებისას თქვენ საფრთხეებს მარტივად აღიქვამთ, თუმცა თქვენი შვილი ამას ვერ ახერხებს. ნაცვლად იმისა, რომ მას უბრალოდ სიფრთხილისკენ მოუწოდოთ, ჩაერთეთ მასთან ერთად თამაშში და პროცესზე დაკვირვება ერთობლივად აწარმოეთ. თუ ბავშვი საქანელაზეა და მიწაზე გადმოხტომას აპირებს, ჰკითხეთ მას, ხომ არ არის ძალიან მაღლა და ხომ არ დაემუქრება საფრთხე, თუ ის მთელი სისწრაფით დაეშვება მიწაზე. ამასთან აღნიშნეთ, რომ თქვენ ამას არ გააკეთებდით, რადგან მიწაზე უსაფრთხოდ ვერ დაეშვებოდით.

4. სიტყვების დახმარებით ბავშვს მინიშნებები გაუკეთეთ, რომლებიც მის უსაფრთხოებას დაიცავს

თუ ბავშვი თამაშისას გამოუვალ მდგომარეობაში აღმოჩნდება, აუხსენით, როგორ მოიქცეს. უთხარით, რომ მისთვის მარცხენა ფეხის გამოყენება უკეთესი იქნება, ვიდრე მარჯვენასი, რათა უხერხულ პოზიციას თავი დააღწიოს. ამგვარად, ბავშვს უსაფრთხო ქმედებისკენ უბიძგებთ, ამასთან ის ვერ იგრძნობს, რომ თქვენ სიტუაციის გაკონტროლებას ცდილობთ.

5. ბავშვს ჰკითხეთ, რა სტრატეგია აქვს მას თამაშის დროს უსაფრთხოების დაცვისთვის

ბავშვები ხშირად ეუბნებიან მშობლებს: „მიყურე!“ ზოგჯერ ეს სანახაობა სასიამოვნოდ სრულდება, ბავშვი ბედნიერი და კმაყოფილია, ზოგჯერ კი პატარები ტრავმების მიღებისგანაც არ არიან დაზღვეულები. ჰკითხეთ ბავშვს, რის ჩვენებას აპირებს თქვენთვის. როდესაც ის თავის გეგმას გაგაცნობთ, ჰკითხეთ, როგორ აპირებს სიმაღლიდან უსაფრთხოდ დაშვებას მიწაზე. ბავშვი საკუთარ ქმედებებზე მეტად უნდა დააფიქროთ, რათა უსაფრთხოების მნიშვნელობა გაიაზროს. ეს ბევრად უფრო ეფექტიანია, ვიდრე სიფრთხილისკენ მოწოდებები, რომლებიც მას შიშს უნერგავს და გამოწვევებთან შეჯახებისას ხელს უშლის.

წყარო:​ imom.com 

შეიძლება დაინტერესდეთ

„საუკეთესო დედის ცნებაში არაფრით არ უნდა ჩაიდოს გადაჭარბებული ზრუნვა და ყურადღება,“ - ნანა ჩაჩუა

„საუკეთესო დედის ცნებაში არაფრით არ უნდა ჩაიდოს გადაჭარბებული ზრუნვა და ყურადღება,“ - ნანა ჩაჩუა

ფსიქოლოგმა ნანა ჩაჩუამ ბავშვზე გადაჭარბებული მზრუნველობის ნეგატიური გავლენის შესახებ ისაუბრა. მან აღნიშნა, რომ საუკეთესო დედა არ არის ის, ვინც გადაჭარბებულად ზრუნავს შვილზე:

„საუკეთესო დედობა შეიძლება იყოს დასაზუსტებელი ცნება. ​გადაჭარბებული ყურადღება და მზრუნველობა ძალიან ნეგატიურია. საუკეთესო დედის ცნებაში არაფრით არ უნდა ჩაიდოს გადაჭარბებული ზრუნვა და ყურადღება. მონადირე ცხოველები თავის ბოკვერებს ასწავლიან, ავარჯიშებენ, რომ მათ დამოუკიდებლად არსებობა შეძლონ. ჩვენთან შეიძლება მეათე-მეთერთმეტე კლასელის ჩანთა დედას მიჰქონდეს.“

ნანა ჩაჩუას თქმით, იმისთვის, რომ ​კარგი დედა, კარგი ცოლი, კარგი მეგობარი და კარგი კოლეგა იყო, მთავარია დრო სწორად გადაანაწილო:

„არავითარი დათმობა არ არის საჭირო. მთავარია, როგორ გადაანაწილებ დროს. ასევე ის, რამდენად რაციონალური, გულწრფელი და ღია ხარ ყველა ურთიერთობაში. ფსიქოლოგიაში ცნობილია, რომ დედა თუ შეძლებს თუნდაც 20 წუთის განმავლობაში შვილთან ურთიერთობას და ბავშვს მიეცემა ის, რომ თვითონ იყოს ინიციატორი ამ ურთიერთობაში, სრულიად საკმარისია ეს დრო იმისთვის, რომ ბავშვმა დედის დეფიციტი არ განიცადოს.“

„ქალისა და მამაკაცის, ცოლ-ქმარს შორის ურთიერთობაში, როდესაც ყველა ხალისით აკეთებს თავის საქმეს, როდესაც ცოლ-ქმარს შორის ხდება ემოციათა გაცვლა ყველა დონეზე, მაშინ ეს ურთიერთობა შემდგარია. ​ქალების ძალიან დიდ ნაწილს აქვს ჩვევად წუწუნი, რომ „მე ამდენს ვაკეთებ.“ რაღაც განსაკუთრებულად უნდათ, რომ დააფასონ მისი შრომა. ეს არც ისე პოზიტიურად სჩანს. როდესაც თვითონ რასაც აკეთებ იმ დროში, იმ წუთში, ის ხარ თავად, ყოველთვის ხარ ის, რაც ხარ, ყოველთვის შეძლებ, რომ შენი თავი გამოხატო ამაში და განიცადო ბედნიერება,“ - აღნიშნულ საკითხებზე ნანა ჩაჩუამ რადიო იმედის ეთერში ისაუბრა.

წყარო: ​რადიო იმედი

წაიკითხეთ სრულად