Baby Bag

პირველკლასელთა რეგისტრაციის ვადებში ცვლილება შევიდა

პირველკლასელთა რეგისტრაციის ვადებში ცვლილება შევიდა

პირველკლასელთა და მათი მშობლების ინტერესების გათვალისწინებით, 2021-2022 სასწავლო წლისთვის პირველკლასელთა რეგისტრაციის I და II ეტაპის ვადებში ცვლილება შევიდა.

პირველკლასელთა რეგისტრაციის I ეტაპი, რომელიც სპეციალური საგანმანათლებლო საჭიროების მქონე პირებს ეხებოდა, 15 მარტიდან 26 მარტის ჩათვლით უკვე წარმატებით განხორციელდა. თუმცა ქვეყანაში არსებული ეპიდვითარების გამო შეფერხდა პირველ ეტაპზე რეგისტრირებული ბავშვების მულტიდისციპლინური გუნდის მიერ შეფასების პროცესი. შესაბამისად, სპეციალური საგანმანათლებლო საჭიროების მქონე მოსწავლეების ინტერესების გათვალისწინებით, რეგისტრაციისთვის საჭირო დოკუმენტაციის წარდგენის საბოლოო ვადა 5 ივნისამდე გახანგრძლივდა.

საქართველოს მთავრობის მიერ 4-11 მაისის უქმე დღეებად გამოცხადების გამო ცვლილება შეეხო პირველკლასელთა რეგისტრაციის II ეტაპსაც, რომელიც 2021 წლის 20 აპრილიდან 29 აპრილის ჩათვლით განხორციელდება.

II ეტაპზე სკოლაში დარეგისტრირდებიან ბავშვები:

  • რომელთა და-ძმა სწავლობს სასურველ სკოლაში;
  • რომელთა მშობელი არის კონკრეტული სკოლის თანამშრომელი;
  • რომელთა ოჯახიდან ერთდროულად ორი ან მეტი ბავშვი შედის პირველ კლასში.

ამ ეტაპზე რეგისტრაცია ხორციელდება საჯარო სკოლებში მშობლის/კანონიერი წარმომადგენლის მიერ ჩასარიცხად აუცილებელი დოკუმენტაციის წარდგენის საფუძველზე. რეგისტრაციას უზრუნველყოფს საჯარო სკოლა.

მოსწავლის პირველ კლასში ჩასარიცხად წარსადგენი აუცილებელი დოკუმენტებია:

  • მოსწავლის კანონიერი წარმომადგენლის განცხადება, რომელიც უნდა შეიცავდეს კანონიერი წარმომადგენლის საცხოვრებელი ადგილისა და ტელეფონის ნომრის თაობაზე ინფორმაციას;
  • კანონიერი წარმომადგენლის პირადობის დამადასტურებელი მოწმობის ასლი და საქართველოში ბინადრობის დამადასტურებელი დოკუმენტის ასლი (ასეთის არსებობის შემთხვევაში).
  • მოსწავლის დაბადების მოწმობის ან პირადობის დამადასტურებელი დოკუმენტის ასლი და საქართველოში ბინადრობის დამადასტურებელი დოკუმენტის ასლი (ასეთის არსებობის შემთხვევაში).


​დოკუმენტების უცხოურ ენაზე წარდგენის შემთხვევაში, მათ უნდა დაერთოს საქართველოს კანონმდებლობით დადგენილი წესით შესრულებული თარგმანი ქართულ ენაზე.

სამინისტრო მშობლებს მოუწოდებს, ყურადღებით გაეცნონ რეგისტრაციის ვადებს და პირობებს, დროულად მიმართონ სკოლის ადმინისტრაციას და წარადგინონ საჭირო დოკუმენტაცია, რათა ბავშვის სკოლაში შეყვანა შეუფერხებლად შეძლონ.

შეიძლება დაინტერესდეთ

მასწავლებლის სახლი ინგლისური ენის პედაგოგებისთვის ინფორმაციას ავრცელებს

მასწავლებლის სახლი ინგლისური ენის პედაგოგებისთვის ინფორმაციას ავრცელებს

მასწავლებლის სახლი ინგლისური ენის პედაგოგებისთვის ინფორმაციას ავრცელებს. უწყების ცნობით ხვალ, 19 ნოემბერს ინგლისური ენის მასწავლებლების ონლაინ პლატფორმა გახსნება. გთავაზობთ მასწავლებლის სახლის მიერ გავრცელებულ ინფორმაციას:

„ძვირფასო ინგლისურის მასწავლებლებო,
მოხარული ვართ, 19 ნოემბერს მოგიწვიოთ ინგლისური ენის მასწავლებლების ონლაინ პლატფორმის გახსნის ცერემონიაზე.

​მასწავლებელთა ონლაინ საზოგადოება არის კოლეგების მიერ მართული ონლაინ პლატფორმა ინგლისური ენის მასწავლებლებისთვის. ის გთავაზობთ ფორუმებს, სადაც მასწავლებლებს შეუძლიათ ჩაერთონ სიახლეებისა და მათთვის საინტერესო თემების ირგვლივ გამართულ დისკუსიებში, გააზიარონ ცოდნა და გამოცდილება, მოახდინონ საკუთარი პრაქტიკის რეფლექსია და მიიღონ მონაწილეობა კვლევით საქმიანობაში.

​ღონისძიების მსვლელობისას, ბრიტანეთის საბჭო გაძლევთ საშუალებას დაესწროთ სესიებს, რომელთაც წარუძღვებიან მსოფლიოში ცნობილი მომხსენებლები და ექსპერტ მოდერატორები ინგლისური ენის სწავლების სამყაროდან.

​მთელი დღის განმავლობაში ყურადღება გამახვილდება პროფესიული პრაქტიკის ონლაინ ერთობის როლზე მასწავლებელთა პროფესიული განვითარების მხარდაჭერასა და წახალისებაში და მასწავლებელთა საკუთარი პროფესიული განვითარების მიკუთვნებულობის ჩამოყალიბებაში.

​ღონისძიებაში მონაწილეობის მისაღებად, დარეგისტრირდით მოცემულ ბმულზე მოკლე ონლაინ ფორმის შევსების გზით. შემდეგ მიიღებთ ავტომატურ ელ.წერილს დამატებითი ინსტრუქციებით.

​სიამოვნებით გვინდა გაცნობოთ, რომ ბრიტანეთის საბჭო ამჟამად მუშაობს საქართველოს განათლების, მეცნიერების, კულტურისა და სპორტის სამინისტროსა და მასწავლებელთა პროფესიული განვითარების ეროვნულ ​ცენტრთან პარტნიორულ ინიციატივაზე, რომლის ფარგლებშიც ჩვენ დავეხმარებით ინგლისურის ყველა მასწავლებელს საქართველოდან დარეგისტრირდნენ ზემოთაღნიშნულ პლატფორმაზე და მივცემთ შესაძლებლობას, განაგრძონ ონლაინ უწყვეტი პროფესიული განვითარება თავიანთ მუნიციპალურ და ქვეყნის ჯგუფებში.

​ინიციატივის შესახებ დეტალურ ინფორმაციას პარტნიორი ორგანიზაციები უახლოეს მომავალში გაასაჯაროვებენ. მანამდე, გთხოვთ დაესწარით ჩვენს ღონისძიებას და გაიზიარეთ ჩვენი პროფესიული დღესასწაული.

​დამატებითი კითხვების შემთხვევაში დაუკავშირდით საქართველოს ბრიტანეთის საბჭოს ოფისს Tamuna.kvachadze@ge.britishcouncil.org.“ - აღნიშულია მასწავლებლის სახლის მიერ გავრცეულებულ ინფორმაციაში.

წაიკითხეთ სრულად