განათლების, მეცნიერების, კულტურის და სპორტის მინისტრის მოადგილემ, ეკა დგებუაძემ საზოგადოებრივი მაუწყებლის ეთერში დისტანციური სწავლების შესაძლებლობებზე ისაუბრა. როგორც მან აღნიშნა, ბოლო პერიოდში ძალიან მნიშვნელოვანი და საინტერესო პროექტები განხორციელდა:
„დისტანციურმა სწავლებამ ბევრი რაღაც გადააფასა, ძალიან მნიშვნელოვანი პროექტების განხორციელების შესაძლებლობა მოგვცა. ჩატარდა უამრავი საინტერესო ვებინარი, ტრენინგი, რომლებიც შეიძლება აქამდე არ იყო ხელმისაწვდომი ყველა ადამიანისთვის, ყველა მასწავლებლისთვის. პედაგოგებს ჰქონდათ შესაძლებლობა, პროფესიონალი სპეციალისტების გამოცდილებას გაცნობოდნენ. ამის ფუფუნება აქამდე არ იყო. უშუალოდ ბრიტანეთიდან სპეციალისტები აძლევენ მასწავლებლებს სასწავლო პროცესის ორგანიზებაზე რეკომენდაციებს,“ - განაცხადა ეკატერინე დგებუაძემ.
განათლების, მეცნიერების, კულტურის და სპორტის მინისტრის მოადგილემ ყურადღება გაამახვილა „ტელესკოლაზე“ და აღნიშნა, რომ „ტელესკლის“ გაკვეთილები თვალსაჩინო მაგალითია, როგორ უნდა ჩატარდეს საინტერესო გაკვეთილი:
„ძალიან კარგი შესაძლებლობა მოგვცა „ტელესკოლამ.“ თვალსაჩინო გახდა, როგორ ორგანიზდეს საინტერესო, ინტერაქტიული გაკვეთილები. ხისტი გაკვეთილები, მე არ ვამბობ, რომ ყველა საკლასო ოთახში მიმდინარეობდა, მაგრამ სწავლების ძველი მეთოდი და სტიგმა დღესაც არსებობს ჩვენს სისტემაში. ასეთი თვალსაჩინო მაგალითები არის ძალიან ღირებული და მნიშვნელოვანი. ამიტომ ძალიან საინტერესო პერიოდში ვცხოვრობთ, რაღაცებს ვაფასებთ. პროექტი „ტელესკოლა“ კიდევ უფრო საინტერესო გახდება. გვაქვს გეგმები ზაფხულისთვის, არდადეგების პერიოდში „ტელესკოლას“ ბიბისის ინგლისური ენის შემსწავლელი პროგრამა დაემატება. ზუსტად ეს არის პირველი ნაბიჯი, რომ ჩვენს მოქალექეებს, ნებისმიერი ასაკის ადამიანს, შესაძლებლობა ექნება ძალიან მაღალი ხარისხის პროექტში იყოს ჩართული,“ - აღნიშნა ეკატერინე დგებუაძემ.
მასწავლებელთა ხელფასის ზრდა მართლაც ისტორიული მოვლენაა
განათლების, მეცნიერების, კულტურისა და სპორტის მინისტრობის კანდიდატმა, მიხეილ ბატიაშვილმა, პარლამენტის სამი კომიტეტის გაერთიანებულ სხდომაზე სიტყვით გამოსვლისას, გუნდს მადლობა გადაუხადა იმ საკანონმდებლო ცვლილებების მხარდაჭერისთვის, რომლებიც განათლების რეფორმას უწყობს ხელს და დეპუტატებს განათლების, მეცნიერების, კულტურისა და სპორტის მიმართულებით მიმდინარე რეფორმები და მიღწეული შედეგები გააცნო.
მინისტრობის კანდიდატის თქმით, ყველა სკოლა იწყება მასწავლებლით და სწორედ მათზეა დამოკიდებული რეფორმების განხორციელება.
მიხეილ ბატიაშვილის თქმით, მთვარობის უმნიშვნელოვანესი პრიორიტეტი ეს არის ეროვნული იდეა - განათლება, რომელიც უკვე გადაიქცა საქმედ, 2022 წლიდან ბიუჯეტის მეოთხედი განათლებაზე დაიხარჯება. ის პენსიონერი პრაქტიკოსი პედაგოგები, რომლებმაც პროფესიიდან გასვლა გადაწყვიტეს, სახელმწიფოსგან ჯილდოს სახით მიიღებენ 2 წლის ჯამურ ხელფასს და შეუნარჩუნდებათ პედაგოგის დაზღვევა მთელი სიცოცხლის განმავლობაში.
„რეფორმის ფარგლებში მასწავლებელთა პროფესიული განვითარებისა და ანაზღაურების მიმართულებით გადადგმული ნაბიჯები უპრეცედენტოა. ამ რეფორმით პირველ ეტაპზე 6 000-ზე მეტმა მასწავლებელმა ისარგებლა. გარდა ამისა, 2019 წლის ბოლომდე მასწავლებლებს აქვთ კომპეტენციის გამოცდის გამეორების ან ჯილდოს მიღებაზე რეგისტრირების შესაძლებლობა. რეფორმის ფარგლებში, მასწავლებელთა ხელფასის ზრდა მართლაც ისტორიული მოვლენაა. 2019 წლის ოქტომბრის დასაწყისში ყველა პედაგოგს, რომელსაც აქვს სტატუსი და მინიმუმ 15 საგაკვეთილო საათი, ანაზღაურება გაეზრდება 150 ლარით! სრული საგაკვეთილო დატვირთვის შემთხვევაში, უფროსი მასწავლებლები მიიღებენ 1011 ლარს; წამყვანი მასწავლებლები - 1435 ლარს; მენტორი მასწავლებლები - 1745 ლარს. აღსანიშნავია ისიც, რომ პედაგოგებისთვის ანაზღაურების ზრდის ტენდენცია შენარჩუნდება და ეტაპობრივად განხორციელდება ისე, რომ 2022 წლისათვის უფროსს მასწავლებელს ანაზღაურება ექნება - 1700 ლარი; წამყვან მასწავლებელის - 2135 ლარი; მენტორ მასწავლებელს - 2445 ლარი. პედაგოგების გარდა, ხელფასები ეზრდებათ სკოლის დირექტორებს, ადმინისტრაციის წარმომადგენლებს, ტექნიკურ მუშაკებს - საშუალოდ 20%-ით. ასევე, 1 სექტემბრიდან რესურსცენტრების ხელმძღვანელებსა და თანამშრომლებს ხელფასები საშუალოდ 200 ლარით გაეზრდებათ” - განაცხადა მიხეილ ბატიაშვილმა.
