Baby Bag

30 ათასზე მეტი პედაგოგი გაზრდილ ანაზღაურებას მიიღებს

30 ათასზე მეტი პედაგოგი გაზრდილ ანაზღაურებას მიიღებს

„სულ რამდენიმე დღეში 30 ათასზე მეტი პედაგოგი გაზრდილ ანაზღაურებას მიიღებს და ათასობით დამსახურებულ პედაგოგს ღირსეულად გავაცილებთ სისტემიდან“ - ამის შესახებ  პარლამენტის განათლების, მეცნიერებისა და კულტურის კომიტეტის თავმჯდომარემ, მარიამ ჯაშმა, პლენარულ სხდომაზე გამოსვლისას განაცხადა.

მისივე თქმით, საპენსიო რეფორმა, რომელიც განათლების სისტემაში ხორციელდება, არა მხოლოდ საქართველოსთვის იქნება წარმატებული, არამედ გახდება მაგალითი, როგორც ცენტრალური და აღმოსავლეთ ევროპის ქვეყნებისთვის, ასევე უფრო გლობალური მასშტაბით.

მარიამ ჯაშმა ყურადღება გაამახვილა 2019 წელს განხორციელებულ განათლების სისტემის რეფორმებზე და აღნიშნა, რომ მიმდინარე წელი ისტორიული მნიშვნელობისაა:

„გადაჭარბების გარეშე ვფიქრობ, 2019 წელი იყო ისტორიული წელი საქართველოს განათლების სისტემის რეფორმისთვის. მე-9 მოწვევის პარლამენტში განხილვების პირველივე დღეებიდან ჩვენი კომიტეტი, ყურადღებას ამახვილებდა დაფინანსების მნიშვნელოვნად ზრდის აუცილებლობაზე, რათა მომხდარიყო ფუნდამენტური რეფორმები განათლების მიმართულებით,“ - განაცხადა მარიამ ჯაშმა.

კომიტეტის თავმჯდომარემ იაკობ გოგებაშვილის დედაენის განახლებულ ვერსიასა და პირველკლასელებისთვის თანამედროვე საგანმანათლებლო რესურსების ხელმისაწვდომობაზე ისაუბრა:

„მოგეხსენებათ, რომ წელს, საქართველოს პარლამენტის ინიციატივით, ბრუნდება იაკობ გოგებაშვილის დედაენის განახლებული ვერსია. ყველა პირველკლასელს სკოლაში დახვდა სწორედ აღნიშნული სახელმძღვანელო, ჩვენ ასევე უზრუნველვყოფთ არჩევანის თავისუფლებას და საავტორო უფლებების დაცვას. ყველა პირველკლასელს დახვდა განახლებული და გაუმჯობესებული ტექნიკური მახასიათებლების კომპიუტერები, რომელიც მოსწავლეებს აძლევთ საშუალებას, რომ მათთვის ხელმისაწვდომი იყოს ყველა თანამედროვე საგანმანათლებლო რესურსი,“ - აღნიშნა კომიტეტის თავმჯდომარემ.

მარიამ ჯაშმა სასკოლო უსაფრთხოების კუთხით, განხორციელებულ ცვლილებებზეც გაამახვილა ყურადღება:

„სასკოლო უსაფრთხოების კუთხით, ჩვენ გვაქვს მნიშვნელოვანი ცვლილებები. დღეის მდგომარეობით, დამატებით 41 სკოლაში შევიდა მანდატურის სამსახური და საერთო ჯამში, 2019 წლის ბოლომდე, სკოლების 80 პროცენტში უკვე იქნებიან სკოლის მანდატურები, ეს კი მნიშვნელოვნად გაზრდის სასკოლო უსაფრთხოებას. ასევე 250 ლარით გაიზარდა მანდატურების სახელფასო ანაზღაურება. მანდატურის სამსახურის გაძლიერებასთან ერთად გაძლიერდა ფსიქო-სოციალური სერვისი. ახალციხესა და ზუგდიდში გაიხსნა დამატებითი ფსიქო-სოციალური მომსახურების ცენტრები, წელსვე მოხდა უმნიშვნელოვანესი გადაწყვეტილების მიღება, რის საფუძველზეც სკოლაში ხდება სპეციალური საგანმანათლებლო საჭიროებების ბავშვთა რეგისტრაცია, 515-მა მოსწავლემ უკვე მიიღო აღნიშნული მომსახურება,“ - განაცხადა მარიამ ჯაშმა.

მან ასევე სასკოლო ინფრასტრუქტურის გაუმჯობესების კუთხით განხორციელებულ სამუშაოებზე ისაუბრა:

„მნიშვნელოვანი ნაბიჯები გადაიდგა სასკოლო ინფრასტრუქტურის გაუმჯობესების კუთხით. 880 სკოლაში განხორციელდა სარემონტო სამუშაოები, აშენდა 27 ახალი სკოლა, ასევე ამერიკის შეერთებული შტატებისა და საქართველოს მთავრობების პრიორიტეტული სტრატეგიული პროგრამის ფარგლებში დასრულდა 91 სკოლის მშენებლობა,“ - განაცხადა პარლამენტის განათლების, მეცნიერებისა და კულტურის კომიტეტის თავმჯდომარემ, მარიამ ჯაშმა, პლენარულ სხდომაზე გამოსვლისას.

შეიძლება დაინტერესდეთ

განათლების სამინისტრო საჯარო სკოლების მასშტაბურ გამწვანებას იწყებს

განათლების სამინისტრო საჯარო სკოლების მასშტაბურ გამწვანებას იწყებს

საქართველოს კათოლიკოს პატრიარქის ინიციატივით, საქართველოს განათლების, მეცნიერების, კულტურისა და სპორტის სამინისტრო საჯარო სკოლების მასშტაბურ გამწვანებას იწყებს.

პროექტის ფარგლებში, განათლების, მეცნიერების, კულტურისა და სპორტის მინისტრმა მიხეილ ბატიაშვილმა და გარემოს დაცვისა და სოფლის მეურნეობის მინისტრმა ლევან დავითაშვილმა 117-ე საჯარო სკოლის მოსწავლეებთან ერთად, ხეების დარგვის პროცესში მიიღეს მონაწილეობა.

უახლოეს მომავალში თბილისისა და რუსთავის 160-მდე სკოლაში 5500 ხეხილის ნერგი დაირგვება.

„პატრიარქის ინიციატივით, დავიწყეთ მასშტაბური და მნიშვნელოვანი სკოლების გამწვანების პროექტი, რომლის პირველ ეტაპზე თბილისისა და რუსთავის 160-მდე სკოლას გავამწვანებთ. ჩვენთვის მნიშვნელოვანია, რომ მოსწავლეებმა გამწვანებულ გარემოში გაატარონ თავისუფალი დრო. ეს აქცია გაგრძელდება და იმედი მაქვს ყველა მოსწავლე ჩაერთვება და მიიღებს მონაწილეობას ხეების მოვლა-პატრონობაში“ - განაცხადა მინისტრმა.

გარემოსდაცვით საკითხებთან დაკავშირებით მოსწავლეების ცნობიერების ამაღლების მიზნით, საქართველოს სოფლის მეირნეობის სამინისტროს სამეცნიერო კვლევითმა ცენტრმა განათლების მეცნიერების კულტურისა და სპორტის სამინისტროს ხეხილის ნერგები გადასცა. აღნიშნული ნერგებით, პროექტის პირველ ეტაპზე თბილისსა და რუსთავში მდებარე საჯარო სკოლების ეზოები გამწვანდება.

სამინისტროს ინიციატივით, სხვადასხვა სასწავლო დაწესებულებაში გამწვანების აქციები მომავალშიც გაიმართება.

წაიკითხეთ სრულად