Baby Bag

97 წლის ვენერა ცარციძე ყველაზე ხანგრძლივი სტაჟის მქონე ბიოლოგიის მასწავლებელია

97 წლის ვენერა ცარციძე ყველაზე ხანგრძლივი სტაჟის მქონე ბიოლოგიის მასწავლებელია

97 წლის ვენერა ცარციძე ყველაზე ხანგრძლივი სტაჟის მქონე ბიოლოგიის მასწავლებელია. ის, ქალაქ საჩხერეში 1922 წელს დაიბადა, 1942 წელს დაამთავრა თბილისის ალ. პუშკინის სახელობის პედაგოგიური ინსტიტუტის ქიმია - ბიოლოგიის ფაკულტეტი და იმავე წელს დაიწყო მასწავლებლად მუშაობა. სსიპ ილია ჭავჭავაძის სახელობის ქალაქ საჩხერის N2 საჯარო სკოლაში ის 1946 წლიდან 2011 წლამდე მუშაობდა.

„ჩემი უმთავრესი მიზანი იყო ბიოლოგიის სწავლება სახალისო და საინტერესო გამეხადა. ამისთვის, სასწავლო პროცესში აქტიურად ვიყენებდი ფილმებს, მოსწავლეებთან ერთად ვამუშავებდი სათბურს, სადაც მათ ნერგების გამოყვანა შევასწავლე და მათ საშუალება ჰქონდათ, თეორიული ცოდნა პრაქტიკულად გამოეყენებინათ; მსგავსი მეთოდი გამოვიყენეთ ცოცხალ ორგანიზმებთან მიმართებაშიც და სკოლის აუზში მოვაშენეთ სხვადასხვა ჯიშის თევზები, რაც განსაკუთრებით დაეხმარა მოსწავლეებს ბიოლოგიის სრულფასოვნად შესწავლაში,“ - იხსენებს  ვენერა ცარციძე.

როგორც სკოლის დირექტორი, ლია გომართელი აღნიშნავს, ქალბატონი ვენერა ყოველთვის გამოირჩეოდა სწავლების განსაკუთრებული მიდგომებით.

„ის მნიშვნელოვან ყურადღებას უთმობდა მოსწავლეებში კრიტიკული აზროვნებისა და შემოქმედებითი უნარების განვითარებას; ბიოლოგიის კაბინეტი აღჭურვილი ჰქონდა მრავალფეროვანი რესურსებით. გარდა სასკოლო მეცადნიეობებისა, უძღვებოდა ბიოლოგიის წრესაც. ამ ყვეაფრის შედეგად, მისი მოსწავლეები ყოველთვის წარმატებით მონაწილეობდნენ ეროვნულ და რაიონულ კონფერენციებში,“- ამბობს დირექტორი.

ქალბატონ ვენერა ცარციძე პედაგოგიურ საქმიანობაში შეტანილი წვლილისთვის 2003 წელს დაჯილდოვდა პრეზიდენტის „ღირსების ორდენით“. 1984 და 1989 წლებში ქალბატონ ვენერა ცარციძეს საქართველოს სსრ განათლების მინისტრის მიერ უფროსი მასწავლებლის წოდება მიენიჭა.

30 აპრილს მასწავლებელთა პროფესიული განვითარების ეროვნული ცენტრის დირექტორის ბერიკა შუკაკიძის გადაწყვეტილებით ვენერა ცარციძეს მიენიჭა ​„დამსახურებული მასწავლებლის“ წოდება.

წყარო - ​მასწავლებლის სახლი

შეიძლება დაინტერესდეთ

„ბავშვების სკოლაში ყოფნისას მანდატური მშობლის როლს ასრულებს“ - მიხეილ ჩხენკელმა მანდატურის სამსახურის 60 თანამშრომელი დააჯილდოვა

„ბავშვების სკოლაში ყოფნისას მანდატური მშობლის როლს ასრულებს“ - მიხეილ ჩხენკელმა მანდატურის სამსახურის 60 თანამშრომელი დააჯილდოვა

საქართველოს განათლების, მეცნიერების, კულტურისა და სპორტის მინისტრმა მიხეილ ჩხენკელმა სამსახურებრივი მოვალეობის კეთილსინდისიერად შესრულებისთვის წლის შემაჯამებელ შეხვედრაზე, მანდატურის სამსახურის 60 თანამშრომელი მადლობის სიგელებით დააჯილდოვა.

მიხეილ ჩხენკელმა ვრცლად ისაუბრა მანდატურის სამსახურის რეფორმის ფარგლებში მიღწეულ შედეგებზე და ხაზი გაუსვა, რომ სასურველი ვითარების მისაღწევად ჯერ კიდევ ბევრი სამუშაოა ჩასატარებელი. მინისტრმა გაწეული ძალისხმევისთვის ყველა თანამშრომელს მადლობა გადაუხადა:

„მანდატურის სამსახური ჩვენი სისტემის ერთ-ერთი ყველაზე მნიშვნელოვანი მიმართულება გახლავთ, რადგან შეუძლებელია საუბარი განათლების ხარისხის განვითარებაზე, ახალ აკადემიურ პროგრამებზე, ინიციატივებზე და, ზოგადად, ახალი სკოლის მოდელზე, თუკი სკოლებში ბავშვებისთვის არ იქნება შექმნილი უსაფრთხო გარემო. ეს არის უმთავრესი და აუცილებელი პირობა იმისა, რომ ჩვენი ჩანაფიქრი, აკადემიური განვითარების მიმართულებით, რეალურად განხორციელდეს სკოლებში.

მინდა, მადლობა გადაგიხადოთ მანდატურის სამსახურის ასეთი დიდი პროგრესისთვის. მიუხედავად იმისა, რომ გამოწვევებიც საკმაოდ ბევრია, დარწმუნებული ვარ, თქვენი პროფესიონალიზმისა და, რაც მთავარია, დამოკიდებულების მეშვეობით სკოლებში არსებული გამოწვევები და პრობლემები აუცილებლად გადაიჭრება.

ყველაზე მთავარი აღნიშნულ პროფესიაში არის ბავშვების მიმართ დამოკიდებულება, მოსწავლეების სიყვარული და მათთვის მზრუნველი ატმოსფეროს შექმნა, რადგან ამის გარეშე ისეთი პრობლემების საფუძვლიანი მოგვარება, როგორიცაა ბულინგის პრევენცია და მასთან დაკავშირებული სხვა მნიშვნელოვანი გამოწვევები, შეუძლებელია.

ბავშვების სკოლაში ყოფნისას თქვენ ასრულებთ მშობლის როლს, რადგან თქვენ ყველაზე მთავარს - ბავშვის უსაფრთხოებას იცავთ.“ - განაცხადა მინისტრმა.

მიხეილ ჩხენკელის თქმით, მომავალი წლიდან მანდატურის სამსახური, ევროპელ ექსპერტებთან მჭიდრო თანამშრომლობით, სასკოლო მედიაციის მექანიზმის დანერგვას დაიწყებს. სრული დატვირთვით ამოქმედდება ახალი ინტერნეტ-პორტალი befriend.mes.gov.ge, რომელიც მნიშვნელოვნად შეუწყობს ხელს ძალადობის შესახებ საზოგადოების ცნობიერების ამაღლებასა და ინფორმაციის ხელმისაწვდომობას. გაგრძელდება როგორც მოქმედი მანდატურების გადამზადება, ასევე გაფართოების პროცესი. 2020 წელს მანდატურის სამსახური, დამატებით 130 საჯარო სკოლაში შევა.

წაიკითხეთ სრულად