Baby Bag

„შრომა სანამ სირცხვილი იქნება, მანამდე რა უნდა გვეშველოს?!“ - ფსიქოლოგი მარინა კაჭარავა

„შრომა სანამ სირცხვილი იქნება, მანამდე რა უნდა გვეშველოს?!“ - ფსიქოლოგი მარინა კაჭარავა

ფსიქოლოგმა მარინა კაჭარავამ შვილების ღირებულებებზე დაყრდნობით აღზრდის მნიშვნელობაზე ისაუბრა. მან აღნიშნა, რომ მშობლებსა და შვილებს სადა ურთიერთობები უნდა ჰქონდეთ:

​ღირებულებები არის ყველაზე მნიშვნელოვანი, რითიც გაზრდი ადამიანს. გქონდეთ ჩვეულებრივი, სადა ურთიერთობები: დღეს გვაქვს, ხვალ არ გვაქვს, დღეს ეს გვაქვს საჭმელი, ხვალ ის გვაქვს. არ არის მნიშვნელოვანი, რა ბრენდის ფეხსაცმელს ჩააცმევ ბავშვს, თან მაშინ, როდესაც არ გაქვს ამის საშუალება. მერე ამადლი შვილს: „მე შენი გულისთვის ვალები ავიღე.“ ვინ გთხოვა ეს? არავის არ უთხოვია. ბავშვმა საერთოდ არ იცის ფასი, შენ თუ არ დაუფიქსირე. იმისთვის ხის სათამაშო და ნებისმიერი პლასტმასის სათამაშო ერთია. როგორ მისცემ, ამას აქვს მნიშვნელობა.“

მარინა კაჭარავას თქმით, შვილი მშობლის შემოქმედებაა და მშობელს ყველა თავისი შეცდომა წინ დახვდება:

„ჩვენივე შემოქმედებაა ჩვენი შვილები. ​ყველა ჩემი შეცდომა ცხვირწინ დამხვდა და ცხვირში მომხვდა. ეს არის სიჯანსაღე: ვიცხოვრო სადად, მშვიდად, დღევანდელ რეალობასთან შესაბამისობაში, არა რაღაც ილუზიებში, ზღაპრებში, თეატრალურ დადგმებსა და ტყუილებში. ტყუილში გაზრდილი ადამიანი რეალობაში რომ გადის, რამდენი პრობლემა აქვს მას?! არ სჭირდება ბავშვს იმაზე მეტი, ვიდრე სჭირდება. სულ უნდა ჰქონდეს მას რაღაც წინ, რისკენაც უნდა ისწრაფვოდეს. ყველაფერი რომ უკვე აქვს ბავშვს, მერე რა აკეთოს იმან?!“

„ოფიციანტობა არ უნდა, ბენზინს არ ჩაასხამს, მარტო უნდათ, რომ დირექტორები იყვნენ. ეს საიდან მოდის? ​სახლში არის ის მეფე, დირექტორი, დედოფალი და შესაბამისად, გარეთაც ეს უნდა. საზღვარგარეთ რომ მიდიან, იქ მუშაობენ, იმიტომ, რომ იქ ნაცნობები ვერ ხედავენ. თითქოს რცხვენია ადამიანს შრომის. შრომა სანამ სირცხვილი იქნება, მანამდე რა უნდა გვეშველოს?!“ - აღნიშნულ საკითხზე მარინა კაჭარავამ რადიო ფორტუნას ეთერში ისაუბრა.

წყარო: ​რადიო ფორტუნა

არ დაგავიწყდეთ !!!

Momsedu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)

ძვირადღირებული საჩუქრების ინტენსიურად ჩუქების შემთხვევაში, არსებობს მუდმივ მოთხოვნილებაში...
სკოლის დამთავრების ან გამოცდების ჩაბარების შემდეგ ძვირადღირებული ნივთების ჩუქებით, ვუკარგავთ თუ არა მოტივაციას შვილებს, თვითონ მიაღწიონ მიზანს, ხომ არ წარმოადგენს ეს დამოუკიდებლობის შეზღუდვას? -...

შეიძლება დაინტერესდეთ

„ყველაზე მთავარი, რაც უნდა შეიცვალოს არის რეცეპტისა და დანიშნულების პოლიტიკა,“ - კონკურენციის ეროვნული სააგენტოს თავმჯდომარე ირაკლი ლიქვინაძე

„ყველაზე მთავარი, რაც უნდა შეიცვალოს არის რეცეპტისა და დანიშნულების პოლიტიკა,“ - კონკურენციის ეროვნული სააგენტოს თავმჯდომარე ირაკლი ლიქვინაძე

საქართველოს კონკურენციის ეროვნული სააგენტოს თავმჯდომარემ ირაკლი ლიქვინაძემ ფარმაცევტულ ბაზარზე ახალი წესების დამკვიდრების პროცესის შესახებ ისაუბრა:

„ჩვენს შუალედურ ანგარიშში წარმოდგენილია 11 რეკომენდაცია. ეს მნიშვნელოვნად გააჯანსაღებს, უფრო კონკურენტუნარიანს და გამჭვირვალეს გახდის ფარმაცევტულ ბაზარს. რამდენიმე მნიშვნელოვანი საკითხია. ბაზარზე გვაქვს რამდენიმე კომპანიის დომინანტური მდგომარეობა. მეორე არის ჰოლდინგური სისტემები. ჩვენთან არიან კომპანიები, რომლებსაც იმპორტის დონიდან დაწყებული, საცალო ქსელი, კლინიკები დაზღვევა, მსვილი ჰოლდინგული ჯგუფებია. ჩვენი დაკვირვებით ეს რგოლები უფრო მეტად კომერციული ინტერესის მატარებელია, ვიდრე მომხმარებლისთვის საუკეთესო გადაწყვეტილების მიმცემი. ისინი მომხმარებლებს ძირითადად საკუთარ პროდუქციას სთავაზობენ.“

ირაკლი ლიქვინაძის თქმით, მთავარი პრობლემა არსებული რეცეპტებისა და დანიშნულების პოლიტიკაა:

„ჩვენ ვხედავთ მთავარ პრობლემას და გვგონია, რომ ამ ნაწილის მოწესრიგებით უნდა დავიწყოთ. ეს არის დღეს არსებული რეცეპტისა და დანიშნულების პოლიტიკა. როდესაც ადამიანს დანიშნულებას აძლევენ, ძირითადად არის კონკრეტული მითითება კონკრეტულ მედიკამენტზე, რაც მოქალაქეს არ უტოვებს სხვა არჩევანს. ამ დანიშნულ მედიკამენტს გააჩნია ბევრი ჩამნაცვლებელი მედიკამენტი, რომელიც ფასით განსხვავებულია. პირობითად, ერთი დანიშნული მედიკამენტი თუ არის 50 ლარიანი, შეიძლება მისი ათლარიანი ჩამნაცვლებელი ბაზარზე რეალურად არსებობდეს და ჰქონდეს იგივე სამკურნალო ეფექტი.“

„აქ მნიშვნელოვანია ექიმის მიდგომის საკითხიც. ექიმს უნდა ჰქონდეს გარკვეული მკურნლობის პროტოკოლი და მისი მკურნალობის მეთოდებთან ეს უნდა იყოს თანხვედრაში. ერთ-ერთი ყველაზე მთავარი, რაც უნდა შეიცვალოს არის რეცეპტისა და დანიშნულების პოლიტიკა. ოთხ წელიწადში მხოლოდ ერთი ჯგუფის მედიკამენტიდან სამი კომპანიის მაგალითზე მოქალაქე დაზოგავდა 16 მილიონ ლარს, რომ ჰქონოდა არჩევანის საშუალება. რეცეპტი საქართველოში უნდა იყოს ელექტრონული, რაც უზრუნველყოფს მის გამჭვირვალობას და უზრუნველყოფს მაკონტროლებლის მხრიდან ეფექტურ კონტროლს ამ მხრივ. ეს რეცეპტი არ უნდა იყოს ერთ კონკრეტულ მედიკამენტზე ორიენტირებული. მასში უნდა იყოს რამდენიმე ალტერნატივა,“ - აღნიშნულ საკითხზე ირაკლი ლიქვინაძემ Euronews Georgia-ს ეთერში ისაუბრა.

წყარო:​ Euronews Georgia

წაიკითხეთ სრულად