Baby Bag

„თვალს რომ ვახელ, ვხვდები, რომ კიდევ ერთი საოცარი დღე იწყება,“ - ლელა მებურიშვილი შვილებთან ურთიერთობის შესახებ

მსახიობმა ლელა მებურიშვილმა „იმედის დღეში“ შვილებთან ურთიერთობის შესახებ ისაუბრა:

„ჩემი დილა ყოველთვის არაჩვეულებრივად იწყება. ჩემი შვილი დილით საწოლში გადმოიპარება, ზურგზე მაწვება, მეხუტება და მკოცნის. თვალს რომ ვახელ, ვხვდები, რომ კიდევ ერთი საოცარი დღე იწყება. ამაზე დიდი სიამოვნება, ალბათ, არ არსებობს. ბავშვების სიყვარული იმდენად საოცარი შეგრძნებაა, რომ ვფიქრობ, რაც უნდა ბევრი სირთულე იყოს, მათთან ურთიერთობა ამ ყველაფერს ერთ წამში ფარავს. პირველ რიგში რაც მინდა არის ის, რომ ბავშვები ბედნიერები იყვნენ. რა თქმა უნდა, მინდა, რომ იყვნენ წარმატებულები, ზრდილობიანები, როგორც ყველა დედას, მაგრამ პირველი მიზანი, რაც მაქვს, არის ის, რომ ბედნიერები იყვნენ. ურთულესია იმის მიხვედრა, რა აბედნიერებს ადამიანს, რა სიამოვნებს ან რა უნდა. ჩვენ ხშირად გვავიწყდება რა გვინდა. ვიცით, რომ უნდა ისწავლო, უნდა იმეცადინო, უნდა ჭამო, ბავშვს რა უნდა ეს არ უნდა დაგვავიწყდეს. მინდა შვილებს ვასწავლო იმის მიხვედრა, რა უნდათ თვითონ, რომ ცხოვრებისგან სიამოვნება მიიღონ.“

ლელა მებურიშვილის თქმით, ცხოვრებისეულ პრობლემებთან გამკლავების საუკეთესო გზა სულიერი სიმშვიდის შენარჩუნებაა:

„ჩემს ცხოვრებაში საუკეთესო რჩევა დიდი ხნის წინ მივიღე. ერთხელ ერთმა ადამიანმა თქვა, მთავარი სულიერი სიმშვიდეაო. ახლა, ამ რთულ დროს, განსაკუთრებით ვხვდები, რომ თუ შინაგანად ყველაფერი დალაგებული გაქვს და მშვიდად ხარ, ყველაფერს გაუმკლავდები. შეუძლებელია, რომ გარემო ყოველთვის დალაგებული იყოს. რაც უფრო მალე გააცნობიერებ, რომ შეიძლება არ გაგიმართლოს, რაღაც უსიამოვნო მოხდეს, მით უფრო მარტივია ცხოვრება. თუ შიგნიდან სიმშვიდე გაქვს, ამ ყველაფერს ერევი. უნდა ეცადო, რომ ყოველდღიურობაში ძალიან ბევრი დადებითი დაინახო.“

„სტრესისგან ძალიან მარტივად ვთავისუფლდები. ამაში ჩემს დიდ ოჯახთან ურთიერთობა მეხმარება. ცოტა ხნითაც რომ ვნახო ისინი, ძალიან სასიამოვნო ემოციებით ვიმუხტები ხოლმე,“ - აღნიშნა ლელა მებურიშვილმა. 

არ დაგავიწყდეთ !!!

Momsedu.ge-მ თქვენთვის, დედებისთვის შექმნა ახალი სივრცე. მოიწონეთ გვერდი მცოდნე ​დედები

შეიძლება დაინტერესდეთ

„ჩვილის აღზრდას რა უნდა?! სამი წლის ბავშვსაც მოუვლი ადვილად, ექვსისასაც მოუვლი, მაგრამ როგორ გართულდება აღზრდა, როდესაც ბავშვი მოწიფულობაში შედის,“ - შალვა ამონაშვილი

„ჩვილის აღზრდას რა უნდა?! სამი წლის ბავშვსაც მოუვლი ადვილად, ექვსისასაც მოუვლი, მაგრამ როგორ გართულდება აღზრდა, როდესაც ბავშვი მოწიფულობაში შედის,“ - შალვა ამონაშვილი

აკადემიკოსმა შალვა ამონაშვილმა იმ შეცდომების შესახებ ისაუბრა, რომელსაც შვილის აღზრდისას ვუშვებთ და თანამედროვე სამყაროში მშობლების წინაშე არსებულ სირთულეებს გაუსვა ხაზი:

„ჩვენ არ ვიცით ცხოვრება საით მიაქანებს ჩვენს შვილს. არასოდეს არ ყოფილა იმდენი ნარკომანი მსოფლიოში, რამდენიც ახლაა. არასოდეს არ ყოფილა იმდენი მწეველი, რამდენიც ახლაა. სუიციდები, რაც ახლა არის არასდროს არ ყოფილა მსოფლიოში და საქართველოში მით უმეტეს. რატომ გამრავლდა ეს ყველაფერი?! ბავშვები გახდნენ ასეთები? გარემო შეიცვალა? დიახ, შეიცვალა, მაგრამ​ ჩვენ არ შევიცვალეთ, ავტორიტარები დავრჩით ავტორიტარებად.“

შალვა ამონაშვილის თქმით, ბავშვი მშობლების ტყვეობაში იმყოფება და გარკვეულ ასაკში ამ ტყვეობისგან გათავისუფლებას ცდილობს:

„გამოდის, რომ ბავშვი იმპერიალისტთა ტყვეობაში იმყოფება. ეს იმპერიალისტები ჩვენ ვართ, მშობლები. ​ამ ტყვეობას ბავშვი გაუძლებს, ვიდრე ხუთი წლისაა, შვიდი წლისაა, მაგრამ ვეღარ გაუძლებს, როდესაც ცხრა და თორმეტი წლის გახდება. იქ იწყება ჩვენი აღზრდის პრობლემებიც.“

„ჩვილის აღზრდას რა უნდა?! სამი წლის ბავშვსაც მოუვლი ადვილად, ექვსისასაც მოუვლი, მაგრამ როგორ გართულდება აღზრდა, როდესაც ბავშვი მოწიფულობაში შედის. ერთი მეთოდი არის, რომ ვიმეგობროთ ბავშვთან. უნდა უთხრა შვილს: „შვილო, ჩემს სამსახურში იცი რა ხდება, კაცო? ასეთ გაჭირვებაში ვარ. არ ვიცი რა ვქნა, იქნებ შენ მიშველო...“ ბავშვს უნდა დაანახო, რომ ის შენი მეგობარია და იმის რჩევა გჭირდება,"- აღნიშნა შალვა ამონაშვილმა.

წყარო: ​„ამონაშვილის აკადემია“

წაიკითხეთ სრულად