Baby Bag

„სკოლაშიც დადიოდა და გაკვეთილებსაც ესწრებოდა, ყველაფერს ასრულებდა, რაც ევალებოდა,“ – 29 წლის სოფლის რწმუნებული, რომელიც ჯერ კიდევ სკოლის მოსწავლეა

კასრისწყლის სკოლის დირექტორი ნანუკას შოუში სოფლის რწმუნებულის შესახებ საინტერესო ამბავს გვიყვება. გიორგი ბუღრიძე აცხადებს, რომ რწმუნებული მისი სკოლის მოსწავლეა:

„ამბავი არის ასეთი, რომ შარშან ზაფხულში განცხადების საფუძველზე ჩავრიცხეთ სკოლაში 29 წლის მოსწავლე. მას 9 კლასი ჰქონდა დამთავრებული, ამიტომ ჩვენ კანონი გვაძლევდა იმის უფლებას, რომ მისთვის მოსწავლის სტატუსი აღგვედგინა და აღვადგინეთ კიდევაც. იმ პერიოდისთვის ის რწმუნებული არ იყო. რწმუნებულად დაინიშნა წელს, 2020 წლიდან, როდესაც მიმდინარეობდა ექსტერნები. შარშან ჩვენ ის მეათე კლასში ჩავრიცხეთ. მისი მოთხოვნით მოვახერხეთ კლასის დონის ექსტერნებით დაძლევა. მან მეათე-მეთერთმეტე კლასის პროგრამა დაძლია.“

სკოლის დირექტორის თქმით, რწმუნებულად დანიშვნის დროს რწმუნებული მეათე კლასის მოსწავლე იყო:

„ის ჯერ კიდევ მეათე კლასში იყო, როდესაც სოფლის რწმუნებულად დაინიშნა. სწორედ ამ პერიოდში მოხდა ექსტერნების საშუალებით კლასის დაძლევა. რწმუნებული გაკვეთილებსაც ესწრებოდა და სკოლაშიც დადიოდა. რა თქმა უნდა, გაცდენები ჰქონდა, მაგრამ ძირითადად მაინც დადიოდა სკოლაში. ის ექსტერნებზეც გამოცხადდა და ყველაფერს ასრულებდა, რაც სკოლაში ევალებოდა.“

გიორგი ბუღრიძის განცხადებით, სოფლის რწმუნებულის მეუღლეც მისი სკოლის მოსწავლეა:

„რწმუნებულის მეუღლის ასაკი ზუსტად არ ვიცი. ალბათ, 28-29 წლის იქნება. ის ამჟამად მეათე კლასში ირიცხება, წელს დაასრულებს და მეთერთმეტეში გადავა. როგორც მოსწავლეს მას დადებითად ვაფასებ, ნამდვილად არ შემიძლია, რომ უარყოფითად შევაფასო. ჩვენ სკოლაში გვყავდა 37 წლის მოსწავლეც, რომელმაც 8 საგანი ჩააბარა. ჩვენს სოფელს ისეთი გეოგრაფიული მდებარეობა აქვს, რომ იქ სწავლა-განათლების მიღება ჭირდა, აქედან გამომდინარე დღეს ჩვენ დიდი გამოწვევის წინაშე აღმოვჩნდით ამ საკითხთან მიმართებაში. ჩვენ უნდა ვიამაყოთ, როდესაც ადამიანი ამ ასაკში აბარებს გამოცდებს. ყველა გამოცდას ჩვენთან სამინისტროდან ჩამოსული დამკვირვებელი ესწრებოდა.“

„ჩვენთან სწავლობს რწმუნებულის ცოლისდაც, რომელიც მეათე კლასშია.“ - აღნიშნავს კასრისწყლის სკოლის დირექტორი. გიორგი ბუღრიძის თქმით, მოსწავლეებს რწმუნებულის და სხვა უფროსი ასაკის თანაკლასელებისადმი ძალიან დადებითი დამოკიდებულება აქვთ. ბავშვები აღნიშნულ ფაქტს ჩვეულებრივ მოვლენად აღიქვამენ. 

შეიძლება დაინტერესდეთ

„თუ შეგიძლიათ, გთხოვთ, ერთი წუთი ამ ვიდეოს ყურებას დაუთმეთ,“ - ანჯელინა ჯოლი უკრაინელი დედის შესახებ ვიდეოს აქვეყნებს

„თუ შეგიძლიათ, გთხოვთ, ერთი წუთი ამ ვიდეოს ყურებას დაუთმეთ,“ - ანჯელინა ჯოლი უკრაინელი დედის შესახებ ვიდეოს აქვეყნებს

ცნობილი მსახიობი ანჯელინა ჯოლი სოციალურ ქსელში პოსტს აქვეყნებს, სადაც ყველას მოუწოდებს უკრაინელი დედის შესახებ გადაღებული ვიდეორგოლის ყურებას ერთი წუთი დაუთმონ:

„თუ შეგიძლიათ, გთხოვთ, ერთი წუთი ამ ვიდეოს ყურებას დაუთმეთ, რომელიც Unicef-მა გამიზიარა უკრაინელი დედის მარინას შესახებ. დაბომბვისა და თავდასხმის შიშის ფონზე ის თავისი შვილების უსაფრთხოებისთვის იბრძვის.

ეს არის ომის შედეგად იძულებით გადაადგილებული და ხაფანგში გაბმული მშვიდობიანი მოქალაქეების რეალობა. მათ შორის არის დაახლოებით 7,5 მილიონი უკრაინელი ბავშვი, მათი ოჯახები, მშობლები, ლტოლვილები ავღანეთიდან, იემენიდან, სირიიდან. ისინი გაიქცნენ უკრაინაში და ახლა იქიდანაც ასახლებენ. იქ იმყოფებიან ასევე სტუდენტები ინდოეთიდან და აფრიკის ქვეყნებიდან.

უკრაინაში მშვიდობიან მოსახლეობას დაუყოვნებლივ ესაჭიროება დახმარებისა და მარაგების მიწოდების უზრუნველყოფა. UNICEF და UNHCR, ასევე პარტნიორები ბევრს მუშაობენ იმისთვის, რომ გაჭირვებულ ადამიანებს, რომლებსაც დახმარება ესაჭიროებათ, დაეხმარონ იქ, სადაც ეს შესაძლებელია,“ - წერს ანჯელინა ჯოლი.

​წყარო

წაიკითხეთ სრულად