Baby Bag

„ვინმეს თუ ჰგონია, რომ დიასახლისის საქმე საქმე არ არის, ძალიან ცდება... მე დიასახლისობა პროფესიად მიმაჩნია,“- ნანა ლორთქიფანიძე დიასახლისების მძიმე შრომის შესახებ

ცნობილმა მსახიობმა ნანა ლორთქიფანიძემ დიასახლისების მძიმე შრომის შესახებ ისაუბრა და აღნიშნა, რომ ის დიასახლისობას პროფესიად თვლის, რომელსაც უდიდესი ენერგია სჭირდება. ქალბატონი ნანას თქმით, ის ოჯახის წევრებს ძალიან ანებივრებს და სხვაგვარად მოქცევა არ შეუძლია:

„აქ მოსვლამდე უკვე სახლში სამნაირი სადილის გაკეთება მოვასწარი. რატომ სამი? იმიტომ, რომ ერთს არ უყვარს წვნიანი, მეორეს არ უყვარს ხორციანი, მესამეს არ უყვარს ხახვიანი და მეც მათ გემოვნებას და მოთხოვნებს ვერგები რაღაცნაირად. იმ დიასახლისებს, რომლებიც მუშაობენ, ძალიან დაკავებულები არიან, სახლშიც უამრავი საქმე აქვთ გასაკეთებელი. მე განსაკუთრებით ვუთანაგრძნობ იმ დიასახლისებს, რომლებიც არ მუშაობენ, სულ სახლში არიან და სულ საოჯახო საქმეებით არიან დაკავებულები. რა ხდება ამ დროს? თუ ქალი სულ სახლშია, საქმე არასდროს არ თავდება.

ვინმეს თუ ჰგონია, რომ დიასახლისის საქმე საქმე არ არის, ძალიან ცდება. მე პირადად დიასახლისობა პროფესიად მიმაჩნია, რომელსაც სჭირდება ძალიან დიდი ენერგია, თავდადება, შრომა და დრო.

ჩვენ თვითონ ვანებივრებთ და ვაჩვევთ ამას ჩვენს ოჯახის წევრებს. მე პირადად უკვე ყველაფერს ვაკეთებ ავტომატურად. აი, მაგალითად, ერთი შვილიშვილი დამიძახებს ერთი ოთახიდან: „ბე, წყალი მომიტანე რა...“ გავქროლდები და მივუტან. მერე მეორე დამიძახებს: „რამე ტკბილი არ გვაქვს?“ გავქროლდები და მივუტან. თუ არ გვაქვს, ჩავირბენ მაღაზიაში და ამოვუცუნცულებ რამეს. მე თვითონ არ შემიძლია, რომ არ გავაკეთო. თვითონ ვარ ასეთი,“- მოცემულ საკითხზე ნანა ლორთქიფანიძემ ტელეკომპანია „იმედის“ გადაცემაში „იმედის დღე“ ისაუბრა.

წყარო:​ „იმედის დღე“

შეიძლება დაინტერესდეთ

„თითოეულ ქალში დედა ღვთისმშობელია... ყველა ქალი უნდა ემსგავსოს დედა ღვთისმშობელს,“- დეკანოზი შალვა კეკელია

„თითოეულ ქალში დედა ღვთისმშობელია... ყველა ქალი უნდა ემსგავსოს დედა ღვთისმშობელს,“- დეკანოზი შალვა კეკელია

დეკანოზმა შალვა კეკელიამ ხარების დღესასწაულის მნიშვნელობაზე ისაუბრა და აღნიშნა, რომ დღევანდელი დღე ქალების დღესასწაულია:

„დღეს არის ქალების დღესასწაული. ქალებისთვის განსაკუთრებული დღეა დღევანდელი დღე. დღეს რომ არა დედა ღვთისმშობლისგან მიღება ამ სიწმინდისა, ჩვენ არ გვექნებოდა არავის. როგორც ევასგან შემოვიდა სიკვდილი, როგორც ევასგან გამოძევდნენ ადამიანები სამოთხიდან, დედა ღვთისმშობლისგან, როგორც მეორე ევასგან, განახლებული ევასგან, შემოვიდა სიცოცხლე, სიცოცხლის წყარო. „გიხაროდენ! ღმერთმა გაგახაროს!“ - ამაზე ძვირფასი სიტყვა არ არსებობს. დილით რომ იღვიძებ ადამიანი, გახარებულმა უნდა გაიღვიძო. ყველა დღე ხარება უნდა იყოს ადამიანისთვის. წარმოიდგინეთ, ქალებისთვის ეს დღე რამდენად მნიშვნელოვანია.“

„რამხელა მნიშვნელობა აქვს ქალს, როგორია ქალი, რამხელა სიწმინდეა ქალი. თითოეულ ქალში დედა ღვთისმშობელია. როგორც დედა ღვთისმშობელს ეხარა, რომ მაცხოვარი ჩაისახა, ასევე ყველა ქალს ამის საოცარი სიხარული აქვს, რომ მან შეიძლება შვილი გააჩინოს. მიეცეს სიხარული, რომ ჩაისახა ბავშვი, ეხარა, ამაზე დიდი სიხარული რა უნდა იყოს?! ყველა ქალი უნდა ემსგავსოს დედა ღვთისმშობელს. წმინდა გაბრიელ ქიქოძე ამბობდა, რომ ქალს აქვს საოცარი თვისებები. ქალს აქვს გრძნობა, გულიდან გამოდის ქალი. კაცი გონებიდან გამოდის. ქალს აქვს ერთი ძვირფასი თვისება, რის გამოც ქალი გახდა დედა და კაცს არ ჩაბარდა შვილის გაჩენა. ქალს აქვს მზრუნველობის უნარი. საოცარი მზრუნველობაა ქალში, დედური განცდაა ქალში. ქალს საკუთარი თავისთვის ცხოვრება არ შეუძლია. ქალს შეუძლია მთელი არსებით იცხოვროს შვილისთვის. მთელი ცხოვრება მიუძღვნას შვილებს, მშობლებს, მეუღლეს, ყველას, ამაზე ძვირფასი თვისება არ არსებობს,“- აღნიშნა მამა შალვა კეკელიამ.

წყარო: ​თბილისის ვაკის მაცხოვრის ფერიცვალების სახელობის ტაძარი

წაიკითხეთ სრულად