Baby Bag

„მარტო განათლება არ უზრუნველყოფს წარმატებას ცხოვრებაში... ადამიანი უნდა იყოს შეიარაღებული შესაბამისი უნარებით,“- გია მურღულია

ფილოლოგმა გია მურღულიამ წარმატების მისაღწევად აუცილებელი უნარები დაასახელა:

„ყველა კვლევით დადასტურებულია, რომ მარტო განათლება არ უზრუნველყოფს წარმატებას ცხოვრებაში. ჩვენ ვიცნობთ ბევრ ადამიანს, რომელიც არის ძალიან განათლებული, მაგრამ ძალიან წარუმატებელი. ადამიანი უნდა იყოს შეიარაღებული შესაბამისი უნარებით. რა უნარებია ეს? ნებისყოფა, შეუპოვრობა, მიზანსწრაფვა, ალგორითმის გააზრების უნარი, დროის შეგრძნებისა და გაფრთხილების უნარი. ეს არსებითია, ეს უნდა ისწავლებოდეს ყველა სკოლაში.

მე ვეკითხები ხოლმე სკოლის დირექტორებს: „რას აკეთებთ თქვენს სკოლაში საიმისოდ, რომ ბავშვებში ეს უნარები ჩამოაყალიბოთ?“ უხერხულად ეღიმებათ, იმიტომ, რომ ბევრი არაფერი კეთდება ჩვენს სკოლებში ამისთვის. ბავშვებში ამ უნარების ჩამოყალიბება არის ლამის გადამწყვეტი მნიშვნელობის ფაქტორი. ხშირად უნდა მისცე ბავშვს ისეთი დავალება, რომელიც მას აიძულებს, რომ მართებულად გადაანაწილოს დრო, სხვაგვარად ის ვერ მოახერხებს ამ დავალების შესრულებას. დავალება უნდა იყოს მრავალკომპონენტიანი. რაც ბუნებითად მოგდგამს ეს ერთია, მაგრამ რასაც სკოლა და ოჯახი უნდა გაძლევდეს, ეს მეორეა. ორივემ უნდა იცოდეს, როგორ გააკეთოს ეს,“- მოცემულ საკითხზე გია მურღულიამ საქართველოს პირველი არხის გადაცემაში „წითელი სკამი“ ისაუბრა.

წყარო: ​„წითელი სკამი“


შეიძლება დაინტერესდეთ

„სიყვარულისა და სიმკაცრის ერთდროული მოცემულობა უნდა მოვახერხოთ მოზარდთან ურთიერთობაში,“ - ფსიქოლოგი ნანა ჩაჩუა

„სიყვარულისა და სიმკაცრის ერთდროული მოცემულობა უნდა მოვახერხოთ მოზარდთან ურთიერთობაში,“ - ფსიქოლოგი ნანა ჩაჩუა

ფსიქოლოგმა ნანა ჩაჩუამ მოზარდთან ურთიერთობაში სიყვარულისა და სიმკაცრის ერთდროული გამოყენების მნიშვნელობაზე ისაუბრა:

„სიყვარულისა და სიმკაცრის ერთდროული მოცემულობა უნდა მოვახერხოთ მოზარდთან ურთიერთობაში. თუ მშობელი დაკავებულია, სამსახურში დადის, აქ ნაკლებად ​განიცდება ბავშვის მიერ მშობლის უყურადღებობა. მოზარდი ყოველთვის გრძნობს, რომ შეიძლება მშობელი სადღაც იყოს, მაგრამ მისი სიყვარული რაღაც ფორმით მოედინება მისკენ. მშობლების ნაწილი არის ასე, განსაკუთრებით თბილისში, ბავშვები დგებიან სკოლაში წასასვლელად და დედას ისევ სძინავს. დედა რომ მძინარე ბავშვს ხელს შეახებს, ტაქტილური შეხებით რომ სითბოს აგრძნობინებს, საწოლთან ჩამოუჯდება, ეს იმხელა სითბოა. ამ სითბოს გარეშე ცხოვრებაში გასული ადამიანი სულ ეძებს ამ დაკარგული სითბოს მიღებას, მაგრამ ამ დაკარგულ სითბოს ვერსად ვერ იპოვი.“

ნანა ჩაჩუას თქმით, სიმკაცრე თანმიმდევრულობასა და პრინციპულობაშია:

„სიმკაცრე თანმიმდევრულობაში, პრინციპულობაშია. თუ ბავშვს რაღაც აქვს გასაკეთებელი და ჩვენ იქ თანმიმდევრულები ვართ, თუ იქ პრინციპულობას ვიჩენთ, თუ ჩვენი ცხოვრების წესში თავად პრინციპულობაა, ეს არის სიყვარულისადმი, ღირებულებებისადმი, ჩემი ცხოვრების წესისადმი ერთგულება, სადაც მე მკაცრი ვარ და იქიდან არ გადავუხვევ. სიმკაცრე არ არის სისასტიკე, ცხადია.​ სიმკაცრე და სისასტიკე განსხვავებულია. სიყვარული სიმკაცრეში აისახება და სიმკაცრე სიყვარულში აისახება, როდესაც მე ძირითადიდან, არსებითიდან არ გადავუხვევ.“

„სიყვარული არ არის „გენაცვალე, კარგი, შვილო.“ თუ სიყვარული და სიმკაცრე ერთმანეთთან მივა, ეს არის ის, რაზედაც დავით გურამიშვილი ლაპარაკობდა. მთავარი არის მშობლის ცხოვრების წესი. ეს არის ხმამაღლა სათქმელი დედების მიმართ. არაჩვეულებრივად პოულობენ გამოსავალს: „დეპრესიული ვარ, იმაზე გავბრაზდი“ და ა.შ. ​ბავშვმა უნდა იგრძნოს, რომ მისთვის რაღაც არის გაღებული. გაღებულია ის, რომ მე დაღლილი ვარ და მაინც ამას ვაკეთებ. არავითარ შემთხვევაში არ უნდა ითქვას ის, რომ მე შენ გამო ვაკეთებ,“ - აღნიშნულ საკითხებზე ნანა ჩაჩუამ „ქართული არხის“ ეთერში ისაუბრა.

წყარო: ​„ქართული არხი“

წაიკითხეთ სრულად