Baby Bag

„კვირას გავხსნით უფასო მაღაზიას, საიდანაც ადამიანები, რომლებსაც ყველაზე მეტად უჭირთ საკვებს უფასოდ წაიღებენ,“- დეკანოზი შალვა კეკელია

„კვირას გავხსნით უფასო მაღაზიას, საიდანაც ადამიანები, რომლებსაც ყველაზე მეტად უჭირთ საკვებს უფასოდ წაიღებენ,“- დეკანოზი შალვა კეკელია

დეკანოზმა შალვა კეკელიამ თბილისის ვაკის მაცხოვრის ფერიცვალების სახელობის ტაძრის Facebook გვერდის ონლაინ ჩართვაში ჭავჭავაძის 33 ნომერში, ეკლესიის ეზოში კვირიდან უფასო მაღაზიის გახსნის შესახებ ისაუბრა. მისი თქმით, მოქალაქეები, რომლებსაც ძალიან უჭირთ მაღაზიიდან პროდუქტებს და ტანსაცმელს უფასოდ მიიღებენ:

„კვირიდან ვაპირებთ, რომ უფასო მაღაზია გავხსნათ. ახალ ზელანდიაში 2010 წელს დაწესდა ეს წესი, როდესაც მოსახლეობამ გადაწყვიტა უფასო მაღაზია გაეხსნათ. ადამიანებს იქ მიაქვთ საკვები, ტანსაცმელი. ადამიანებს, რომლებსაც ეს სჭირდებათ, უნაწილდებათ. ეს უმნიშვნელოვანესი პროექტია. კვირას 11 საათზე გავხსნით ამ მაღაზიას. ჩვენი მრევლის წევრი თამარი დადგება და დაურიგებს ადამიანებს საკვებს, ტანსაცმელს.

ადამიანები მოიტანენ უფუჭებელ საკვებს, მაკარონს, ზეთს. იმ ადამიანებს, ვისაც ძალიან უჭირთ, მოვლენ და წაიღებენ აქედან პროდუქტებს და ტანსაცმელს. ის ადამიანები, ვისაც აქვს შესაძლებლობა, მოიტანენ პროდუქტებს და ტანსაცმელს. თქვენი დახმარება ძალიან დაგვჭირდება. გვინდა, რომ ეს მარტო ჩვენს ტაძრში არ იყოს. გვინდა, რომ ეს უფასო მაღაზიები ქალაქის ყველა უბანში გაიხსნას, საქართველოს ყველა კუთხეში, ყველა რეგიონში გაიხსნას. ადამიანები, რომლებსაც აქვთ საშუალება, რომ ადამიანებს შეეწიონ, დაეხმარონ მათ და ადამიანებმა, რომლებსაც ყველაზე მეტად უჭირთ, მოვიდნენ და ეს ყველაფერი წაიღონ აქედან. თითოეული თქვენგანის მონაწილეობა ძალიან მნიშვნელოვანი იქნება ამ საქმეში,“- აღნიშნა მამა შალვა კეკელიამ.

წყარო: ​თბილისის ვაკის მაცხოვრის ფერისცვალების სახელობის ტაძარი

შეიძლება დაინტერესდეთ

„მე მიყვარს ძილის წინ აღზრდის პედაგოგიკა, ეს იშვიათი მომენტია...“- შალვა ამონაშვილი

„მე მიყვარს ძილის წინ აღზრდის პედაგოგიკა, ეს იშვიათი მომენტია...“- შალვა ამონაშვილი

აკადემიკოსმა შალვა ამონაშვილმა ბავშვებს შორის კონფლიქტის აცილების გზებზე ისაუბრა და მშობლებს საინტერესო რჩევები მისცა:

„პირველ რიგში, ვურჩევდი, რომ მშობელმა ბავშვები ერთმანეთს არ შეადაროს. ვინ უფრო გააკეთა, ვინ ვერ გააკეთა, ვინ ვის უნდა დაუთმოს, ეს შეფასებები ბავშვებს არ უნდა გავუკეთოთ ჩვენ. არ ივარგებს დიდს ვთხოვოთ, რომ სულ დაუთმოს. პატარას კი უნდა ვთხოვოთ, რომ მოუსმინოს უფროსს, უფროსია ის, იცის რაღაცები. დიდი უნდა გამოვიყენოთ ჩვენ პატარას აღზრდაში. ცალკე უნდა ესაუბროთ უფროსს. უნდა უთხრათ: „ის ჯერ გამოუცდელია, შენ დიდი ხარ. შენ ეს იცი, ის იცი. დაგვეხმარე, რომ ჩვენ ეს პატარა აღვზარდოთ.“ ნელ-ნელა ვასწავლოთ, როგორ დაგვეხმაროს, ყურადღებიანი იყოს, დამთმობი იყოს, დაიცვას ის, ეთამაშოს მას.

„თუ უფროსს გამოუვა და კარგი გამოუვა უმცროსის მიმართ, უნდა გავაზვიადოთ და უთუოდ მადლობა ვუთხრათ უფროსს. მადლობა ვუთხრათ ძილის წინ. მე მიყვარს ძილის წინ აღზრდის პედაგოგიკა. ეს იშვიათი მომენტია ძილის წინ დასარიგებლად, გზაზე დასაყენებლად, მადლობის გადასახდელად, რაღაცის თხოვნა რომ გვინდა ბავშვისთვის. ძილის წინ მიუჯდეს დედა, მამა, უთხრას ბავშვს: „შვილო, მადლობა, რომ დღეს ასე დაგვეხმარე. მადლობა, რომ კარგად მოექეცი შენს ძმას, დიდი მადლობლები ვართ ამისთვის.“ მშობელმა უნდა დაარწმუნოს, რომ მან რაღაც გააკეთა. ეს მისი თვითშეფასება იქნება. პატარასაც თავისი უნდა ვუთხრათ, რომ გაუგონა, დაუჯერა უფროსს. ეს კარგი იყო ძალიან. მადლობა გამოუცხადეთ ბავშვს,“- აღნიშნა შალვა ამონაშვილმა.

წყარო: ​ამონაშვილის აკადემია

წაიკითხეთ სრულად