Baby Bag

„არაფრის არ გრცხვენოდეს, უზრდელი იყო და მარტო სექსზე ლაპარაკობდე, როგორ ფიქრობთ, ეს არის თავისუფლება?“- ფსიქოლოგი ზურა მხეიძე

„არაფრის არ გრცხვენოდეს, უზრდელი იყო და მარტო სექსზე ლაპარაკობდე, როგორ ფიქრობთ, ეს არის თავისუფლება?“- ფსიქოლოგი ზურა მხეიძე

ფსიქოლოგმა ზურა მხეიძემ საქართველოში თავისუფლების არასწორი გაგების პრობლემაზე ისაუბრა და აღნიშნა, რომ თავისუფალ ქცევად ხშირად ისეთი ქცევები აღიქმება, რომლებსაც თავისუფლებასთან არანაირი კავშირი არ აქვს:

„თავისუფლებასთან და თავისუფალ ქცევასთან დაკავშირებით ითვლება, რომ მე თუ ეტიკეტს ვიცავ, არათავისუფალი ტიპი ვარ. ჩვენთან თავისუფლებას ცოტა სხვა ინდიკატორები აქვს. რომ გაჩვენოთ, რომ თავისუფალი ვარ, რამოდენიმე რაღაც უნდა გავაკეთო: უნდა შემეძლოს ბილწსიტყვაობა, არაფრის არ უნდა მრცხვენოდეს, უნდა შემეძლოს დიდხანს სექსზე საუბარი. ეს არის ინდიკატორები, რომლებსაც არანაირი კავშირი არ აქვს თავისუფლებასთან. რომ აჩვენონ, რომ თავისუფლები არიან, ასე იქცევიან.

სიმორცხვე ადამიანის ჩვეულებრივი და ძალიან კარგი თვისებაა. ჩემს ძაღლსაც რცხვენია რაღაცას რომ დააშავებს ხოლმე. არაფრის არ გრცხვენოდეს, უზრდელი იყო და მარტო სექსზე ლაპარაკობდე, როგორ ფიქრობთ, ეს არის თავისუფლება? შენ შეგიძლია ეტიკეტიც დაიცვა, ზრდილობიანიც იყო და შენზე თავისუფალი არავინ არ იყოს. არ სჭირდება თავისუფლებას მტკიცებითი ფორმა და დემონსტრირება, რომ თავისუფალი ხარ,“- მოცემულ საკითხზე ზურა მხეიძემ „საზოგადოებრივი რადიოს“ ეთერში ისაუბრა.

წყარო:​ „საზოგადოებრივი რადიო“

შეიძლება დაინტერესდეთ

„თუ თქვენ ფიქრობთ, რომ ლობიო ჩვეულებრივი საკვებია, ძალიან ცდებით,“ - გიორგი ღოღობერიძე ლობიოს 5 სასარგებლო თვისების შესახებ

ექიმმა გიორგი ღოღობერიძემ „მთავარი არხის“ გადაცემაში „მთავარი დიაგნოზი“ ლობიოს შესახებ 5 სასარგებლო ფაქტზე ისაუბრა:

„თუ თქვენ ფიქრობთ, რომ ლობიო ჩვეულებრივი საკვებია, ძალიან ცდებით. 100 გრამი ლობიო რომ ავიღოთ, აქედან 10 გრამი ცილაა. ლობიო არის ცილოვანი საკვები. ერთი ცუდი თვისება აქვს ლობიოს. სამწუხაროდ, ის არ შეიცავს ცხრავე ესენციურ ამინომჟავას, რომელიც უნდა მივიღოთ გარედან. თქვენ შეგიძლიათ ეს მარტივად გამოასწოროთ, თუ ლობიოს მომზადების დროს კერძს დაამატებთ ნიგოზს. ამ შემთხვევაში ლობიო იქნება იდეალური, სრულფასოვანი ცილოვანი საკვები.

ლობიოში ბევრი ფოლიუმის მჟავაა, რომელიც ახდენს ჩვენს ორგანიზმში უჯრედების წარმოქმნას. ლობიოში ბლომად გვაქვს რკინაც. თუ ჩვენ ვსაუბრობთ მოზარდზე, მისი სხეული რადგან იზრდება, რკინაზე მოთხოვნილება მეტი აქვს. თუ ვსაუბრობთ ასაკოვან ადამიანზე, მის ორგანიზმში რკინის ათვისება ძნელდება. თუ საქმე ეხება საკვებს, რომელიც რკინას შეიცავს, ერთ-ერთი იქნება ლობიო.

ლობიოში დიდი რაოდენობით არის რთული ნახშირწყლები. ისინი ეხმარებიან ჩვენს ნაწლავებს სწორ პერისტალტიკაში, აყალიბებენ სწორ ბაქტერიულ ფლორას, ორგანიზმში შეიწოვებიან ეტაპობრივად. ლობიოში ძალიან ბევრი ანტიოქსიდანტია. სწორედ ისინი გვიცავენ ჩვენ ჟანგბადის თავისუფალი რადიკალებისგან.

სამწუხაროდ, ლობიოში არის ორი მავნე ნივთიერება. ერთ-ერთი არის ფიტის მჟავა, რომელიც ორგანიზმში D ვიტამინის ცვლას არღვევს. თუ თქვენ D ვიტამინი გაკლიათ, ლობიოს ყოველდღიურად მიღება არ არის რეკომენდებული. ლობიოში კიდევ არის ერთი მავნე ნივთიერება, ლექტინი, რომელიც ტოქსინებს მიეკუთვნება.

როგორ მოიქცე ისე, რომ შენ ლობიოსგან მხოლოდ კარგი მიიღო და ცუდი არაფერი დაგრჩეს? ლობიო შეძენის შემდეგ ძალიან კარგად გარეცხეთ და თუ მასში ერთი გაფუჭებული მარცვალი მაინც არის, მოაშორეთ. ხომ ვიცი, ზოგიერთი დატოვებს იმ მარცვალს, არაუშავს, ერთი ცალიაო. არა, ის ერთი გაფუჭებული მარცვალიც უნდა მოაშორო! როდესაც ლობიოს მომზადებას დააპირებ, მთელი ღამე გააჩერე, ამგვარად მასში არსებული ანტინუტრიენტები გამოილექება. ეს წყალი გადაღვარე. როდესაც ლობიო მოიხარშება, კიდევ ადუღე. დუღილის ტემპერატურაზე ამყოფე 10 წუთის განმავლობაში. ეს მასში არსებულ ტოქსინებს ბოლომდე დაშლის,“- აღნიშნა გიორგი ღოღობერიძემ.

წყარო: ​„მთავარი დიაგნოზი“ 

წაიკითხეთ სრულად