Baby Bag

„ასეთი ტილო არამხოლოდ არ წმენდს სრულყოფილად ზედაპირს, არამედ ჯვარედინი დაბინძურების რისკსაც ზრდის,“ - მარიამ ჩაჩუას რეკომენდაციები

„ასეთი ტილო არამხოლოდ არ წმენდს სრულყოფილად ზედაპირს, არამედ ჯვარედინი დაბინძურების რისკსაც ზრდის,“ - მარიამ ჩაჩუას რეკომენდაციები

სურსათის უვნებლობის სპეციალისტმა მარიამ ჩაჩუამ სამზარეულოს ჯვარედინი დაბინძურების საფრთხეებზე ისაუბრა:

„ბაქტერიები ძალიან გავრცელებულია. პათოგენური მიკროორგანიზმები არამხოლოდ ჩვენს სუფრაზე შეიძლება მოხვდნენ, არამედ საკვებშიც. იქიდან გამომდინარე, რომ ნიადაგშიც ვხვდებით მათ, ჰაერშიც და წყალშიც, ძალიან მარტივია, რომ ამ გზით ისინი მოხვდნენ ჩვენს სამზარეულოშიც, განსაკუთრებით მაშინ, როდესაც ვამუშავებთ ხილს, ბოსტნეულს, რომელსაც მიწა მოჰყვება, ცხოველურ პროდუქტებს, მაგალითად, სისხლიან ხორცს, თევზს, ქათამს, კვერცხს. ძალიან მნიშვნელოვანია, რომ დამუშავების შემდეგ აუცილებლად გავასუფთავოთ სამზარეულო, მხოლოდ დეზინფექციის გზით და არა ტილოების საშუალებით.

ტილო არამხოლოდ არ წმენდს სრულყოფილად ზედაპირს, არამედ ჯვარედინი დაბინძურების რისკსაც ზრდის. ასეთი მოსუფთავების დროს, ზედაპირიც არ არის სრულყოფილად სუფთა, იმიტომ, რომ მას დეზინფექცია სჭირდება. 60%-იანი სპირტის შემცველი ხსნარი მიღებული ფორმაა სურსათის უვნებლობის სფეროში. ერთი წუთიც საკმარისია, რომ გავაჩეროთ. 60%-იანი სპირტის შემცველობა ნებისმიერ მიკრობს ანადგურებს. ძალიან მნიშვნელოვანია ამის გამოყენება, მით უმეტეს, თუ ცხოველურ პროდუქტს ვამუშავებთ. ჯვარედინი დაბინძურება ძალიან სახიფათოა ამ შემთხვევაში. ამ ტილოთი თუ გავწმინდე ზედაპირი, რომელზეც ხორცი დავამუშავე, შემდეგ კი ტილო გავრეცხე, ის არ არის მაინც სუფთა. ამ ტილოთი თუ მაგიდას გადავწმენდთ, იქ შეიძლება მოხვდეს ისეთი პროდუქტი, რომელსაც თერმულად არ ვამუშავებთ, მაგალითად, ბოსტნეული, ხილი. ცხოველური პროდუქტისგან მიღებული მიკროორგანიზმი ტილოთი გადავიტანე ისეთ ადგილას, საიდანაც ის ჩემს ორგანიზმში მარტივად მოხვდება. მას შემდეგ რაც დეზინფექციას გავუკეთებთ ზედაპირს, კარგი იქნება, თუ ხაოიან ტილოს გამოიყენებთ. პირველ რიგში, გაწმენდისას ერთჯერადი ხელსახოცი უნდა გამოვიყენოთ, რომელსაც ჩვენ გადავაგდებთ. მას შემდეგ რაც დავამუშავებთ ხორცს, ჯერ გადავწმენდთ ერთჯერადი ხელსახოცით, შემდეგ სადეზინფექციო ხსნარს ერთი წუთით გავაჩერებთ. შემდეგ სასმელი წყლით და ხაოაიანი ტილოთი გავწმინდოთ სრულფასოვნად ზედაპირი. ასე შენარჩუნდება სისუფთავე,“- აღნიშნულ საკითხზე მარიამ ჩაჩუამ ტელეკომპანია „რუსთავი 2“-ის გადაცემაში „დილა მშვიდობისა საქართველო“ ისაუბრა.

წყარო: ​„დილა მშვიდობისა საქართველო“

შეიძლება დაინტერესდეთ

„ყველა ანალიზი სასურველია ჩატარდეს დილის 8 საათიდან 10 საათამდე ინტერვალში,“ - ლაბორატორიული მედიცინის სპეციალისტი ნინო ბაკურაძე

„ყველა ანალიზი სასურველია ჩატარდეს დილის 8 საათიდან 10 საათამდე ინტერვალში,“ - ლაბორატორიული მედიცინის სპეციალისტი ნინო ბაკურაძე

ლაბორატორიული მედიცინის სპეციალისტმა ნინო ბაკურაძემ ანალიზებისთვის მომზადების სპეციალური წესების შესახებ ისაუბრა. მან აღნიშნა, რომ ლაბორატორიული კვლევებისთვის იდეალური დრო დილის საათებია, რადგან ორგანიზმი ამ დროს მოსვენებულია:

„ზოგადად მოწოდებულია, რომ ყ​ველა ანალიზი სასურველია ჩატარდეს დილის 8 საათიდან 10 საათამდე ინტერვალში, როდესაც ორგანიზმი არის ყველაზე უფრო მოსვენებული. ის მზადყოფნაშია ტესტირებისთვის. პაციენტი უნდა იყოს უზმო მდგომარეობაში. მას არ უნდა ჰქონდეს მიღებული მედიკამენტი, რომელიც, შესაძლოა, კონკრეტულად მოქმედებდეს ამა თუ იმ პარამეტრზე.“

ნინო ბაკურაძის თქმით, პაციენტმა, რომელიც კონკრეტულ მედიკამენტს იღებს, მისი მიღების გაგრძელების ან შეწყვეტის თაობაზე მკურნალ ექიმთან კონსულტაციები უნდა გაიარონ:

„როდესაც პაციენტი მიდის​ კლინიკურ ლაბორატორიაში კვლევისთვის, აუცილებელია, რომ ექიმს დაეკითხოს: „მე ხვალ მივდივარ ლაბორატორიულ ტესტირებაზე. მივიღო თუ არა ეს მედიკამენტი?“ შეიძლება ჩვენ ვამბობდეთ, რომ მედიკამენტები მოქმედებს კონკრეტულ პარამეტრებზე, მაგრამ, შესაძლოა, ექიმს სწორედ ამ კონკრეტული მედიკამენტის ფონზე აინტერესებდეს ამა თუ იმ პარამეტრის გამოკვლევა.“

„არსებობს თვითონ მედიკამენტების ორგანიზმში დაგროვების უნარი. მე თუ ერთი კვირის განმავლობაში ვსვამ ამა თუ იმ მედიკამენტს, დილით ამ მედიკამენტის არდალევა უფრო არამართებულია. ამ ექვსი-შვიდი დღის განმავლობაში ​მიღებული მედიკამენტის ბიოლოგიურად აქტიური ნივთიერებები, რომლებიც გროვდება ჩვენს ორგანიზმში, უკვე მოქმედებს. სწორედ ამიტომ, დილით ამ მედიკამენტის არმიღება ამ შემთხვევაში არამართებულია,“ - აღნიშნულ საკითხზე ნინო ბაკურაძემ საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.

წყარო: ​„პირადი ექიმი - მარი მალაზონია“

წაიკითხეთ სრულად