Baby Bag

„ეს ღმერთის გადარჩენილი ბავშვია, ის 650 გრამი დაიბადა,“ - ლევან რატიანი პირველ საუნივერსიტეტო კლინიკაში სასწაულებრივად გადარჩენილი ახალშობილისა და დედის შესახებ

„ეს ღმერთის გადარჩენილი ბავშვია, ის 650 გრამი დაიბადა,“ - ლევან რატიანი პირველ საუნივერსიტეტო კლინიკაში სასწაულებრივად გადარჩენილი ახალშობილისა და დედის შესახებ

44 წლის თამარი 22 კვირის ორსული იყო, როდესაც კოვიდ-19-ის გართულებული ფორმით რეანიმაციულ განყოფილებაში მოათავსეს. დედისა და ნაყოფის მდგომარეობა უკიდურესად კრიტიკული იყო, რის გამოც ორსულობის შეწყვეტის შესახებ დაისვა საკითხი.

პირველი საუნივერსიტეტო კლინიკის დირექტორმა ლევან რატიანმა პატარა ლაზარეს სასწაულებრივად გადარჩენის შესახებ ისაუბრა:

„მიმაჩნია, რომ ეს დიდი წარმატებაა არამარტო ჩვენი კლინიკისთვის, არამედ მთელი ქვეყნის მასშტაბით. ძალიან იშვიათი შემთხვევებია მე რაც გადავხედე. მსოფლიო მასშტაბით ასეთი შემთხვევა თითქმის არცერთ კლინიკაში არ ყოფილა. გონებაში არ დამიშვია, რომ დედას და შვილს ცუდი გამოსავალი ექნებოდათ. არ ვუშვებდი ამას, შინაგანად მქონდა განცდა, რომ ისინი აუცილებლად გადარჩებოდნენ.“

ლევან რატიანის თქმით, დედის და ნაყოფის მდგომარეობა კრიტიკული იყო:

„გამოხატული იყო სუნთქვის უკმარისობა, იყო ჟანგბადდამოკიდებულება, მოთავსდა ინტენსიური თერაპიის განყოფილებაში. ნაყოფი აღმოჩნდა 420 გრამი. დაახლოებით 18 საათში იმდენად დამძიმდა პაციენტის მდგომარეობა, რომ რეანიმაციაში გადავიყვანეთ. ცხოვრებაში არ დამავიწყდება მისი სიტყვები: „მე დედა უნდა გავხდე, ექიმო! ეს არ გააკეთოთ, რომ ჩემი სიცოცხლის გადარჩენისთვის მე ორსულობა შემიწყვიტოთ.“ ყოველდღიურად გვქონდა კონსილიუმი. ყოველი წუთი გადამწყვეტი იყო. დედის სიცოცხლე უნდა გადაგვერჩინა. მცირე შანსი იყო, რომ 22 კვირის ნაყოფს, თუ ის გაჩნდებოდა სიცოცხლისუნარიანობა გაჩენოდა. 25 კვირაზე ჩატარდა საკეისრო კვეთა. დაიბადა 650 გრამი ნაყოფი. ნაყოფი გადავიყვანეთ მართვით სუნთქვაზე. დედა-შვილი იმყოფებოდნენ კრიტიკულ მდგომარეობაში. ყველაფერი ჩადო ჩვენმა კლინიკამ, რომ დედა-შვილის სიცოცხლე გადარჩენილიყო. ღმერთის წყალობით გამარჯვებას მივაღწიეთ. დედა 8 კვირის შემდეგ მოიხსნა აპარატიდან. ახალშობილმაც გარკვეული პერიოდის შემდეგ დაიწყო წონაში მატება. სულ ამას ვიძახი, რომ ეს ღმერთის გადარჩენილი ბავშვია. მან დაიწყო წოვა, აღუდგა ყლაპვის რეფლექსი.“

„მახსოვს ლაზარე იყო ფოტოზე სულ წითელი. „ეს არის შენი ლაზარე, თამარ და იბრძოლე ლაზარესთვის, ლაზარე გადარჩა,“ - ასე მითხრა ლევანი ექიმმა. დე, ლაზარე, უფალმა მაჩუქა შენი თავი და წმინდა მარიამმა. სადაც არ უნდა მოვხვდე, ამ სასწაულს ვყვები. უფლის და სასწაული გუნდის ხელში მოვხვდით. მოციქულებს შორის უფალს ყველაზე ძალიან ლაზარე უყვარდა. ვფიქრობდი, რომ გარდაიცვლება უფალი მკვდრეთით აღადგენს-მეთქი. ჩემმა მეუღლემ მითხრა, რომ ისე იძახოდი ლაზარეს, მართლა მკვდრეთით აღადგინა უფალმა დედა და შვილი,“ - აღნიშნა პატარა ლაზარეს დედამ.

წყარო: ​თბილისის სახელმწიფო სამედიცინო უნივერსიტეტი

შეიძლება დაინტერესდეთ

„როგორც ექცევი მშობელს, როგორი დამოკიდებულებაც გაქვს მის მიმართ, ზუსტად ისე გექცევა მერე შენი შვილი,“ - მამა საბა ჭიკაიძე

„როგორც ექცევი მშობელს, როგორი დამოკიდებულებაც გაქვს მის მიმართ, ზუსტად ისე გექცევა მერე შენი შვილი,“ - მამა საბა ჭიკაიძე

დეკანოზმა საბა ჭიკაიძემ მშობლების პატივისცემის მნიშვნელობაზე ისაუბრა. მან აღნიშნა, რომ მშობლის კურთხევა ადამიანისთვის ღმერთის კურთხევის მსგავსია:

„ძველი აღთქმა გავიხსენოთ, როგორ იქცეოდნენ ჩვენი მამამთავრები, როგორი პატივისცემა ჰქონდათ მათ მშობლის. მშობელს, როგორც უფალს, ისე ექცეოდნენ და ისე უყურებდნენ, საოცარი კრძალვა და მოწიწება ჰქონდათ მათ მიმართ. მშობლის კურთხევა პირდაპირ ღმერთის კურთხევაა. ეს მინდა, რომ იცოდეს ყველამ. როდესაც ახალგაზრდები მოდიან ხოლმე ჩემთან, ერთმანეთი უყვართ, დაოჯახება უნდათ, ერთ-ერთი პირველი შეკითხვა, რასაც ვეკითხები ხოლმე არის, მშობლები რას ფიქრობენ მათ ამბავზე. შენ თუ გინდა, რომ ბედნიერი ოჯახი შექმნა, გადამწყვეტი მნიშვნელობა აქვს მშობელი როგორ უყურებს ამ ურთიერთობას. რატომ უნდა იყოს მშობელი წინააღმდეგი? ე.ი. რაღაც ისეთს ხედავს, რაც შენ შეიძლება გამოგეპაროს მხედველობიდან. მას მეტი გამოცდილება აქვს.​ ყველაზე მეტი კეთილისმყოფელი ვინ არის შენი? მშობელი არ არის?!

მამა საბა ჭიკაიძის თქმით, თუ ადამიანს სურს შვილებისგან პატივისცემა და სიყვარული მიიღოს, მან მათ შესაბამისი მაგალითი უნდა მისცეს:

„როგორ შეიძლება შენ მშობლის აზრი არ გაითვალისწინო? მშობლის პატივისცემა უაღრესად მნიშვნელოვანია. მცნებაში გვიწერია პირდაპირ, თუ გინდა დღეგრძელი და ბედნიერი იყო ამქვეყანაზე, მშობელს პატივი ეციო. მინდა შევახსენო ყველას, ცოდვას ბუმერანგის პრინციპი ახასიათებს. რასაც დასთეს, იმას იმკი აუცილებლად.თუ გინდათ, რომ ​თქვენი შვილებისგან პატივისცემა და სწორი დამოკიდებულება მიიღოთ, თვითონ დათესეთ უპირველეს ყოვლისა ეს სიყვარული და პატივისცემა თქვენი მშობლების მიმართ.“

„როგორც ექცევი ადამიანი მშობელს, ​როგორი დამოკიდებულებაც გაქვს მშობლის მიმართ, ზუსტად ისე გექცევა მერე შენი შვილი. როგორც ორჯერ ორი არის ოთხი, ზუსტად ასე მუშაობს ეს პრინციპი. ამიტომაც ამბობს უფალი, შენ ხომ გინდა, რომ იყო ბედნიერი და დღეგრძელი, პატივი ეცი მშობელსო. ძალიან მნიშვნელოვანია, რომ მშობლის პატივისცემა გვქონდეს,“ - აღნიშნულ საკითხებზე მამა საბა ჭიკაიძემ საპატრიარქოს ტელევიზიის გადაცემაში „განთიადი“ ისაუბრა.

წყარო: ​„განთიადი“


წაიკითხეთ სრულად