Baby Bag

„თუ შენ ლოცულობ, მაგრამ არ გეძლევა ის, რასაც ლოცულობ, ამას ორი მიზეზი აქვს...“ - დეკანოზი საბა ჭიკაიძე ლოცვის ძალის შესახებ

დეკანოზმა საბა ჭიკაიძემ ლოცვის ძალისა და სწორად ლოცვის მნიშვნელობის შესახებ ისაუბრა:

„უფალმა თქვა თვითონ, რომ თუკი მდოგვის მარცვლისოდენა რწმენა მაინც გექნებათ, ამ მთას ეტყვით: აღიფხვარ ამიერ და შთავარდი ზღვად და ასეც იქნებაო. რა თქმა უნდა, ლოცვას უდიდესი ძალა აქვს. თუ თქვენ მთელი გულითა და სიწრფელით ილოცებთ, ყველაფერი მოგეცემათ ღვთისგან. ჩვენ არ ვლოცულობთ ისე, როგორც საჭიროა და იმიტომაც ვერ ვიღებთ იმას, რაც გვინდა, რომ გვქონდეს.“

„წმინდა მამები გვეუბნებიან: თუ შენ ლოცულობ, მაგრამ არ გეძლევა ის, რასაც ლოცულობ, ორი ვარიანტია ამის. ან შენ რწმენა არ გყოფნის, რომ ისეთი სარწმუნოებით ილოცო, როგორც საჭიროა, ან ბოროტად ითხოვ, ითხოვ ისეთ რაღაცას, რაც შენთვის ან სხვა ადამიანისთვის იყოს დამაზარალებელი. ღვთისგან არ მოგეცემა, რა თქმა უნდა, რაც შეიძლება დამაზარალებელი იყოს. ამას ღვთისგან ვერ მიიღებ. როდესაც შენ სწორს ითხოვ, სწორად ითხოვ, ითხოვ ისეთ რამეს, რაც შენი სულისა და სხვა ადამიანისთვის გამოსადეგია, ასეთ შემთხვევაში, მოგეცემათ ღვთისგან. ღმერთი მოსიყვარულე, მოწყალე მამაა, ყველას პატრონობს და აუცილებლად მიიღებთ თქვენს სათხოვარს, ჩემო ძვირფასებო,“- აღნიშნა მამა საბა ჭიკაიძემ.

წყარო:​ თბილისის ვაკის მაცხოვრის ფერიცვალების სახელობის ტაძარი

შეიძლება დაინტერესდეთ

გულის რიტმის აჩქარება კოვიდის გადატანის შემდეგ - კარდიოლოგი გიორგი პაპიაშვილი გულის რიტმის დარღვევის გამომწვევ მიზეზებზე

გულის რიტმის აჩქარება კოვიდის გადატანის შემდეგ - კარდიოლოგი გიორგი პაპიაშვილი გულის რიტმის დარღვევის გამომწვევ მიზეზებზე

კარდიოლოგმა გიორგი პაპიაშვილმა კოვიდის გადატანის შემდეგ გულის რიტმის აჩქარების პრობლემაზე ისაუბრა და მისი გამომწვევი სავარაუდო მიზეზები დაასახელა:

„პანდემიის ეპოქაში ვცხოვრობთ და ძალიან ბევრმა ადამიანმა გადაიტანა უკვე კოვიდ-19. ძალიან ბევრი პაციენტი დაგროვდა ასეთი სიმპტომებით. ნამდვილად არ არის ეს გადაჭარბებული. საკმაოდ ბევრი პაციენტი უჩივის კოვიდის გადატანის შემდეგ გულის რიტმის გარკვეულ დარღვევებს. კოვიდს მთელს ორგანიზმზე აქვს გავლენა და ის გულზეც სერიოზულ გავლენებს ახდენს. ზოგ სიტუაციაში კოვიდი იწვევდა გულის კუნთის ანთებას, ზოგ სიტუაციაში იწვევდა თრომბოზების განვითარებას, აქედან გამომდინარე გულის კუნთის შემდგომ დაზიანებას. არის ასევე აღწერილი არაერთი შემთხვევა, როდესაც კოვიდმა გამოიწვია არა უშუალოდ გულის კუნთის დაზიანება, არამედ გულის ნერვების. ყველა ორგანოს აქვს თავისი ნერვები და ნერვული რეგულაცია. ჩვენს გულსაც აქვს ავტონომიური ნერვული რეგულაცია, რომელიც განაპირობებს იმას, თუ როგორ პასუხობს გული კონკრეტულ სიტუაციას. ეს ხორციელდება ნერვების საშუალებით. აღწერილია შემთხვევები ამ ნერვული დაბოლოებების დაზიანების. ეს იწვევს იმას, რომ კოვიდის გადატანის შემდეგ გახშირებულია შეუსაბამო სინუსური ტაქიკარდია. 

როდესაც სირბილის დროს გული ჩქარდება, ამას ჰქვია სინუსური ტაქიკარდია, რადგან მას აქვს თავისი მიზეზი. ვირბინეთ და აგვიჩქარდა გული. ძალიან გახშირებულია შეუსაბამო სინუსური ტაქიკარდია, რომელიც არ რის გამოწვეული კონკრეტული გამღიზიანებლით. არც გვირბენია, არც გვინერვიულია, მაგრამ მაინც ძალიან აჩქარებული გვაქვს გული. გვაქვს შემთხვევები, როდესაც ადგომისას, წამოჯდომისას, შეუსაბამოდ უჩქარდება ადამიანს გული. ამ ნერვული დისრეგულაციის მკურნალობის მზა რეცეპტი არ არსებობს. ხშირ შემთხვევაში უბრალო სიმპტომური დახმარება არის ხოლმე საჭირო და დროთა განმავლობაში ორგანიზმი ახდენს ამის დაბალანსებას.

როდესაც ვნახავთ, რომ კოვიდის შემდეგ ადამიანს აჩქარებული გულისცემა აქვს, არ ნიშნავს, რომ პირდაპირ ეს დიაგნოზი უნდა დავსვათ. ცხადია, ჩასატარებელია კვლევები, რომ სხვა ცნობილი დაავადებები გამოვრიცხოთ, რომელიც გულის რიტმის დარღვევას იწვევს. თუ ვხედავთ, რომ სხვა დაავადებები გამოირიცხა და კლინიკური მიმდინარეობა ჩვენ მიერ ჩამოთვლილ სიმპტომატიკას შეესაბამება, მაშინ ამას უკვე ვარქმევთ ამ სახელს და ვიცით, რომ ეს არის კოვიდის მიერ დატოვებული კუდი,“- მოცემულ საკითხზე გიორგი პაპიაშვილმა საქართველოს პირველი არხის გადაცემაში „პირადი ექიმი - მარი მალაზონია“ ისაუბრა.

წყარო:​ „პირადი ექიმი - მარი მალაზონია“

წაიკითხეთ სრულად