Baby Bag

„სამართლიანობა არასდროს არ მარცხდება, ეს დროებითია! სიბრძნე ყოველთვის იმარჯვებს,“- ფსიქოლოგი ნანა ჩაჩუა

„სამართლიანობა არასდროს არ მარცხდება, ეს დროებითია! სიბრძნე ყოველთვის იმარჯვებს,“- ფსიქოლოგი ნანა ჩაჩუა

ფსიქოლოგმა ნანა ჩაჩუამ ომის სისასტიკისა და უსამართლობის შესახებ ისაუბრა და ყველა ბავშვს, ვისაც ომი არასდროს უნახავს, უსურვა, რომ ის არასდროს იხილონ:

„დაე, ასე იყოს, რომ ბავშვებს, რომლებმაც ჯერ არ იციან რა არის ომი, მხოლოდ თეორიულ დონეზე ჰქონდეთ წარმოდგენა ამ უსასტიკეს მოვლენაზე. დაე, მათ მხოლოდ ფილმების სახით, მხოლოდ თეორიულ დონეზე ჰქონდეთ წარმოდგენა ამ უსასტიკეს ფენომენზე სამყაროში. უდიდესი ფსიქოლოგი ვიქტორ ფრანკლი გერმანიაში დაჰაუს საკონცენტრაციო ბანაკში იმყოფებოდა. მას აქვს ასეთი ფრაზა ნათქვამი: „ამ ომის მთელი საშინელება ის არის, რომ საკონცენტრაციო ბანაკში მყოფ ადამიანებს საკუთარი სიკვდილით სიკვდილი არ უწერიათ.“ საკუთარი სიკვდილით სიკვდილი არის კანონზომიერი მოვლენა. როდესაც მავანის და მავანის ინტერესებთან არის დაკავშირებული და ის წყვეტს ჩემს სიცოცხლეს, ეს არის ტრაგედია.“

ნანა ჩაჩუას თქმით, ომი მთელი თავისი სისასტიკით ჩვენ წინაშე დგას:

„უსამართლო ომის ღმერთი არესი თავისი სისასტიკით, ფაქტია, რომ არის, ფაქტია, რომ ჩვენ წინ დგას. ადამიანები, რომლებიც სიბრძნით ებრძვიან უსამართლობას, ყოველთვის იმარჯვებენ. „ბოროტსა სძლია კეთილმან, არსება მისი გრძელია,“ - ეს არ არის ლიტონი სიტყვები. თუნდაც რაღაც ეტაპზე სამართლიანობა შეფერხდეს, ის არასდროს არ მარცხდება. ეს დროებითია. აქ ყოველთვის სიბრძნეა პრიორიტეტული. სიბრძნე ყოველთვის იმარჯვებს. ეს არ არის მხოლოდ ემოციის საგანი. ეს არის გულისა და გონის საგანი.“

„ადამიანთა სიმრავლე მხოლოდ მაშინ შეძლებს მტრის პირისპირ ღირსეულ დგომას, თუ ის ერთ ერად იქნება იმ დროს წარმოდგენილი. რა არის ერი? ერი ეს არის ადამიანთა ის ერთიანობა, მთლიანობა, თუნდაც მყისიერად შექმნილი ისტორიული ბედისწერის წინაშე. დღეს უკრაინელი ხალხი არის ერი. ჩვენ ამის მაგალითი გვაჩვენა უკრაინელმა ხალხმა,“- აღნიშნულ საკითხზე ნანა ჩაჩუამ რადიო „იმედის“ ეთერში ისაუბრა.

წყარო: ​რადიო „იმედი“

შეიძლება დაინტერესდეთ

ბავშვის თხოვნას დაუყოვნებლივ არასდროს უპასუხოთ, მან უნდა იგრძნოს, რომ თქვენ გადაწყვეტილებას ფიქრის შემდეგ იღებთ

ბავშვის თხოვნას დაუყოვნებლივ არასდროს უპასუხოთ, მან უნდა იგრძნოს, რომ თქვენ გადაწყვეტილებას ფიქრის შემდეგ იღებთ

ბავშვები მშობლებს თხოვნით ხშირად მიმართავენ. მათ ზოგჯერ სმარტფონში მულტფილმის ყურება უნდათ, ზოგჯერ კი ნამცხვრის დამოუკიდებლად გამოცხობა. ზოგიერთი თხოვნის შესრულება შედარებით მარტივია, მაგრამ როდესაც ბავშვი სამზარეულოში ფუსფუსს და ნამცხვრის გამოცხობას ითხოვს, მშობელი მის უსაფრთხოებაზე ზრუნვას იწყებს.

მშობლებმა ხშირად არ იციან, როგორ უპასუხონ ბავშვს, როდესაც ის მათგან რაღაცას ითხოვს. ბავშვის თხოვნაზე პასუხის გაცემამდე შემდეგი რჩევები გაითვალისწინეთ:

  • პასუხი თხოვნის ფორმაზე უნდა იყოს დამოკიდებული


​თუ თქვენი შვილი პატივისცემით და ზრდილობიანად მოგმართავთ, ის, პირველ რიგში, კარგი მანერების გამო უნდა შეაქოთ. ბავშვი იგრძნობს, რომ მის ზრდილობიან ქცევას მშობელი ყოველთვის ამჩნევს და აფასებს. თუ ბავშვი უხეშად მოგმართავთ, გიბრძანებთ ან გემუქრებათ, მას პირველ რიგში, საუბრის ტონის შეცვლა ურჩიეთ და მოუწოდეთ, რომ ზრდილობიანად მოგმართოთ.

  • ბავშვს ყურადღებით მოუსმინეთ


​ბავშვის თხოვნა ყურადრებით მოისმინეთ, მაშინაც კი, თუ მას თხოვნის შესრულებაზე უარს ეუბნებით. თქვენმა შვილმა უნდა იგრძნოს, რომ მისი საუბარი გაინტერესებთ, ამგვარად თქვენი პასუხი მისთვის უფრო მისაღები იქნება. აუცილებლად უთხარით ბავშვს, რომ მისი იდეა მოგწონთ და მისი გესმით.

  • შეჩერდით და დაფიქრდით


​ბავშვის თხოვნას დაუყოვნებლივ არასდროს უპასუხოთ. მან უნდა იგრძნოს, რომ თქვენ გადაწყვეტილებას ფიქრის შემდეგ იღებთ. პასუხი ხისტი არ უნდა იყოს. ბავშვს აუხსენით, რატომ ეუბნებით არას ან კის.

როგორ უნდა მოიქცეთ, როდესაც ბავშვის თხოვნას უარით პასუხობთ?


​არას თქმა მშობლებს ძალიან უჭირთ, რადგან ისინი ყოველთვის შვილის გაბედნიერებაზე ოცნებობენ. ვიდრე ბავშვს უარს ეტყვით, შემდეგი მითითებები გაითვალისწინეთ:

  • თქვენი გადაწყვეტილება არგუმენტებით გაამყარეთ


​ბავშვს აუხსენით, რატომ ეუბნებით მას უარს თხოვნის შესრულებაზე. თუ მას არას მკაცრად ეტყვით, ის ვერ გაიგებს რა დგას თქვენი უარის მიღმა. თუ აუხსნით, რომ პარკში წასასვლელად დრო არ გაქვთ, რადგან სადილი უნდა მოამზადოთ, მისთვის თქვენი უარი გასაგები გახდება.

  • გადაწყვეტილება არასდროს შეცვალოთ


​თქვენს პასუხს თუ შეცვლით, ბავშვი მიხვდება, რომ თქვენი უარი საბოლოო არ არის. ის ჭირვეულობით ეცდება მიზნის მიღწევას, რაც მასთან ჯანსაღ ურთიერთობას ძალიან გაართულებს.

  • ბავშვს ალტერნატიული შეთავაზება გაუკეთეთ


​მაღაზიაში ტკბილეულის შეძენას თუ ვერ ახერხებთ, ბავშვს აუხსენით, რომ საკმარისი ფული არ გაქვთ, მაგრამ სახლში გემრიელ ორცხობილას გამოუცხობთ.

  • ბავშვი კარგი ქცევისთვის შეაქეთ


​ბავშვი თქვენს უარს ღირსეულად თუ მიიღებს, მისი ქცევა დადებითად შეაფასეთ. აუცილებლად უთხარით თქვენს შვილს, რომ მისი ემპათია ძალიან მოსაწონია და რომ მისმა პასუხმა გაგაბედნიერათ.

როგორ შევამციროთ არას თქმის საჭიროება?

​ბავშვისთვის უარის თქმა ხშირად რომ არ დაგჭირდეთ, მას გარკვეული შეზღუდვები წინასწარ დაუწესეთ.

  • ბავშვს ინფორმაცია წინასწარ მიაწოდეთ


​მაღაზიაში წასვლამდე ბავშვს აუხსენით, რომ ტკბილეულს სახლში მოსვლის შემდეგ მიიღებს და მისი შეძენა არ მოგთხოვოთ. ამგვარად, არას თქმის საჭიროებას მნიშვნელოვნად შეამცირებთ.

  • ბავშვს თხოვნა შეუსრულეთ, თუ ამის შესაძლებლობა გაქვთ


​თუ ბავშვი სახლში მეგობრის მოყვანას გთხოვთ, მისი თხოვნა შეასრულეთ, თუ თქვენი შვილის მეგობრის მშობლები ამაზე თანახმა იქნებიან.

  • არას თქმის ნაცვლად ბავშვს დიპლომატიურად უპასუხეთ


​ბავშვი პარკში თუ ვერ მიგყავთ, აუხსენით, რომ ამას ხვალ აუცილებლად გააკეთებთ, მაგრამ დღეს ვერ მოახერხებთ.

​ორ წლამდე ასაკის ბავშვებისთვის არას თქმა ხშირად რთული გამოწვევაა. ისინი თვითკონტროლს ჯერ კიდევ სწავლობენ. როდესაც მათ უარს ეუბნებით, პატარები ისტერიკას აწყობენ, რაც ამ ასაკში ნორმალური რეაქციაა.

სკოლის ასაკის ბავშვი ენობრივ უნარებს უკვე კარგად ფლობს, რის გამოც მასთან არგუმენტირებული საუბარი სავსებით შესაძლებელია. სკოლის ასაკის ბავშვი უარზე ისტერიკით არ გიპასუხებთ, ის საკუთარ ქცევებს უკეთ აკონტროლებს და თქვენი უარის მიზეზებიც ესმის.

მომზადებულია​ raisingchildren.net.au -ს მიხედვით

თარგმნა ია ნაროუშვილმა 

წაიკითხეთ სრულად